لا تقاوم تغييرات روحك ولمن تحتاج أن تتغير بس حتى لاتكون غريب على اللي يعرفوك
مو مهم المهم انت ،
لا تحاول تسكت صوت الـ (لا) من داخلك لمن تحس أن ضروري تنگال
لأن مو مهم شنو ينگال عليك المهم انت،
لاتمشي تحت مبادئ غيرك بس حتى لاينحجي عنك
أنفر وأختلف وتمرد مادامك ما مأذي أحد ولا ضار احد باقتناعاتك ومبادئك
لأن محد المهم بحياتك غيرك انت ..

أنا خايفة من لحظة اللي يطيب خاطري من الكل ومابعد تفرق وياي من صدك،
لأن لحظتها بس راح اكون غير إنسانة كُليًا عن اللي يعرفوها ومابعد ارجع مثل قبل ..

يارب
أرِنا الحقائِق
لا تجعل هذا الرأسُ
مُمتلئ بأسئلة
لا إجابات لها .

…

انا كطالبة لازلت
بس لمن داشوف الخريجين داتجيني مشاعر حزينة
اللي هي مهما جان تعب الدوام وروتينه ومهما جانت النهايات مُفرحة
بس تبقى بالأخير نهايات ولازم تصير بداخلك شعور مخلوط بي الحزن ..

هسه بيني وبينكم
انا داعد الأيام اللي اوصل تخرجي بيها
بس لمن راح اوصل اذكركم بأذن الله انو راح ادكها مناحة وبجي من اول يوم لحد ما أسلم كلشي بالدوام ،
لأني إنسانة تكره النهايات بكلشي ..

___

أفهمك لمن مرات تجيك أيام تحس نفسك داتتنفس حب بدون ما تسوي اي شي وكُلك طاقة حتى لو مهدود من التعب وكلشي مخربط تشوفه بعينك حلو ومرتب حياتك انت يومك اللي حوليك وكلشي،
ومرات فاقد للشغف عاجز عن انو تتحرك منا لهنا بدون أي سبب واضح وكلشي حوليك وبيك وبروتينك تحسه مو تمام ومليان عيوب، ضياع بحياتك وبيومك ،
أفهمك يعني شنو تكون متأرجح بين مزاجيات هالحياة اللي مزاجياتها مرات أقوى مننا تكون ..

إذا كانت نيتك لا أبرح حتى أبلغ،
فلابُد أن تصبرّ على ما لَم تُحط بهِ خبرًا.

…

بعدت ١٢ ساعة عن البيت والأهل
حسيتني مضيعة جزء جبير مني ومن حياتي وأريد ارجع،
شون اكدر بدونهم انا وشون ممكن اعوف أهلي بيوم؟ ..

✨أنتِ كاتبة✨

سلامٌ على قلبك,
حتى يهدأ,
حتى يطمئن،
حتى يرضى,
حتى تطيب لك الحياة .

-مو داحجي
=اي داسمعج ،بس تركيزي بغير مكان
-وشنو الفائدة؟

*حوار بسيط صار كدامي
بس شكد بقى بعقلي! ..

ضروري تنتبه على نفسيتك وعصبيتك كدام اهلك لاينگال عنك ممتربي،
ضروري تراعي اصدقائك ومشاكلهم وتسمعلهم حتى لايعتبروك بطلت تحبهم وتسأل عن الغايبين والمشغولين لا تتسمى بايع العشرة ،وضروري تواضب على شغلك ودوامك وتركز على دراستك حتى لا تفشل وينحجي عنك ،
ضروري روتينك ويومك مرتب حتى أي شخص يحتاجك يلگيك لأن إذا أحتاجك وما لگاك راح ينحجي عليك ويمكن ينگال عنك متغير وشايف نفسه ،
وبين كل هاللوصه هاي وكل الضروريات تنسى نفسك
تنسى انك تهتم لنفسيتك علمودك انت
تنسى انك تسمع نفسك وتسأل عن حالك انت
بين كل الضروريات تنسى أهم شغلة
"تنسى انك ضروري تعيش لنفسك انت" ..

__

١٤ سنة دراسة
ولازم بكل مرة يكون عندي بيها امتحانات ضروري اتمرض بوقتها ..