..
اذا خطبت وتمت الخطبة بالفعل ، انتفي سبب اطلاق البصر
ومش من حقك تبحلق ولا من حقك تبحلقي لان الأمر عاد للتحريم الأول وأنتم أجانب عن بعضكم لحد العقد
يعني لا بحلقة ولا سفر ولا لمس ولا حب ولفلفة بلا داعي ولا خضوع بالقول محرم ، اللهم بلغت 😁

#الساخر_الهادف
#ضوابط_الخطبة

الفتن كتير، وكل يوم خناقة والواحد زهق، أعمل ايه عشان أدخل الجنة ؟؟
= روى البخاري عن طلحة بن عبيد الله أنَّ أعْرَابِيًّا جَاءَ إلى رَسولِ اللَّهِ صَلَّى اللهُ عليه وسلَّمَ ثَائِرَ الرَّأْسِ، فَقالَ: يا رَسولَ اللَّهِ أخْبِرْنِي مَاذَا فَرَضَ اللَّهُ عَلَيَّ مِنَ الصَّلَاةِ؟ فَقالَ: الصَّلَوَاتِ الخَمْسَ إلَّا أنْ تَطَّوَّعَ شيئًا، فَقالَ: أخْبِرْنِي ما فَرَضَ اللَّهُ عَلَيَّ مِنَ الصِّيَامِ؟ فَقالَ: شَهْرَ رَمَضَانَ إلَّا أنْ تَطَّوَّعَ شيئًا، فَقالَ: أخْبِرْنِي بما فَرَضَ اللَّهُ عَلَيَّ مِنَ الزَّكَاةِ؟ فَقالَ: فأخْبَرَهُ رَسولُ اللَّهِ صَلَّى اللهُ عليه وسلَّمَ شَرَائِعَ الإسْلَامِ، قالَ: والذي أكْرَمَكَ، لا أتَطَوَّعُ شيئًا، ولَا أنْقُصُ ممَّا فَرَضَ اللَّهُ عَلَيَّ شيئًا، فَقالَ رَسولُ اللَّهِ صَلَّى اللهُ عليه وسلَّمَ أفْلَحَ إنْ صَدَقَ، أوْ دَخَلَ الجَنَّةَ إنْ صَدَقَ.

اطّمن علي دول الأول لأن دول أهم من أي حاجة، وكما قال رسول الله : دخل الجنة إن صَدَق!

#الساخر_الهادف

يبني ممنوع الكلام في الحب بالشكل المفرط ده، الخطوبة مش بتتيح ليك أي حاجة غير أنك تتعرف علي خطيبتك في حدود الأدب، انت أجنبي عنها وكده حرام !!
= حاضر يا شيخ، والله مش ببعتلها ده كتير انا ملتزم بالضوابط

*هو كل يوم الصبح:
حبيبتي في الله أم يزن بنت الأصول السلام عليكم ورحمة الله وبركاته ، أتمني تكوني بتصلي الفجر وحشتيني ، وبتاكلي كويس بحبك

.. هتعجبها أووي أم يزن دي أنا عارف ، وكدا نكون ملتزمين بالظوابط ميه ميه 😁

#ضوابط_الخطبة
#الساخر_الهادف

-
حرام أنك تكلم خطيبتك بكلام يهيج المشاعر بأي شكل، لانه مهما بلغ تقواكم وحرصكم فالشيطان الملعون لن يترككم وسيستدرجكم خطوة بخطوة ألي كل فاحش..

انا عارف انكم بتحبوا بعض، بس أجلوا الكلام ده لوقته .. بيبقي له أثر اجمل وهيبقي حلال 
مبقولش خليك جاف، لا، خليك ذوق ومحترم
بقول خليك ملتزم بضوابط الخطبة، وحاول انك متعديش الخطوط الحمراء دي عشان صدقني الاستشارات مليانة بلاوي سودة.. مش عاوز اسد نفسكم بس امسك نفسك أحسن، اللي قبلك كلهم ضاعوا لانهم تساهلوا في الأمر

او اكتب كتابك بدري شوية وحب فيها براحتك يسيدي
لكن غير كده .. هتندموا هتندموا هتندموا

ربنا يزوجكم عاجلا يا رب 😁

#الساخر_الهادف
#ضوابط_الخطبة

هو مفيش حل؟!

#الساخر_الهادف
#مقاطع_دعوية

أغنى رجل على وجه الأرض ؛ يا ترى كانت نهايته ايه؟!

