#قصص_الأنبياء
#الحلقة_الثامنة
#قصة_نوح_عليه_السلام
#الجزء_الثالث_ما_بعد_الطوفان

قلنا المرة إللي فاتت إن نوح عليه السلام ركب السفينة هو والذين آمنوا معاه ومعهم من كل نوع من الحيوانات ذكر وأنثى،
وربنا أغرق الأرض بالماء وأهْلَك قوم نوح عليه السلام،
ربنا وَعد نوح عليه السلام إنه ينجّيه هو وأهله،
والمقصود بالأهل هنا هو كل من آمن بالله سواء كانوا أقاربه ولّا لأ،
زوجته كانت كافرة وكانت بتقول عنه مجنون،
وطبعا باعتبار الزوجة هي أكتر واحدة معاشرة زوجها وعارفة خباياه وطباعه وأخلاقه، فلما الناس سمعتها بتقول كده عنه وهي زوجته أصلا = فلاشك إن ده أثّر على دعوة نوح عليه السلام بالسلب،
وعشان كده ربنا وصفها بالخيانة في القرآن لأن الأصل إن الزوجة تعين زوجها في الشدائد وتعينه على الحق ومتطعنش في سمعته بالسوء بالزور والبهتان،
عشان كده ربنا ضربهم مثل لنا في القرآن عشان يعلمنا إن العبرة بالإيمان بالله مش بالنسب،
ربنا بيقول:
"ضَرَبَ اللَّهُ مَثَلًا لِّلَّذِينَ كَفَرُوا امْرَأَتَ نُوحٍ وَامْرَأَتَ لُوطٍ ۖ كَانَتَا تَحْتَ عَبْدَيْنِ مِنْ عِبَادِنَا صَالِحَيْنِ فَخَانَتَاهُمَا فَلَمْ يُغْنِيَا عَنْهُمَا مِنَ اللَّهِ شَيْئًا وَقِيلَ ادْخُلَا النَّارَ مَعَ الدَّاخِلِينَ"

طبعا مش المقصود هنا بالخيانة هي الخيانة الزوجية إطلاقا إللي هي الزنا؛ لأن ربنا حافظ لأعراض الأنبياء من ده👌
وماتت زوجة نوح على الكفر وأغرِقَت مع المُغرَقِين.

نوح عليه السلام كان له أربعة أبناء،
ثلاثة آمنوا، و الرابع إللي هو مذكور في القرآن لم يؤمن به لحد آخر لحظة وهو بيطلع الجبل لحد ما الموج فصل بينهم هما الاتنين وغرق زي ما شوفنا،
ولمّا الموج فصل بين الأب وابنه ،نوح عليه السلام بمشاعر الأب الرحيم الرفيق بدأ يسأل ربنا عنه:
يارب مش انت قلتلي إنك هتنجيلي أهلي ...طيب ما ابني من أهلي وانت وعدك الحق لا تخلف وعدا وعدته😔
"وَنَادَىٰ نُوحٌ رَّبَّهُ فَقَالَ رَبِّ إِنَّ ابْنِي مِنْ أَهْلِي وَإِنَّ وَعْدَكَ الْحَقُّ وَأَنتَ أَحْكَمُ الْحَاكِمِينَ"

هنا ربنا قال لنوح عليه السلام وقالنا كلنا القاعدة دي:
إنه ليس من أهلك👌
يعني أي حد مش على دينك مينفعش يكون بينك وبينه أي صلة وُد وحب حتى لو كان ابنك من لحمك ودمك،
يعني العبرة بقرابة الدين مش قرابة النسب.
"قَالَ يَا نُوحُ إِنَّهُ لَيْسَ مِنْ أَهْلِكَ ۖ إِنَّهُ عَمَلٌ غَيْرُ صَالِحٍ"

☆وهنا تيجي قاعدة مهمة جدا جدا في العقيدة وهي قاعدة
《الولاء والبراء》ومعناها باختصار :
الولاء يعني الإنسان يتولى الله ورسوله والمؤمنين،
والبراء يعني يتبرأ من الكفر وأهله،
يعني مينفعش يكون بيني وبين حد غير مسلم علاقات عميقة فيها حب وموالاة وتبادل لصور المودة كإنه أخويا أو حد من أهلي،
في حين إن علاقتي باخواني المسلمين مفيش فيها الكلام ده ولا حتى ربعه😑
نتعامل معاهم بالحسنى والعدل والكرم من باب الإحسان إليهم فقط عشان يعرفوا سماحة الإسلام مع غير المسلمين في أداء الحقوق وحسن الخلق..
لكن أكتر من كده = ما ينفعش👌
إلا لو حد من الأهل والأرحام فطبيعي بيبقى في حب فطري جِبِلِّي في القلب تجاههم = فده مافيش فيه حرج أو مؤاخذة.

◇ممكن حد يقول: بصراحة أخلاقهم أحسن من مسلمين كتير🙄

طيب هنفترض معاكم إن بعضهم أصدق وأوفى بوعده وأكرم أخلاقا من بعض المسلمين -وبالفعل فيه ناس في جاهليتهم بيبقوا من أحسن الناس أخلاقا، زي ما احنا عارفين "خيارهم في الجاهلية خيارهم في الإسلام.. إذا فقهوا"
يعني الأخلاق والطباع الكويسة فعلا بتسيب أثر بغض النظر عن الدين.. فتمام كده أنا هتفق معاكم في ده،
لكن سؤال مهم بقى👌
مهما أخلاقهم كانت حلوة،
إزاي ممكن نتخيل إنهم يكونوا أحسن من المسلمين وهمّ إللي أساؤوا الأدب مع الله عز وجل وكذبوه وقالوا إن عنده ولد وهو معندهوش ولد؟!!
بالله عليكم لو فيه حد بيعاملك كويس لكن طول النهار وكل ما يشوفك عمال يقولك "أمك دي كذابة" وانت عارف إن أمك صادقة مُنزهة عن السوء وعمرها ما تكذب،
انت ممكن تكون على علاقة بيه بعد كده؟ ده إذا ممسكتوش ضربته عشان يبطل يتكلم عنها بسوء أصلا..😒

ولله المثل الأعلى ..الله أحق إننا نغضب له👌

فاحنا بنحب ونوالي المسلمين لأنهم مسلمين،
ونبغض في الله ونتبرأ من الكفر وأهله لأنهم غير مسلمين لرب العالمين👌
ومش معنى إنك تكره حد في الله إنك هتؤذيه أو هتظلمه، اطلاقا.. 😱
ده مش سبب أبدا لكده ..ربنا قالنا:
"وَلَا يَجْرِمَنَّكُمْ شَنَآنُ قَوْمٍ عَلَىٰ أَلَّا تَعْدِلُوا ۚ اعْدِلُوا هُوَ أَقْرَبُ لِلتَّقْوَىٰ"
أيوة إحنا مأمورين بالإحسان لغير المسلمين😤
لكن مش على حساب دينا ولا عقيدتنا أبدا👌

المهم،
ربنا قال لنوح إنه يتبرأ من ابنه لأنه مش على دينه،
فبالتالي هو مش من أهلك.. وأنا وعدتك إني هنجيلك أهلك المؤمنين لكن الكفار لأ، فلا تدعوني بشيء محرم وهو إني أُنْجي كافر،
وأنا أنزهك إنك تكون من الجاهلين إللي مش عارفين الكلام ده،
"فَلَا تَسْأَلْنِ مَا لَيْسَ لَكَ بِهِ عِلْمٌ

#قصص_الأنبياء
#الحلقة_التاسعة
#قصة_هود

اتكلمنا المرة إللي فاتت عن الوصية إللي نوح عليه السلام وصاها لابنه قبل موته،
بعد موت نوح عليه السلام عاش أبناؤه على التوحيد وعَمَروا الأرض،
وبعد سنين وسنين الناس نسيت وصية نوح عليه السلام و بدأ الشيطان يوسوس لهم تاني بنفس الطريقة،
أحفاد نوح عليه السلام قالوا إحنا مش عايزين ننسى آبائنا فاحنا لازم نعملهم تماثيل،
عشان نفضل فاكرينهم فيذكرونا بعبادة ربنا وقدرة ربنا والمعجزة إللي حصلت لنوح عليه السلام،

وطبعا جيل بعد جيل نسيوا عبادة ربنا وتعظيم وراء تعظيم كانت النتيجة إن البشرية رجعت تعبد الأصنام تاني وتركوا عباة الله الواحد الأحد الذي لا شريك له😑

واحنا قلنا قبل كده إن الشيطان نَفسه طوييييل مبيزهقش،
عادي جدا بالنسبة له إن يحط بذرة النهاردة بخطوة واحدة، ويلاقي ثمرتها بعد جيل أو أجيال كاملة👌

¤ ممكن حد يسأل ويقول وهم ذنبهم إيه...ماهمّ مكنوش يعرفوا حاجة؟
الجواب:
كان فيه تقصير من الآباء والمجتمع كله في نقل العلم الصحيح لأبناءهم وكل إللي حواليهم وإنهم يحذروهم من الشرك الظاهر والواضح جدا ده،
هقول لكم مثال،
مش احنا بنشوف في عصرنا دلوقتي ناس بتطوف بقبور أولياء الله الصالحين إللي ماتوا، ويتوسلوا ليهم ويدعوهم من دون الله؟!
طيب بلاش دي،
هل في عاقل يروح يشتري بنطلون مقطع فِتَل كده عشان يلبسه😑
يعني الطبيعي إن الهدوم لما تتقطع بنخيطها ونلبسها،
لكن لما تتتقطع لدرجة إنها تبقى فِتل بنشتري غيرها عشان خلاص مبقتش تنفع تتلبس، صح؟
هل يُعقل إني أروح أشتري الهدوم دي😳
لأ
ولو قلت آه = يبقى انت إللي غلط ومبتفهمش في الأمور الصح طبعا 🙄
طيب فين دور الأباء والأمهات هنا في غرس الصح ده وتصحيح الخطأ لما بيلاقوه قدامهم؟ فين تربيتهم؟
ماهو الأبناء هيجيبوا فلوس منين عشان يشتروا الهدوم دي مثلا؟
ده ساعات الأب والأم همّ إللي بيساعدوا أبناءهم ويشجعوهم إنهم يلبسوا كده،
وساعات كمان تلاقي الأب والأم لابسين اللبس ده بكل أسف، مع إن لسه حواليهم ناس بتفكرهم إن ده غلط وما يصحش ولسه بين إيدينا القرآن والسنة والهدي النبوي، يعني العلم لسه موجود👌
يبقى منستغربش لما الناس نسيت وصية نوح عليه السلام، لإنهم ببساطة مشيوا خطوة ورا الشيطان، والخطوة بتجر لخطوة،
وخطوة خطوة هتبص وراك مش هتلاقي طريقك كان فين بدايته عشان ترجع، فبتكمل لقدام ..
وبسبب كده ضلوا ورجعوا تاني لعبادة الأصنام😞

طيب خلونا نفترض إن الأباء مقصروش في تربية أبناءهم
والأبناء هم إللي ضلوا وعبدوا الأصنام، لأنهم مش مستوعبين خطورة الشرك بالله وطال عليهم العهد بعد هلاك قوم نوح عليه السلام، وأكيد إللي سمع مش زي إللي شاف👌

طيب إيه الحل؟
الحل إن ربنا يبعت لهم نذير،
وهو ده إللي حصل مع عاد قوم هود👌
عاد قوم هود هم أول ناس عبدوا الأصنام على وجه الأرض بعد الطوفان،
كانوا بيسكنوا في مكان اسمه الأحقاف وهي جبال الرمل،
وهي جزء من صحراء الربع الخالي، بين سلطنة عُمان واليمن،
"واذْكُر أخَا عادٍ إذ أنذَرَ قومَه بالأحْقَاف "
وكانوا عمالقة وأقوياء ...مكنش في حد في قوتهم أبدا في الوقت ده،
بنوا مدينتهم إِرَم وكانوا بيحبوا يعيشوا في الخيام،
فبنوا خيام بعواميد عملاقة ومرتفعة جدا، وكان عندهم حضارة متقدمة، ربنا وصف حضارتهم بإنها لم يُخلق مثلها في البلاد،
ويُقال إن أسوار المدينة كانت من الذهب والفضة،
وكانوا بيبنوا فوق الجبال القصور للترفيه والتسلية بالبناء، بيلعبوا يعني😅
يعني مش عشان يسكنوا فيها، لأ بينوها كده وخلاص،
من كتر ماكانوا أقوياء وعندهم رخاء وأموال،
زي إللي بيلعب بالرمل على الشاطئ كده مثلا،
وكانت القصور دي آية في الروعة والضخامة وفن المعمار..
"أتَبْنُونَ بكل رِيعٍ آيةً تَعبثُون"

وكان الناس بيخافوا من قوم عاد لأنهم كانوا ظلمة وجبارين،
مكنش في حد بيقدر يقف في طريقهم،
فهم اجتمع عندهم الكفر والظلم، يعني ربنا قادر على إنه يهلكهم في لحظة👌
لكنه سبحانه قال:
"وما كنا مُعَذّبِينَ حتّى نَبْعثَ رَسُولا"
فعشان يقيم عليهم الحُجة أرسل إليهم هود عليه السلام عشان يحذرهم من عبادة الأصنام ويدعوهم لعبادة الله وحده
ويحذرهم من الظلم والكفر والفجور وغيره،

كان هود عليه السلام واحد منهم... يعني عارفينه وعارفين أخلاقه وعارفين أصله وكل حاجة عنه،
وكان هود عليه السلام من الأنبياء العرب الأربعة،
والأنبياء العرب الأربعة هم عالسريع كده:
هود وصالح وشعيب ومحمد صلى الله عليهم أجمعين.
فكان هود عليه السلام وقومه عاد يتكلمون العربية.

قال هود لقومه اعبدوا الله وسيبكم من عبادة الأصنام ربنا هو إللي خلقكم وأعطاكم القوة والأموال ، وأنعم عليكم بالرخاء إللي إنتم عايشين فيه ده، الأصنام حجارة لا تضر ولا تنفع😥
"وَإِلَى عَادٍ أَخَاهُمْ هُودًا قَالَ يَاقَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ "

فرد عليه عِلية القوم والأكابر منهم وقالوا :
انت سفيه وكذاب 😏
"قَالَ الْمَلَأُ الَّذِينَ كَفَرُوا مِنْ قَوْمِهِ إِنَ

#قصص_الأنبياء
#الحلقة_العاشرة
#قصة_صالح

شوفنا إزاي إن عاد قوم هود عليه السلام كذبوه ورفضوا عبادة ربنا فأهلكهم الله بالريح ونجّى هود والذين آمنوا معه،
عاش هود عليه السلام والذين آمنوا معه على عبادة الله،
وتناسلوا وجه جيل ورا جيل ،
والشيطان لعب لعبته تااااني🙄
نعمل تماثيل عشان نفتكر بيها آباءنا وأجدادنا ...وفي الآخر الأحفاد يعبدوها😑
ما بيزهقش👌
إنتم ممكن تستغربوا إزاي الناس بتقع في نفس الفخ مرة ورا مرة 🤨
هو احنا شايفين كده عشان احنا برة الموضوع لكن تعال نبص لنفسنا مثلا في المواضيع إللي بالفعل كل واحد فينا متعرض لها في حياته زيهم كده😕
=كم مرة عرفت إن صلاة الفجر فرض وهي إحدى أثقل صلاتين على المنافقين ومع ذلك بنضيعها عمدا؟

=كم مرة عرفنا إن الغيبة حرام وإننا لما بنغتاب حد بنديله حسناتنا على طبق من فضة ومع ذلك برده بنغتاب؟

=كم مرة عرفنا إن الأغاني والأفلام والمسلسلات حرام ومع ذلك بنتفرج؟
كم مرة النساء عرفوا الوعيد الشديد للي بتلبس لبس مجسم عورتها كإنها مغلفة جسمها مش ساتراه!
زي ما الحديث قال بالظبط كاسيات عاريات،
وإن إللي بتخرج من بيتها متعطرة و يشم عطرها الرجال فكأنها زانية والعياذ بالله،
ومع ذلك النساء لسه بتلبس لبس غير شرعي عادي خالص وتحط عطر وهي خارجة برة بيتها والدنيا آخر حلاوة ومحدش شايف إنه بيعمل حاجة تستدعي الدهشة🙃

كم مرة النساء شافت وسمعت إن نمص الحواجب حرام ومع ذلك لسه المسلمات بتنمص حواجبها وبتبحث على الشيوخ إللي يقولولها إنه حلال عشان تموّت ضميرها وتعمل نمص براحتها😞
احنا ممكن منكنش مشتركين مع الأمم السابقة في عبادة الأصنام ...لكن إحنا أكيد مشتركين معاهم في عدم الالتزام الكامل في طاعة الله وبنتبع أهواءنا...
فمتستغربوش و سَلُوا اللهَ العافية👌

عبَد الناس إللي من نسل هود عليه السلام واسمهم ثمود الأصنام تاني مرة ثانية،
ثمود سكنوا منطقة اسمها الحِجْر ويُقال إنها في شمال شرق المدينة المنورة،
وقوم ثمود دول لأنهم أحفاد هود عليه السلام- إللي هو من قبيلة عاد أصلا- كانوا أقوياء زيهم،
وكانوا بينحتوا الجبال على هيئة بيوت، يعني الجبل الضخم الكبير ده كانوا بينحتوا فيه وبيحولوه لبيت يسكنوا فيه مش بيبنوه من الطوب والأسمنت زي حالتنا كده😅
وده طبعا شيء يدل على قوتهم وضخامة أجسامهم👌
فربنا لأنه لا يُعذب أحد إلا لما يرسل له رسول ...أرسل لهم واحد منهم اسمه صالح،
وزي ما قلنا قبل كده إن ربنا بيرسل لهم واحد منهم عارفين أصله ونسبه وعارفين صدقه عشان ميكنش ليهم حجة ويقولوا:
مين ده! إحنا ما نعرفوش! نضمن منين هو كويس والا وِحش🙄
صالح عليه السلام بدأ يدعو قومه لعبادة الله وإنهم يسيبوا عبادة الأصنام،
"وَإِلَى ثَمُودَ أَخَاهُمْ صَالِحًا قَالَ يَاقَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ"
وبدأ يذكرهم بنعم ربنا عليهم وإزاي إن ربنا أسكنهم الأرض بعد قوم عاد وإزاي إن ربنا أعطاهم القوة إنهم يبنوا بيوتهم من الجبال👌
"وَاذْكُرُوا إِذْ جَعَلَكُمْ خُلَفَاءَ مِنْ بَعْدِ عَادٍ وَبَوَّأَكُمْ فِي الْأَرْضِ تَتَّخِذُونَ مِنْ سُهُولِهَا قُصُورًا وَتَنْحِتُونَ الْجِبَالَ بُيُوتًا فَاذْكُرُوا آلَاءَ اللَّهِ وَلَا تَعْثَوْا فِي الْأَرْضِ مُفْسِدِينَ"

