گێل و گه‌مژه‌ نین
ئه‌وانه‌ی هه‌ڵه‌ی ئازیزانیان ده‌بینن به‌ڵام چاوپۆشییان لێده‌كه‌ن
ئه‌وان له‌پاكیی خۆیان ده‌یانه‌وێت ژیان به‌ساده‌یی بڕوات و
به‌كێشه‌ی بچووك ، گرفتی گه‌وره‌ ناخه‌نه‌ سه‌ر رێگه‌ی خۆیان

زۆرن ئه‌وانه‌ی له‌گۆڕستانه‌كاندا پێ به‌گۆڕی كه‌سدا نانێن
به‌ڵام كه‌من ئه‌وانه‌ی له‌ژیاندا پێ به‌مرۆڤی زیندوودا نانێن
له‌وانه‌یه‌ له‌به‌ر ئه‌مه‌ بێت به‌ئێمه‌ ده‌ڵێن : زیندوو كوژی مردوو په‌رست

ده‌ركه‌وتنی مانگ و دره‌وشانه‌وه‌ی له‌نێو هه‌وره‌ چڕه‌كاندا
په‌یامێك ده‌دات كه‌ تروسكاییه‌ك له‌هیوا هه‌ر ده‌مێنێت

چارۆكه‌ی كه‌شتیی ژیانت بكه‌ره‌وه‌و
له‌چاوه‌ڕوانی (با)ی هه‌ل و ده‌رفه‌تدا به‌
هه‌ر شتێك بڕیار بێت بۆ تۆ بێت ، پێت ده‌گات
يان له‌سه‌ر ده‌ستی خۆت ، یان كه‌سێكی دی
یان له‌سه‌ر ده‌ستی ئه‌و كه‌سه‌ی كه‌ نه‌یده‌ویست پێت بگات!!

باشترین یادكردنه‌وه‌ی له‌دایكبوونی پێغه‌مبه‌ر دروودی خوای له‌سه‌ر
پابه‌ندبوونمانه‌ به‌ئاكارو ره‌وشت و ره‌فتاره‌كانی
به‌و جۆره‌ بین كه‌ خه‌ڵك له‌ زمان و ده‌ستمان سه‌لامه‌ت بن
هه‌ر شتێكيشمان بۆ خۆمان پێخۆش بوو بۆ خه‌ڵكیشمان پێخۆش بێت

با چاكه‌ بكه‌ین و ، چاكه‌ ببه‌خشینه‌وه‌
ئاسه‌واری چاكه‌ ون نابێت و ، هه‌ر ده‌مێنێت
وه‌ك ئه‌وه‌ی گوڵ به‌سه‌ر خه‌ڵكدا دابه‌ش ده‌كات
گوڵیشی بۆ نه‌مێنێت ، بۆنی گوڵ به‌ده‌ستییه‌وه‌ ده‌مێنێت

دنیابینیی تایبه‌تی هه‌ر یه‌كێكمان زاده‌ی ئه‌زموونی خۆیه‌تیی
راسته‌ هه‌مووان له‌سه‌فه‌ری ژیاندا ته‌ماشا ده‌كه‌ن
به‌ڵام كه‌س ناتوانێت وێنه‌ گه‌وره‌كه‌ی ژیان ببینێت
هه‌مووان ئه‌وه‌نده‌ ده‌بینن كه‌ په‌نجه‌ره‌ی ته‌مه‌ن رێ به‌بینینی ده‌دات

شكۆی مرۆڤ به‌زمان درێژیی و خۆ به‌گه‌وره‌ زانیین به‌ده‌ست نایه‌ت
شكۆی مرۆڤ ئه‌و كاته‌ پارێزراو ده‌بێت كه‌ مرۆڤ دوور بێت
له‌گشت ئه‌و كه‌سانه‌ی قه‌دری نازانن و رێزی ناگرن

تا ده‌توانیت وته‌ی باش و ، قسه‌ی خێر ، ببه‌خشه‌
به‌ڵام هه‌رزان فرۆشیان مه‌كه‌ بۆ ئه‌وانه‌ی قه‌دری نازانن
چونكه‌ له‌مێژه‌ وتراوه‌: ئه‌گه‌ر زێڕه‌كانت لای پێڵاو فرۆش دابنێیت
له‌وانه‌یه‌ بێ بایه‌خ سه‌یریان بكات و ، به‌نرخی پێڵاو بیانفرۆشێت

هه‌رگیز مه‌ڕووخێ به‌كه‌وتن ، زۆربه‌مان كه‌وتووین و ده‌كه‌وین
نه‌ به‌ئازایه‌تیی ئه‌وان كه‌وتوویت و ، نه‌ به‌زیره‌كی ئه‌وانیش ده‌كه‌ویت
ئه‌وه‌ی ده‌تخات خراپكاره‌ ئاشكراكان نین ، به‌ڵكو ئه‌و خراپانه‌ن
كه‌ خۆیان له‌به‌رگی كه‌سێكی چاكدا حه‌شار داوه

زۆرن ئه‌وانه‌ی وه‌ك تۆ هه‌موو سپێده‌یه‌ك بڕیار ده‌ده‌ن
تووڕه‌ نه‌بن و ، ئه‌و رۆژه‌یان به‌هێمنی به‌ڕێ بكه‌ن
به‌ڵام نه‌زانێك یان له‌خۆباییه‌ك یان حه‌سوودێك
دێت رێگه‌ی لێده‌گرێت و ، به‌ره‌فتاری نه‌شیاوی رۆژه‌كه‌ی لێ تاڵ ده‌كات
بۆیه‌ هه‌ندێ جار رۆژه‌كه‌ت وه‌ك ئه‌وه‌ نابێت كه‌چاوه‌ڕێی ده‌كه‌ی