#الساخر_الهادف
#مقاطع_دعوية

نصيحة ليك من أخ ليك
عاوزك تفكر شوية قبل ما تقرر انك تكون بتاع بنات، أو خليني احدد الوصف واقول "عكاك" ولاهث خلف كل ما هو مؤنث
وقبل ما تنفعل، عاوز افهمك انك لما تشوف بنت "أيا كان شكلها وطريقة حياتها حتى لو رقاصة" .. وبعدين تروح تتدحلب وتجر ناعم وتستجدع معاها وتهتم بيها وتتغزل فيها وانت عارف ان كل ده مش هيعمل حاجة الا انه هيخليها تحبك أو على الأقل ترتاحلك، وبعدها
نبدأ ننقل العلاقة لمرحلة أعلي ونتقابل ويحصل تجاوزات، أو يحصل تجاوزات اونلاين في الشات والكاميرا وخلافه تخت بند انك بتحبها وهتكمل معاها ،وهي أقل ما توصف به انها ساذجة متعرفش أن الحياة مش بريئة زي ما هي فاكرة ف هتأمنلك وتديك كل ده وهي مطمنة
انك هتتجوزها زي ما وعدتها "على أساس أن لو ده حصل هيبقى التجاوزات والعلاقة دي قبل الجواز حلال يعني"

وبعدين نوصل لنقطة : هتيجي تتقدملي امتا؟
ف تبدأ انت بقى ترد : عندي جيش / انا اكبر واحد في اخواتي وصعب اجي دلوقت / حاسس اني مش جاهز / حالتنا المادية مش أفضل حاجة ومش عاوز اضغط على اهلي / اديني سنتين اكوّن نفسي / انا بحبك بس انتي تستاهلي حد احسن مني، هتتعبي معايا وانا مرضاش
ليكي ده / انا بعمل كده عشانك.... الخ
طب كان فين كل ده وانت بتعمل معاها اللي عملته؟

عارف يا صاحبي؟ انا مش هقولك خاف ربنا واتقِ الله وكل ده، لأنك عارف ان ده كله حرام وغلط وكبائر كمان، وعارف من الاول انك داخل دخلة مش تمام لأجل غرض معين في دماغك، وكدبت وهي صدقتك، مفيش ذئب وضحية على فكرة، انتو الاتنين شركاء في ده، بس انت هنا في كامل وعيك! وهي انضحك عليها بمعسول كلامك واهتمامك بسبب قلة وعيها فبقت مغيبة ونايمة! ف انت المحرِّك من البداي ة

عارف أشد عقاب للي بتعمله ده ايه ؟
انك هتفضل طول حياتك مرعوب! عايش هتموت من الخوف أن ده يحصل للي يخصوك! وهتبقي راجل شكاك وعمرك ما هتآمن لست حتى لو الست دي مراتك أو بنتك!
أشد عقاب ليك انك تعيش عمرك كله وانت مستني تتردلك، ف تعيش كل ايامك الأمر بيطاردك في يومك وبيقلق منامك!
حياتك "كلها" هتفسد وهتتدمر، وافتكر الكلمتين دول وقتها..

مفيش كلام تاني اقوله غير ربنا يهدينا كلنا ويتوب علينا ويغفر لنا، عشان احنا والله مش مدركين حجم العواقب اللي ممكن تعود علينا من
يعم مالك في ايه!!have some fun أفعالنا دي، فاكرين انها "عادي" وكنا بن

لله الأمر، ولا حول ولا قوة الا بالله
سلام .

#الساخر_الهادف

لماذا يا وفاء؟؟

باب استغراب شديد لما تلاقي نفس التجارب عمالة تتكرر بدون أي تغيير سوي في الاسماء، نفس السيناريوهات
واحدة حبت واحد
كلمته اكتر فحبته زيادة
بقي هو كل حياتها والعكس
قابلها مرة واتنين وتلاتة
مسك ايديها
حضنها وقرب منها
مسك جسمها
قد يتجاوز الامر هذه النقطة لنقطة ابعد بكثير..
( بعتتلو صور )محنا بقينا زي المتجوزين خلاص
عملها ألبوم
اتخانقو وبدأت العلاقة تبوظ
بدأتي تفوقي / او هو بدأ يتغير
العلاقة بتلفظ انفاسها الأخيرة
بطلتي تبعتيلو صور وتقابليه
انسحبتي من العلاقة / او هو انسحب
بعدتو في هدوء بدون دوشة
بدأتي تشوفي نفسك قذرة ورخيصة وقرفانة من نفسك
اكتئاب وندم شديد وعياط كل يوم
او بعد ما بعدتي يفضل وراكي
يبدأ يبتزك ويهددك
خفتي واترعبتي
بدأتي تشوفي نفسك ضحية
بينك وبين الفضيحة شبر
اكتئاب وحزن وخوف ورعب وندم
أعمل ايه ؟
أبعتله واقابله تاني ولا اقدم فيه محضر؟
حياتي بقت سودة
عاوزة أنتحر
الحقني يا مجتمع انا ضحية