ده بقى شكر النعمة يا ناس؟! بقى ربنا يعطيكم الثمار والزروع والأموال،
وفي الآخر تعبدوا وتعظموا وتشكروا غيره ومتسمعوش كلامه وتعرضوا عنه😥
وبشرهم إنهم إنهم لو يستغفروا ربنا ويتوبوا من كل ده، ربنا هيقبل توبتهم ويحبهم رغم ما قد سَلف👌

طيب يا ترى ردوا بقى قالوا إيه🙄

قالوا له إنت إيه إللي جرالك 😳..إنت كنت كويس😳
إنت أكيد مسحور ، إحنا كنا حاطين أملنا عليك🤦‍♂️
إحنا كنا متوقعين إنك هيكون ليك شأن كبير في القبيلة بسبب حكمتك وأخلاقك وحلمك ورجاحة عقلك ورشدك😞
إنت إزاي بتنهانا إننا نعبد الآلهة إللي طول عمرنا بنعبدها احنا وآبائنا 😰...كلامك ده مش صح 😤
"قَالُوا يَاصَالِحُ قَدْ كُنْتَ فِينَا مَرْجُوًّا قَبْلَ هَذَا أَتَنْهَانَا أَنْ نَعْبُدَ مَا يَعْبُدُ آبَاؤُنَا وَإِنَّنَا لَفِي شَكٍّ مِمَّا تَدْعُونَا إِلَيْهِ مُرِيبٍ "

فقالهم بكل لطف ولين وكلام كله عقل:
طيب لو أنا طلع كلامي صح...عذركم إيه عند ربنا ساعتها؟
مين إللي هينجيكم منه ؟ ...وكمان مش عايزيني أدعوكم لعبادته 😳
طيب إزاي وربنا هو إللي أمرني بكده 😟
ولو أنا سمعت كلامكم مين هينجيني من غضب ربنا😞
"قَالَ يَاقَوْمِ أَرَأَيْتُمْ إِنْ كُنْتُ عَلَى بَيِّنَةٍ مِنْ رَبِّي وَآتَانِي مِنْهُ رَحْمَةً فَمَنْ يَنْصُرُنِي مِنَ اللَّهِ إِنْ عَصَيْتُهُ فَمَا تَزِيدُونَنِي غَيْرَ تَخْسِيرٍ"
قالوا له انت بشر زينا 🙄 إزاي عايزنا نؤمن ونتبع بشر 😏
ثم إشمعنى أنت يعني إللي جالك وحي دونا عن باقي القبيلة 😒 ده إنت كذاب كذب😑
"فَقَالُوا أَبَشَرًا مِنَّا وَاحِدًا نَتَّبِعُهُ إِنَّا إِذًا لَفِي ضَلَالٍ وَسُعُرٍ ۩
أَؤُلْقِيَ الذِّكْرُ عَلَيْهِ مِنْ بَيْنِنَا بَلْ هُوَ كَذَّ

#قصص_الأنبياء
#الحلقة_الحادية_عشر
#إبراهيم_عليه_السلام_الجزء_الأول
#إبراهيم_والأصنام

إبراهيم عليه السلام ولد في بابل في العراق، وهو من نسل سام بن نوح عليه السلام،
وكانت الأرض كلها على الكفر ...الناس نسيت ربنا والعلم اندثر ومع وسوسة الشيطان كل الناس كانوا كفار،
وكان الناس في قرية إبراهيم عليه السلام برده مشركين، إللي فيهم بيعبد الأصنام 👥وإللي فيهم بيعبد النجوم والكواكب🌕 وإللي فيهم بيعبد الملوك🤴
وفوق كل ده أبو إبراهيم عليه السلام نفسه كان بيصنع الأصنام ويبيعها للناس،
يعني إبراهيم كان متربي في بيئة كلها كفر ومفيش أي شعاع من نور،
وكان أبوه واسمه آزر بيديله الأصنام عشان يروح يبيعها في السوق للناس،
فكان إبراهيم عليه السلام يقعد ينادي في السوق :
اشتروا من لا يسمع ولا يرى....اشتروا من لا يضر ولا ينفع...
وكان سنه صغير ...ومع ذلك كان بيفكر بعقله👌
وكان ذكي وعنده حكمة، فاتربى على كُره الأصنام وكان بيتعجب من قومه إزاي الناس دي بتعبد ما لا يسمع لا يرى، ولا ينفع ولا يضر؟!!
إزاي يكون حاجات إحنا إللي بنصنعها تكون هي إللي نعبدها؟!!
مقلش أنا كل أهلي بيعملوا كده...والناس كلهم كده، يعني هو أنا إللي هبقى صح والناس دي كلها غلط😑
بقى معقولة الناس الكبار دول هم إللي غلط وأنا إللي لسه سني صغير مش عارف حاجة هكون صح🤨
إبراهيم عليه السلام مستسلمش للواقع بتاعه وقلد الناس تقليد أعمى،
ولا قال أنا لازم اكون زيهم وأمشي وراهم👌
ربنا وهبه الهداية من صغره عن طريق إنه خلاه يفكر بعقله ويكون من الراشدين ،
"وَلَقَدْ آتَيْنَا إِبْرَاهِيمَ رُشْدَهُ مِنْ قَبْلُ وَكُنَّا بِهِ عَالِمِينَ"

فكان بيتفكّر في خلق السماوات والأرض وفي خلق البشر لحد ما اهتدى بتفكيره إن الكون ده له خالق،
فكان عايز يعلّم قومه ويهديهم لعبادة الله الخالق وإنهم يسيبوا عبادة الأصنام ،
ودي فطرة الإنسان إنه مجرد ما يعرف ربنا ويعرف دينه بيكون عايز ينشر الدين ده ويبدأ يبلغ الناس إللي حواليه،
فلما إبراهيم عليه السلام كِبِر وجاءه الوحي،
بدأ بدعوة أبيه لأن طبيعي إن أول شخص الإنسان يحب لهم الخير هم أبويه،
لكن الموضوع صعب...لأن دايما الأبوين بيشوفوا عيالهم مهما كبروا واتعلموا إنهم صغيرين،
وطبعا غالبا بيكون عندهم نظرة لعيالهم إن إيه يابني، على آخر الزمن هييجي واحد زيك لسه مطلعش من البيضة هيعلمني الصح من الغلط والحق من الباطل🙄
ده الكلام ده في الأمور العادية...فما بالكم لما إبراهيم عليه السلام يقول لأبوه مثلا:
والله يابابا الدين إللي إنت بتتبعه ده والأصنام إللي انت بتعبدها دي إنت وقومك وأجدادك من قبلك كل ده غلط والصح كذا وكذا ☺️

متخيلين رد الفعل هيكون إيه😅
☆خلينا نحط نفسنا كأبناء مكان إبراهيم عليه السلام كده والواحد مننا يروح يقول لأمه أو أبوه: أنا عرفت إن المسلسلات والأغاني والاختلاط حرام وهنقول الدليل من القرآن والسنة وأهل العلم قالوا كذا وكذا ،
متخيلين ممكن يعملوا فينا إيه😶
وهم مسلمين موحدين ...فما بالكم لو قلنا لهم إن الدين بتاعكم ده كله على بعضه غلط🙂
فإبراهيم عليه السلام في موقف صعب جدا،
ومع ذلك مقلش مليش دعوة وكل واحد هيتحاسب عن نفسه، وأنا مالي وأنا مش عاوزهم يكرهوني👌
بالعكس... المحب الحقيقي بيبذل كل إللي يقدر عليه عشان خاطر إللي بيحبه حتى لو كان ده هيكون فيه ضرر عليه أو هيسبب غضبه منه 😊
وده بالضبط إللي حصل مع إبراهيم عليه السلام،
راح لأبوه وكلمه بكل لطف وحب واختار الكلمات بعناية واختار الأسلوب المناسب الحكيم عشان يقدر يقنع أباه،
قال له:
=يا أبتِ =عشان يحسسه إنه قريب منه ويستعطفه،
إنت ليه بتعبد ما لا يسمع ولا يرى ومش بيفيدك بأي شيء،
هو الإنسان بيعبد إله ليه؟
"إِذْ قَالَ لِأَبِيهِ يَاأَبَتِ لِمَ تَعْبُدُ مَا لَا يَسْمَعُ وَلَا يُبْصِرُ وَلَا يُغْنِي عَنْكَ شَيْئًا"
مش عشان يستجيب دعاؤه ويدفع عنه أي ضرر ويهديه ويحميه ويرزقه ويدبر له أموره،
طيب الأصنام مبتعملش أي حاجة من دي...فإنت ليه بتعبدها😔
◇وطبعا مش معنى إن الإله مفروض يمنع عنا الضر إن المقصود إننا نبقى مُنعمين في الحياة الدنيا بدون أي ابتلاءات، لأ المقصود :
"قُلْ مَن يُنَجِّيكُم مِّن ظُلُمَاتِ الْبَرِّ وَالْبَحْرِ تَدْعُونَهُ تَضَرُّعًا وَخُفْيَةً "
"أَمَّن يَهْدِيكُمْ فِي ظُلُمَاتِ الْبَرِّ وَالْبَحْرِ وَمَن يُرْسِلُ الرِّيَاحَ بُشْرًا بَيْنَ يَدَيْ رَحْمَتِهِ"
يعني اللي يملك الضر والنفع هو الإله ده، يعافيكم أحيانا ويبتليكم أحيانا لحكمة هو يعلمها، لكن الأصنام بتعمل إيه من كل ده🤷‍♂️
ولا شيء إطلاقا.. ده غير عجزها عن إنها تدفع الضر عن نفسها أساسا🙄

☆إبراهيم عليه السلام بيكلم أبوه آزر بكل عقل👌
يا أبتِ على الرغم من إنك أبويا والمفروض إنك أعلم مني،
بس أنا جالي علم مش عندك ...فاسمع كلامي هوصلك للحق،
"يَاأَبَتِ إِنِّي قَدْ جَاءنِي مِنَ الْعِلْمِ مَا لَمْ يَأْتِكَ فَاتَّبِعْنِي أَهْدِكَ صِرَاطًا سَوِيًّا"
يا أبتِ بلاش تسمع كلام الشيط

#قصص_الأنبياء
#الحلقة_الثانية_عشرة
#إبراهيم_عليه_السلام_الجزء_الثاني
#إبراهيم_وإلقائه_في_النار

وقفنا المرة إللي فاتت عند إبراهيم عليه السلام لما كسّر الأصنام كلها ماعدا أكبر واحد فيهم،
وعلق الفأس عليه، وبعدين قومه لما رجعوا من العيد بتاعهم وراحوا يشوفوا الآلهة لقوهم متكسرين ، وسألوا مين إللي عمل فيهم كده،
"قَالُوا مَنْ فَعَلَ هَذَا بِآلِهَتِنَا إِنَّهُ لَمِنَ الظَّالِمِينَ"

فبعض الناس قالوا احنا سمعنا شاب اسمه إبراهيم بينتقص الآلهة بتاعتنا ويذكرها بالسوء، فقالوا هاتوه قصاد الناس كلهم عشان يشهدوا عليه،
"قَالُوا سَمِعْنَا فَتًى يَذْكُرُهُمْ يُقَالُ لَهُ إِبْرَاهِيمُ ۩ قَالُوا فَأْتُوا بِهِ عَلَى أَعْيُنِ النَّاسِ لَعَلَّهُمْ يَشْهَدُونَ"
وفعلا جابوا إبراهيم عليه السلام وسألوه قصاد الناس كلهم :
إنت إللي كسرت آلهتنا يا إبراهيم😡
"قَالُوا أأنْتَ فَعَلْتَ هَذَا بِآلِهَتِنَا يَاإِبْرَاهِيمُ"

☆إنتم متخيلين ناس كفار بيتأكدوا من المعلومة قبل ما ياخدوا أي قرار😅
ده احنا كمسلمين لما أي حد يقولنا حاجة ولّا خبر بينتشر على الفيسبوك ولّا كلام الناس تنقله عن شخص معين بنصدقه على طول 🤓
كم من علاقات اتقطعت بسبب كلمة اتقالت وصدقناها من غير ما نتأكد، مع إن ربنا حذرنا وقال لنا:
"يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ "
لما واحد ييجي يقولك ده فلان بيقول عليك كذا😮
ما تستعجلش وتتعصب وتقعد تشتم فيه تدعي عليه من غير لما تتأكد!!👌
تقول لي بس أنا واثق في صاحبي إللي بلغني الكلام ده😤
هقولك كلامي ده مش تخوين لصاحبك، بس ممكن صاحبك يكون فهم غلط أو طلّع الكلام من سياقه ونقله بفهمه الغلط بدون قصد خصوصا إن السّياق من المُقَيِّدات🙄
يعني قيد محطوط على الكلام المُطلَق، ما ينفعش نفكّه منه وإلا المعنى هيتغير
بمعنى هل ينفع أقول "ويل للمصلين" واسكت؟
لأ طبعا... لاااازم أكمل سياق الآية إللي هو:
"الذين هم عن صلاتهم ساهون"
فربنا قَيِّد لنا سياق الآية المُطلَقة "ويل للمصلين"
ب "الذين هم عن صلاتهم ساهون"
يعني مش كل المصلين دي فئة محددة👌

◇مثال في حياتنا اليومية للتوضيح أكتر 😅
ممكن واحد صاحبك يقول عنك:
《والله ده على نياته خالص》
وهو يقصد من جواه إنك غلبان وطيب وملكش في الخبث والمكر وسوء النية،
فيقوم إللي سمع الكلمة أول مرة يفهمها بمعنى تاني، وينقلك المعنى إللي هو فهمه ده ويييجي يقولك ده فلان بيقول عليك إنك أهبل وعبيط والناس بتضحك عليك بسهولة 🙄
وكمان يقول لك كده من غير ما يحكي لك الموقف –السياق يعني- إللي حصل،
فانت لو عرفت الكلام اتقال في أنهي موقف كنت هتفهم المعنى إللي صاحبك يقصده👌
فمتصدقش حد بينقلك أي كلام غير لما تجيب الطرف التاني وتسأله إنت قلت كذا؟ وكان قصدك إيه؟
هتلاقيه بيقولك محصلش😤
أو أيوة قلت وكان قصدي كذا مش كذا.

فعلى الرغم من إن قوم إبراهيم كانوا كفار لكن راحوا يتأكدوا من المعلومة وكمان هيعطوا فرصة لإبراهيم عليه السلام إنه يدافع عن نفسه👌
فقال لهم إبراهيم : بل فعله كبيرهم هذا 👈فاسألوهم إن كانوا لو ينطقون😏
"قَالَ بَلْ فَعَلَهُ كَبِيرُهُمْ هَذَا فَاسْأَلُوهُمْ إِنْ كَانُوا يَنْطِقُونَ"

آآاااه 😅
همّ دلوقتي اتزنقوا خلاص :
يا إما يعترفوا بالحق، وهو إن الجماد ده إللي همّ صنعوه ومش بيتحرك فميقدرش يعمل كده،
يا إما يقولوا معاك حق يا إبراهيم فعلا انت بريء والإله ده هو إللي كسر الأصنام التانية😤
هنا قوم إبراهيم عليه السلام راجعوا نفسهم كده شوية وقالوا لبعض احنا إللي غلط واحنا إللي ظَلَمَة😧
" فَرَجَعُوا إِلَى أَنْفُسِهِمْ فَقَالُوا إِنَّكُمْ أَنْتُمُ الظَّالِمُونَ"

لكن لحظة الصدق مع النفس إللي بتبقى أول بوابات الوصول للحق، ما استمريتش كتير للأسف ورجعوا عن كلامهم ده واستكبروا عن اتباع الحق وقالوا لإبراهيم:
ما انت عارف إنهم مش بيتكلموا😠!!
"ثُم نُكِسُوا عَلَى رُؤوسِهِمْ لَقَدْ عَلِمْتَ مَا هَؤُلَاءِ يَنْطِقُونَ"
فإبراهيم عليه السلام زنقهم أكتر وقال لهم:
يبقى ليه بتعبدوا ما لا ينفعكم ولا يضركم ولا حتى كانت قادرة تدافع عن نفسها ضد التحطيم !!😡
"قَالَ أَفَتَعْبُدُونَ مِنْ دُونِ اللَّهِ مَا لَا يَنْفَعُكُمْ شَيْئًا وَلَا يَضُرُّكُمْ ..أُفٍّ لَكُمْ وَلِمَا تَعْبُدُونَ مِنْ دُونِ اللَّهِ أَفَلَا تَعْقِلُونَ"

هنا قوم إبراهيم عليه السلام لما لقوا نفسهم ماعندهمش أي كلام يردوا بيه راحوا مستخدمين مبدأ القوة والبطش😑
قالوا إحنا هنحرقه وننصر آلهتنا 😤
"قَالُوا حَرِّقُوهُ وَانْصُرُوا آلِهَتَكُمْ إِنْ كُنْتُمْ فَاعِلِينَ"

