ئه‌و ساتانه‌ی خه‌ڵك ، مرۆڤی باش و خراپ وه‌ك یه‌ك ده‌بینن
ته‌نها خۆشییه‌ك هه‌بێت ئه‌وه‌یه‌ كه‌ خودا ئاگاداره‌ به‌هه‌موو شتێك
له‌ ناخی هه‌موان .. له‌ نییه‌تیان .. له‌ پاڵنه‌ری پشت كاره‌كانیان
ده‌زانێت كێ له‌ناخدا خراپه‌ ، به‌ڵام خه‌ڵك وه‌ك باشی ده‌ناسن
ده‌شزانێت كێ باشه‌ ، به‌ڵام لای خه‌ڵك به‌خراپ ناسێنراوه

ئاساییه‌ كاتی بۆشایی و ده‌ست به‌تاڵییمان هه‌بێت
به‌ڵام نائاسایی ئه‌وه‌یه‌ ئه‌و بۆشایی و ده‌ستبه‌تاڵییه‌
به‌قسه‌ی خراپ و ، باسكردنی خه‌ڵك پڕ بكه‌ینه‌وه

گوناهه‌كانت نهێنیی خۆتن ، بۆ خه‌ڵكیان باس مه‌كه‌
تۆ به‌تێپه‌ڕبوونی رۆژگار ده‌گۆڕێیت و، واز له‌گوناه دێنیت
به‌ڵام لای ئه‌وانه‌ی به‌حاڵی باشی ئێستات نازانن
هه‌ر وه‌ك گوناهباره‌كه‌ی جارانت ده‌ناسن و باست ده‌كه‌ن

خۆت له‌هه‌موو كه‌س زیاتر پێویستییت به‌خۆته‌
كه‌خۆت نه‌بیت ناشتوانیت بۆ كه‌س بیت ، بۆیه‌
قوربانییدانی كوێرانه‌ شایانی هه‌موو كه‌سێك نییه‌
با ته‌مه‌ن به‌ره‌ پێش بڕوات ئه‌وسا ده‌زانیت
كێن ئه‌وانه‌ی شایانی ماندووبونه‌كانت بوونه

هه‌مووان خه‌مبارن ، به‌ڵام هه‌ندێكیان دڵخۆش دیارن
ئه‌وان ئه‌وانه‌ن كه‌ زانیویانه‌ ته‌مه‌ن رۆژانێكی ژمێردراون
ژیانیش چ هه‌وراز بێت یان نشێو ، چیرۆكێكی كاتییه‌
بۆیه‌ ده‌یانه‌وێت كۆتایی چیرۆكه‌كه‌یان به‌خێر ته‌واو بێت

هه‌ر مرۆڤێك زانا بێت یان نه‌زان
پێوه‌ری خۆی بۆ هه‌ر شتێك هه‌یه‌
بۆیه‌ نه‌كه‌ی كه‌سی نه‌زان پێوه‌ره‌كانی خۆیت به‌سه‌ردا فه‌رز ده‌كات
چونكه‌ ئه‌وسا تۆی زانا ناچار ده‌بیت به‌پێوه‌ری نه‌زانێك بجولێیته‌وه

ئه‌مڕۆش نه‌بێت ، سبه‌ی ئاكامی ئه‌وانه‌ هه‌ر ده‌رده‌كه‌وێت
كه‌ كامه‌رانیی خۆیان به‌خه‌مباركردنی ئه‌وانی دی ، به‌ده‌ست ده‌هێنن
یان بۆ ئه‌وه‌ی خۆیان به‌ڕاست ده‌ربخه‌ن
هه‌ڵه‌كانی خۆیان ده‌خه‌نه‌ ملی كه‌سێكی دی

گرنگ نییه‌ ئه‌وانی دیكه‌ چۆنت ده‌بینن
كاتێك تۆ خۆت گه‌وره‌ ده‌بینیت له‌چاوی خۆتدا
له‌چاوی ئه‌وانیشدا به‌گه‌وره‌ ده‌بینرێیت
چونكه‌ ئاوێنه‌ی ناخت ده‌بێته‌ ده‌رخه‌ری وێنه‌ت‌ له‌ده‌ره‌وه

ده‌بێت له‌م سه‌رده‌مه‌و ، له‌نێو خه‌ڵكی خراپدا
فێری هونه‌ری فه‌رامۆشكردن و به‌رگه‌گرتن بیت

راگرتنی هاوسه‌نگیی له‌په‌یوه‌ندییه‌كاندا پێویسته‌
چونكه‌ هه‌تا ژماره‌ی ئه‌و كه‌سانه‌ زیاتر بێت
كه‌ رۆژانه‌ ده‌تناسن و ده‌یانناسیت
ئه‌رك و به‌رپرسیارییت گه‌وره‌تر ده‌بێت و
بازنه‌ی ئازادییشت بچوكتر ده‌بێته‌وه