وهكذا وهكذا وهكذا

ويبقي السؤال المهم!
(ليه تعملوا في نفسكم كده)من الأول؟؟؟
ليه تدخلي باب نهايته انتي عارفاها وشايفاها الف مرة قبل كده ؟؟ لماذا يا وفاء ؟!
سامحونا يا اخواتنا، بس انتو مش ضحايا لحاجة سوي سذاجتكم واتباع هواكم وقلوبكم، بالعكس، انتو شركاء في الجريمة دي، مفيش نعجة وذئب، انتو الاتنين مشتركين في اللي حصل بنفس درجة الذنب، شركاء
هو مذنب وانتي مذنبة
وللأسف مش كل الرجالة سوية، في ناس مريضة ومش هتسيبك في حالك حتي لو تبتي وندمتي وبطلتي
وفي ناس من كتر ما اتجرحت عاوز يذلك ويكسر نفسك زي ما عملتي فيه، وبرضو هرجع اقول: ليه من الأول اروح هناك؟؟ ليه احط رقبتي تحت سكيـ-نة حد ؟؟

انسحبوا من دلوقت مهما كان في حب يا شباب
الحرام نهايته هتوجعكم وتدمركم .. بلاش مغامرات
اسمع للي سبقك وعارف وشاف اكتر منك بكتير
انسحبوا حالا، افضل ليكم وليهم ومتفكرش كتير
ومش ذنب، الذنب انكم تكملوا في الحرام بحجة الحب
اتقي الله يا بنت الناس
اتقِ الله يا ابن الناس

#الساخر_الهادف

بمناسبة عيد الحب
45% من حالات الزواج عن حب تنتهي بالطلاق
40% من الزيجات الناتجة عن حب، تشهد خيانات زوجية
35% من عدد الحالات دي جوزها اتجوز عليها تاني
فيما بلغت نسبة المشاكل والعنف الجسدي نحو% 75! وده دراسة اتعملت في ٢٠١٦
وفي دراسة حديثة بقي لنقيب المأذونين المصري قال ان% 75 من حالات الزواج عن حب انتهت بالطلاق "آني آسف"

اللي جاب هدية يولع فيها بقى ويرقد في بيته ويتقي الله احسنلو عشان النهاية هناك اهي انا شايفها، اتقوا الله عشان هنرجع نكاكي ونسحّ دموع في الجروبات والمنشورات وفي المحاكم و "انا انخدعت فيك/ي" وستتدمر حياتك ويضيع جهدك وقلبك ومالك وستندم ندما والله لن ينفعك حينها وتتمنى لو عاد بك الزمن ولم تفعل ما فعلته، يكفيك إلى هنا! وسيب دلوقت بمزاجك وانت لسه مخسرتش حاجة واتعب شوية ، بدل ما تسيب بكره برضو بس بعد ما تكون خسرت "كل" حاجة وتفضل تعبان باقي عمرك وندمان ومكسور!
كل اللي حاول قبلك فشل وخسر "الا قليلا"، والعاقل مبيبنيش كل حياته ويبني قرار مصيري زي ده على احتمال "قليل ونادر" ان في واحد من مليون نجحوا يبقى انا كمان هنجح!

الحب جميل، بس الحب (الحلال) اللي بيكون جوه قلبك ومبيطلعش الا بين اتنين ربنا راضي عن فعلهم في خطوبة أو زواج، ف متفسدش على نفسك واحد من أجمل المشاعر الإنسانية وهو الحب، متشوهش نفسك، انت موهوم وده مش حب، ده سم هيبقى هو سبب موتك حرفيا، وغدا تدرك ويا ليتك تدرك الان، فغدا تكون الخسائر أفدح مما تظن

انا بحبك وخايف عليك، وانت حر، دي حياتك
وحياتك =قراراتك .
سلام.

#عيد_الهيئ
#الساخر_الهادف

هو ليه الإسلام والإسلاميين مش وراهم الا المرأة المرأة، هو مفيش مواضيع تانية غير المرأة عندكم؟!!؟؟
= مش فاهم السؤال، أو ليست هذه المرأة مسلمة..؟

اه مسلمة
= طب ليه زعلانة اننا بنقولها الإسلام بيقولها ايه وبيأمرها بايه؟

ايوه بس مش كل شوية كده، احنا زهقنا!!
= زهقتي عشان بتسمعي نفس الكلام كل مرة ومش عاوزة تسمعي، ولا مدايقة أن كل شوية حد يفكرك بالصواب والدين؟
وبالمناسبة، انا مثلاً بتكلم عن كل حاجة تقريباً وبوجّه نصح للجنسين في موضعه "واللي متابعني عارف ده"
لكن لا نراكم الا حين نكتب كلمة توجيه للمرأة، وكأن توجيه المرأة للصواب أصبح سُبّة!