☆وده مبدأ الشخص إللي مش بيبقى عارف يرد😏
لما تكون بتكلم حد وانت إللي معاك الحق،
وعمال تقول الدلائل بتاعتك والتاني مش عارف يرد،
تلاقيه فجأة راح مزعق...ممكن يشتم...يتهمك بحاجة مش فيك، عشان يتهرب من الحوار بأي طريقة ويقلب عليك الترابيزة زي ما بيقو

#قصص_الأنبياء
#الحلقة_الثالثة_عشرة
#قصة_إبراهيم(٣)
#إسماعيل_الذبيح
#قصة_زمزم

قلنا المرة إللي فاتت إن إبراهيم وسارة ومعاهم هاجر توجهوا لبلاد الشام مرة تانية بعد ما خرجوا من مصر وراحوا قعدوا في فلسطين،
إبراهيم عليه السلام كان كِبِر في السن ومكنش عنده أولاد،
وكان بيتمنى إنه يكون عنده ولد،
فدعا ربنا إنه يرزقه الذرية الصالحة:
"رَبِّ هَبْ لِي مِنَ الصَّالِحِينَ ۩ فَبَشَّرْنَاهُ بِغُلَامٍ حَلِيمٍ "
وكانت سارة عقيم لا تلد،
فوهبت سارة لإبراهيم عليه السلام "هاجر" وبقت ملك يمين له،
وملك اليمين زيها زي الزوجة من ناحية المعاشرة الزوجية والإنجاب،
فحملت هاجر ... وولدت إسماعيل عليه السلام،
وطبعا كأي أب لسه أول مرة ينجب طفل من صلبه إبراهيم عليه السلام اتعلق بولده إسماعيل،
وكمان هنا الوضع مختلف لأن الولد جه لأب كبير في السن يعني بعد طول اشتياق وصبر فأكيد الإهتمام هيكون مُضاعف...
فهنا غارت سارة 😅
مع إنها هي إللي وهبت هاجر لإبراهيم عليه السلام عشان تخلف له ولد، لكن طبيعة غيرة النساء تغلب🤷‍♂️
يعني غيرة المرأة من الزوجة التانية دي حاجة طبيعية لا تُحاسب عليها إلا إذا المرأة تعدت بسبب الغيرة وظلمت أختها فاغتابتها أو طلبت من زوجها إنه يطلقها أو كادت لها المكائد وما إلى ذلك،
فالغيرة مادامت في القلب ويظهر منها الشيء المعقول إللي ما يتسببش في ضرر أو سوء ومدفعتش المرأة لإرتكاب أي محرم، فالمرأة لا تُحاسب على الغيرة دي😊

ولو بصينا لسارة هنلاقي إن من حقها فعلا تغير في موقف زي ده الصراحة،
انتم متخيلين زوجة مرت مع زوجها بأحداث كتير وعاشت معاه سنين طويلة -وده مش أي زوج ده إبراهيم خليل الله،
فتقوم الزوجة دي تلاقي واحدة تانية في يوم وليلة مفرحة قلب زوجها بالولد إللي هي مقدرتش توهبه له، ومستحوزة هي والولد على جزء كبير من اهتمامه😶
لاشك إن من حقها تغير وقلبها يَضِيق بده،
فربنا عز وجل رأفةً بسارة ورحمةً بمشاعرها أمر إبراهيم عليه السلام إنه ياخد هاجر وابنها الرضيع إسماعيل ويوديهم مكان تاني إللي هو مكة،
خدوا بالكم إن ربنا لما يريد شيء بيهيء له أسبابه👌

يعني يا جماعة بعدين ربنا هيأمر إبراهيم وإسماعيل عليهما السلام إنهم يبنوا الكعبة بيت الله الحرام، فإزاي كانوا هيبنوها وهم أصلا قاعدين في فلسطين والبيت الحرام هيكون في مكة💁‍♂️
فكان لازم ربنا يهيأ أسباب سفرهم لمكة أصلا،
و كمان ساعتها مكة كانت صحراء جرداء ومكنش ينفع لسه حد يعيش هناك ولا كان في زمزم لسه ولا كان في أي حاجة..فإزاي بقى كان كل ده هيحصل وييجوا مكة ويحفروا زمزم😕
فبتقدير وتدبير من ربنا عز وجل، سارة غارت وبالتالي ربنا أمر إبراهيم عليه السلام إنه يأخذ هاجر وإسماعيل لمكة عشان يهيء الأسباب إن البيت الحرام يتبنى وتبقى البلد الحرام مكة بلد معمور يأتي إليها الناس أفواجا من كل مكان فسبحان الله العظيم👌

◇ومن هنا أحب أقول لكم محدش يزعل لما يدعي دعوة وتتأخر، أو لما تحصلكم أي حاجة تضايقكم..
محدش يعرف الخير فين لأننا معندناش علم ربنا الواسع المحيط بكل شيء ولا عندنا حكمته الواسعة عشان نقدر نحكم على الأمور،
مش يمكن ربنا بيهيأ الأسباب عشان يحقق لنا إللي نفسنا فيه وأحسن كمان؟!!
مش يمكن ربنا قَدَّر الحاجة إللي احنا شايفينها وحشة ومضايقانا دلوقتي عشان يمنع عننا كارثة في المستقبل؟
اعرفوا كويس أوي إن تقدير ربنا لينا داااايما خير، بس احنا نثق فيه ونتوكل عليه وننقاد له😊
المهم،
إبراهيم عليه السلام أخد هاجر وإسماعيل وسافروا لمكة عند موضع البيت الحرام إللي ماكنش لسه اتبنى وكان أرض صحراء جرداء من غير زرع ولا مية، ساب لها قِربة مية وجِراب فيه تمر،
يعني نقدر نقول إزازة مية وكيس تمر،
وبعدين سابهم وإداهم ضهره ومشي!!
فهي استغربت🤨
وقعدت تنادي عليه:
يا إبراهيم إنت سايبنا لمين هنا وماشي؟!
وهو مش بيبص لها ومش بيرد ومكمل مشي...!
وهي تنادي عليه وتكرر نفس السؤال...فهي حست إن في حاجة، فسألِته: هو ربنا إللي أمرك بكده؟
فالْتَفَت وقال: نعم...فقالت بكل ثقة إذاً لن يضيعنا👌
يعني مادام ربنا إللي أمر وقدر كده يبقى أمره وقدره خيييير 😊
☆انتم مخيلين🙊
زوجة فجأة زوجها يجيبها في صحرا هي وابنها ويسيب معاها بشوية تمر ومية ويمشي ويسيبهم وكمان ما يردش عليها يطمنها بكلمة ولا يشرح لها شيء،
تقوم بدل ما تتهمه إنه مش أب ولا عنده رحمة ولا إنسانية –لإنها عارفة كويس أخلاقه ودينه- تفكر في أول حاجة إييييه؟؟؟
ربنا.. مالك الملك.. مالك إبراهيم ومالكها ومالك إسماعيل..
وكإن مفيش أي حاجة تانية هتطمنها لو السؤال ده كانت إجابته لأ..
مجرد ما اطمنت إن ربنا هو إللي أمر بكده ارتاحت واطمنت👌
دايما قولها لنفسك كل ما تحصلك مشكلة...
كل ما تتأخر عنك دعوة...
كل ما يشتد عليك البلاء...
قول لنفسك: مش ده قدر ربنا ؟
مش هو إللي أمر بده؟
مش هو إللي هيأ أسباب ده كله وأنا عامل استخارة وواخد بالأسباب زي ما أمرني ومُسلّم له كل أموري؟
خلاااا

#قصص_الأنبياء
#الحلقة_الرابعة_عشرة
#قصة_إبراهيم(٤)
#البشارة_بإسحاق

وقفنا المرة إللي فاتت عند دهشة إبراهيم عليه السلام من السكينة التي لا تذبح وصوت المنادي إللي بينادي على إبراهيم عليه السلام😮
سمع المنادي بيقول :
يا إبراهيم قد صدقت الرؤيا!
"وَنَادَيْنَاهُ أَنْ يَا إِبْرَاهِيمُ *قَدْ صَدَّقْتَ الرُّؤْيَا"
يعني ربنا قال لإبراهيم إنت نفذت المطلوب منك خلاص ونجحت في الاختبار العظيم ده،
فالتفت إبراهيم عليه السلام لقى كبش ضخم عشان يذبحه فداء لإسماعيل عليه السلام، يعني يتم ذبحه بداله،
وخلاص البلاء انتهى وإبراهيم عليه السلام لم يذبح إسماعيل😊
¤إيه ده😳
طيب وكان لازمته إيه الموضوع من الأول مادام كده كده ربنا لا يريد قتل إسماعيل عليه السلام😥
لازم يعني الإبتلاء الشديد ده😖
أيوة لازم اختبار وتمحيص، وعشان كده احنا جينا الدنيا: 《ليبلوكم أيكم أحسن عملا 》
ربنا لا يبتلي عباده المؤمنين ليعذبهم أبدا👌
لكن كمان ربنا مش بيحاسبنا ولا بيجازينا بسابق علمه فينا...يعني لااااازم نشتغل ويبقى لينا عمل عشان على أساسه يحاسبنا فيعاقبنا أو يكافئنا،
إزاي ربنا هيكافئ إبراهيم عليه السلام ويرفع درجته بحاجة هو معملهاش لسه لكنه عارف عز وجل إنه هيعملها👌
مثال : إنت مكتوب لك عند ربنا إن ليك أجر الصابرين والكاظمين الغيظ،
إزاااااي هتاخد الأجر ده إلا لو ربنا ابتلاك بشخص سليط اللسان مش بيشوفك غير لما يحرق دمك🤓
ربنا مثلا كاتب لك أجر المجاهدين لأنفسهم...إزاااي هتاخد الأجر ده إلا لو إنت عمّال تجاهد نفسك وشيطانك على الطاعة وبعيد عن المعصية...وهكذا👌
وكذلك إبراهيم عليه السلام إزاي قصته هتكون مضرب للمثل في التسليم لأمر الله إلا لو اتحط في الإبتلاء ده؟
إزاي مكانته كخليل للرحمن هتيجي من غير ما يضحي بأغلى ما يملك في حياته في الوقت ده وهو ابنه👌

طيب فاكرين لما قلنا إن سارة غارت جدا من هاجر وابنها إسماعيل😊
إزاي قلب سارة هيهدى وتتحول قسوة الغيرة إلى شفقة وحب لو محصلتش الحادثة دي،
وإزاي كانت هتكون مناسك الحج لولا الحادثة دي😁

فمتفكرش أبدا أبدا إن ربنا بيقدّر الأمور عبثًا والعياذ بالله،لأ،
ده كل حاجة محطوطة في مكانها بالضبط...وكل حاجة متسجلة،
وجع قلبك ودموعك وقهرتك وظلم الناس ليك و...و...
كل ده ربنا مقدره عشان يشيل من عندك ذنب أو يطهر قلبك ويعلمك الصح من الغلط فتزكي نفسك أو يرفع درجتك في الجنة، واحنا قلنا إن ربنا لا يبتلي ليُعذب ...فما تقلقش😊

بعد ما ذبح إبراهيم عليه السلام الكبش فداءا لإسماعيل عليه السلام ورجعه لأمه هاجر رجع لفلسطين عند سارة من تاني
وكان إبراهيم عليه السلام ييزور إسماعيل وهاجر كل فترة زي ما قلنا،
وكان إسماعيل عليه السلام تزوّج من قبيلة جُرهم بعد موت أمه هاجر، فلما زاره إبراهيم عليه السلام ومالقاهوش
ولقي إمرأة وسألها عن إسماعيل، قالت له مش موجود، راح يصطاد لنا صيد ،
وكان إسماعيل بيخرج عشان يصطاد ،
فسألها عن حالهم بشكل عام عاملين إيه؟
فقالت له العيشة وحشة ومعندناش إللي يكفينا والحالة كرب و و و و... وقعدت تشتكي له من الحياة الزوجية مع إسماعيل😞
فقال لها لما زوجك ييجي سلمي عليه وقوليله غيّر عتبة بابك 😑
فلما رجع إسماعيل عليه السلام كإنه حس إن في حد جه، فسأل زوجته: حد جه النهاردة 🤔
فقالت له أيوة جالنا شيخ شكله كذا وكذا -ووصفته لإسماعيل عليه السلام- وسأل عليك وسأل عن حالنا فحكيت له،
فسألها ..طيب هو وصاكِ بحاجة🤔
قالت: قال لي أبلغك سلامه وبيقولك غير عتبة بابك،
فقالها ده أبويا وووصيته هي إني أفارقك..
وطلقها فعلا،
وتزوج امرأة تانية من جُرهم،
بعد مدة جه إبراهيم عليه السلام يزور إسماعيل مرة تانية وماكنش موجود و ردت عليه إمرأة تانية،
فسألها عن إسماعيل فقالت إنه خرج يصطاد، يعني في الشغل بلغة زماننا😅
فسألها عن حالهم وعيشتهم فحمدت ربنا وقالت إن ربنا موسع عليهم، فسألها بياكلوا إيه قالت: اللحم وسألها بيشربوا إيه: قالت الماء ،
فدعا لهم إبراهيم عليه السلام بالبركة وقالها:
لما زوجك يرجع سلمي عليه وقوليله ثبّت عتبة باباك،
فلما رجع إسماعيل عليه السلام سأل زوجته حد جه النهاردة🤔
قالت أيوة جالنا شيخ كبير -ووصفته ومدحته- وسأل على حالنا قلتله إننا كويسين،
فقال لها وصاكِ بحاجة🤔....قالت له: بيسلم عليك وبيقولك ثبّت عتبة بابك،
فقال لها ده أبي، وإنتِ العتبة إللي أمرني إني أثبتها، يعني بيوصيني ما أفارقكيش.

¤وييجي هنا سؤال...
هم ليه بيسموا المرأة عتبة 😕
لإن عتبة الباب والزوجة بيشتركوا في نفس الصفات الحميدة الطيبة: من حفظ البيت وستره وصيانة إللي جوة البيت من كل سوء برة البيت😊

¤طيب سؤال تاني 🤔
هو إسماعيل عليه السلام يسمع كلام أبوه كده على طول بدون ما يراعي مشاعر زوجته😥
طب وهي مراعتش ليه مشاعر زوجها لما واحد غريب ماتعرفوش يسألها عن حالهم وتقعد تشتكيله😑
يعني بغض النظر إن ده نبي هل ينفع إن المرأة تقعد تشتكي من زوجها للناس للرايح والجاي بصفة

#قصص_الأنبياء
#الحلقة_الخامسة_عشرة
#قصة_إبرهيم(٥)
#لوط_وقومه

كنا واقفين عند إبراهيم عليه السلام لما كان بيجادل الملائكة في قوم لوط ،والملائكة قالت إن خلاص ربنا أمر بإهلاكهم، وفعلا خرجت الملائكة متجهة إلى قرية لوط عليه السلام.

مين همّ قوم لوط أصلا🤔

خلونا نرجع بالزمن شوية ...
فاكرين لما إبراهيم عليه السلام ربنا نجّاه من النار وبعدين لوط عليه السلام آمن بيه وخرجوا مهاجرين من بلدهم؟
( ولوط عليه السلام هو ابن أخ إبراهيم عليه السلام،)
وفاكرين بعدها لما إبراهيم عليه السلام سكن الشام مع سارة،
أهه في الوقت ده لوط عليه السلام سكن في مدينة اسمها سَدُوم،
عند مكان اسمه "البحر الميت" في زماننا دلوقتي،
وأهل سدوم اسمهم "المُؤْتَفِكة"،
والمؤتفكة في اللغة العربية معناها: كل ما هو مصروف عن وجههِ وحاله إللي المفروض إنه يكون عليه..
ومعناها في القرآن: هُم قومُ لوط المُنقلبة قُراهُم عليهم عاليها سافلها
المهم..
كانت المدينة دي يتبعها قُرَى حواليها،
أهل المدينة دول كانوا كفار.. ومش بس كده،
لأ دول كمان كانوا بيعملوا حاجة بشعة محدش عملها قبل كده😶
وهي إن الرجال كانوا يأتون الرجال...يعني الرجل يُعاشر الرجل...ودي حاجة ضد الفطرة، عكس الوجه والحال اللي ربنا خلق البشر بيه وإللي المفروض يكونوا عليه.
يعني ربنا خلق الرجل والمرأة مناسبين لبعض عشان يتزوجوا ويجيبوا أطفال ويستمر النسل👨‍👩‍👧‍👦
لكن لما الرجل يتزوج الرجل النسل هينقطع والأمراض هتنتشر،
والمشكلة إن مش واحد ولا إتنين إللي شَذُّوا عن الفطرة اللي ربنا فطر الناس عليها..لأ ... دي القرية كلها كده والعياذ بالله😓
وكانوا بيعملوا الفاحشة دي قصاد بعض عادي في النوادي
وكانوا يخرجون الريح علانية أمام بعض ويتضاحكون على كده، ومكانوش بيستحوا من أي شيء من أفعالهم الخبيثة القذرة دي،
وكانوا كمان قُطّاع طرق، يقطعوا الطريق على المسافرين ويفعلوا بهم الفاحشة،
"أَئِنَّكُمْ لَتَأْتُونَ الرِّجَالَ وَتَقْطَعُونَ السَّبِيلَ وَتَأْتُونَ فِي نَادِيكُمُ الْمُنْكَرَ "
يعني كانوا أخبث الخلق فعلا،
ويُقال والله أعلم إن إللي خلّاهم يعملوا الفاحشة مع الرجال إن كان عندهم بساتين وثمار موجودة على الطريق وحصل لهم قحط وجوع فقالوا لبعض لو منعنا الثمار إللي على الطريق دي عن المسافرين وأبناء السبيل هنقدر نعيش،
فقالوا ونمنعها إزاي🤔
فقالوا نخلي من عاداتنا إن أي رجل غريب ييجي البلد نسرقه ونفعل به الفاحشة وبكده محدش هييجي البلد 😈
وفعلا عملوا كده واعتادوا على الموضوع لحد ما بقى في طبعهم،
فربنا أرسل لهم لوط عليه السلام، بالهداية عشان يخرجهم من الظلمات دي إلى النور.

