МЕН ЙЎҒИМДА

Мен йўғимда:
Гуллар очилар,
Ташна бўлиб салқин елларга.
Майин,тиниқ бўйлар сочилар
Ёлғизоёқ,
сокин йўлларга.
Мен йўғимда:
Тикилиб йўлга
Хўрсинмоқда яланг қоратол,
Хотирлардан фаромуш бўлган
Булоқларнинг кўзида малол.
Мен йўғимда:
Ёвқур шамоллар
Оғушида райҳон кулади.
Гузарларда мудраган чоллар
Бир кечада ғойиб бўлади.
Мен йўғимда:
Фиғон этармиш
Кўкка қараб карнай-сурнайлар.
Мен йўғимда ташлаб кетармиш
Фарғонани оппоқ турналар.

✍ Шавкат Раҳмон

👉 @nazmiy

Бобур ғазали билан...

Жасминнинг шеъри...

Тоғи Сулаймоним, тоғи Асқарим,
Сенинг-ла сафари ҳадсиз, чикора.
Юрагим Буроқдир.
...ҳаддан ташқари -
Ўта кетган бахтдан қилсам, шикоят.

Ҳар лаҳзам Меърождир, ҳар лаҳзам Ҳамал,
ҳар лаҳзам баҳорнинг қоқ ўрта куни.
Ҳуррият бор - будин вужудга қамар,
Еттинчи осмонга интилсам, кулиб.

Бироқ изтироб ҳам баробар - етук,
Хаёл ҳаёланар қийноқ забтида.
Ўзимга келаман юзимга чертиб,
Балки ожизликдир, афти- пафтидан...

Соғинч эътиқоддир, муҳаббат тақво,
Истакнинг пешидан тортар андиша.
Фалакнинг дафтарин қайта ёз Раҳмон,
Қирқ мингта хур билан қилсам маишат.

Тоғи Сулаймоним, тоғи Асқарим,
Сенинг-ла сафари ҳадсиз, чикора.
Юрагим Буроқдир.
...ҳаддан ташқари -
Ўта кетган бахтдан қилсам, шикоят:

Кўнглимга санчилса кўнглинг чанглари,
Зоҳиринг заҳрини тотсам уддалаб.
Алҳақ, отмоқлигин сенли тонгларим,
Жудалар истардим, жуда, жудалар.

Ҳар лаҳзам Меърождир, ҳар лаҳзам Ҳамал...

8.02.2019

✍ Нуруллоҳ Неъмат

@nazmiy

Она қандоқ ўйин бошлаб қўйдим мен,
Қандоқ савдоларга бошимни бердим.
Қандоқ саҳроларда юргандим она,
Қирқ йил товонимдан тиканлар тердим.
Ҳаёт эгиб борар мағрур бошимни,
Боқсам юрагимда мислсиз доғлар.
Лекин ҳавасимни келтирар мудом,
Бировга суянмай юксалган тоғлар.
Мен ахир тупроқдан куч олган қизман,
Тупроқнинг ичида қотган суягим.
Онажон, бу ўхшаш қисматни қара,
Отамнинг қўлидек қадоқ юрагим.
Ҳамон болалигим чорлайди мени,
Ҳамон турналарга келар ҳавасим.
Мен мудом гўдакка ўхшайман она,
Ойнинг ёғдусига ўхшар нафасим.
Ҳануз майсаларнинг бошини силаб,
Шивирлаб айтаман: Нурдек тозаман.
Мудом капалакка эгиздир руҳим,
Ҳамон япроқларга шеърлар ёзаман.
Бироқ қандоқ ўйин бошлаб қўйдим мен.
Бу қандоқ жанггоҳдир еяр руҳимни.
Ҳар тонгки ортимга қараб айтаман,
Мен бу оловлардан омон чиқдимми?
Тобора руҳимни эзар бир азоб,
Ҳар лаҳза руҳимда чақмоқда чақин.
Бўғзимга қадалиб келмоқда бир оҳ.
Тобора бошимга қиличлар яқин,
Онажон, мен бир кун осмон бўламан,
Сен ишон руҳимда гуллайди боғлар.
Ахир, ҳавасимни келтирар мудом,
Ҳеч кимга суянмай юксалган тоғлар.

✍ Guljamol Asqarova

👉 @nazmiy

Чолиқушидан

-Eнди айт-чи, Камрон,гулбашакар ёқдими?
Йигит кулиб жавоб қилди:
-Ёқди.
-Яхши кўриб қолдингми?
-Яхши кўриб қолдим.
-Яна бир марта айт.
-Яхши кўриб қолдим.
-Унақа эмас, Камрон, «мен Гулбашакарни яхши кўраман» де.
Камрон бу болаларча нозга тушунмай кулди-да:
-Ҳа,мен Гулбашакарни яхши кўраман,-деб такрорлади.
Фериденинг юзи лоладай қизарди,кўзлари пирпираб ёнди,уялганидан киприклари пирпиради,ялинаётган ёш боладек бўйнини эгиб,илтимос қилди.
-Камрон,яна бир марта:«Мен Гулбашакарни жуда яхши кўраман»,дегин.
Йигит сабабини ўзи ҳам билмаган ҳолда,ички бир ҳаяжон билан титраб:
-Гулбашакарни жуда яхши кўраман,сен хоҳлаганингча яхши кўраман,-деди...