بس انا عندي طاقة كبيرة على فكرة واقدر اعمل كل حاجة انتو بتعملوها كرجال بل واحسن، ليه التحجيم لدورنا ده!!!
= متفق معاكي انك تقدري، بس المشكلة مش في القدرة يا بنت الناس، المشكلة ان في أوامر ونواهي تحكم ما يمكنك فعله ولا يمكنك
بمعنى، انا اقدر اسرق واقتل وازني، بس عندي أوامر ونواهي بتقولي متعملش ده، فأنا مؤمن بدين لازم احتكم ليه في كل حاجة وارجعله
اعملي كل اللي عاوزاه "طالما حلال"! لكن أي حاجة هتخرج بره إطار الحلال والعقل والعرف .. صدقيني هتندمي

ايه دخل الدين في الموضوع مش فاهمة انا !!!
= اهو هي دي المشكلة الفعلية، انهم اقنعوك واقنعوكي أن الدين ليه "حصة" وان الدين ليه "شهر" والقرآن ده وقت الحزن والمياتم بس، حصرولك الدين في كورنر لا يجوز لك إخراجه منه
بس عمرهم ما قالولك أن الدين ده بينظم ابسط أمور حياتك حتى، الاكل والشرب والنوم، الدين بيقولك ازاي تغتسل من قضاء حاجتك وازاي حتى تجامع زوجتك! الدين داخل في "كل" حاجة في حياتك، ف اوعي تصدق جملة "بعيداً عن الدين" عشان مفيش اصلا حاجة واحدة بعيدة عن الدين يا صاحبي

طب تقول ايه للرجالة اللي بتقهر الست وبتحسسها بعجزها؟!
= لا جزاهم الله خيراً لأنه ما هكذا أمرنا رسول الله، ولا هكذا يكون التعامل في ديننا مع القوارير، وهي صاحبة حق وهو يجب أن يُحاسب "وقلت ده كتير بتفصيل اكتر للي متابعني"
هو الذي أخطأ، وليس الدين يا بنت الناس، الدين سليم قويم، ولا علاقة له بظلم أو سوء معاملة، هذا السوء منا نحن .. نحن السيئين وليس الدين

* لما تشوفي راقصة الباليه أو الطبالة أو المغنية أو عارضة الأزياء أو الممثلة بتتكرم والناس مبسوطة اوي بيها، اوعي تفتكري أن ده الصح، اوعي تفكري أن كسر حواجز الدين والعرف والعادات ده نجاح وإنجاز! والله هذا كل الخسارة، وغداً يعلمون
النجاح والإنجاز يكون بما يرضي الله ورسوله، لكن ما دون ذلك، هو نجاح دنيوي، خسارة اخروية يبكي أصحابها دماً يوم القيامة .. فلا تغتروا !
النجاح والإنجاز مش بالفلوس الكتير، ولا بالفلورز الكتير، ولا بالشهرة الكبيرة ! عشان في ناس محدش من أهل الدنيا يعرفهم .. بس كل اهل السماء عارفينهم، وهذا لو تعلمون هو النجاح الحقيقي

احفظها عني .. "أكثر" أهل الأرض سيضلّوك، ولكن "قلة" هم من في النهاية سينجون .. فلا تغترّ بالأعداد ولا بالكميات يا صديقي
هتلاقيهم في كل مكان يعملو هاها أو يعترضوا وتسفيه من كلامك "ولكن الحقيقة انهم لا يعلمون أنه ليس كلامك، انت فقط تخبرهم بما يقوله الله ورسوله! "
هدى الله الجميع وانا منهم، لكنه أمر محزن أن تجد الناس تقابل الدين بالهاها والتسفيه .. ولا أعلم ماذا أعددنا لنكن بكل هذه الجرأة على الله ورسوله .. ماذا لدينا أخبروني ..! 💔

"وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَن يَكُونَ لَهُمُ الْخِيَرَةُ مِنْ أَمْرِهِمْ ۗ وَمَن يَعْصِ اللَّهَ وَرَسُولَهُ فَقَدْ ضَلَّ ضَلَالًا مُّبِينًا"
اقرأها وافهمها .. تكفيك

#الساخر_الهادف

مَا سَلَكَكُمْ فِي سَقَرَ ؟ (يعني ايه اللي دخلكم النار)
= قَالُوا لَمْ نَكُ مِنَ الْمُصَلِّينَ....