بدأ لوط عليه السلام أول حاجة خالص زي أي نبي مُرسل يَدعوهم لعبادة الله وحده،
يعني بدأ معاهم بالأَوْلى والأهم، فأهم حاجة دلوقتي إنهم يؤمنوا بالله ويعبدوه،
عشان لما ده يتحقق هيبقى سهل يستسلموا لأوامره ويتقوه ويطيعوه بدون عناد ومكابرة .
"إذْ قَالَ لَهُمْ أَخُوهُمْ لُوطٌ أَلا تَتَّقُونَ۩ إِنِّي لَكُمْ رَسُولٌ أَمِيْنٌ۩ فَاتَّقُوا اللهَ وَأَطِيْعُون"

☆وهنا في فائدة وهي إن لازم يكون عند الدعاة إللي بيدعوا الناس وبينصحوهم حاجة اسمها فِقه الأولويات،
يعني نعرف نبدأ بإيه معاهم الأول قبل أي حاجة تانية، حسب ترتيب الشرع للأولويات الشرعية..
يعني مثلا زي بالضبط لما تيجي أخت تنصح بنت مش بتصلي ومش لابسة حجاب هتكلمها في إيه الأول؟
هتكلمها في الصلاة الأول لأنها الأصل ورسول الله ﷺ قال:
"العهد الذي بيننا وبينهم الصلاة فمن تركها فقد كفر"
طيب هل معنى كده إن الحجاب الشرعي مش مهم🤨
لأ هو مهم بس الصلاة أهم دلوقتي👌
وهو ده فقه الأولويات الشرعية.

المهم،
لوط عليه السلام لما بدأ دعوته لقومه بإنهم يعبدوا الله وحده ولا يشركوا به شيئا، وقالهم إنه مش عايز منهم مقابل لدعوته ولا أجر،
هو بينصحهم عشان مصلحتهم هم فقط في الدنيا والآخرة
"وَمَا أَسْأَلُكُمْ عَلَيْهِ مِنْ أَجْرٍ إِنْ أَجْرِيَ إِلاَّ عَلَى رَبِّ العَالَمِيْنَ"

وحذرهم إن ربنا هينزل فيهم العذاب لو استكبروا ورفضوا الهدى،
وطبعا ناس زي دول، تتوقعوا هيكون رد فعلهم إيه😑
"قَالُوا لَئِنْ لَّمْ تَنْتَهِ يَا لُوطُ لَتَكُونَنَّ مِنَ المُخْرَجِيْنَ"
يعني قالوا للوط عليه السلام لو مابطلتش كلامك ده هنطردك برة البلد😡
لكن لوط عليه السلام استمر يدعوهم ويأمرهم بالمعروف وينهاهم عن المنكر سنين، ويعيد ويزيد ويقول:
"أَتَأْتُونَ الذُّكْرَانَ مِنَ العَالَمِين ۩ وَتَذَرُونَ مَا خَلَقَ لَكُمْ ربُّكُمْ مِّنْ أَزْوَاجِكُمْ بَلْ أَنْتُمْ قَومٌ عَادُونَ"

لما كان بيبقى في ناس معدية على الطريق من المسافرين كان لوط بيخبيهم عنده ويمشيهم في الليل في الخفاء بعيد عن أعين قومه أهل الفواحش، عشان لو شافوا الرجال دول هياخدوهم ويغصبوهم على فعل الفاحشة معهم،

واستمر الوضع على كده...قوم لوط عليه السلام يعملوا الفواحش ومستمرين في الكفر والظلم والتعدي عل

#قصص_الأنبياء
#الحلقة_السادسة_عشرة
#قصة_إبراهيم(٦)
#قصة_الكعبة_على_مر_الزمن

بعد ما جاءت البشرى لإبراهيم عليه السلام بولادة ابنه إسحاق، عدت فترة من الزمن وبعدين ربنا أمر إبراهيم عليه السلام بأمر جديد،
ذهب إبراهيم عليه السلام عشان يزور إسماعيل عليه السلام فلما راح له مكة لقاه كان قاعد عند شجرة في محيط البيت الحرام، وكان قاعد بيبري نَبْل...
عارفينه🤔
زي خشبة كده عمال بيبريها بسكين زي ما بنبري القلم الرصاص كده.
فلما شافه إسماعيل عليه السلام قام له..
وإنتم عارفين لما الأب ولاّ الإبن بيشوفوا بعض بعد زمن بيعملوا إيه، وخصوصا لو كانت علاقتهم زي علاقة إبراهيم وإسماعيل عليهما السلام😊

بعد ما سلموا على بعض، إبراهيم عليه السلام قال لإسماعيل إن ربنا أمره بأمر معين، فإسماعيل عليه السلام قال له: طبعا نفذ إللي ربنا يؤمرك بيه يا أبي،
يعني كأنه بيقول له لو في ذبح تاني أنا معنديش مانع خالص عليه السلام😅
فإبراهيم عليه السلام قاله طيب هتساعدني؟
قاله طبعا أساعدك💪🏻
فقاله ربنا أمرني إني أبني في المكان ده بيت 👈 وشاور على منطقة مرتفعة عن الأرض مغطياها الرمال،
وكان ربنا هو إللي عرف إبراهيم المكان إللي هيبني فيه بالضبط، يُقال عن طريق ريح ربنا أرسلها فكنست المكان المقصود من الرمل ،ويُقال عن طريق سحابة وقفت في مكان البيت وظللت مساحة معينة كانت هي دي المساحة بتاعة الكعبة،
"وَإِذْ ((بَوَّأْنَا)) لِإِبْرَاهِيمَ ((مَكَانَ)) الْبَيْتِ أَنْ لَا تُشْرِكْ بِي شَيْئًا وَطَهِّرْ بَيْتِيَ لِلطَّائِفِينَ وَالْقَائِمِينَ وَالرُّكَّعِ السُّجُودِ"
وفوق الكعبة بالظبط البيت المعمور، وهو كعبة أهل السماء وموجود في السماء السابعة ، يدخله كل يوم سبعون ألف ملك يطوفون حوله لا يرجعون للطواف مرة تانية إلى يوم القيامة👌
بدأ إبراهيم عليه السلام يبني البيت،
فكان إسماعيل عليه السلام يأتي بالحجارة وإبراهيم عليه السلام هو إللي يبني،
فقال إبراهيم عليه السلام لإسماعيل هات لي حجر أحطه في زاوية بحيث يكون علامة للناس يبدأوا من عنده الطواف،
فجاء إليه جبريل عليه السلام بالحجر الأسود، وهو حجر من الجنة، وكان أول ما نزل الأرض..
و كان أشد بياضا من الثلج، ثم سوّدته خطايا بني آدم

☆يعني سودته خطايا بني آدم وطاعات الموحدين لم تبيضه؟🤔
أيوة، لأن العادة إن الأسود هو إللي بيصبغ الأبيض وليس العكس، ولإن الذنوب عددها كبير جدا للأسف أكبر بكتير من الطاعات،
"وَإِن تُطِعْ أَكْثَرَ مَن فِي الْأَرْضِ يُضِلُّوكَ عَن سَبِيلِ اللَّهِ" "ويعرفون نعمة الله ثم ينكرونها وأكثرهم الكافرون"
"ولكن أكثرهم للحق كارهون"
"وأكثرهم فاسقون"👌
وكمان فيه عبرة ...يعني الخطايا أثرت في الحجر الجامد الصلب فما بالنا بتأثير الذنوب في القلوب😞

استمر بناء الكعبة لحد ما ارتفع البنيان وبعدين إسماعيل جاب حجر عشان يقف عليه إبراهيم عليه السلام عشان يكمل البناء،
وهم بيبنوا كانوا بيدعوا ربنا وبيقولوا :
"وَإِذْ يَرْفَعُ إِبْرَاهِيمُ الْقَوَاعِدَ مِنَ الْبَيْتِ وَإِسْمَاعِيلُ رَبَّنَا تَقَبَّلْ مِنَّا إِنَّكَ أَنْتَ السَّمِيعُ الْعَلِيمُ "
☆وده يعلمنا إننا لما نعمل أي طاعة لله ندعي ربنا وإحنا بنعملها إنه يتقبلها مننا😊

وكانت الكعبة هي أول بيت لله في الأرض.
استمر بناء الكعبة لحد ما ارتفع البنيان وبعدين إسماعيل جاب حجر عشان يقف عليه إبراهيم عليه السلام عشان يكمل البناء، وهم بيبنوا كانوا بيدعوا ربنا وبيقولوا :
"وَإِذْ يَرْفَعُ إِبْرَاهِيمُ الْقَوَاعِدَ مِنَ الْبَيْتِ وَإِسْمَاعِيلُ رَبَّنَا تَقَبَّلْ مِنَّا إِنَّكَ أَنْتَ السَّمِيعُ الْعَلِيمُ "

☆وده يعلمنا إننا لما نعمل أي طاعة لله ندعي ربنا وإحنا بنعملها إنه يتقبلها منها😊

وكانت الكعبة هي أول بيت لله في الأرض وبعد بنائها بأربعين سنة تم بناء المسجد الأقصى على يد يعقوب عليه السلام،
"إِنَّ أَوَّلَ بَيْتٍ وُضِعَ لِلنَّاسِ لَلَّذِي بِبَكَّةَ مُبَارَكًا وَهُدًى لِلْعَالَمِينَ "

في خلاف بين العلماء على مين إللي بنى البيت الحرام 🤔
في علماء قالوا إنهم الملائكة ...
وفي فريق قال إن إللي بناها إبراهيم وإسماعيل ومعاهم أدلتهم،
وفريق ثالث قال لأ ...ده القواعد -الأساس يعني- بتاع البيت الحرام موجود من أيام آدم عليه السلام، وإبراهيم وإسماعيل حفروا لحد ما وصلوا للقواعد وبنوا عليها وبردو معاهم أدلتهم،
أنا شخصيا مقتنعة بالرأي التالت الأخير ده، لإن إبراهيم عليه السلام قال:
"رَّبَّنَا إِنِّي أَسْكَنتُ مِن ذُرِّيَّتِي بِوَادٍ غَيْرِ ذِي زَرْعٍ عِندَ بَيْتِكَ الْمُحَرَّمِ"
والبيت مكنش لسه اتبنى🤷‍♂️
وكمان ربنا قال :
"وَإِذْ يَرْفَعُ إِبْرَاهِيمُ الْقَوَاعِدَ مِنَ الْبَيْتِ وَإِسْمَاعِيلُ"
يعني القواعد كانت موجودة من الأول وإبراهيم وإسماعيل عليهما السلام كملوا البناء عليها،

☆في التعليقات هتلاقوا الرابط بتاع الأقوال والأدلة بتاعتهم لو حد عايز يعرف أكتر👇

¤في هنا سؤال منطقي

#قصص_الأنبياء
#الحلقة_السابعة_عشرة
#قصة_إبرهيم(٧)
#الجزء_الأخير

بعد ما إبراهيم عليه السلام بنى الكعبة مع إسماعيل عليه السلام رجع إلى فلسطين لزوجته سارة وكانت قد ولدت إسحاق عليه السلام،
في يوم من الأيام طلب إبراهيم عليه السلام من ربنا طلب،
قاله يارب أَرِني كيف تحيي الموتى، فربنا سأله:
أَوَلم تُؤمن؟
يعني مش انت خلاص آمنت بي،

فإبراهيم عليه السلام قال: طبعا مؤمن ...بس عايز قلبي يبقى مطمن.
"وَإِذْ قَالَ إِبْرَاهِيمُ رَبِّ أَرِنِي كَيْفَ تُحْيِي الْمَوْتَىٰ ۖ قَالَ أَوَلَمْ تُؤْمِن ۖ قَالَ بَلَىٰ وَلَٰكِن لِّيَطْمَئِنَّ قَلْبِي"

☆يعني إيه الكلام ده🤨👆
في حاجة اسمها علم اليقين وحاجة تانية اسمها عين اليقين😊
علم اليقين يعني أكون عاااارف ومتأكد مثلا إن الجنة والنار حق، وإن ربنا هو إللي خلقنا وخلق الكون،
زي عمر بن الخطاب رضي الله عنه لما قال: لو شفت الجنة والنار حالا وأنا في الدنيا إيماني مش هيزيد حاجة، لأنه متأكد من وجودها👌

عين اليقين بقى إن الإنسان يشوف بعينه 😁
يعني إحنا مؤمنين بالصراط وبالميزان وبعلامات يوم القيامة،
لما نشوفها يبقى إحنا انتقلنا من مرحلة علم اليقين لعين اليقين😊
وهو ده إللي إبراهيم عليه السلام طلبه من ربنا...هو عنده علم يقين إن ربنا هو إللي بيميت ويُحيِي ...لكن عايز ينتقل لمرحلة أعظم وهي عين اليقين إنه يشوف بعينيه...فاهمين😅

عارفين زي إيه مثلا🤔
لما تكون عايز تعمل حاجة معينة وتطلب من ربنا إنه يديك علامة كده إن الحاجة دي كويسة،
يعني لو بتقدم على وظيفة وانت عايزها مثلا..أو عايز تدخل كلية معينة وإنت عارف إنها مناسبة ليك بس بتكون عايز حاجة كده تطمنك،
أهه ده تقريبا الإحساس إللي كان عايزه إبراهيم عليه السلام ،
هو كان موقن بقدرة ربنا على إحياء الموتى بدليل إنه قال: 《أرني كيف》 يعني سأل عن الكيفية مش عن الإحياء نفسه👌
فهو لم يشك لحظة على قدرة ربنا في إحياء الموتى....بس هو حب يشوف بعينه كمان ...يعني بطبيعة البشر إللي بيكونوا عايزين يشوفوا حاجة اتحكى لهم عنها،
يعني مش ساعات حد ييجي يحكيلك على حاجة هتحصل زي حفلة مثلا أو زفاف أو مثلا جالك خبر ثقة برجوع حد من حبايبك من السفر...أو... أو..
مش انت بتكون متشوق ونفسك تشوف ده بعينك دلوقتي حالا عشان تطمن اكتر😁
أهه ده نفس الموضوع تقريبا👌

فربنا استجاب لطلبه وقال له: خذ أربعة طيور واذبحهم وقطعهم واخلطهم على بعض وبعدين وزع الخليط ده على كذا جبل بحيث كل جبل يكون عليه جزء...
عايزاكم تتخيلوا كده معايا ...أربعة فرخات مثلا مذبوحين قصادك قطعتهم وخلطتهم وحطتهم في كيس ...تعرف تطلع أنهو جزء بتاع أنهي فرخة 🙃
مستحيل طبعا😅
بعد ما إبراهيم عليه السلام نفّذ كل ده،
ربنا قال له : نادي عليهم هتلاقيهم جايين ليك.
"قَالَ فَخُذْ أَرْبَعَةً مِّنَ الطَّيْرِ فَصُرْهُنَّ إِلَيْكَ ثُمَّ اجْعَلْ عَلَىٰ كُلِّ جَبَلٍ مِّنْهُنَّ جُزْءًا ثُمَّ ادْعُهُنَّ يَأْتِينَكَ سَعْيًا"
وبكده شاف إبراهيم عليه السلام معجزة إحياء الموتى أمامه😊

دين إبراهيم عليه السلام ودين كل الأنبياء هو الإسلام،
"إِنَّ الدِّينَ عِندَ اللَّهِ الْإِسْلَامُ"
والإسلام معناه الإستسلام لأوامر لله، وتوحيد الله بالعبادة،
ممكن الشرائع تختلف إللي هي الحلال والحرام ...
يعني يكون عندنا حاجات حرام كانت حلال في الشرائع إللي قبلنا،
لكن عموميات الحرام واحدة تقريبا زي تحريم القتل والسرقة والكذب والظلم...الخ
فاللي بيختلف بيكون بعض التشريعات من زمن لزمن،
إنما الأصل واحد وهو توحيد الله بالعبادة ،
حتى في اليهودية والنصرانية...لكن أهل الكتاب حرفوا العقيدة زي ما هنقول إن شاء الله لما يبجي وقتها👌

نرجع لإبراهيم عليه السلام،
كان إبراهيم عليه السلام يدعو إلى الله في منطقة فلسطين وما حولها ويعلم الناس الدين،
وزي ما أُنزل على محمد ﷺ القرآن،
أُنزل على إبراهيم عليه السلام الصّحُف،
وكانت عبارة عن مواعظ وحِكم وعِبر، وأُنزلت عليه في أول ليلة من ليال رمضان،
وإبراهيم عليه السلام كان هو أول من اخْتَتَن وكان عمره ثمانين عام،
يُقال أن إبراهيم عليه السلام عاش مئتي سنة وفي قول إنه عاش ١٦٠ سنة، وكان قد تزوج بعد موت سارة وأنجب ٦ أبناء،
فيكون مجموع أبناء إبراهيم عليه السلام مع إسماعيل وإسحاق عليهما السلام ثمانية أبناء،
واحنا منعرفش حاجة عن باقي أبناء إبراهيم عليه السلام،
نعرف فقط عن إسماعيل وإسحاق،

ربنا جعل في ذرية إبراهيم عليه السلام النبوة والرسالة...
إسماعيل عليه السلام هيكون في ذريته محمد ﷺ 😊
وإسحاق عليه السلام هيكون في ذريته باقي الأنبياء....يعقوب ويوسف وداود وسليمان وأيوب ويونس و....و...
ومات إبراهيم عليه السلام ودُفن في مدينة الخليل المعروفة اليوم، في مغارة كان اشتراها ودفن فيها زوجته سارة،
وإللي تولى دفنه هو إسحاق وإسماعيل عليهما السلام.