ئازادیت كه‌خۆت رزگاركردووه‌ له‌بیرۆكه‌ی رازییكردنی هه‌مووان
چونكه‌ له‌ وه‌همێكی گه‌وره‌دا ده‌ژی ئه‌و كه‌سه‌ی پێی وابێت
ئه‌و ده‌توانێت ئه‌و كه‌سه‌ بێت وا له‌ هه‌مووان بكات خۆشیان بوێت
خۆیشی له‌بازنه‌یه‌كی تونددا به‌ند ده‌كات ئه‌گه‌ر پێی وابێت
ئه‌و ده‌توانێت ئه‌و كه‌سه‌ بێت كه‌هه‌مووان له‌خۆی رازیی بكات

یارمه‌تیدانی ئه‌وانی دی مرۆڤدۆستییه‌
به‌ڵام كه‌ یارمه‌تیدان بگاته‌ راده‌ی قوربانیدان به‌خۆ
ئه‌وه‌ مایه‌ی به‌خۆداچوونه‌وه‌و دانانی سنوورێكه‌
چونكه‌ داوای یارمه‌تیدان شتێكه‌و ، چه‌وساندنه‌وه‌ت شتێكی دیكه‌یه

ورده‌ شه‌ڕه‌ بێ زیانه‌كانی رۆژانه‌ی نێوان هاوڕێیان
باشتره‌ له‌ په‌نابردنه‌ به‌ر شه‌ڕێكی گه‌وره‌ی رووخێنه‌ر
ورده‌ شه‌ڕه‌كانی نێوانیان ده‌بنه‌ هۆی ساتێك له‌ناكۆكییان
به‌ڵام شه‌ڕی گه‌وره‌ ده‌بێته‌ هۆی ساڵانێك له‌ دابڕانیان

ته‌نهاییه‌ك به‌شكۆی خۆته‌وه‌و له‌شوێنی خۆتدا
باشتره‌ له‌ئاماده‌بوونت له‌ نێو كه‌سانێكدا كه‌
وه‌ك زیاده‌یه‌ك سه‌یر بكرێیت و به‌زیاد لێت بڕوانن

كه‌س ئیره‌یی و حه‌سووديی به‌كه‌س نه‌بات
زۆرن ئه‌وانه‌ی كه‌ ده‌یانبینیت واده‌زانیت له‌هیچیان كه‌م نییه‌
به‌ڵام له‌ڕاستیدا خه‌مه‌كانیان به‌جۆرێك په‌رت و بڵاون
به‌هه‌وڵی سات به‌ساتی ته‌مه‌نیان بۆیان كۆ ناكرێته‌وه

خراپترین جۆری ئاڵوگۆڕكردن ئه‌وه‌یه‌ كه‌
مرۆڤ چاكه‌كانی خۆی به‌خه‌ڵك بدات و گوناهه‌كانیان وه‌ربگرێت
له‌ڕێگه‌ی له‌پاشمله‌ قسه‌ وتن به ‌كه‌سانی بێ تاوان و
به‌ خراپ ناوهێنانی كه‌سانی بێ گوناه

پێویسته‌ نرخ و بایه‌خی كه‌سه‌ باشه‌كان له‌كاتی خۆیاندا بزانرێت
چونكه‌ له‌دوای ئه‌وه‌ی له‌ ده‌ست ده‌چن و ، رێگا ده‌گرنه‌ به‌ر
دیمه‌نی دووركه‌وتنه‌وه‌و رۆیشتنیان مرۆڤ به‌ئاگا دێنێته‌وه‌
ئه‌و كاتیش به‌ئاگا هاتنه‌وه‌ سوودێكی نابێت بۆ گێڕانه‌وه‌یان

كه‌سێك كه‌ هه‌تا له‌ژیاندا بیت له‌گه‌ڵتدایه‌ خۆتی
بۆیه‌ تا ده‌توانیت له‌پێشدا له‌خه‌می خۆت به‌
یارمه‌تی خۆت بده‌ بۆ به‌دیهێنانی ئامانجه‌كانت
چونكه‌ ئه‌گه‌ر بۆ خۆت نه‌بیت له‌سه‌ره‌تادا
ناتوانیت بۆ كه‌سی دیكه‌ بیت له‌كۆتاییدا

گوێ به‌قسه‌ی هه‌موو كه‌س مه‌ده‌ له‌باره‌ی خۆته‌وه‌
خۆت له‌چاوی خۆتدا گه‌وره‌ به‌ ، خۆت رێز له‌پێگه‌ی خۆت بگره‌
چونكه‌ ته‌نها خۆت ئاگات له‌ساڵانێك هه‌وڵ و ماندووبوونی خۆته‌
هه‌ر خۆت ده‌زانیت تووشی چ هه‌ورازو نشێو بوویته‌
كه‌چی هێشتاش به‌ پێوه‌یت و نه‌كه‌وتوویت

راست نییه‌ ده‌ڵێن شه‌مه‌نده‌فه‌ره‌كه‌ به‌جێی هێشتوويت
له‌ڕاستییدا كه‌س له‌وه‌ی له‌ناخیدایه‌ به‌جێ نه‌ماوه‌
هه‌ر كه‌سه‌و كاتی خۆی هه‌یه‌ بۆ به‌دیهێنانی ئامانجه‌كانی