ترك الصلاة أعظم الكبائر علي الإطلاق، ف متهزرش عشان دي بالذات مفهاش هزار خالص
تارك الصلاة مع فرعون وهامان وقارون في قعر جهنم !!
متخيل مكانك فين لو مبتصليش ؟

إياك تموت وأنت مبتصليش
لو مبتصليش، ابدأ وجاهد نفسك
ولو بتقطع، اجتهد تلتزم وجاهد نفسك
ولو ملتزم، ادعي ربنا بالثبات وجاهد نفسك

جاهد وعافِر لحد ما تستقيم
او تموت وانت بتجاهد وبتعافر عشان تستقيم

إيااااااك تموت وانت مبتصليش
دي الخسارة اللي فعلا مفهاش تعويض.. فيها نار!

#أكبر_الكبائر
#الساخر_الهادف

هو ايه اللي يدايق في فكرة أن المرأة تطبخ وتغسل وتنضف بيتها لجوزها حبيبها وعيالها قرة عينها ويكون بيتها رقم ١ قبل كل حد وكل شغل وكل حاجة ؟ هو أصلا في إحساس أجمل من كده بالنسبة للمرأة السوية ؟
مش فاهم ايه ممكن يعصب واحدة من القصة دي إلا أنها حاجة من اتنين :
- مراهقة او طالبة ملهاش سابق علم ولا تجربة في الزواج أو معنى البيت ومفهوم الزواج، ودول الاغلب
- واحدة طيبة رامية ودنها لبعض المطلقات المفسدات والنواشز (وهم قلة بالمناسبة بس صوتهم عالي شوية) اللي علي الميديا ف بدأت تتشبع بأفكارهم الساذجة بدون وعي منها وهم واهمينها انهم بيدورو علي حقها وهم كل هدفهم تبقي مطلقة او ناشز زيهم ف تتساوي الرؤوس مش أكتر

كل حاجة حواليك هنا بتدفعك تتحللي من دينك وعقلك عشان وقتها تتحركي بمعاييرهم هم مش معايير الإله اللي خلقك، ف فُوقي عشان تمن الحاجات دي غالي

#الساخر_الهادف
#بديهيات

(مشهد رقم 1)
س : باركولي يجماعة انا لبست الحجاب خلاص الحمد لله❤️

= ص : حجاب؟! انتي شايفة نفسك الأول؟!! وشعرك اللي ظاهر ده والبنطلون اللي انتي لابساه ده يبقى حجاب؟؟ قرفتونا وكرهتونا ف الحجاب الله يقرفكم انتو واشكالكو، يا تلبسيه صح يا تقلعيه يماما!!
ع : حجاب ايه بالميكب اللي ف وشك ده هههه، قالك حجاب، عشنا وشفنا والله حجاب على وش سافرات ومبسوطين بيه كمان هههه، اقلعي الطرحة دي يماما ومتهينيش الحجاب معاكي، مش ناقصة عك

(مشهد رقم 2)
س منزلة فديو ليها مع خطيبها بشعرها وفستان ضيق وبيرقصو وهو ايده ع وسطها وحضنها ولف بيها ف الرقصة

= ص : خطفتوا قلبي ما شاء الله عليكي، ربنا يحفظكم من العين يا رب، انتي قمر اصلا وخطيبك يبخته بيكي وبجمالك وبرقة قلب واحدة زيك، الفديو مليان مشاعر جميلة اوووووي
ع : ايوه بقاااا، انا لو لقيت حد يحبني كده ممكن اموت فيها هههه، لايقين على بعض اووووي بجد والرقص تحفة تحفة تحفة، كويس انه موقعش بيكي وهو شايلك وبيلف كانت هتبقى ترند دي هههه، ربنا يخليكم لبعض يا قمري

ها .. فهمت حاجة؟
لا اقول الا لا حول ولا قوة الا بالله العلي العظيم! نروح للشخص السالك الكويس أو اللي بيحاول حتى، ونطلع فيه القطط الفاطسة لحد ما يكره عيشته انه قرر بس ياخد "خطوة" ف التغيير انه يبطل عادة وحشة أو يبدأ عادة حلوة، بدال ما نشجعه ونقوله احسنت وربنا يكملهالك على خير، وحمد الله ع سلامتك وبكره هتبقى احلى كمان من دلوقت!
اما اللي فاتحها ع البحري وإريل ف نفسه نجيبه ونقول اوووه الراجل الحنين رزق بجد، واللي كل ايميلاتها صور وفيديوهات وبوستات لا أدري والله كيف تقابل الله بها نقولها اوووه انتي جامدة كده ليه خطفتي قلبي بجد، اوووه فستانك جميل اوي وخطيبك يبخته بيكي بجد، اوووه ال outfit بتاعك النهارده تحفة بالذات الpants، الميكب جميل اوي جايبة الايلاينر والكونتور منين؟؟؟