كان إسماعيل عليه السلام رسول لقبيلة جُرهم إللي اتكلمنا عنها قبل كده وقلنا إنها جت سكنت عند الكعبة لما تفجر ماء زمزم،
وكان ر

#قصص_الأنبياء
#الحلقة_الثامنة_عشرة
#قصة_شعيب

بعد هلاك قوم لوط إللي تكلمنا عليهم قبل كده؛ بعد كم سنة في مكان قريب منهم كان في قبيلة اسمها مَديَن، أهل مدين دول كانوا ناس كفار بيعبدوا شجرة اسمها الأَيْكة،
وكانوا من أسوأ الناس معاملة 😑
لما يكونوا بيبيعوا حاجة بيُقللوا الميزان لمصلتحهم،
أو يبيعوا مثلا القماش ناقص بفلوس زيادة، يعني يبيعوا ٩٠سم قماش بسعر متر،
لكن لما هم إللي يشتروا بياخدوا زيادة عن حقهم ...يعني ياخدوا بالزيادة ويدفعوا بالناقص.

☆ولو بصينا في حياتنا هنلاقي ناس كتير بتعمل كده إلا من رحم الله،
لما تيجي تشتري حاجة تلاقيها عمالة تفاصل وتفاصل لحد ما تبخس ثمن الحاجة وتجيبها الأرض😅
لكن تعالوا شوفوهم لما يكون فيها مصلحتهم تلاقيهم بيزودوا السعر ويحلفوا بالله كذب عادي جدا إن الحاجة دي سعرها كده😑
ودول اللي ربنا قال عنهم في القرآن "المُطَفّفِين" وتوعّدهم بالويل والعياذ بالله😞

وكان أهل مدين قطّاعين طُرق...بيطلعوا على الطريق ويخوّفوا المسافرين وياخدوا أموالهم وحاجتهم، كانو بأفعالهم أشبه بقوم لوط،
فلأن ربنا رحيم ومش بيعذب حد ولا يُهلكه إلا لما يبعتله حد يُذكره ويُوعظه ويُنبهه، ربنا أرسل لهم واحد منهم اسمه شعيب.
"وَمَا كُنَّا مُعَذِّبِينَ حَتَّىٰ نَبْعَثَ رَسُولًا"
شعيب عليه السلام كان زيه زي باقي الأنبياء لم يعبد صنم أبدا ولم يكفر بالله أبدا...كلهم على الفطرة...
يعني كل إنسان ربنا بيخلقه بيكون على فطرة الإسلام والتوحيد،
وبعدين بقى يبدأ التغيير فيه من إللي حواليه وخصوصا الأب والأم إللي ليهم التأثير الأكبر على عقيدة الطفل،
فالأنبياء والرسل ربنا حفظهم بفطرتهم لحد ما تجيلهم الرسالة😊
فربنا أوحى لشعيب عليه السلام إنه هيكون رسول لقومه عن طريق جبريل فجبريل عليه السلام هو المَلك المسؤول عن تبليغ الوحي للأنبياء،
ويُقال إن شعيب عليه السلام من ذرية إبراهيم عليه السلام لكن مفيش دليل على كده،
وخصوصا إن شعيب عليه السلام من الأنبياء العرب العاربة إللي رسول الله ﷺ ذكرهم في الحديث، إن الأنبياء العرب أربعة، وإبراهيم عليه السلام مكنش عربي وأول عربي مُستعرِب هو إسماعيل عليه السلام👌

عالعموم نسبه مش هيفيدنا بشيء.. لأنه لو كان هيفيدنا كان ربنا قالنا سواء في القرآن أو في السنة،
فربنا دايما بيقولنا على الحاجات إللي هتنبني عليها حاجة مفيدة لينا،
لكن الحاجة إللي مش هتفيدنا مش بيذكرها زي مثلا مرات إبليس اسمها إيه ولّا هو متزوج أصلا ولّا لأ🤓

فاللي يهمنا إن شعيب عليه السلام نبي مرسل لقوم مدين إللي كانوا قريبين من مكان وزمان قوم لوط،
"وَإِلَى مَدْيَنَ أَخَاهُمْ شُعَيْبًا "

أول حاجة دعاهم ليها كعادة الأنبياء زي ما قبل كده
هي:
إنهم يعبدوا الله وحده...ربنا إللي خلقهم وبيرزقهم وبيشفيهم إذا مرضوا ملوش شريك ولا له ولد هو الخالق الوحيد للكون ده،
ونصحهم إنهم يوفوا المكيال ويرجعوا للناس أموالهم، وميخدوش زيادة عن حقهم ...ورزق ربنا أحسن لهم من إنهم ياخدوا أموال الناس بالباطل.
"قَالَ يَاقَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ قَدْ جَاءتْكُمْ بَيِّنَةٌ مِنْ رَبِّكُمْ فَأَوْفُوا الْكَيْلَ وَالْمِيزَانَ وَلَا تَبْخَسُوا النَّاسَ أَشْيَاءهُمْ ولاَ تَعْثَوْا في الأرضِ مُفْسِدِين"

ربنا إللي بيرزق و بيبارك في الأموال، لو انتم مشيتم في طريق غلط لجمع الأموال دي ربنا مش هيبارك وهتفتقروا،
فالحلال فيه بركة حتى لو كان قليل، والحرام هيفنى سريعا ويَمحقُه الله حتى لو كان كثير،
"بَقِيَّةُ اللَّهِ خَيْرٌ لَكُمْ إِنْ كُنْتُمْ مُؤْمِنِينَ وَمَا أَنَا عَلَيْكُمْ بِحَفِيظٍ"

وأنا بعمل إللي بقولكم عليه...مش بقولكم على الحاجة وأعمل عكسها، أنا كل إللي عايزه هو الإصلاح على أد ما أقدر وأعمل إللي عليّ والتوفيق من عند ربنا.
"وَمَا أُرِيدُ أَنْ أُخَالِفَكُمْ إِلَى مَا أَنْهَاكُمْ عَنْهُ إِنْ أُرِيدُ إِلَّا الْإِصْلَاحَ مَا اسْتَطَعْتُ وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ"

☆ودي الدعوة إلى الله بالقدوة👌
لما تحب تدعي حد حاول تكون قدوة في إللي بتدعي ليه الناس على أد ما تقدر لأن ده بيكون أكثر تأثيراً في قلوب الناس،
بتدعي الناس للصدق كُن صادق...بتدعي الناس لمساعدة الغير إنت كمان ساعد غيرك وهكذا،
لكن مش معنى كده إننا نسيب الدعوة بحجة إننا مش بعمل إللي بنقوله أو لأننا أصحاب ذنوب😅
كلنا مش معصومين وأكيد بنقع في أخطاء وتقصير وزلات
بس بنجاهد نفسنا إننا نعمل إللي بندعي الناس بيه، فمتوقفش دعوة الناس للخير مهما كنت على ذنوب، أو بتتعرض لعثرات في طاعتك،
لعل ببركة دعوتك دي ربنا يرزقك العمل بيها في يوم من الأيام👌

المهم، قوم شعيب قالوا له:
هي الصلاة إللي إنت بتصليها هي إللي أمَرِتك إننا نسيب عبادة الأَيْكة إللي كان بيعبدها آباؤنا أو نعمل في فلوسنا إللي إحنا عايزينه 🙄
ده إيه الصبر والبصيرة إللي إنت فيها دي😏
احنا كنا عارفينك أعقل وأَرشد من كد

#قصص_الأنبياء
#الحلقة_التاسعة_عشرة
#قصة_إسحاق_يعقوب_يوسف(١)
#الرؤيا_والمَكِيدة

قلنا قبل كده إن إبراهيم عليه السلام ربنا بشّره بابنه إسحاق على لسان الملائكة لما كانوا رايحين يُهلكوا قوم لوط،
فإسحاق هو الابن الثاني لإبراهيم عليه السلام
اتولد بعد إسماعيل عليه السلام بحوالي ١٣ سنة،
"وَبَشَّرْنَاهُ بِإِسْحَاقَ نَبِيًّا مِنَ الصَّالِحِينَ "
مفيش كلام كتير عنه في القرآن والسنة، هو كان نبي على نفس شريعة إبراهيم عليه السلام،
وكان عنده ولدين: يعقوب والعِيص، والإتنين كانوا بارّين بأبوهم،
زوجة إسحاق عليه السلام قالت لابنها يعقوب إنه يروح عند خاله واسمه "لَابان"
ويقعد عنده في مدينة حَرّان وهي موجودة حاليا في شرق تركيا،
مسافة السفر كانت طويلة فكان بينام في الليل في الطريق،
فنام على صخرة وشاف رؤيا ،
شاف إن ربنا بيكلمه وبيقوله إنه هيُكَثَّرُ له في ذريته،
يعني ذريته هتبقى كتيرة وربنا هيبارك له فيها وهتكون الأرض دي له هو وذريته،
استيقظ يعقوب عليه السلام من النوم وحط علامة على الحجر إللي كان نايم عليه عشان يعرف الأرض إللي ربنا قاله إنها هتكون له هو وذريته وسمى المكان ده "بيت إِيل"،
وكلمة إِيل في لغتهم معناها الله...
و"بيت إِيل" يعني بيت الله،
فقال إنه هيبني في المكان ده بيت لربنا،
وإسرا معناها عبد وإسرائيل معناها عبد الله، ده في لغتهم هم😅
لكن احنا ماينفعش نسمي ربنا في شريعتنا الإسلامية العربية بإيل لأن أسماء الله في شريعتنا الخاتمة توقيفية،
يعني ربنا عز وجل هو إللي يقولنا عليها، زي الرحمن والرحيم والعزيز و....و...فمينفعش احنا نخترع اسم ونسمي ربنا بيه 👌
المهم،
يعقوب عليه السلام كمّل طريقه ووصل عند خاله واستقر عنده مدة طويلة،
طلب من خاله إنه يتزوج بنته واسمها "راحِيل"
فقاله موافق بس بشرط إنك تشتغل عندي سبع سنين،
فقاله ماشي وبعد السبع سنين زوّجه بنته الكبيرة "لِيَا"🤓
فقاله يا خالي أنا عايز راحيل مش لِيا فقاله عندنا ماينفعش الصغيرة تتزوج قبل الكبيرة،
فقاله بس أنا عايز راحيل😳
قاله مفيش مشكلة اشتغل عندي سبع سنين تانية وأزوجك راحيل😊
ففعلا اشتغل عنده سبع سنين تانية وبعدين تزوج من راحيل.

¤كان في شريعتهم عادي إن الرجل يجمع في الزواج بين أختين.
وقعد عند خاله ست سنين كمان لحد ما أتم عنده عشرين سنة،
وكان بيرعى الغنم وربنا فتح عليه في الرزق وبقى عنده أموال كثيرة،
ربنا رزقه بستة أبناء من لِيا،
وراحيل مخلفتش،
فلما يئست إنها مش هتخلف أهدت يعقوب عليه السلام جارية لها عشان يتزوجها فالجارية دي خلّفت ليعقوب عليه السلام ولدين،
تسكت "لِيا" 😅
لأ طبعا😅
راحت هي كمان أهدت يعقوب عليه السلام جارية عشان يتزوجها فخلفت هي كمان ولدين،

☆زمانكم مستغربين إيه الناس دي😳😅
هو عادي كده الواحدة تدي لزوجها امرأة تانية 🤐
طبعا الزمن والتربية بيختلف، يعني احنا أجيال اتربينا على رفض الزوجة التانيةنفسيا -مش شرعا طبعا وإلا يبقى كفر والعياذ بالله-
واتربينا على إنها خطافة الرجالة ونظرة الناس لده فيها حرج وشماتة و...و...،بعكس الأزمنة إللي فاتت،
وكمان إنتشار الجواري في الأزمنة إللي فاتت كان مخلي الأمور طبيعية أكتر من كده، فأكيد طبعا لازم نستغرب من النساء بتوع زمان😅

فيعقوب عليه السلام اتولد له دلوقتي عشر أبناء...
لكن راحيل مخلفتش، فيُذكر إنه دعا الله أن يرزقه ولد من راحيل وهي كمان دعت، فربنا رزقها بيوسف وبينيامين،
بعد ما أتم يعقوب عليه السلام عشرين سنة عند خاله قرر إنه يرجع عند أبوه إسحاق وأمه وأخاه، فرجع فعلا لأهله واستقر معاهم،
رجع يعقوب عليه السلام للمكان إللي حط عنده العلامة وبنى هناك بيت المقدس، وكان ثاني بيت لله في الأرض،
البيت الأول كان الكعبة والتاني هو بيت المقدس،
ورجع قعد مع أبيه إسحاق ومات إسحاق عليه السلام بعد مدة وقيل إنه مات وهو عنده ١٨٠ سنة،

☆طبعا الأسماء والأحداث👆 التفصيلية دي من الإسرائيليات التي لا نصدقها ولا نكذبها واحنا كنا اتكلمنا في أنواع الإسرائيليات قبل كده والمقبول منها والمرفوض منها لو تفتكروا،
وأهل التفسير ذكروا التفاصيل دي عشان نفهم السياق المبدئِي والتخيلي للقصة ماشي إزاي 👌

يعقوب عليه السلام اتولد له ١٢ ولد، واختلف أهل العلم هل أبناؤه دول هم الأسباط ولّا لأ🤔
والأسباط معناها ذرية الإنسان
سواء أبناؤه مباشرة أو أحفاده أو أحفاد أحفاده المهم إنهم من ذرية الإنسان،
" قُلْ آمَنَّا بِاللَّهِ وَمَا أُنزِلَ عَلَيْنَا وَمَا أُنزِلَ عَلَىٰ إِبْرَاهِيمَ وَإِسْمَاعِيلَ وَإِسْحَاقَ وَيَعْقُوبَ وَالْأَسْبَاطِ ،
وَمَا أُوتِيَ مُوسَىٰ وَعِيسَىٰ وَالنَّبِيُّونَ مِن رَّبِّهِمْ لَا نُفَرِّقُ بَيْنَ أَحَدٍ مِّنْهُمْ وَنَحْنُ لَهُ مُسْلِمُونَ"
والصحيح إن أبناء يعقوب عليه السلام مش الأسباط لأن الأسباط كانوا كلهم أنبياء،
وأفعال أبناء يعقوب عليه السلام مع أخوهم يوسف زي ما هنشوف مش أخلاق أنبياء حتى قبل الرسالة👌

في يوم من الأيام جه ليعقوب عليه السلام ابنه الصغي

#قصص_الأنبياء
#الحلقة_العشرون
#قصة_يوسف(٢)
#يوسف_وامرأة_العزيز

وقفنا المرة إللي فاتت عند إخوة يوسف عليه السلام لما أقنعوا أبوهم يعقوب أنهم يأخذوا يوسف معاهم وهم خارجين في نزهة،
تاني يوم فعلا إخوة يوسف عليه السلام أخدوه لمكان البئر
ومسكوه عشان يرموه
فقال لهم: أنا أخوكم إزاي هتعملوا فيَّ كده😥!
قالوا له: إنت ملكش ذنب، الذنب ذنب أبوك
وقلّعوه القميص ورموا أخوهم يوسف فعلا في البئر😶!
"فَلَمَّا ذَهَبُوا بِهِ وَأَجْمَعُوا أَنْ يَجْعَلُوهُ فِي غَيَابَةِ الْجُبِّ "
الموقف صعب...
شباب بالغين يرموا طفل صغير عمره حوالي عشر سنين في بئر وكمان أخوهم!!
تخيل ابنك ولا أخوك ولا أي طفل بتحبه في الموقف ده😳
والطفل ده كانت مشاعره إيه في موقف زي كده؟؟، طيب فين عقلهم ؟؟!!..
فين خوفهم من ربنا ...؟؟! ما هم مؤمنين بالله خدوا بالكم مش كفار😅
وأبناء نبي...يعني تربيتهم مش زي أي تربية👌

لكن سبحان الله هم في النهاية بشر خطاؤون.. بيغويهم الشيطان وبتغويهم أنفسهم وشهواتهم زي أي بشر،
الغيرة والحسد عموا قلوبهم والشيطان مش سايبهم😑
في اللحظة دي ربنا أوحى ليوسف عشان يهوِّن عليه خوفه وألمه إنه في يوم من الأيام انت هتحكي لاخواتك الموقف ده وهم مش عارفينك،
"وَأَوْحَيْنَا إِلَيْهِ لَتُنَبِّئَنَّهُمْ بِأَمْرِهِمْ هَذَا وَهُمْ لَا يَشْعُرُونَ"
وده من لطف ربنا بالعباد...بيبتليهم لكن في نفس الوقت يبعتلهم رسايل تطمنهم وتهدي من حرقة قلبهم،
وإن كان المُوَفَّق هو إللي ربنا يخليه يشوف اللُّطف ده، فالمُوَفق أكثر هو إللي ربنا يخليه يشكره على لطفه وسط محنته، وما يبقاش عبد كفور وساخط بسبب الألم ومش شايف اللّطف والرحمة والعافية في باقي الأمر👌

بعد كده إخوة يوسف عليه السلام أخدوا قميصه وغرّقوه دم خروف كانوا دبحوه،
ورجعوا بالليل لأبوهم ودخلوا عليه يقولوا له وهمّ بيعيطوا قال يعني بقى قلبهم حزين وكده🙄
احنا رحنا نتسابق وسيبنا يوسف ياخد باله من الحاجات بتاعتنا فالذئب هجم عليه وأكله😭😭
وطبعا انت مش هتصدقنا...انت دايما بتتهمنا بالكذب😤

☆فكإنهم بيحرجوا أبوهم عشان يصدقهم يعني😏

"وَجَاءُوا أَبَاهُمْ عِشَاءً يَبْكُونَ *قَالُوا يَا أَبَانَا إِنَّا ذَهَبْنَا نَسْتَبِقُ وَتَرَكْنَا يُوسُفَ عِنْدَ مَتَاعِنَا فَأَكَلَهُ الذِّئْبُ وَمَا أَنْتَ بِمُؤْمِنٍ لَنَا وَلَوْ كُنَّا صَادِقِينَ"

