#چوون_كۆی_عەوداڵان...

چوون كۆی «عەوداڵان»، چوون كۆی «عەوداڵان»
 كۆن؟ كۆيێ دڵگير، چوون كۆی عەوداڵان؟!!

«كابه»ی مەقسوودەن، پەرێ نەوهاڵان
پەی وايەی موراد وەنەش مەلاڵان

كۆی بەرزی بوڵەند، چمان كۆی «قاف»ەن
به بەرزی بەرزەن، به سافی سافەن

سەر كێشان نه ئەوج چەرخی چەهبەری
بۆش نيان نەبۆی «زوهره»و «موشتەری»

جای شەو بيداران، سەحەر لاڵانەن
تەكيەگای خاسان، «هەفت ئەوداڵانەن»

هەر هەفت عەوداڵان، قوتبی ڕووی زەمين
چوون «اَصحابُ الكَهف» دايم «غار» نشين

مەسكەنشا گرتەن بەو بوڵەند كۆوه
«يا مَن هُو» شانەن هەر ڕۆ جه نۆوه

تا دونيا وه پشت ماهيش قەرار بۆ
ڕوتبەشان بوڵەند، هيممەتشان يار بۆ

هانه پای ئەو كۆ ڕەندان، چوون پەری
گشت ئامادەی حوسن شۆخی‏و دوڵبەری

نەك جه خەم نيشۆ نه دڵشان خارێ
كەردەنشان دەستوور، هەر هەفتێو جارێ

وەختی شاخەی «سوبح»، ئەو گرۆی ڕەندانu
كۆی كڵاف نه دۆش موشكين كەمەندان

مەخێزان به عەزم بارگەی «عەوداڵان»
مەدان جه نەووه، تەرتيبی خاڵان

چوون «ئاهوی خوتەن»، ڕەوێڵەی تەتار
پۆل پۆل نازداران مەبينان قەتار

به ڕەفت‏و هەموار، به ڕێزه ڕێزان
مەشان بەو كۆوه، به موراد وازان

وەختێو پا مەنيان وه باڵای كەمەر
نه خاكی پاشان گوڵان مەنيان سەر

ئەشەدبۆی «طفيل» سەر نه ڕاشانەن
«چنوور» ئامێتەی خاك پاشانەن

«ياللّە» قاپی خەير تۆ كەری گوشاد
ياوان به «مەقسوود»، بدەيشان موراد

يا «هەفت عەوداڵان»، كۆی بەرزو بوڵەند
ديدەی بەد، پێشان نەياونۆ گەزەند

عەوداڵانی بەرز، بەرز بۆ پايەشان
هيممەت يار كەره، حەق دۆ وايەشان

دايم بەی دەستوور خاتر شاد كەران
بەڵكم وەختی سەير، ئێمەيچ ياد كەران

«صەيدی» تاسەی سەخت، دووری يارشەن
نه ئارام، نه سەبر، نه قەرارشەن

يا عەوداڵ «صەيدی» هاوار وه تۆشەن
ديدەش به ديدار يار، كەری ڕەوشەن


✍ #سەیدی_هەورامی
@joolandeh