تاهت منا أنفسنا في زحام الدنيا وزينتها! ، وغداً والله موتٌ قادمٌ لا محالة، وسنُجرّد من كل ذلك ونُلَف في قماشة بيضاء ليست على أحدث صيحة أبداً! .. غداً والله تقف .. يسألك الله عن كل صغيرة وكبيرة، ويا لقلة حيلتك حينها .. يا ويلك من هكذا موقف إذا لم تعمل .. يا ويلك
تخيل الموقف .. وأخبرني كيف تصنع إذا مت الآن ..

#الساخر_الهادف

((ربنا يرزقنا براجل زي ده، الراجل الحنين رزق بجد))
جملة بتتقال لما واحدة تشوف (راجل) لطيف وجدع وعاقل في تعامله مع الناس في الشارع او مكان العمل، بالذات لما تشوف تعامله مع النساء الأجانب (شايفة ذوق ازاي؟ يبخت اللي هتكون من نصيبه)

تعالوا نوضح الفرق بين (الراجل - والرجُل)
(معظم) الرجالة - إن لم يكن كلهم - بيتعامل بألطف وأرق طريقة مع الناس، مؤدب وذوق وجدع وشهم وصاحب واجب، الله بقي لو بيتعامل مع نساء، ماسورة ذوق ولطف ضربت في المكان، وده المعظم، لذلك ده مش معيار، الراجل غالبا كده!

لكن (الرجُل) ده تعرفه لما تبص ازاي بيعامل أهل بيته!
ازاي بيعامل (النساء بالذات) المسئولين منه زي أمه وأخته ومراته وبنته، هنا بس هتقدر تعرف وتقيّم قد ايه هو رجل وفيه خير! لأن الإنسان مبيعرفش يمثل علي أهله، وبيتعامل بأسلوب يصل لحد الأذي لأهل بيته! وحسن الخلق مع الأهل صفة ميعملهاش إلا اللي فيه خير فعلا
لذلك قالوا زمان: اللي ملوش خير في أهله ملوش خير ف حد!
وقال رسول الله ﷺ : وخيارُكُم خيارُكُم لنسائِهِم!
وقال ﷺ : خَيرُكم خَيرُكم لأهلِه!
ده معيار الخيرية اللي فقدناها النهارده، فانهدمت بيوتنا
ولا حول ولا قوة إلا بالله

الأول موجود كتير وهو غالبا اللي بيتشاف، مش محتاجين نتعب عشان نلاقيه، متنبهرش بالظاهر، ده فخ!
لكن التاني ده لو لقيتوه، متفرطوش فيه، عشان اللي مبيعاملش أهل بيته ودمّه أفضل معاملة عمرُه ما هيبقي فيه خير لحد، ومسألة وقت وهيتعود على الشخص الجديد، وينقله لدايرة عدم الود وسوء التعامل.

لذلك دايما دورو على إجابة سؤال: هو بيعامل أمه وأخته ازاي ؟ أخلاقه جوه بيته ايه ؟
ده السؤال المهم، لكن الظاهر غالبا هيبقي جميل!

اللهم اهدِنا واهدِ بنا واجعلنا يا رب سببا لمن اهتدى

#الساخر_الهادف

-كل الناس اللي هتقابلك بتعمل حاجة عكس الدين بحجة الحرية أو التطور ف تحس انك متقيد مش حر زيهم

-كل الناس اللي هتقابلِك تستهزأ بالحجاب والخمار وتتنمر ع النقاب فتزعلي لأنك متأكدة انك صح بس هم للاسف اكتر منك

-كل صحابِك اللي شايفين انك معقدة لمجرد انك مبتكلميش ولاد أو بتديهم وش وبتتهمك بالرجعية وانك هتعنسي وايه ده يبنتي انتي ازاي مقفولة كده بيييجاااد!!

-لكل أصحاب الجمل اللي زي، هو انت بتفهم حاجة؟ ده انتو متخلفيين رجعيين ياخي ايه ده!! ، ده الدين يسر يا متشددين، ده انتو مش فاهمين معنى الدين الصحيح، ارتقو بقا وبطلو شغل الجاهلية ده هههه
وبعد ده كله تلاقيه يقولك انا مسلم يعم مالك فيه ايه؟ هتكفرني ولا ايه؟؟

- كل اللي بيقولولك انتي وحشة، حطي ميكب عشان تحلوي! البسي ده وده عشان تحلوي! وحطي البرفيوم ده عشان تكوني جذابة أكتر! لا بيّني رجلك من تحت عشان تكوني ملفتة! بصي طلّعي القُصّة كدهو يلهوي قمررززز،
ولما تقوليلهم لا حرام، يقولولك إن الله جميل يحب الجمال يبنتي ايه التخلف ده، ده انتي متشددة اوي بجد!!!

