ئاگری رقی مرۆییت به‌ده‌ریای خۆشه‌ویستیی خودا بكوژێنه‌وه‌
له‌وانه‌یه‌ له‌به‌ر هه‌ر هۆیه‌ك رقت له‌مرۆڤێك یان چه‌ند مرۆڤێك بێت
به‌ڵام مه‌هێڵه‌ ئه‌و رقه‌ وات لێبكات رقت له‌هه‌موو مرۆڤایه‌تیی بێت
عه‌بدولڕه‌حمان سدیق

چاكه‌كارین ئه‌گه‌ر رقمان له‌ خودی خراپه‌و گوناه بێت
خراپه‌كارین گه‌ر بێ به‌ڵگه‌ گوناهێك بده‌ینه‌ پاڵ كه‌سێك
چونكه‌ گه‌وره‌تر له‌خودی هه‌ر خراپه‌و گوناهێك
تاوانباركردنی كه‌سێكه‌ به‌گوناهێك كه‌ نه‌یكردووه‌
عه‌بدولڕه‌حمان سدیق

ئێمه‌ هه‌ر خۆمانین ، به‌ڵام له‌ ئاوینه‌ی كه‌سی به‌رامبه‌ردا ئه‌وه‌ین كه‌ ئه‌و ده‌یبینێت
حه‌زو ئه‌وین ، رق و قین ، ره‌خنه‌و گله‌یی وێنه‌ی جیاوازمان بۆ دروست ده‌كه‌ن
بۆیه‌ گه‌ڕان به‌دوای حه‌قیقه‌تی ئێمه‌دا كۆتایی نایه‌ت له‌بوونی ئه‌و هه‌موو ئاوێنانه‌دا
حه‌قیقه‌تی هه‌ریه‌كه‌مان ئه‌وه‌یه‌ كه ‌له‌رۆژی دوایی له‌ئاوێنه‌ی خودادا ده‌رده‌كه‌ویت
عه‌بدولڕه‌حمان سدیق

راسته‌ له‌توانای ئێمه‌دا نییه‌ هه‌مو خراپه‌كاران چاك بكه‌ین
به‌ڵام ئه‌و كاته‌ی خۆمان چاك و پاك ده‌بین ، ده‌توانین بڵێین
توانیومانه‌ یه‌ك كه‌س له‌ ژماره‌ی خراپه‌كاران كه‌م بكه‌ینه‌وه‌
عه‌بدولڕه‌حمان سدیق

له‌تاریكترین دوا ساته‌كانی شه‌ودا ئاسمان روناك ده‌بێته‌وه
هه‌وره‌كانيش چڕ ده‌بنه‌وه‌ ده‌گۆڕێن بۆ بارانی ره‌حمه‌ت و ده‌بارێن
خه‌مه‌كانیش كاتێك زیاتر ده‌بن ، ده‌رگایه‌ك بۆ خۆشیی ده‌كرێته‌وه
‌ئه‌و ده‌رگای كه‌له‌ساتی نائومێدیدا واتده‌زانی كلیلی بۆ دروست نه‌كراوه‌‌
عه‌بدولڕه‌حمان سدیق

له‌هه‌ر زه‌مانێكدا قۆناغێك هه‌یه‌ تیایدا كه‌س له‌كه‌س رازیی نابێت
كه‌چی زۆرینه‌یه‌كیش له‌هه‌وڵدا ده‌بن ببنه‌ ئه‌ستێره‌ بۆ هه‌مووان
جا بۆ ئه‌وه‌ی نه‌كه‌ویته‌ نێو گێژاوی ئه‌و شه‌پۆله‌ ماندووكاره‌وه‌
ئه‌وه‌نده‌ت به‌س بێت نیه‌تی ناخ و كاری دیارت به‌خودا بسپێریت و
یاده‌وه‌رییه‌كی جوان بیت له‌ناخی یه‌كێك یان كه‌مینه‌یه‌كی كه‌مدا
عه‌بدولڕه‌حمان سدیق

ئه‌وه‌ی خه‌مبارت ده‌كات بینینی كۆتایی ناخۆشی رێگه‌یه‌كه‌
كه‌ هێشتا یه‌كه‌م هه‌نگاوی سه‌ره‌تات له‌سه‌ر نه‌ناوه‌
بۆیه‌ هه‌میشه‌ گومانی باش ببه‌ به‌ئاینده‌و داهاتووی خۆت
چونكه‌ زۆر جار داهاتووت ، ره‌نگی گومانه‌كانی خۆت ده‌گرێت
عه‌بدولڕه‌حمان سدیق