◇طيب اشمعنى قالوا الذئب ومقالوش حاجة تانية🤔
لإن يعقوب عليه السلام كان خايف من الذئب أصلا فكإنه إدالهم حجة مقنعة ،
يعني إللي انت كنت خايف منه حصل، ما بنقولش كلام مستحيل يتصدق يعني😅
فقالوا له لو عايز دليل؟ شوف الدليل أهه👈
مش ده قميص يوسف😤؟
قالهم: أيوة قميص يوسف!
قالوا: شوف القميص مليان دم أهه إزاي😤
"وَجَاءُوا عَلَى قَمِيصِهِ بِدَمٍ كَذِبٍ "
قال لهم انتم كذابين ...انتم عملتم حاجة في يوسف...هو يعني الذئب أكل يوسف وغَرَّق قميصه دم من غير ما القميص يتقطع نهائي كده😐

☆ودي من ضمن نعم ربنا علينا في الدنيا الحمد لله👌
إن مفيش جريمة كاملة 💁‍♂️
كل مجرم لازم يسيب وراه حاجة تفضح جريمته، ولو بعد حين مهما طال الزمن وسواء حد اكتشفها أو لأ 👌

المهم،
يعقوب عليه السلام واجههم بكذبهم وبالدليل عليه .. وقال لهم أنا هصبر على البلاء ده وهستعين بالله يُصبّر قلبي على الألم إللي أنا حاسس بيه وعلى الخذلان والإيذاء إللي شوفته منكم 😔
"قَالَ بَلْ سَوَّلَتْ لَكُمْ أَنْفُسُكُمْ أَمْرًا فَصَبْرٌ جَمِيلٌ وَاللَّهُ الْمُسْتَعَانُ عَلَى مَا تَصِفُونَ"

☆تخيل أحب الناس إليك: ابنك ..زوجك.. أمك... أبوك..
فجأة اختفى ومش عارف عنه حاجة...!
قلبك هيكون عامل إزاي ومفيش في إيدك حاجة تعملها فعلا إلا الدعاء والصبر؟
لكن يكفيك ساعتها إن الله يعلم، ويلطف ويرحم ويستجيب.. وقريب من الصابرين والمؤمنين...
يكفيك إنك تعرف إنه بحكمته وعلمه الواسع هيدبر أمره وأمرك وهيرضيك، طالما انت راضي وحامد وصابر،
هو إللي قدّر كده وأَذِن إن ده يحصل بقدرته وحكمته وعلمه...يعلم كل شيء سبحانه...
هو فيه حاجة بتحصل في الكون إلا بقدره وعلمه وحكمته،؟!
يبقى لما ينزل بيك أي بلاء تعمل إييييه؟
تروح لربنا إللي قدَّره عليك،
وتدعوه وتتقرب له بكل يقين وإخلاص وبدون ملل أو كلل أو يأس وهو عز وجل يرفعه عنك حتى لو كنت صاحب معاصي ...
حتى لو كنت بعيد عنه عز وجل كل البعد 👌
مانت مالكش غيره.. وهو ابتلاك أصلا عشان تنتبه وتفوق وترجع ...
عشان تصلح...
عشان يفكرك إنه عز وجل موجود وبيغفر الذنب
وانك حتى لو مَلِيت الأرض كلها خطايا ، بس رجعت له في الآخر واستغفرت هيغفر لك،
ربنا مش يبتلي عشان يعذب...
"ما يفعلُ اللَّهُ بِعَذَابِكُمْ إِنْ شَكَرْتُمْ وَآمَنْتُمْ "
"ما يريدمَا يُرِيدُ اللَّهُ لِيَجْعَلَ عَلَيْكُم مِّنْ حَرَجٍ وَلَٰكِن يُرِيدُ لِيُطَهِّرَكُمْ وَلِيُتِمَّ نِعْمَتَهُ عَلَيْكُمْ لَعَلَّكُمْ تَشْكُرُونَ "
ابتلاءك مهما طال فهو إما تكفير سيئات أو رفع درجات أو اختبار،
وكلهم تزكية ليك في كل ال

#قصص_الأنبياء
#الحلقة_الحادية_والعشرون
#قصة_يوسف(٣)
#دخول_السجن

قبل ما نكمل باقي القصة، فيه نقطة مهمة لازم نعرفها في تفسير آية:
"وَلَقَدْ هَمَّتْ بِهِ وَهَمَّ بِهَا لَوْلَا أَنْ رَأَى بُرْهَانَ رَبِّهِ "
لأن في ناس ومنهم أهل الكتاب اتّهمت يوسف عليه السلام وقالوا كان هيعمل الفاحشة مع امرأة العزيز وكلام كتير كده😑
معنى الآية إن امرأة العزيز أرادت فعل الفاحشة لما ربنا قال: "وَلَقَدْ هَمَّتْ بِهِ"
ولكن يوسف عليه السلام مجاش في باله حتى إنه يطاوع امرأة العزيز، يعني حتى نفسه ما اشتهتش الفاحشة كطبيعة بشرية ،
يعني هو كرجل أعزب وهي كامرأة ذات منصب وجمال وتدعوه لفعل الفاحشة،
فكأي نفس بشرية على الأقل يفكر ولو للحظة في الموضوع
ومع ذلك يوسف عليه السلام مجاش في باله أصلا إنه يستحيب لفعل الفاحشة، بسبب برهان ربه👌
والبرهان ده حاجة ربنا خلّاه يشوفها، ومفيش فيها نص واضح هي عبارة عن إيه،
وورد فيها كلام كتير من أهل الكتاب،
وفي مفسرين قالوا إن البرهان ده هو الإيمان إللي ربنا ألقاه في قلب يوسف عليه السلام وكان سبب في عصمته من الوقوع في الفاحشة، والله أعلم..
وقالوا إن ربنا أوحى ليوسف عليه السلام إنه يهرب، لإن مفيش قصاده حل تاني 👌
ففي الآية ربنا بيقول:
"وَهَمَّ بِهَا لَوْلَا أَنْ رَأَى بُرْهَانَ رَبِّهِ"
فلولا برهان ربه -إللي هو الإيمان- موجود في قلبه،
أو الوحي إللي جاله ،
كان زمانه على الأقل نفسه الأمارة بالسوء هتدعوه لفعل الفاحشة وهو يقاومها مثلا ويجاهدها حتى لا تَغلبه مثلا،
لكن يوسف عليه السلام مجاش أصلا على باله ولو ثانية حتى إنه يفعل الفاحشة👌
زي مثلا لما تقول: كان زماني متلج من البرد لولا إني لبست هدوم تقيلة،
فانت مش متلج ولا حاجة؛ لإنك لابس هدوم تقيلة بالفعل ولولاها إنت كنت تلّجت💁‍♂️

نرجع بقى لنسوة المدينة إللي سمعوا باللي عملته امرأة العزيز مع يوسف قالوا إيه😈
قالت النساء : إلحقوا 🤭
مرات العزيز تراوِد العبد بتاعها عن نفسه لفعل الفاحشة وهو مش راضي😏
معقولة حبها ليه وصل للدرجة دي🤭
ده إيه الضلال إللي هي فيه ده😏
وبقت هي حديث النساء في المدينة بالمنظر ده،
"وَقَالَ نِسْوَةٌ فِي الْمَدِينَةِ امْرَأَةُ الْعَزِيزِ تُرَاوِدُ فَتَاهَا عَنْ نَفْسِهِ قَدْ شَغَفَهَا حُبًّا إِنَّا لَنَرَاهَا فِي ضَلَالٍ مُبِينٍ"

طب كان رد فعل امرأة العزيز إيه ؟
ربنا بيقول:
"فَلَمَّا سَمِعَتْ بِمَكْرِهِنَّ" مقلش فلما سمعت قولهن،
مع إن ظاهر كلام النساء إنه كلام وأقوال عادية😕

لكن ركزوا معايا كده شوفوا كمية المكر إللي في السطرين دول😮
أول حاجة قالوا (امرأة العزيز) يعني :
يا شيخة اتكسفي على دمك انتِ مكانتك مش زي مكانة أي حد😏
وكمان انتِ امرأة متزوجة...يعني لو واحدة مش متزوجة كنا إلتمسنالك العذر🙄
وكمان بتراود مين ؟ فتاها.. عبد يعني ..مش حر ... وإللي زيك تراود واحد من مستواها...ملك ...وزير.. واحد من الطبقة الراقية ..مش عبد😑!
وكمان هي إللي بتراوده عن نفسه مش هو!!...
يعني لو هو إللي بيراود وهي قَبِلت كان ممكن نعديها لكن هي إللي بتراود،
وقالوا تراود فعل مضارع يدل على الإستمرار يعني هي لسه مستمرة مش راودت وخلاص مرة وتابت،
يعني كإنهم بيعايروها وبيقولوا عنها:
"إيه المهانة إللي هي حطت نفسها فيها دي، للدرجة دي هي ضعيفة قدامه؟!😏
احنا مستحيل نوصل للضلال إللي هي فيه ده😤
وكمان من المكر إنهم قالوا الكلام ده من ورا ضهرها.. غيبة يعني😅
وطبعا هم عارفين إن الكلام هيوصل لإمرأة العزيز،
وهم عايزين يشوفوا يوسف عليه السلام وهم كانوا سمعوا عنه بس، وده برده من مكرهن ،
يعني قالوا الكلام ده عشان امرأة العزيز تغضب وتخليهم يشوفوه عشان تدافع عن نفسها👌

☆متخيلين إن العلماء قعدوا يفسروا ويتدبروا عشان يطلعوا التفسير ده من خلال السطرين دول وامرأة العزيز مجرد ما سمعت كلامهم فهمت على طول مكرهم، والأعجب بقى إللي هي هتعمله فيهم😈

كان إيه رد فعل امرأة العزيز بقى💁‍♂️
امرأة العزيز بعتت لهم دعوة عشان ييجوا يزوروها 😊
وفعلا جاءوا وحضّرت مجلس يكونوا فيه قاعدين ومرتاحين وآخر انبساط،
ظاهر الموضوع إنها بتكرمهم😏
"أَرْسَلَتْ إِلَيْهِنَّ وَأَعْتَدَتْ لَهُنَّ مُتَّكَأً.. وَآَتَتْ كُلَّ وَاحِدَةٍ مِنْهُنَّ سِكِّينًا.."
يعني كمان قدمت لهم أكل محتاج استعمال سكاكين و أعطت كل واحدة سكينة🔪 ...
يعني ماحطتش شوية سكاكين وكل كام واحدة تستعمل سكينتها شوية وتديها للي جنبها بعدها، لأ...
كل واحدة ليها سكينة خاصة بيها،
هي عاوزة تحقق غرض معين، وبالفعل حققته بعد تخطيط ومكر ودهاء..
فهي قابلت المكر القولي بمكر عملي👌
واستعملت عنصر المفاجأة ،
فأول ما لقيتهم قاعدين مرتاحين ومش مديين خوانة وولا على بالهم أي شيء،
أمرت يوسف إنه يدخل عليهم ..
" وَقَالَتِ اخْرُجْ عَلَيْهِنَّ "!
طبعا النساء ضيوفها انتبهوا فجأة كلهم للشخص إللي داخل وفضلوا مدهوشين ومبرّقين عنيهم مش قادرين يلتفتوا عن يوسف بنظرهم إطلاقا كإنهم اتسحروا 😳

#قصص_الأنبياء
#الحلقة_الثانية_والعشرون
#قصة_يوسف(٤)
#الخروج_من_السجن

وقفنا المرة إللي فاتت عند يوسف عليه السلام لما طلب من الساقي إللي فسّر له الرؤيا إنه يحكي قصته عند الملك،
لكن الساقي نسي موضوع يوسف عليه السلام بتقدير من ربنا، وقعد يوسف في السجن حوالي من ثلاثة إلى سبع سنين، المدة بالضبط مكنتش معروفة🤷‍♂️
"وَقَالَ لِلَّذِي ظَنَّ أَنَّهُ نَاجٍ مِنْهُمَا اذْكُرْنِي عِنْدَ رَبِّكَ فَأَنْسَاهُ الشَّيْطَانُ ذِكْرَ رَبِّهِ فَلَبِثَ فِي السِّجْنِ بِضْعَ سِنِينَ"

في يوم من الأيام الملك رأى رؤيا، رأى إن فيه سبع بقرات ضعاف هزلانين بياكلوا سبع بقرات سِمان وطخان كده وحلوين😅
فقام من النوم مفزوع😳
ليه🤨
لأن الطبيعي إن القوي السمين هو إللي ياكل الضعيف مش العكس🙃
فنام تاني ورأى سبع سنبلات يابسة بيتلفّوا على سبع سنبلات خضراء وبيخلوهم يابسين زيهم، فقال باااس كده الموضوع فيه حاجة😨
"وَقَالَ الْمَلِكُ إِنِّي أَرَى سَبْعَ بَقَرَاتٍ سِمَانٍ يَأْكُلُهُنَّ سَبْعٌ عِجَافٌ وَسَبْعَ سُنْبُلَاتٍ خُضْرٍ وَأُخَرَ يَابِسَاتٍ"
جمع السحرة والكهان والوزراء وحكى لهم الرؤيا...وسألهم إيه رأيكم ؟ أنا عاوز حد يفسرلي الرؤيا دي😥
فقالوا له كلهم : رؤيا إيه بس🙄
دي أضغاث أحلام ...أوهام ....واحنا مش اختصاصنا تفسير الأحلام🤷‍♂️
احنا بنفسر الرؤى بس، لو دي رؤيا كنا فسرناها على طول😊
"قَالُوا أَضْغَاثُ أَحْلَامٍ وَمَا نَحْنُ بِتَأْوِيلِ الْأَحْلَامِ بِعَالِمِينَ"

☆يعني مش بس جهلة؛ لأ ده بيفتوا بغير علم😑
وكمان إيه، بيجزموا بكده بكل ثقة😏
يعني حتى مش شايفين احتمال إنهم ممكن يكونوا غلط🙄 لأ ده كمان ادّعوا الفضل لنفسهم:
لو كانت رؤيا كنا عرفناها😤
أمّال يعني تضيع هيبِتهم كده قدام الملك والحاشية ويبان إنهم مش عارفين😏
فالأسهل والأحسن لشكلهم إيه؟ إنهم ينكروا الموضوع كله وخلاص، وبكل ثقة كده😐
ده حتى مقالوش طب خلينا نبحث المسألة وندور، لأ ده قالوها خبط لزق كده ...دي أضغاث أحلام 😤

☆ولو أخدتم بالكم هتلاقوا النوعية دي في حياتنا
تيجي تقول له معلومة انت سمعتها من دكتور مثلا ولّا حد على علم بيها،
تلاقيه يقولك لا لا لا.. الكلام ده مش مظبوط ده كلام فارغ، الصح كذا وكذا😤
وخدوا بقى من ده كتير في الدين تلاقوا أحلى جهل وأحلى فتي🤓
تقول لواحد على حكم حاجة ولّا معلومة، يقوم يضرب بعرض الحائط العلم والأدلة ويتكلم برأيه ويقول لك لأ مش صح🙄
أصل بالعقل كده إزاي دي تيجي يعني 🤔
ده الصح كذا ..طيب يابني ابحث ودور واتأكد، ولا الهوا😶
طيب يافلان والحديث الصحيح الفلاني؟ طب الآية الصريحة الفلانية 😅
يقولك: لالا تفسيرها مش كده احنا أصلا لازم نعيد قراءة النصوص دي كلها ونحط لها تفسير عصري يناسب الناس، انتم بتفسروا الدين على مزاجكم وديننا بريء من الخرافات بتاعتكم دي😑
طيب يا سيدي كلام العلماء والأئمة الفلانية وتفسيرهم كذا كذا ده مش كلامي !
يقولك : لا العلماء دول متشددين وما وصلهمش الأحاديث إللي وصلت للي جم بعدهم😒
عمال يقاوح معاك ويفتي بالباطل في دين الله، وهو أصلا مابيعرفش يفرق بين الفاعل من المفعول أو يقرأ حتى القرآن صح 🤦‍♂️
مش فاهم إن العلماء دول بيرجعوا للصحابة والتابعين وتابعي التابعين إللي رسول الله ﷺ قال عنهم إنهم أفضل القرون على الإطلاق وبيشوفوهم فسروا الآيات والأحاديث وطبقوها إزاي في حياة النبي ﷺ وبعد وفاته وعلى الأساس ده بينقلوا عنهم،
يعني مش بيخترعوا دين جديد ولا حاجة🙄
لكن هنقول إيه😞

المهم،
مين بقى إللي كان موجود في اللحظة دي وسمع الحواااار 🤭
ساقي الملك إللي طلع من السجن ونسِي خااالص موضوع يوسف 💁‍♂️
وفي وسط القصر والملأ قاعدين والسحرة والكهنة والملك قاعد محتار،
إذ فجأةً يطلع صوت حد بيقول: أنا هقول لكم تأويل الرؤيا دي إيه🙋‍♂️
"وَقَالَ الَّذِي نَجَا مِنْهُمَا وَادَّكَرَ بَعْدَ أُمَّةٍ أَنَا أُنَبِّئُكُمْ بِتَأْوِيلِهِ "
طبعا الكل بص مين إللي بيتكلم ده! لقوه ساقي الملك🤨
وكإن نظراتهم ليه ساعتها بتقول : يعني إنت إللي هتجيب التايهة يا فالح😏
راح على طول قال لهم: ابعتوني بس للسجن.. فيه واحد هناك هو إللي هيفسر كل حاجة 👌
"فَأَرْسِلُونِ"
في اللحظة دي بس افتكر يوسف عليه السلام، وقال بكل ثقة إنه هيجيب لهم خُلاصة الموضوع، وده بسبب ثقته الشديدة في يوسف عليه السلام😊
وعلى رأي المثل: اسأل مجرب..
هو جرب بنفسه صدق تأويل يوسف للرؤى.. ده غير إنه قعد معاه فترة في السجن وعاشره بنفسه وشاف صلاحه وحسن خلقه وتقواه،
وفعلا بعتوا الساقي للسجن ودخل على يوسف عليه السلام
وأول ما بدأ كلامه مدحه وأثنى عليه، لإنه مش ناسي فعلا أد إيه يوسف كان إنسان صالح ومحترم ومن المحسنين.

