#یاوگەو_ئاواتا↙️
🔶 @Ema_Horamyenme
🔷🔶🔹🔸

ئەر چنار نازۆ کە بێ خەم پەی چەمات چەم چەم کەروو
یەک دەسەی هەر چێ چنارا پەی چەما تۆ خەم کەروو


ئەر چەمێ من هەر نەوینا ئا چەماتە من ملوو
چێروو چەتروو ئا چنارا چوون چەمم نەم نەم کەروو


هەم چنار و هەم چەمێ تۆ بێ گونێنێ لەیلەکەم
بەختوو وێم دانش کەمانم پەوچی یەکسەر کەم کەروو


ئێننە زووەن چەم نەوینانش سیاوی ئا چەما
ئەر ڕوێ وینوو چەما تۆ چۆن نەچیران ڕەم کەروو


چی دەمت گەرما وەنەم واچە هەتا کەی بێ وەفا؟
من جە ئاویرگا و لچا تۆ چای زۆخاوا دەم کەروو


ئەر جە وەزعوو نامۆرادیم و زەلیلیم تێک شیەی
تف کەرە تا من تەوافی ئاوەکەی زەم زەم کەروو


من جە مەجنوونی جە فەرهادی نەدیم خەیر و وەفا
با وەلی بوو چوون پەپوولە سەیری باڵای شەم کەروو


ئەر زەمانێ بێ نەپێویەی نەی وەراوەر یانەکەم
پێسە شیشێ ئی چەمامە با نەوینوو تەم کەروو


ئەی دڵەی وێڵم وەشی کۆن؟..نادیار..یما وەشا
وەقتوو کۆچوو ئاخرین با کۆچ و باریم جەم کەروو


#عەباس_غەریبی🌺


@joolandeh

نەوینانش چەمم هیچکەی جە تاق و پەنجەرە و عەشقی
کە وارانوو وەفاداری کەرۆ تەڕ مەنزەرەو عەشقی

خەبەر دەیدێ بە ئانیشا کە لاشا دا بە یەک دەعوەت
خەلاسیشا نیا یەک دەم جە یانەو بێ بەرەو عەشقی

هەناروو ئی بەر و بوومی جە شادٚی دەم ترەک نەبیەن
دەمش سەکتەو دڵیش کەردەن هەناروو ئی دەرەو عەشقی

جە یەک وەزن و جە یەک بەخشارێ هەم جەللاد و هەم حەللاج
عەجەب چیوێ جیاواز و جیاکەر بی سەرەو عەشقی

جە ساحیب لاسوو ئی هەردٚی مەپەرسۆ کەس کە پەی چێشی؟
هەمیشەی ئاورا و ڕووتا وەڵاخوو ئی گەرەو عەشقی

ئەگەر چی ناسکا دڵما وەلێ موحکەم بیەن پۆسش
هەڵیزوو ئی دڵوو ئێمە بە جەوتوو ئی نەرەو عەشقی

هەزار عیلمێ وەنی ئاخر نەبۆت عیلموو وەفاداری
خەڵاتوو تۆ مەبۆ هەرگیز کڵاوو مێزەرەو عەشقی

#عەباس_غەریبی

@joolandeh

ئەی خۆدٚا وەشڵەی بە حاڵت هیچ کەست مەرحووم نیا
سەدٚ هەزار وەشڵەی بە عەرشت میللەتش مەحرووم نیا

ئانە مەردٚەن دەفتەرش بەسیان و تۆشەش جەم مەبۆ
زیننە پەوچی فرسەتش هەن دەفتەرش مەختووم نیا

من جە شێتی عاقڵاو ئی عاڵەمی زانوو بە حەق
دەفتەروو عەقڵینە مەنتێق تا ئەبەد مەرقووم نیا

زوو شەریکی مانگێ و ئی هەوروو شەوێ واتەن بە من
چی وەڵاتوو زەڕ پرێسا عاشقی مەرسووم نیا

هەر وەڵاتێ مەولەویش کریا بە مەولانا مەقام
مەسنەویش بۆ مەعنەوینە و مەولەویش مەعدووم نیا

دڵ مەبۆ تێراو جە بەحسوو تازەواچوو عاشقی
کەوچەکەش نیما و کەمش هەن بەحسەکەش مەنزووم نیا

وەرگە هارێ زوو لوێ یاوێ مەقام و مەنسەبی
کیسەڵی دێرش بیەن چوون مەقسەدش مەعلووم نیا