-لكل اللي بيتكلمو عن الحريات واللي هم نفسهم اكتر ناس بيحجروا على حريات الناس التانية ويتهموهم بمعاداة الحرية بل بالتخلف لمجرد أنهم مش على نفس رأيهم!!

-لكل دول .. هرد عليكم بكلام لا هو كلامي ولا كلام إمام معين اصل محدش منهم بيعجب .. هرد عليكم بكلام رب العزة سبحانه، اللي بيتجلي فيه جداً كل الأمثلة دي
يقول الله " وَإِذَا قِيلَ لَهُمْ لَا تُفْسِدُوا فِي الْأَرْضِ قَالُوا إِنَّمَا نَحْنُ مُصْلِحُونَ (11) أَلَا إِنَّهُمْ هُمُ الْمُفْسِدُونَ وَلَكِنْ لَا يَشْعُرُونَ (12) وَإِذَا قِيلَ لَهُمْ آمِنُوا كَمَا آمَنَ النَّاسُ قَالُوا أَنُؤْمِنُ كَمَا آمَنَ السُّفَهَاءُ أَلَا إِنَّهُمْ هُمُ السُّفَهَاءُ وَلَكِنْ لَا يَعْلَمُونَ (13) "

ثبّت الله المؤمنين علي الحق، وهدي الله الضآلين عن الطريق، وأنار بصرَ الباحثين عن اليقين .. اللهم آمين

إنا لله وإنا إليه راجعون

#الساخر_الهادف

محتاجين نستغل الزخم ده عشان نفكر بعض بقليل من الأمور (التي هي دين وعرف وأساسيات) ولكنها اندثرت!

- الراجل اللي مبيغيرش على عرضه اسمه ديوث، مسموش متفهم ولا عاقل ولا جنتل، اسمه (ديوث) ، والله لا ينظر له يوم القيامة من فداحة ذنبه.

- الحجاب يعني الستر، والستر بمعناه العام وليس مجرد تغطية الشعر بحتة قماشة، يكفي انك تبقي عارفة انك مقصرة جدا لو مش ساترة كل بدنك، لكن حصر الحجاب مجرد غطاء شعر وتسميته حجاب هذا تلبيس وافتراء وفتنة لباقي المسلمات.

- البكاء والكلام المعسول ليس دليلا على الصلاح، وابتزاز الناس عاطفيا تحت مسمى (انا بحاول انتو ليه بتهاجموني كده) هو فعل طفولي سخيف، محتاجين نبقي بالغين وكبار ونتحمل نتايج افعالنا ومجاهرتنا بالذنوب (واللي هو كبيرة من الكبائر تخرج صاحبها من رحمة الله بالمناسبة) مش دل ما حد يكلمنا ف الصح نطلع نعيط عشان نكسب تعاطف وحب الناس، هذا أكثر فعل طفولي رأيته.

- احنا مسلمين، وملناش معيار تقييم في الأمور دي غير القرآن والسنة، مبنقيمش بمعايير اوروبا ولا عالم التيك توك ولا بمعايير الفيفا، والدين يقول أن هذا (دياثة ومجاهرة بذنوب ونشر فتن وإشاعة فاحشة في المؤمنين) والله يقول: إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ.

- تقبلك للأفعال ده تطبيع مع الحرام، وتشجيعك للي بيحصل ده ذنب كبير، والتماس الأعذار له حدود لأنه بيقلب بحمق وسذاجة ساعات، بل إن التماسك العذر لشخص (أكيد) حد كلمه او كتبله تعليق او عمله بوست زي ده او فيديو ونصحه فيه بل وفي ظل وجود الميديا اللي خلت كله عارف الحلال والحرام بالذات الذنوب المشهورة دي، التماسك الأعذار هنا سُخف وحماقة شديدة، وإنكار المنكر أولى وأهم

كن مسلما واعتز بإسلامك، ومتخليش العواطف تدفعك انك تقع ف حرام او تشجع حرام او تتقبل حرام! كن مسلما وإياك والفتنة بهؤلاء فإنهم والله في بلاء شديد وفتنة عظيمة، نسأل الله لنا ولهم الهداية والله

#الساخر_الهادف

هذا النموذج هو مثال لفئة كبيرة أصبحت منتشرة، وهي فئة المشاهير البلوجرز المتزوجين او المخطوبين، لذلك الكلام أعم من تلك الحالة، فالكلام على كل من كانت أفعاله مثلهم

نسأل الله ان يتوب علينا وعليهم

#الساخر_الهادف

مش هحاول اتكلم عن محتوى الكتب ولا أهميتها، بس بجد متفكرش في الدهب والعفش قبل ما تفكر في التأهيل الفعلي والحقيقي للزواج! ولازم تتعب شوية، بس هترتاح الجاي من حياتك كله.