فحكى له الرؤيا، وقال له إيه تفسيرها لعلي أرجع وأقول للناس عشان يعرفوا يتصرفوا إزاي وكمان عشان يعرفوا عنك وعن مكانتك وقدرك وفضلك فيكون ده سبب مُحتمل في إنك تخرج من السجن.
"يُوسُفُ أَيُّهَا الصِّدِّيقُ أَفْتِنَا فِي سَبْعِ بَقَرَاتٍ سِمَانٍ

#قصص_الأنبياء
#الحلقة_الثالثة_والعشرون
#قصة_يوسف(٥)
#التمكين

وقفنا المرة إللي فاتت عند إخوة يوسف عليه السلام لما راحوا مصر عشان يشتروا منها طعام،
كان يوسف عليه السلام بُيشرِف على أمور البيع والشراء، فَجاء إخوة يوسف ودخلوا عليه عشان يشتروا،
فلما شافهم، هو عرفهم وهم ماعرفوهوش، متخيلين الموقف 🙊
هنا يوسف عليه السلام اتعاد قصاده شريط ذكرياته كله...
وأكيد بقى قلبه بيدق وبقى فيه فوران مشاعر مختلطة،
افتكر المعاملة السيئة...افتكر رميه في البئر وتركه بلا أمان ولا أنيس..
افتكر بيعه بتمن رخيص.. وبلاؤه مع امرأة العزيز ثم مع النسوة...السنين إللي قضاها في السجن...
وفجأة يلاقي السبب في كل إللي حصله ده واقف بشحمه ولحمه قصاد عينه دلوقتي، ويفصل بينه وبين الثأر منهم لنفسه لحظات👌
"وَجَاءَ إِخْوَةُ يُوسُفَ فَدَخَلُوا عَلَيْهِ فَعَرَفَهُمْ وَهُمْ لَهُ مُنْكِرُونَ"

لكن يوسف عليه السلام معملش أي حاجة، متخيلين الثبات الانفعالي والحِلم إللي عند يوسف عليه السلام 😮
يوسف عليه السلام مسك نفسه من إنه يقول لهم انتم مش عارفيني،؟!
أنا يوسف، أنا إللي عملتم فيه كذا وكذا ودلوقتي أقدر أنتقم منكم، لكن يوسف عليه السلام معملش كده ومسك نفسه،
إحساس كبح زمام النفس ده عن إحراج الناس بالمثل، إحساس صعب فعلا وشديد وفظيع الصراحة😅
عشان كده الصفتين دول من الصفات إللي ربنا عز وجل بيحبها،
والصفتين دول لما بيكونوا في شخص بيكون فعلا رزق طيب ومهم وبتبقى من البُشْريات للعبد👌
حتى رسول الله ﷺ قال لواحد من الصحابة اسمه الأَشَج العصري:
"إن فيك خصلتين يحبهما الله، الحِلمُ والأَنَاةُ"
ربنا يجعلنا منهم ويوفقنا لكل خير يرضيه عز وجل 🤲

يوسف عليه السلام بقى عاملهم زي ما بيعامل باقي الناس بالخلق الكريم والإحسان👌
وكان من عادة يوسف في الإشراف على البيع والشراء، إنه يبيع لكل مُشتري حمولة جمل واحد فقط،
عشان يقطع الطريق على التجار إنهم ميشتروش كميات كبيرة بغرض احتكار البضاعة في السوق عشان يعلوا الأسعار على الناس بعد كده،
فإخوة يوسف كمشترين زي باقي المشترين، طلبوا منه نصيب لأبوهم وأخوهم إللي مش معاهم دلوقتي في القافلة،
فبدأ يوسف يتكلم معاهم ويعمل معاهم حوار بلهجة أهل مصر عشان مايعرفوهوش من لهجة بلده الأصلية إللي هي بلدهم عند يعقوب،
وسألهم عن بلدهم وأحوالهم من باب تلطيف الجو وتبادل الحوار بحيث إنهم يطمنوا له وكده😅
وقبل ما يسيبهم يمشوا قال لهم:
السنة الجاية تجيبوا أخوكم معاكم عشان أتأكد إنكم مش كذابين ومش واخدين نصيب نفر زيادة من غير حق😤
وقال لهم عشان يحمسهم أكتر إنهم مينسوش يجيبوه معاهم المرة الجاية:
مش إنتوا شايفين بنفسكم إزاي أنا بملا المكيال لحد آخره من غير ما بنقّص منه أو بطفّف في المكيال زي التجار الغشاشين؟
مش شفتوا بنفسكم إزاي بنحب نكرم زبايننا💁‍♂️
فاحنا في انتظاركم بقى السنة الجاية بالنفر الزيادة ده تيجوا كلكم و تاخدوا البضاعة إللي تعجبكم إن شاء الله..
وده الحوار إللي ربنا اختصره في القرآن بكل بلاغة وفصاحة ودقة وقال:
"وَلَمَّا جَهَّزَهُمْ بِجَهَازِهِمْ قَالَ ائْتُونِي بِأَخٍ لَكُمْ مِنْ أَبِيكُمْ أَلَا تَرَوْنَ أَنِّي أُوفِي الْكَيْلَ وَأَنَا خَيْرُ الْمُنْزِلِينَ"

لكن يوسف في نفس الوقت خوّفهم وقال لهم:
بس لو ماجبتوش أخوكم معاكم المرة الجاية مش هَدِّيكم حاجة خالص😤
"فَإِن لَّمْ تَأْتُونِي بِهِ فَلَا كَيْلَ لَكُمْ عِندِي وَلَا تَقْرَبُونِ"

فقالوا له هنحاول نقنع أبونا ونجيبه😥
"قَالُوا سَنُرَاوِدُ عَنْهُ أَبَاهُ وَإِنَّا لَفَاعِلُونَ"

☆ثواني كده🤨
هو إزاي يوسف عليه السلام عِرفهم وهم ماعرفهوش😳
لإن يوسف عليه السلام لما افترق عنهم كان صغير وهم كانوا كبار،
وعلى الأقل عدت حوالي عشرين سنة على يوسف
《من ساعة مافترق عنهم》، فأكيد ملامح يوسف عليه السلام اتغيرت من ملامح الطفولة لملامح الشباب،
وكمان همّ لما دخلوا عليه كانوا ضعفاء وهو عليه هيبة المُلك فهيبة المُلك ولبسه وهيئته ماخلتهمش يتعرفوا عليه بسهولة ويمكن مخلتهمش كمان يبصوا له بتأمل دقيق أو يتمعّنوا في ملامحه،
ده غير كده أصلا هم عمرهم ما يتخيلوا أبدا إن يوسف يكون في المكان ده فضلا عن إنه يكون وزير المالية إللي سيرته انتشرت في كل مكان بكل خير بسبب عبقريته الاقتصادية وحسن إدارته لخزائن مصر في زمن القحط 😶
وكمان يوسف كان مترقّب ومستني وصول إخواته من بلد أبيه يعقوب في أي وقت زيهم زي أي ناس رايحة جاية على مصر الفترة دي؛
لإن هو عارف إن القحط إللي كان في كل البلاد ده هيخليهم ييجوا عندهم لإنهم البلد الوحيد إللي عرف يوفر أكل،
فكان متوقع إنهم هييجوا، وكمان إخواته كانوا عشرة فلو ماعرفش واحد هيعرف التاني ويتأكد إنهم همّ إخوته،
بعكس الشخص الواحد مش هيركزوا معاه أوي كلهم مرة واحدة😅

رجع إخوة يوسف عليه السلام لفلسطين عند يعقوب ..قالوا له:
احنا اتمنع مننا المؤونة بتاعة السنة الجاية لإنهم اشترطوا علينا إننا نجيب أخونا معانا عشان يتأكدوا

#قصص_الأنبياء
#الحلقة_الرابعة_والعشرون
#قصة_أيوب

اتكلمنا عن قصة يوسف عليه السلام وإنه كان ابن يعقوب عليه السلام، وقلنا قبل كده إن إسحاق عليه السلام كان عنده ولدين هما يعقوب والعيص،
فكان من ذرية العيص نبي اسمه أيوب عليه السلام ودي قصتنا النهاردة إن شاء الله😊

☆لكن قبل ما نتكلم عن أيوب عليه السلام في أخت سألتني: إيه الحكمة إن ربنا أرسل يوسف عليه السلام ؟
يعني في الأمم السابقة كان الرسل بيدعوا قومهم ولو لم يؤمنوا ربنا يهلكهم، وربنا لم يهلك أهل مصر، فإيه السبب🤔

=يوسف عليه السلام كان نبيا رسولا، أُرسل لأهل مصر في زمن ملك مصر إللي أكرمه وأحسن إليه ومكّنه من خزائن مصر،
هو دعا الناس لعبادة الله والملك نفسه قرّبه إليه، فكان التركيز في القرآن على قصة حياة يوسف عليه السلام عشان نتعلم منها العِبر زي الصبر على البلاء والصبر على الأذى،
والقوة في مواجهة الفتنة، والإحسان لمن أساء إلينا، إلى آخرِه..
فلو كل الأحداث نسخة بالكربون يبقى احنا هنستفيد إيه🤷‍♂️
وربنا مش بيذكرلنا قصة إلا وهو يريد إنه يعلمنا منها حاجات جديدة من زوايا جديدة ومتنوعة👌
ده غير إن كل قصص الأنبياء السابقين إللي قومهم هلكوا كانوا بسبب إنهم كذّبوا أنبياؤَهم وطلبوا معجزات فيها تعنّت واستكبار وابتزاز وآذوا الأنبياء ،
لكن ده محصلش مع يوسف عليه السلام، فليه ربنا يهلكهم وخصوصا إنهم أكرموا يوسف والناس بتحبه وفي مجال إنهم يدخلوا في الدين؟!
والغاية أبدا مش إهلاك الناس... الغاية جعل الناس يؤمنوا بالله، فطول ماهو شغال في الدعوة والناس مش بتؤذيه وهو نفسه مدعاش عليهم خلاص...ربنا يسيبهم لعلهم يؤمنوا،
ولعل في ناس آمنت كثير بس مش ده المقصد من قصة يوسف عليه السلام،
الدروس إللي بنتعلمها من قصة يوسف عليه السلام غير الدروس إللي اتعلمناها من قصة هلاك قوم نوح مثلا أو قوم صالح...كل قصة ليها عبرة خاصة بيها، فربنا بيقولولنا إللي يفيدنا من كل قصة😊

نرجع بقى لقصة أيوب عليه السلام😁
قلنا قبل كده إن إسحاق عليه السلام كان عنده ولدين هما يعقوب والْعِيص،
فكان من ذرية العيص بن إسحاق بن إبراهيم النبي أيوب عليهم جميعًا السلام،
"إِنَّا أَوْحَيْنَا إِلَيْكَ كَمَا أَوْحَيْنَا إِلَى نُوحٍ وَالنَّبِيِّينَ مِنْ بَعْدِهِ وَأَوْحَيْنَا إِلَى إِبْرَاهِيمَ وَإِسْمَاعِيلَ وَإِسْحَاقَ وَيَعْقُوبَ وَالْأَسْبَاطِ وَعِيسَى وَأَيُّوبَ"
كان أيوب عليه السلام عنده أموال وأراضي وذرية كتير جدا،
كان عنده ١٤ ولد وبنت ، وكان عايش في أرض حُورَان في الشام مع قومه،
عاش أيوب عليه السلام في نعيم الأرض ده سبعين سنة،
وكان نبي مع النعيم ده كله....
وكان كريم جدا ...كان لو عدّى على اتنين بيتخانقوا وحلفوا على بعض بالله كان بيُصلح بينهم، ثم لمّا يروَّح بيتصدق عن حلفانهم ده من ماله الخاص تنزيهًا لاسم ربنا إن حد يحلف بيه كذب أو يحلف وميوفيش بحلفانه،
وكان يساعد الفقراء بكل كرم وسخاء ...على الرغم من كل الطاعات إللي كان بيعملها دي؛ بدأ البلاء ينزل بأيوب عليه السلام...
أبناؤه بدأوا يموتوا واحد ورا التاني🙊
الابن إللي كان بيلعب معاه وكِبر قصاد عينه، إذ فجأة داخل البيت زوجته تقوله ابنك مات😞
ياخده يغسله ويكفنه ويدفنه في القبر ويسيبه ويمشي والناس تعزيه ولسه نار قلبه مبردتش ويلاقي التاني مات😥
ويتكرر نفس الموضوع ١٤ مرة ...متخيلين؟!
ده لو حد مات له طفل ولا اتنين ولا حتى ثلاثة بيبقى هيتجنن ومش قادر😞
ده مات له ١٤ ابن ورا بعض،
ومش بس كده، ده كمان خسر أمواله كووولها😑
ثروته...والأراضي بتاعته كل حاجة ...كل حاجة بمعنى الكلمة،
ومش بس كده...ده بدأ كمان المرض ينزل عليه لدرجة مبقاش في مكان في جسمه إلا فيه مرض، ماعدا لسانه وقلبه😶
أنا عايزكم تتخيلوا معايا😦
واحد عياله كلهم ماتوا...خسر فلوسه كلها...نايم على السرير مبيتحركش...جسمه بقى مليان قُرَح... واستمر في المرض ده مش يوم ولا اتنين ولا شهر ولا شهرين...ده قعد مريض مش بيتحرك ١٨ سنة👌
إحنا الواحد فينا –ربنا يعافي الجميع- لما بيقعد في السرير كام يوم بيبقى مش طايق نفسه ومخنوق😑
ده إنسان قعد ١٨ سنة مريض بيتألم وكمان مبتلى بالحزن على فقد أولاده وفلوسه،
والمرض طول جدا لدرجة إن الناس زهقت من كتر ما بتروح تزوره،
وبِعدوا عنه وهجروه وبدأوا يتكلموا عليه،وطبعا إنتم عارفين كلام الناس😶
هَمّ تاني لوحده🙄
يعني كم واحد رجع عن طريق الإلتزام بسبب كلام الناس وكم واحدة خايفة تأمر بالمعروف وتنهى عن المنكر عشان خايفة من كلام الناس و....و.... 😑
المهم،
اتبقّى لأيوب عليه السلام اتنين أصحابه هم بس إللي استمروا يزوروه، لحد ما في يوم من الأيام وهما رايحين يزوروه واحد قال للتاني:
أكيد أيوب عمل ذنب عشان ربنا يبتليه الإبتلاء ده😤
السنين دي كلها في الإبتلاء وربنا ما بيرفعش عنه ويعافيه! أكيد عمل حاجة استحق بيها عقاب ربنا👌

☆بنسمع وبنقول الكلمة دي لبعض كتير صح😁
لما نلاقي حد ربنا بيبتليه ويبتليه ويبتليه بنقول أكيد ده عنده ذنب ف

#قصص_الأنبياء
#الحلقة_الخامسة_والعشرون
#قصة_ذا_الكفل_أصحاب_الرس_يونس

معانا النهاردة إن شاء الله ثلاث قصص قصيرة هم:
《قصة ذو الكفل وأصحاب الرّس، ويونس》

♡نبدأ بأول قصة وهي قصة ذو الكفل.

من الأنبياء إللي ربنا ذكرهم لينا ذو الكفل عليه السلام،
في علماء قالوا إنه كان فقط رجل صالح مش نبي، لكن ظاهر القرآن بيقول إنه كان نبي،
وفي علماء قالوا إنه كان ابن أيوب عليه السلام بس مفيش دليل على الكلام ده،
هو مفيش عنه أخبار كتير، بس ربنا قال عنه إنه كان من الصابرين وذكره مع أيوب وإسماعيل عليهما السلام،
"وَإِسْمَاعِيلَ وَإِدْرِيسَ وَذَا الْكِفْلِ كُلٌّ مِنَ الصَّابِرِينَ"

والكفل معناه الحِمْل، و ذا يعني "صاحب" فيبقى "ذا الكفل" معناه صاحب الحِمل أو واحد بيشيل حِمل.