@nazmiy

Eнди айт-чи, Камрон,гулбашакар ёқдими?
Йигит кулиб жавоб қилди:
-Ёқди.
-Яхши кўриб қолдингми?
-Яхши кўриб қолдим.
-Яна бир марта айт.
-Яхши кўриб қолдим.

@nazmiy

***

Ёмғирни кузатмоқ керак:
айвон четидаги устунга илиб,
мато ёпиб қўйилган
қафас ичидаги бедана бўлиб.

Кенгликларга кўз тикмоқ керак,
кетишни исташ керак ундан-да нари:
овчи қопқонида
сўнги нафасини олаётган бўри сингари.

Баҳорни соғинмоқ керак:
жонидан ўтканча қаҳратон қаҳри
охирги кучини сарф этганича
дон излаётган мусича каби.

Севмоқ керак ўша сулувни—
дардсизликдан даволаниб
ўлиминг каби худди
рад этилишинг бўйнингга олиб.


✍ NajmiddinErmatov

👉 @nazmiy

Лабларингни бурма, менга қилма таманно,
Ўзгададур менинг кўнглим, сендамас асло.

Атай сенинг деразангга эгилганим йўқ,
Сени излаб келганим йўқ, тикилганим йўқ.

Зор эмасман сенга, фақат бу оқшом бехос
Ўта туриб боққим келди дарчангдан, холос.

✍ S. Yesenin

👉 @nazmiy

​ДЕРАЗАНИ ЧЕРТИБ...

Деразани чертиб ёмғирлар ўтди
Кечагина бизлар қолдирган издан.
Паришон боғларни туманлар ютди,
Севгилим, не кечди хаёлингиздан?

Ташлаб кетганида маъюс турналар,
Ичида йиғларкан ҳатто тоғлар ҳам.
Севгилим, нечундир бағрим тирналар,
Кўзингиз ногаҳон тортмадими нам?

Дарахт шохларига қўнади бир қуш,
Ёмғирлар тагида ивиб, жунжиккан.
Балки у мендирман, кўраётиб туш
Яна олислардан сизга кўз тиккан.

Бир гўзал ишқ эди бизнинг севгимиз,
Ёруғ лаҳзаларнинг овози тинди.
Қўшилиб келганда хазонлар сели,
Севгилим, ким билан йиғлайсиз энди?

Мен-ку, ўлиб бўлдим,
шудир ишқ расми,
Аммо сиз ғамларга чидайсиз қандоқ?
Севгилим, севгилим, оғир эмасми
Бир гўзал севгини топиб, йўқотмоқ?

....Севгилим, ким билан йиғлайсиз энди..?

✍ Зебо Мирзо

👉 @nazmiy

Мен-ку, ўлиб бўлдим,
шудир ишқ расми,
Аммо сиз ғамларга чидайсиз қандоқ?
Севгилим, севгилим, оғир эмасми
Бир гўзал севгини топиб, йўқотмоқ?

....Севгилим, ким билан йиғлайсиз энди?...

@nazmiy

Ҳаётда бир қоида бор. Аёл хулқда, эътиқодда эрига тобеъ бўлади. Аёл бамисоли эрнинг кўзгусидир.

Шайҳ Муҳаммад Ротиб Набулсий

👉 @nazmiy

Умр ўтар, вақт ўтар,
Хонлар ўтар, тахт ўтар,
Омад ўтар, бахт ўтар,
Лекин ҳеч қачон чиқмас ёдимдан
Сенинг юришларинг, сенинг кулишларинг.

Баҳорда боғ на гўзал,
Қор тушса тоғ на гўзал,
Бу ёшлик чоғ на гўзал,
Лекин ҳеч қачон чиқмас ёдимдан
Сўзсиз қарашларинг, ҳолим сўрашларинг.

Ой чиқар гоҳ заҳоли,
Дўстлар кўпдир вафоли,
Ҳаёт шундан сафоли,
Лекин ҳеч қачон чиқмас ёдимдан
Сокин сўзлашларинг, пинҳон излашларинг.

Умр — йўл, қайрилиш кўп,
Учрашиш, айрилиқ кўп,
Унутиш, айтилиш кўп,
Лекин ҳеч қачон чиқмас ёдимдан
Ўша кулишларинг, ўша келишларинг…

Омон Матжон

@nazmiy

...Кӯнглим дуо истар, паррандаларнинг
Бир жуфт қанотидай қӯлингни ёзиб,
Худони фалакдан ерга чорлардинг,
Ғамгин пичирлардинг қиблага боқиб.