چن سەراوار و چەپا ئی ڕەسم و یاساو عاڵەمی
عاڵەمێ کاول بیەن چوون خادێمش مەخدووم نیا


#عەباس_غەریبی

@joolandeh

دەگاوجۆڵاندێ

❤️پەی حەزرەتوو پیرشالیاری❤️


خۆدام تاقانەن و ئەڵڵان بە حەق پەروەردگارم هەن
ئەگەر گرکەس کەسێوەش هەن منیچ پیرشالیارم هەن

وەلی نێعمەت،غەنی پافەڕ،مەکین کۆگا،تەمەن بێ شەڕ
خەڵات ئاوەر،دیاری دەر،بە شاری پەڕ هەژارم هەن

ئەگەر وینی کە گەورێ ئا وەڵاتا زاڵمێنێ من
نموونە و سوڵح و ئازادی و گوڵی بێ قین و قارم هەن

تەبیب و دووکترێ ئارۆی ئەگەر حەیرانوو دەردٚانێ
ئەمن پیری شەفائاوەر جە خاک و سەنگ و دارم هەن

مەنازوو من بە پاشایا بە قەسر و ساختماناشا
هەتا پیری کز و بێ دەس ڕیازەت کێشی غارم هەن

هەواروو خەڵکی ئەر کۆنە و جە یارانی بیەن هاڵی
هەواری پەڕ جە یار و چۆڵ،هەمیشەی تاسەبارم هەن

جە زمسانان قەرار و تاقەت ئەر بڕیۆ جە ئەغیارا
جە سایەو پیروو پیراوە جە زمسانان قەرارم هەن

بە سۆزوو کوفری وێرانا هەواروو دین و ئیمانی
بە سۆزەو دینەکەو پیریم هەواری بێ کەلارم هەن

هەنا سەدٚ پیر و یەک میللەت کە نەقشم بەندوو نەقشێوەن
نە تورک و فارس و ئەفغان و نە قێرقیز و مەجارم هەن

خۆدا شوکرانە بۆ سەدٚجار جە بەحروو عەشق و عێرفانی
هەزاران گەوهەرێ خاسێ جە بەحری بێ کەنارم هەن

کە یۆ چا گەوهەرا سەیێد مسەففان غەوسی فەرماوان
پیایێ کامڵ و ئەلحەق برای بێ عەیب و عارم هەن

هەتا من زیننەنا ماچوو کە خاکت مەڵهەما یا پیر
کە مەردٚانێچ بە شانازی جە لات ئاخر هەوارم هەن

عەقیدٚەم کامڵا بەرزەخ بەهەشتا پەی منی لاری
بە هامسایی هەتا مەحشەر ڕەفێقی پای مەزارم هەن

#عەباس_غەریبی🌺
@joolandeh

دڵ هەمیشەی بێ بەشوو شادٚین جە غەم بێ بەش مەبۆ
زاموو دووری تۆ کرۆنان و بە داروو وەش مەبۆ

دوور جە لاشەیما بە دایم دڵ بە ڕۆح سەیرت کەرۆ
چێش کەروو یاوای بە ئاواتوو دڵی بێ لەش مەبۆ

ئی خڵووزوو خەڵوەتوو عەشقی عەزیزم جوز بە تۆ
پەی کەسی حەتتا بە لاسۆما و خەیاڵیچ گەش مەبۆ

واتەبێم بێ تۆ مروو واتت نەمەردٚی بێ وەفا
پەی گەدٚای سەختا وەساڵت بێ درۆ و بێ غەش مەبۆ

با ڕەقیب بێ خەم قیافێ گێرۆ واچۆ من هەنا
دەوروو شیرینی هەمیشەی بێ مەشوولە و مەش مەبۆ

خەتتێ ڕۆخساریم غەڵەت ئیملایی عەشقینێ کەسم
گەرچی زانوو من کە پیریچ بێ خەت و بێ خەش مەبۆ

پەی نەتیجەو عەشقوو تۆ شێتی کەما ئەی بێ وەفا
وێم و دڵ پەی عەشقوو تۆ ئاخر نەدٚەیمێ کەش، مەبۆ
#عەباس_غەریبی
@joolandeh

تەماشوو مەنزەرە و عۆمری جە جاموو یانەکەو مامێم
کەرۆ پیر و وزۆ سەرجەم دزانێو شانەکەو مامێم

جوانی ڕاویارێوەن کە تەژنەن پەی نەموو پیری
نەزانانش چیان ئاهش کونەو تۆختانەکەو مامێم