جۆرێك له‌خه‌ڵكی خراپ هه‌ن ، ده‌رگاشیان به‌ڕوودا دابخه‌یت
تۆزو غوباری ئازاریان له‌ژێر ده‌رگاشه‌وه‌ بێت هه‌ر پێت ده‌گات
جا بۆ ئه‌وه‌ی په‌شیمان نه‌بیت با هه‌موو كارت له‌ڕای خودا بێت
بۆ خزمه‌تی مرۆڤایه‌تی و ، چاوه‌ڕوانیی پاداشت نه‌بیت له‌كه‌س
عه‌بدولڕه‌حمان سدیق

له‌بازنه‌ی فراوانی ئایندا ئه‌مانه‌ش چاكه‌ن : دڵخۆشكردنی خه‌مبارێك
گوێگرتن له‌قسه‌و ناخی بێزارێك ، بڵاوكردنه‌وه‌ی قسه‌ی زانیارێك
شاردته‌وه‌ی گوناهی تۆبه‌كارێك ، یارمه‌تی و كۆمه‌كردنی هه‌ژارێك
به‌زه‌یی هاتنه‌وه‌ به‌گیاندارێك ، خزمه‌تكردنی ئینسان به‌هه‌ر كارێك
عه‌بدولڕه‌حمان سدیق

كه‌سمان ناچار نین بڕوا به‌هه‌موو راو بۆچوونێكی یه‌كدی بكه‌ین
كه‌سیشمان ناتوانین به‌زۆر قه‌ناعه‌ت به‌ بیروڕای یه‌كدی بهێنین
به‌ڵام پێویسته‌ رێز له‌و په‌یوه‌ندییه‌مان بگرین كه ‌گه‌وره‌تره‌
له ‌ڕاجیاییمان ، ئه‌گه‌ر به‌نیازین هه‌تا سه‌ر هاوڕێی یه‌كدی بین
عه‌بدولڕه‌حمان سدیق

خه‌م مه‌خۆ له‌ ونبوونت له‌نێو رێگه‌یه‌كی تاریکی ژیاندا
رۆژێك خۆت له‌سه‌ر رێگایه‌كی روناکدا ده‌دۆزیته‌وه‌
خه‌م له‌ئاوابوونی خۆری هیچ وردە ئاواتێك مه‌خۆ
سپێده‌یه‌ك خۆری ئاواتێكی گه‌وره‌ترت هه‌ڵدێت
عه‌بدولڕه‌حمان سدیق

له‌مێژه‌ ده‌ڵێن: ( پڕۆپاگه‌نده‌ كه‌سێكی دڵ پڕ له‌قین دروستی ده‌كات
ساویلكه‌یه‌ ئه‌وه‌ی بڵاوی ده‌كاته‌وه‌ ، گێله‌ ئه‌وه‌ش كه‌ بڕوای پێده‌كات)
بۆیه‌ هه‌ر كات هه‌واڵێكیان پێدای ، پرسیار لەسەرچاوەکەی بکە چونكه‌‌
بڵاوكردنه‌وه‌ی هه‌واڵی ناڕاست ئاگربه‌ردانه‌ له‌خه‌رمانی ژیانی بێتاوانان
عه‌بدولڕه‌حمان سدیق

جه‌ژنتان پیرۆز بێت و هه‌میشه‌ له‌خۆشیی و جه‌ژندا بن
به‌هیوای ئه‌وه‌ی ئه‌م جه‌ژنه‌ له‌هه‌موو جه‌ژنێك زیاتر
ده‌روازه‌ی خێر بین بۆ خۆشیی مرۆڤ و ئاوه‌دانیی نیشتمان
نزیكتر بین له‌خوداو رێنماییه‌كانی بۆ ئاسووده‌بوون له‌ ژیان
عه‌بدولڕه‌حمان سدیق

گه‌ر نه‌توانین وه‌ك پێویست خۆشیی له‌گه‌ڵ ئه‌وانی دیكه‌دا به‌ش بكه‌ین
ده‌توانین خه‌میان له‌گه‌ڵدا به‌ش بكه‌ین و ، به‌شێك له‌خه‌میان له‌كۆڵ بنێین
ده‌ڵێن:خۆشیی به‌به‌شكردنی گه‌وره‌ ده‌بێت ، خه‌م به‌ به‌شكردنی بچوك ده‌بێته‌وه‌
بۆیه‌ مرۆڤبوونمان خوازیاره‌ به‌شداریی خه‌می كه‌س وكاری ئه‌نفالكراوان بین
عه‌بدولڕه‌حمان سدیق

