میزان - کـوردستان

🔵 #شێعر_و_وەرگێڕان

"نامەیێک بۆ خوا ۳"
چ سەبرێکت هەیە خودا
سەهۆڵ
بەردە، یا لە پۆڵا
سەیرە، هەنووکە نەتوا...
لە چ بڵێم
چەنەمین جارە وەک نامه
لە دڵەوە هەڵئەکوڵێم
قوڵم داوە هەتا ژوورت
عەرزم کردووی له حزوورت،
باسی ئەم عەرزەم بۆ کردووی
تۆ کە حەیییت و نەنووستووی...
نیشتمان رەنگی ماتەمە
وەرزەکانمان هەموو خەمە
سەختە دڵخۆشی شک نەبەی
مردن ببێتە ئاوات و
چاوت هەڵنەیە بە سبەی...
بە قورعان و بە پێغەمبەر
وەختە فەرقان بکەم یەکسەر
هیچێ نەما خەمم نەدات
مەگەر مەرگێ بمدا نەجات
گیرۆدەی دەستی زاڵمین
تۆ بووی بە ڕەببی ئاسمان
وێڵە شەیتانولعالەمین...
باسم هەمووی هەر کۆنەیە
هەر ئەو تام و ئەو بۆنەیە،
جۆرێ ئەیڵێم
خودای لێزان
سۆزی نەمانبەنە زیندان،
ڕاستە کە دوابەدوای شەوێ
چاو ئەبێ بە خۆڕ هەلکەوێ
بەڵام ئێرە شەشدانگ شەوە
خەڵکی سەرانسەر لە خەوە
هەم سپێدە، هەم کازیوە
ترساون لەو نەوچە دێوە،
"ئاسۆ" تاوێ هات بێ بۆ شار
لەو مل کێوە دایان لە دار
ئێمەی نووستوو نەمانزانی
لەمێژەیە بۆتە ئاوات
بگەینە دەمەو بەیانی...
دڵخۆش بووین بەو دوو گڵۆپەی
نووزەی دابوو بە کووچەمان
هاتن تاوی دەن، خامۆش بوون
نەهاتنە هانای قرچەمان...
ئێستە بۆتە جۆرە شەوێ
شۆڕش بە شۆڕشیەکەی خۆی
لە ترس هەتا ئەم شەویتر
چاوی داناچێ بە خەوێ...
خودا ئێره زۆر تاریکە
شەقامه پانەکانی شار
له تاریکی زۆر باریکە
کەی ئەتوانین وەک "ڕۆژانێ"
هەنگاو هەڵێنین جارێکە...
هام لە ماڵا، بە بەر مۆمێ
سەبرەکەی تۆ خستمیە گۆمێ،
بەند کراوم لەم دەواره
ئەڵێن تاریکی زۆر سواره
ئازاد بەو ئازادییەی خۆی
بە مانگ کەوتۆتە شەوارە،
فەرموو خودا کە مانگەکەت
چەنێ دووره لەم هەواره
بەڵام بۆ خێڵی تاریکی
کایە و گەمە و گاڵتەجاڕە...
خودا خەتەر کە بۆ تاوێ
بێ خوارەوە و
بیکە قاوێ
کڵاشەکەت هەڵگرە نەکا
لە تاریکی کەویە داوێ
بەقوربانت بم تۆ نووری
خێڵ تار و تەم بکە ڕاوێ...
دەردمان فرە و تەواو زۆرە
بۆت ئەنێرم نۆرە نۆرە
مەرحەمەتێ فەرموو وڵام
بنێره بۆم، دی وەسسەلام...

✍️جەمیل_محەممەدی

👇👇👇👇👇👇

T.me/Mizankurdi

🌍 Telegram Mizan 🌍 YouTube Mizan 🌍 Facebook Mizan 🌍 Instagram Mizan 🌍 Web Miza 🌍 Mizan Kurdi 🌍 Mizan Arabic 🌍 Mizan Quran