جە زووەن ئێش و نێش و خەم چەنوو پیری نیاشا وەش
سەروو هەنگامەکا و بابایم جە وەرهەیوانەکەو مامێم

ئەگەر کەنعانوو یەعقووبی گوڵستان بی جە نۆ بابام
لوێ چن یۆسفێش نەبیێ بلا کەنعانەکە و مامێم

بە یەعقووبی نەبی واچا سەبوورین مەڵهەموو عەشقی
کە ئاسان بۆ سەبووری ئەر بلۆ ئاسانەکەو مامێم

جە بەیتۆلحۆزنەکەش بێ بەر جە بەیتۆلحەمدەکە و باباییم
وەنۆ دەرسوو سەنا و حەمدی چەنوو ئیمانەکەو مامێم

چەموو ماساوە هەرسێنە جە کانەو ئا چەما زانام
بیەن وشک و نەمش چنیان چەموو سیروانەکەو مامێم

هەمیرش هورپڕۆ مامام مەوینوو تاتەلێم بێوە
مریچیڵێ وەرا زوو زوو هەمیروو نانەکەو مامێم

شەراب و مەی بە ماماو من ئەزەڵ تا ئیسە بێگانەن
خەریکا ئاشنێ بیمێ چەنوو بێگانەکەو مامێم

وەهارا نەرگسوو دووری زیان تاقوو چەموو تاسەی
چەنوو ڕەنگەڕەژیلێوە جە پەشتوو یانەکەو مامێم

سگاروو کاکەلێم ئاڕۆ کە جەرگش بی کەباب و سۆت
زیا گیانش جە دیواروو کەڵوو وێرانەکەو مامێم

هەواروو من هەوارێوەن کە تا مەحشەر مەبۆ کۆنە
زیانۆ چادلێ کەپرا سیاو ڕێحانەکەو مامێم

خەمێ با بەر کەرا عاڵەم پەناهەندێ کەروو گردٚی
جە وێران یانەکەو وێما و جە خەڵوەت خانەکەو مامێم

#عەباس_غەریبی🌺

دەگاو جۆڵاندێ

@joolandeh

ئەدٚا! عەترێ ئەگەر بێنێ و ڕەئیسوو گردٚی شەوبۆ بۆ
نیا عەترێ کە وەشبۆتەر جە سمڵ و مێخەکوو تۆ بۆ

تەماموو سازەکا تەسلیم بە دەنگوو لایەلایەو تۆ
تەنانەت سەردەسێ سازا نەی و تار و پیانۆ بۆ

سەرەو مەغروروو پاشایا وەراوەرتەو بە تەعزیما
ئەگەر خەسرەو وە یا کوورش، فەرەیدوون یا دیاکۆ بۆ

جە بەرزیت بەرزە کۆسارێ خەجاڵەتبار و حەیرانێ
چە عەودٚاڵان، چە کۆساڵان وە یا خۆ تەخت و شاهۆ بۆ

وەشا واردٚەی وەراوەرتەو سەروو سفرەو هەواریوە
ئەگەر چی خەپلە وشکێوە، کەرێ یا خۆ پلێ دۆ بۆ

بە کۆچوو تۆ ئەدٚالێ گیان هەواروو ئی دڵی چۆڵا
حەقوو وێما هەتا مەردەن فەغانم ئەر شەو و ڕۆ بۆ

سەروو هانەی کە ئێنیوە کونەی نامەردٚ کەرێ کۆمەت
میسالوو کۆمیلەو تۆ مەر وەنەوشەی پاکی بنجۆ بۆ

ئەگەر گۆراڵێ گردٚ پەرسا کە تاوا با بە وێنەو تۆ
جوابوو ئا سوالاشا هەتا مەحشەر بە چۆ چۆ بۆ

ئەدٚا ئەر حەز کەری زانی کە بێ تۆ ڕەنگ و بۆم چەینا
پەنەت ماچوو نموونەو من جە هامن مەر چڵێ لۆ بۆ

نەچڕیەن دەنگەکەش زووەن کە هۆرزەو ڕۆڵەکەم دێرا
ئەجەل دەی کەی قەرارا بەی؟ سەبا نا بەش هەر ئارۆ بۆ

#عەباس_غەریبی

دەگاوجــــــۆڵانــــــدێ

@joolandeh

📖شێعر: کۆنە یار

🎤دەنگ:
#شەهلا_فەتحی

📝 شاعێر:
#عەباس_غەریبی


‎‌‌ ‌‎‌‌دەگاو جــــــــۆڵانــــــــدێ

@joolandeh