ژیان به‌دڵی خه‌ڵك و ، وه‌ك ئه‌وان بوون جۆرێكه‌ له‌به‌ندیخانه‌
به‌ندیخانه‌یه‌ك كه‌ لەناخی مرۆڤ خۆیه‌تی و ، خۆی تێدا به‌ند ده‌كات
كاتێك له‌ترسی قسه‌ی خه‌ڵك و بینینی خه‌ڵك ، یان خۆی ده‌شارێته‌وه‌
یان بۆ ره‌زامه‌ندیی خه‌ڵك و چاولێكردنیان ، خۆی وەک ئەوان ده‌گۆڕێت
عه‌بدولڕه‌حمان سدیق

راسته‌ دەڵێن: دواجار ئاو ده‌گه‌ڕێته‌وه‌ نێو رێڕه‌وه‌كەی جارانی
به‌ڵام له‌وانه‌یه‌ ماوه‌یه‌كی بوێت هه‌تا ره‌نگی ڵێڵی روون ده‌بێته‌وه‌
بۆیه‌ به‌ئاسانی ئازاری كه‌س مه‌ده‌ به‌ئومێدی دواتر ئاشتبوونه‌وه‌
چونكه‌ به‌زمانیش لێت ببورێت ، زه‌مانێكی ده‌وێت تا لێت دڵنیا ده‌بێته‌وه‌
عه‌بدولڕه‌حمان سدیق

كه‌ شه‌پۆلی خه‌م زۆرت بۆدێنێ و ، له‌ته‌نهایی ته‌نهاتر ده‌بیت
كه‌ له‌درێژه‌ی چاوه‌ڕوانیتدا ده‌نگێك نییه‌ بانگت بكات بۆ دیدارێك
ئه‌و كات هیچ ده‌نگێك له‌ده‌نگی خه‌مڕه‌وێنی بانگ خۆشتر نییه‌
گه‌ر هه‌ست بكه‌یت بانگ زه‌نگی بیرخستنه‌وه‌یه‌ بۆ دیداری خودا
عه‌بدولڕه‌حمان سدیق

ناخۆشترین په‌یوه‌ندییت له‌گه‌ڵ ده‌وروبه‌ردا ئه‌و جۆره‌ كه‌سانه‌ن
كه‌ هه‌رچی بڵێیت و هه‌رچی بكه‌یت ، ئه‌وان بڕیاری خۆیان داوه‌
بۆیه‌ ئه‌وانه‌ی به‌ئه‌نقه‌ست له‌ناخه‌وه‌ نایانه‌وێت راستیی ببینن
شایانی ئه‌وه‌ نین ماندووت بكه‌ن به‌ وه‌ڵام و روونكردنه‌وه‌كانت
عه‌بدولڕه‌حمان سدیق

كه‌ هێشتا چیرۆكی ژیانت كۆتایی نه‌هاتووه‌ ، كۆڵ مه‌ده‌و به‌هێز به‌
له‌سه‌ر پێیه‌ ماندووكانی خۆت بڕۆو ده‌ست به‌شانی كه‌سه‌وه‌ مه‌گره‌
ئه‌وه‌ی لای تۆ مه‌حاڵه‌ له‌وانه‌یه‌ له‌ئاینده‌دا به‌ڕێگه‌یه‌كی مه‌حاڵتر بێته‌ دی
عه‌بدولڕه‌حمان سدیق

خه‌م له‌شتی كه‌م بایه‌خ مه‌خۆ ، به‌توندییش مامه‌ڵه‌ مه‌كه‌
له‌به‌ر ئه‌وه‌ی له‌كۆتایی رێگاكانی ژیاندا بۆت ده‌رده‌كه‌وێت
ئه‌و رۆژانه‌ی به‌تووڕه‌بوونت به‌خشی و خۆت پێیان خه‌مبار كرد
هی ئه‌وه‌ بوون به‌سانایی و زه‌رده‌خه‌نه‌یه‌ك به‌ڕێیانت بكردایه
عه‌بدولڕه‌حمان سدیق