كه‌س ناخی كه‌س نابینێت
ئه‌وه‌ وشه‌و قسه‌كانی هه‌ر مرۆڤێكه‌
كه‌ ئه‌وه‌ی له‌ناخیدایه‌ پیشانی هه‌مووانی ده‌دات

هیچ رووداوێك خۆی دووباره‌ ناكاته‌وه‌
ئه‌وه‌ مرۆڤه‌ هه‌مان رووداو دووباره‌ ده‌كاته‌وه‌
ئه‌وه‌ مرۆڤه‌ (هه‌ڵه‌)ی رابووردوو دووباره‌ ده‌كاته‌وه‌و
(هه‌ل) و ده‌رفه‌تی ئێستاشی به‌فیڕۆ ده‌دات

سه‌ركه‌وتنت به‌ فه‌رامۆشكردنی كه‌سی نه‌زان و له‌خۆبایی
باشتره‌ له‌ وه‌ڵامدانه‌وه‌یه‌ك كه‌ بتهێنێته‌ ئاستی نزمی ئه‌وان

هه‌ندێك كات واباشه‌ ته‌نها رووی ده‌ره‌وه‌ی ره‌فتاره‌ بینراوه‌كان زیزت نه‌كه‌ن
چونكه‌ زۆر كات دیمه‌نه‌ به‌رچاوه‌كان ئاوێنه‌ی هه‌موو راستییه‌كان نین
وه‌ك (مه‌ی زیاده‌)ی نووسه‌ر ده‌ڵێت: من به‌یه‌ك ده‌ست خوداحافیزییم لێ ده‌كرد
به‌ڵام ئه‌و نه‌یده‌زانی ‌چه‌ند ده‌ستی دیكه‌ له‌دڵمدا پێیان ده‌گوت: تكایه‌ مه‌ڕۆ

هه‌ستكردنی خراپ ئاكام و ئه‌نجامی خراپی ده‌بێت ، بۆیه‌ باش نییه‌
وابزانیت هه‌موو دنیا چاویان له‌سه‌ر تۆیه‌و ، چاوه‌ڕێی كه‌وتنت ده‌كه‌ن
جاك كانفیڵد ده‌ڵێت: له‌ته‌مه‌نی 18 ساڵییدا واده‌زانیت هه‌مووان چاویان له‌سه‌رته‌و تۆ ده‌بینن
له‌ 40 ساڵییدا هه‌وڵ ده‌ده‌ی گوێ نه‌ده‌ی به‌وه‌ی خه‌ڵك چۆن باست ده‌كه‌ن
له‌ 60 ساڵییدا بۆت ده‌رده‌كه‌وێت نه‌دنیا به‌تۆوه‌ سه‌رقاڵ بووه‌و ، نه‌ زۆربه‌شیان ئاگایان له‌تۆ بووه

خراپ تێڕوانینی مرۆڤ بۆ شته‌كان هۆكارێكه‌ بۆ خه‌مباریی
وه‌ك به‌گه‌وره‌ زانینی ئه‌و شته‌ بچووكه‌ی له‌ده‌ستمان ده‌چێت
وا ده‌كات ئه‌و شته‌ گه‌وره‌یه‌ی له‌به‌ر ده‌ستماندایه‌ به‌بچووك بزانین

بێ ویژدانن ئه‌وانه‌ی‌ ئازاری ده‌روونی مرۆڤێك ده‌ده‌ن
بۆ ئه‌وه‌ی له‌كاردانه‌وه‌دا هه‌ڵه‌یه‌كی پێ بكه‌ن
پاشان ره‌خنه‌ی لێ بگرن له‌سه‌ر ئه‌و هه‌ڵه‌یه‌ی كه‌ ئه‌و نه‌یده‌كرد
ئه‌گه‌ر ئه‌وان به‌ئه‌نقه‌ست و به‌رده‌وام پاڵنه‌ری هه‌ڵه‌پێكردنی نه‌بوایه‌ن

له‌هه‌ر زه‌مان و بارودۆخێكدا كارێكی باش هه‌یه‌ بۆ كه‌سێكی بكه‌ین
ره‌نگه‌ له‌م زه‌مانه‌دا باشترین كارێك بۆ هه‌ر مرۆڤێكی بكه‌ین ئه‌وه‌ بێت
كه‌ ده‌ست نه‌خه‌ینه‌ نێو ورده‌كاریی و تایبه‌تمه‌ندیی ژیانییه‌وه‌و
هه‌وڵی كردنه‌وه‌ی ئه‌و باسه‌ش نه‌ده‌ین كه‌ ئه‌و حه‌ز به‌داخستنی ده‌كات

خراپه‌ هه‌میشه‌ خۆت به‌گوناهبار بزانیت له‌به‌رامبه‌ر ئه‌وانی دیكه‌دا
نه‌بادا بۆ هه‌میشه‌ ببیته‌ قوربانیی بۆ هه‌ڵه‌و كه‌مته‌رخه‌مییه‌كانی ئه‌وان
بۆیه‌ له‌دوای هه‌ر (هه‌ڵه‌)یه‌ك (راست)ێك ئه‌نجام بده‌
له‌خۆت ببوره‌و ، به‌رده‌وامیی بده‌ به‌ ژیان