◇طيب ليه اتسمى بالإسم ده 🤔
علماء التفسير قالوا لأنه تحمّل –أو حمّل نفسه- إنه يصوم النهار ويقوم الليل ولا يغضب أبدا.
وطبعا الموضوع صعب 😅
مين إللي يستحمل يصوم النهار كل يوم ويقوم الليل كل ليلة ولا يغضب أبدا😶

☆لو لاحظتم ...في قصة إسماعيل وأيوب ويوسف كان ربنا بيذكّرنا بالصبر على البلاء إللي بيحصل للإنسان غصب عنه،
زي بلاء المرض ودخول السجن والذبح،
لكن في نوعين تانيين من الصبر وناس كتير أوي تلاقيها مبتقدرش تكمل في النوعين دول👌
◇النوع الأول هو:
الصبر على الطاعة، زي الصبر على الصلاة والوضوء في شدة البرد، والصبر على قيام الليل والصبر على صيام النهار والصبر على لبس النقاب في عز الحر،
والصبر على قراءة القرآن والصبر على اتباع أوامر ربنا...ده كله من الصبر.
◇النوع التاني إللي هو: الصبر عن المعصية.
يعني واحد مثلا بيموووت في سماع الأغاني، بيموووت في الأفلام والمسلسلات ومع ذلك بيصبر إنه لا يسمع أغاني ولا يتفرج على المسلسلات،
واحدة بتموووت في لبس الموضة وإنها تبين جمالها للناس عشان الناس تقولها انتِ جميلة، لكن بتصبر عن المعصية دي وتجاهد نفسها إنها تبعد عنها👌
فكلنا بلا استثناء حالنا هو إما صبر على طاعة أو صبر عن معصية أو طبعا النوع التالت إللي كلنا عارفينه زي ماقلنا، إللي هو الصبر على البلاء 😊
عشان كده ربنا ذكر اسم ذا الكفل عليه السلام مع أيوب وإسماعيل عليهما السلام،
لإنه تحمّل صبر على طاعات شديدة وصبر عن معصية صعبة جدا،
وإليكم المفاجأة 🙊
الصبر على الطاعة والصبر عن المعصية أعلى منزلة من الصبر على البلاء😁✌️
إزاي😳
ببساطة لأن البلاء أو المصيبة قدر من ربنا نافذ لا محالة، فالإنسان غصب عنه مفيش قدّامه إلا إنه يصبر سواء صبر جميل أو لأ، كده كده معندوش اختيارات إنه يقبل بالوضع أو ميقبلش🤷‍♂️
يعني سواء صَبَر صَبْر جميل أو اشتكى منه ليل نهار فالبلاء كده كده موجود غصب عنه ما يقدرش يرفعه بنفسه،
والصبر على البلاء كمان ممكن بيقدر عليه الكفار فمهواش خاص بالمؤمنين فقط يعني،
كم مرة شوفنا واحد غير مسلم حصل له ابتلاءات كتير ومع ذلك صابر وبيضحك والدنيا عنده عادي وبيصبّر نفسه بإيمانه بإلهه المزعوم؟
كتييير 😅
لكن الصبر إللي له علاقة بالتكليف سواء صبر على طاعة أو الصبر عن المعصية، فده صبر أتْباع الرسل، لإنه حاجة اختيارية بنختارها بإرادتنا،
الإنسان بيختار بنفسه إنه يتبع هواه ويسيب الطاعات... يسمع أغاني يغتاب، يسرق، يكذب، ينقّي من الدين إللي على هواه، أو ممكن يختار بنفسه عكس ده كله💁‍♂️
يعني ذِكر قصة ذي الكفل وكُون اسمه لافت للنظر وله معنى عميق كده ده يؤكد لنا إن ربنا لما بيذكر لنا قصة نبي بيكون وراها فايدة أكيد، وإللي يسكت عنه يبقى ما يهمناش أو مالوش فايدة،
لإن القرآن مش كتاب تاريخ عشان يقول لنا تفاصيل الأحداث الدقيقة، زي مثلا قميص يوسف كان لونه إيه، امرأة العزيز كان عندها كام سنة وهكذا😅
الحاجات دي متقالتش في قصة يوسف عليه السلام،
اتقال لنا فقط إللي يهمنا من موضوع القميص،
وكذلك لما ربنا قال لنا عن قصة ذي الكفل في القرآن قالنا على يهمنا بس فيها، وهو إنه كان من الصابرين الصالحين👌
"وَاذْكُرْ إِسْمَاعِيلَ وَالْيَسَعَ وَذَا الْكِفْلِ وَكُلٌّ مِنَ الْأَخْيَارِ "
وبكده خلصت قصة ذي الكفل عليه السلام😊

♡القصة التانية هي: قصة أصاحب الرس.
"كَذَّبَتْ قَبْلَهُمْ قَوْمُ نُوحٍ وَأَصْحَابُ الرَّسِّ وَثَمُودُ "

علماء التفسير قالوا فيها كلام كتير أوي بصراحة😶
فأنا هقول لكم أكثر قصة لقيتها منطقية ومُقنعة نوعا ما 😅
وإللي عايز يعرف الأقوال التانية هيلاقيها في تفسير بن كثير 😁
الرّس معناها البئر، وكان أصحاب الرس عندهم بئر بيشربوا منه، وكان بيحكمهم ملك عادل وكانوا بيحبوه جدا، فلما مات زعلوا عليه جدا...
وبعد كام يوم الشيطان تمثّل في صورته وقال لهم : أنا مامُتّش، لكن أنا غيبت عنكم شوية كده عشان أشوفكم هتعملوا إيه 😏
ففرحوا جدا وأمرهم إنهم يعملوا بينهم وبينه حجاب،
☆ حاجة كده زي الكَرَفان إللي بيكون مخرم ده عارفينه🤔

المهم،
أكتر الناس صدّقته فعلا وافتَتَنوا بيه وبدأوا يعبدوه😶
فربنا أرسل لهم نبي وقال لهم إن الحاكم ده شيطان

#قصص_الأنبياء
#الحلقة_السادسة_والعشرون
#قصة_موسى_الجزء_الأول
#المولد_والنشأة

قصتنا النهاردة عن نبي من أُولِي العَزْم من الرسل،
وأُولي العزم معناها:
الأنبياء إللي تعرضوا لأذى شديد من قومهم واتعرضوا لابتلاءات كثيرة في حياتهم، ثم واجهوا الأذى والبلاء ده بالصبر،
وأولي العزم من الرسل هم أفضل الأنبياء والمرسلين على الإطلاق، وهم خمسة : نوح وإبراهيم وموسى وعيسى ومحمد صلى الله عليه أجمعين.
واحنا اتكلمنا عن نوح وإبراهيم عليهما السلام، و النهاردة هنتكلم عن موسى عليه السلام 😁
اسمه موسى بن عمران من ذرية يعقوب عليه السلام،
هو أكثر نبي مذكور في القرآن لأن قصته مع بني إسرائيل مليانة عِبر، ولأن أحداث أُمِّته متشابهة كتير مع أحداث أمة محمد ﷺ،
وموسى عليه السلام له علينا فضل كبير جدا احنا المسلمين ،
لأن في رحلة المعراج لما ربنا فرض على رسول الله ﷺ الصلاة وكانت خمسين،
قابل رسول الله ﷺ موسى في السماء السادسة، وسأله موسى عن إللي ربنا فرضه عليه ،
فقال له رسول الله ﷺ إن ربنا فرض عليه خمسين صلاة،
فموسى عليه السلام قال له أُمّتك مش هتستحمل،
فاطلب من ربك التخفيف، فالنبي ﷺ استغرب، وبص لجبريل باستغراب وسأل:
هو أنا ينفع أرجع لربنا وأسأله التخفيف؟ فجبريل عليه السلام قال له: نعم،
ففعلا بسبب كلام موسى عليه السلام، استمر رسول الله ﷺ يسأل ربنا التخفيف لحد ما وصلت لخمس صلوات بدل خمسين،
وطبعا انتم عارفين إن كتير من الناس بتصلي الخمس صلوات بالعافية فما بالنا لو كانت خمسين😶
طبعا كله بتقدير من ربنا ومكتوب في اللوح المحفوظ، لكن موسى عليه السلام كان سبب بس،
وربنا هو إللي جعله سبب في ده، وهتلاقوا في السيرة شرح الموضوع بالتفصيل😊

نرجع بقى بالزمن شوية كده😁
اتكلمنا قبل كده عن قصة يوسف عليه السلام وإنه قال لإخواته إنهم يجيبوله كل أهلهم من البَادية في فلسطين عشان يسكنوا مصر،
وفعلا يعقوب عليه السلام جه هو وأبنائه ال11 وأم يوسف، وسكنوا كلهم مصر،
وكان الناس بيكرّموهم ويعاملوهم بإحسان إكراما ليوسف عليه السلام.
وكان الملك إللي بيحكم مصر في عهد يوسف عليه السلام من الهكسوس، وكان الهكسوس محتلين مصر ساعتها،
فلما قام أحمس الأول بثورة وخرّج الهكسوس من مصر وبدأ عصر الفراعنة،
بدأ الفراعنة يستعبدوا بني إسرائيل على أساس إنهم كانوا مُوالين ومتعاونين مع الهكسوس، وقعدوا في الظلم والقهر والاستعباد ده حوالي ٣٠٠ سنة،
وقلنا قبل كده إن إسرائيل هو يعقوب عليه السلام، وإن كلمة إيل في اللغة السريانية معناها الله، وكلمة إسرا معناها عبد فتكون إسرائيل بمعنى عبد الله،
وبني إسرائيل هم ذرية يعقوب عليه السلام 😊
فكان الفراعنة إللي بيحكموا مصر مخليين بني إسرائيل عبيد وبيخلوهم يشتغلوا في المِهن الحقيرة الوضيعة عندهم، يعني كانوا عايشين في منتهى الذل والهوان والقهر😶
في يوم من الأيام واحد من الفراعنة شاف رؤيا ويُقال إن الفرعون ده رمسيس الثاني والله أعلم،
شاف إن في نار بتخرج من بيت المقدس وتنتشر في مصر ، وبتُصيب كل بيوت أهل مصر،
ماعدا بيوت بني إسرائيل مش بتيجي ناحيتهم،
فقام من النوم خايف😳
وجمع السحرة والكهنة والوزراء وبدأ يسألهم فقالوا له ده معناه إن في طفل هيتولد من بني إسرائيل وهيكون زوال ملكك على إيده👌
فطبعا خاف وأمر إن أي طفل يتولد لبني إسرائيل يُقتل على طول😤
الفرعون ده كان أشد الفراعنة قوة وبطش وظلم ...كان مفتري يعني😑
"إِنَّ فِرْعَوْنَ عَلَا فِي الْأَرْضِ وَجَعَلَ أَهْلَهَا شِيَعًا"
والفراعنة بصفة عامة كانوا بيقولوا إن دمهم فيه دم إلهي، يعني نَسَبْهُم مُتصل بالإله،
الفرعون ده بقى عَدَّاهُم كلهم...قال إنه هو ذات نفسه إله ورب😶
فاكرين لما قلنا قبل كده إن معظم الناس كانوا مؤمنين بتوحيد الربوبية يعني إن الكون ده له رب هو الخالق والرازق والمدبر والمالك، بس همّ بيشركوا معاه آلهة تانية في العبادة والقصد والتعظيم🤔
أهه الفرعون ده بقى مش بس بيزعم إنه إله متفرد بتوحيد الألوهية وتعظيم الناس له، لأ ده كمان بيزعم إنه متفرد بتوحيد الربوبية،
"أَنَا رَبّكُمْ الْأَعْلَى "
بيقول إن هو الرب، يعني هو الخالق والرازق والمدبر ومالك الملك...حاجة كده آخر جنون يعني 😅

المهم،
بدأ جنود فرعون يمشوا في الشوارع وأول ما يلاقوا طفل ذَكَر مولود ياخدوه كده ويدبحوه أو يقتلوه، ويبحثوا عن غيره😶
طبعا حاجة بشعة...احنا لما بنشوف طفل ميت عادي قلبنا بيتقطع عليه، ولّا لو أم ابنها مات بعد ما تولده بتبقى روحها هتطلع😞
دول بقى كانوا بياخدوا الطفل الرضيع إللي لسه مولود ويذبحوه قصاد أمه وأبوه وأهله ويسيبوه ويمشوا،
وأهله مش قادرين يعملوا لهم حاجة.

☆وطبعا المذابح إللي حصلت للأطفال بسوريا مش بعيد عننا، أكيد شفتم الأطفال الصغيرين ومنظرهم وهم مدبوحين😔
فده كان بلاء واقع على بني إسرائيل...ذبح وقتل في الأطفال، وياخدوا الرجال يشتغلوهم بالسُّخْرة والعبودية..وياخدوا النساء يشتغلوا في قصور الأغنياء...حياة كلها ذل وقهر.
"يَسْتَضْعِفُ طَائِفَة

#قصص_الأنبياء
#الحلقة_السابعة_والعشرون
#قصة_موسى_الجزء_الثاني
#الرسالة

وقفنا المرة إللي فاتت عند موسى عليه السلام لما أخذته آسية زوجة فرعون عشان تربيه في القصر،
كَبُر موسى عليه السلام في قصر فرعون وهو شايف الظلم والقهر إللي بيتعرضله بني إسرائيل،
فكان بيكره فرعون، واتولّد جواه حِس نصرة المظلوم،
في يوم من الأيام نزل من القصر ودخل المدينة في وقت القيلولة محدش تقريبا بيبقى موجود،
"وَدَخَلَ الْمَدِينَةَ عَلَى حِينِ غَفْلَةٍ مِنْ أَهْلِهَا "
وهو ماشي شاف واحد من المصريين بيتخانق مع واحد من بني إسرائيل، فتوقع إن المصري ظالم للرجل بسبب إللي شافه طول السنين إللي فاتت،
"فَوَجَدَ فِيهَا رَجُلَيْنِ يَقْتَتِلَانِ هَذَا مِنْ شِيعَتِهِ وَهَذَا مِنْ عَدُوِّه"
وفي نفس الوقت الرجل من بني إسرائيل استغاث بيه وقال له إلحقني،
فتأكد ظن موسى عليه السلام وراح عشان ينصر المظلوم فزق المصري بإيده، راح واقع ميت😶
"فَاسْتَغَاثَهُ الَّذِي مِنْ شِيعَتِهِ عَلَى الَّذِي مِنْ عَدُوِّهِ فَوَكَزَهُ مُوسَى فَقَضَى عَلَيْهِ"
موسى عليه السلام بيشوف الراجل لقاه مبيتحركش ومات فعلا!🙊
طبعا موسى عليه السلام اتصدم😳
هو مكنش يقصد أبدا إنه يقتل الرجل ومكنش متخيل قوته كده....
هو كان بيبعده بس لكن موسى عليه السلام كان قوي جدا لدرجة إن زقة واحدة قتلت الشخص، فتخيلوا إنتم قوته كانت عاملة إزاي😅
فورا موسى عليه السلام استغفر ربنا لإن بالفطرة الإنسان بيحس إن القتل ده حاجة كبيرة، حتى لو مفيش دين بيحرم القتل،
"قَالَ هَذَا مِنْ عَمَلِ الشَّيْطَانِ إِنَّهُ عَدُوٌّ مُضِلٌّ مُبِينٌ * قَالَ رَبِّ إِنِّي ظَلَمْتُ نَفْسِي فَاغْفِرْ لِي فَغَفَرَ لَهُ إِنَّهُ هُوَ الْغَفُورُ الرَّحِيمُ "

وقال يارب بما إنك أنعمت عليّ بنعمة القوة كد، فمش هخليها في مساعدة المجرمين ولا هكون زيهم متجبر بقوتي وجبروتي على الضعفاء،
"قَالَ رَبِّ بِمَا أَنْعَمْتَ عَلَيَّ فَلَنْ أَكُونَ ظَهِيرًا لِلْمُجْرِمِينَ "

☆طب وهو موسى عليه السلام كان يعرف ربنا😕
جميع الأنبياء على التوحيد، لم يشركوا أبدا بالله حتى قبل البعثة، وكمان هو كان على شريعة بني إسرائيل فكان عارف من هو الله 👌
بعد القتل الخطأ ده، هرب موسى عليه السلام ومحدش يعرف مين إللي قتل المصري غير الرجل إياه من بني إسرائيل، واتجمع الناس وقعدوا يسألوا محدش شاف مين القاتل،
فضل موسى عليه السلام في المدينة وهو خايف وبيراقب هل الناس عرفوا إن هو القاتل ولّا لأ😥
"فَأَصْبَحَ فِي الْمَدِينَةِ خَائِفًا يَتَرَقَّبُ"

☆إيه ده وهو يخاف ليه😕
مش هو ابن الفرعون يعني محدش يقدر يقول له إنت قتلت ليه 🙄
ماهو ده دليل إن فرعون مكنش بيحب موسى عليه السلام ومكنش بيعامله زي ابنه، وموسى كان عارف ده،
وهو قال لآسية من البداية قرة عين ليكِ انتِ أما بالنسبة لي لأ😤
المهم.. وهو ماشي في المدينة شاف نفس الرجل من بني إسرائيل بتاع إمبارح بيتخانق مع واحد مصري تااااني، فلما شاف موسى عليه قعد يستغيث بيه ويقوله إلحقني ...إلحقني😫
" فَإِذَا الَّذِي اسْتَنْصَرَهُ بِالْأَمْسِ يَسْتَصْرِخُهُ "
فموسى عليه السلام قال له ده انت إللي بتاع مشاكل بقى😠
"قَالَ لَهُ مُوسَى إِنَّكَ لَغَوِيٌّ مُبِينٌ"

☆وده يعلمنا إننا مناخدش بالظاهر ...وإننا لما نكون عايزين نحكم في مشكلة لازم نسمع من الطرفين ..مش من طرف واحد،
حتى لو احنا كنا متأكدين إن الطرف التاني هو إللي ظالم دايما...مش يمكن المرة دي هو إللي مظلوم👌
فبلاش نستعجل في الحكم وناخد قرارات ظالمة وخاطئة،
وكما قيل:
"إذا جاءك الرجل وقد فُقِئت عَينُه👁 فلا تحكُم له حتى ترى الآخر فربما فُقِئت عيناه الاثنتان👀"

فلما موسى عليه السلام قرّب من الاتنين اللي بيتخانقوا عشان يبعدهم عن بعض ويفض الخناقة بسلام،
قام الراجل اللي من بني إسرائيل تخيل إن موسى غضبان منه هو وهيضربه هو المرة دي عشان بتاع مشاكل وكده، فراح قايل له:
إنت عايز تقتلني ياموسى زي ما قتلت واحد امبارح😱
ده انت عايز تبقى جبار بقى😤

"فَلَمَّا أَنْ أَرَادَ أَنْ يَبْطِشَ بِالَّذِي هُوَ عَدُوٌّ لَهُمَا قَالَ يَامُوسَى أَتُرِيدُ أَنْ تَقْتُلَنِي كَمَا قَتَلْتَ نَفْسًا بِالْأَمْسِ إِنْ تُرِيدُ إِلَّا أَنْ تَكُونَ جَبَّارًا فِي الْأَرْضِ وَمَا تُرِيدُ أَنْ تَكُونَ مِنَ الْمُصْلِحِينَ "

فهنا المصري عرف إن القتيل بتاع إمبارح موسى هو إللي قتله،
فراح على طول بلغ الجنود، والجنود بلغوا فرعون،
فبدأ يتكلم مع الوزراء بتوعه وقعدوا يدبّروا خطة يقتلوا بها موسى عليه السلام🙊
فجه واحد من القصر بسرعة وقابل موسى وقال له إن الوزراء والأعيان بيدبروا مؤامرة عشان يقتلوك فخذ نصيحتي واهرب من البلد عشان ماحدش يقدر يوصل لك.
"وَجَاءَ رَجُلٌ مِنْ أَقْصَى الْمَدِينَةِ يَسْعَى قَالَ يَامُوسَى إِنَّ الْمَلَأَ يَأْتَمِرُونَ بِكَ لِيَقْتُلُوكَ فَاخْرُجْ إِنِّي لَكَ مِنَ النَّاصِحِينَ"
فموسى عليه السلام خرج من المدينة وهو خائف وبيراقب أحسن حد ي