الكتب دي قيمة ونافعة جداااااا ، وأنصح بها وبما فيها لكل من يريد أن يعيش علاقة وحياة زوجية طيبة وناجحة ♥️

#الساخر_الهادف

-
ميزة الكتب دي انها مش تنمية بشرية ولا كلام حماسي ولا هري علماني، ويمكن ده اللي مخليني حاببها جدا، لأن كل اللي فيها على الهدي النبوي من القرآن والسنة وقصص الصحابة والسلف، وكمان فكرة انها مقسمة على الفترات ومراحل العلاقة، كنوع من التسهيل عليك انك تشتري بس اللي انت محتاجه، والتفصيل ف الأمر ده مهم جدا جدا جدا، ولذلك الكتب كتير

الكتب عندي، وحقيقي لا تتردد انك تحوش وتجيبهم واحد بواحد مع الوقت

#الساخر_الهادف

لو سمعت قصة توبة أي حد وتغييره هتلاقيه بيحكي حدث معين في حياته، خطبة سمعها، فيديو قابله، حد مات من المقربين عنده، صاحبه نصحه، سمع آية في موقف معين، قصة حب فشلت، المهم انك هتلاقي نقطة فيصلية
هتلاقي أن كل اللي بقو قدوة دلوقت كانو ناس أسوأ بكتير منك ومني، بس لما جت ((لحظة النور)) مسك فيها بايده وسنانه وقال: الآن يا رب، الآن أعود يا رب

كلنا ربنا بيبعتلنا الرسايل دي من وقت للتاني، كلنا بلا استثناء، مش عشان احنا نستاهل، بل عشان هو رحيم تواب يريد أن يتوب علينا ويحب لنا الهدى والخير، يريد أن يخفف عنا سبحانه، ولكن كتير مننا لما بتجيله لحظة النور بيغمض عينه او بيديها ضهره، وأول ما الصوت جواه يقوله: أنا حاسس أن دي اللحظة، مش يلا بقى نرجع؟ بيروح مسكّت الصوت ده ويلغيه ويتناساه عشان ميغيرش حاجة ولا يبدأ رحلة نجاته وفرحته الحقيقية، زي ما في ناس هتعمل سكيب للمنشور عند النقطة دي.

كل اللي مبيصليش، كل اللي بيشرب سجاير او مخدرات، كل اللي بيلبسوا لبس لا يرضي الله، كل اللي بيحطو برفيوم فواح ويبينو نص الشعر من الطرحة، كل اللي في علاقات حرام، كل اللي بيسمع أغاني ويحضر حفلات، كل اللي عنده ذنوب خلوات، كل اللي بيعمل معاصي معطلاه ومنغصة عليه حياته، كل اللي فاكر أنه مفيش منه أمل، عاوز أقول أنك لو بتقرأ دلوقت ف هي دي الإشارة، هي دي اللحظة! هي دي اللحظة اللي لازم تقف فيها وتقول لنفسك: هو انا مستني ايه ؟ مستني مين يموتلي عشان أرجع؟ مستني أتفضح في مرة ؟ مستني أموت طيب ؟ مستني ايه عشان أرجعلو وهو كل يوم فاتحلي بابه وبيناديني: هل من مستغفر! هل من تائب.. هفضل لحد امتا بعيد؟ هل بعدي ده مريحني؟ هل اللي بعمله ده عادي؟ طب لما هو عادي ليه أنا مش سعيد وحياتي كل يوم بتسوء عن اليوم اللي قبله؟ لحد امتا هفضل أأجل...؟

وقت ما تشوف البوست قوم فورا اتوضأ واقف بين ايدين ربك تصلي ركعتين وقوله: آسف يا رب، الآن يا رب، الآن عدت، يا رب أنا عبدك الخطاء وأنت الله التواب الرحيم، اقبلني وارحمني.. اقبلني وارحمني.. اقبلني وارحمني.

الآن يا صديقي، لأن - والله - الموت سيأتيك فجأة بدون موعد، وكلنا هنموت.. ف خليك جاهز، خليك مستعد.
امسك اللحظة دي بايدك وسنانك يا صديقي، لأن يا عالم هتيجي تاني امتا، ويا عالم هتلحقها قبل ما تموت ولا لأ..

#الساخر_الهادف