Мени олисларга кузатган чоғда
Ногоҳ ёшга тӯлиб кетарди кӯзинг.
Кетганингдан кейин, ортимдан йиғлаб
Суяниб қолардинг ӯзингга ӯзинг...

✍️Лоиқ Шерали

(Одил Икром таржимаси)

👉 @nazmiy

Севгимиз ўлдими? — либосингиз кўк...

Севгимиз ўлдими? — либосингиз кўк,
Кўнглингиз — бегулхан, кўзингиз — бечўғ.
Биздан бориш йўқдир, сиздан — келиш йўқ
Келишсиз дунёда беғам, азизим,
Нега кўзларингиз бенам, азизим.

Ўт етди — қақшатди банд-бандларимни,
Тупроқда сочдингиз баландларимни,
Ақлимни, дилимни — бебахтларимни —
Боришсиз дунёга отган, азизим,
Олисда ой каби ботган, азизим —

Чунки тунга айтар рост «оҳ»ингиз йўқ,
Фалакда кезгани шаън роҳингиз йўқ,
Нечун келмайсиз, гар гуноҳингиз йўқ —
Боқаман: нигоҳим — гумон, азизим,
Йўлларинг тумандир, туман, азизим.

Қаранг, минг бир баргда кузак учадир,
Қизил-саригида — юрак учадир,
Сўнгаклар учадир, суяк учадир —
Бу тўфон — хазонлиғ менман, азизим,
Сизсиз минг кузакка тенгман, азизим.

Аммо сиз сарғайманг — гулли боғ бўлинг,
Ям-яшил кўкаринг, мудом соғ бўлинг,
Баҳорнинг бағрида беадоғ бўлинг —
Ахир, қарғаганим сизмас, азизим,
Икки куз дунёга сиғмас, азизим...

✍ Usmon Azim

👉 @nazmiy

Севгимиз ўлдими? — либосингиз кўк,
Кўнглингиз — бегулхан, кўзингиз — бечўғ.
Биздан бориш йўқдир, сиздан — келиш йўқ
Келишсиз дунёда беғам, азизим,
Нега кўзларингиз бенам, азизим...

@nazmiy

ИККИНЧИ АПРЕЛЬ

Мен чарчаб сенга суяндим
Ҳақиқат!
Соат бонг урмоқда гаплашайлик кел.
Қўрқма ўтиб кетди бир кунлик дахшат,
Бугун иккинчи апрель
ҳақиқат иккинчи апрель...

Усмон Азим

👉 @nazmiy

МУНОЖОТ

Мен забунман. Тун қўйнида қаро тунман, 
Тунд бағримга зиёларни кимдан сўрай? 
Ўзим ерман, ўзим само - мен очунман, 
Ўздан ўзга дунёларни кимдан сўрай?

Ишқим барбод бўлди обод шаҳарларда, 
Барча кулди, мен йиғладим баҳорларда, 
Юрак шабнам бўлиб томган саҳарларда 
Осмонимга зуҳроларни кимдан сўрай?!

Кўкдан сўра хаёлимнинг ҳурларини, 
Ердан сўра пешонамнинг шўрларини, 
Мендан сўра сен дардларнинг турларини –
Мен дардимга даволарни кимдан сўрай?!

Сен тунларни - ялдоларни мендан сура, 
Хатоларни, савдоларни мендан сура, 
Сен кўзингга зиёларни мендан сўра, 
Мен кўксимга ҳаволарни кимдан сўрай?!

Нетай, бордир бу тоғларнинг орасида, 
Оёқ изи - юрагимнинг ярасида. 
Шафқат йўкдир ул кўзларнинг қорасида, 
Оқ меҳрли қароларни кимдан сўрай?!

Малак, сенинг малаклигинг ёлғон экан, 
Фалак, сенинг фалаклигинг ёлғон экан! 
Юрак, сенинг юраклигинг ёлғон экан, 
Сенга бошқа самоларни кимдан сўрай?!

Мен кўзимдан ёшлар отиб йиғлай, дўстлар, 
Кўксингизга бошлар отиб йиғлай, дўстлар, 
Тош бағримга тошлар отиб йиғлай, дўстлар, 
Йўқотмишим худоларни кимдан сўрай?!

Юраккинам, наво иста, нидолар қил, 
Ё навосиз жонгинамни адолар қил, 
Сўра, етти иклимларга садолар қил –
Мен умримга наволарни кимдан сўрай?..

✍ Мирзо Кенжабек

👉 @nazmiy

Ишқим барбод бўлди обод шаҳарларда, 
Барча кулди, мен йиғладим баҳорларда, 
Юрак шабнам бўлиб томган саҳарларда 
Осмонимга зуҳроларни кимдан сўрай?!

@nazmiy

Онам қариб қолган. Тушида

Сўзлашади у отам билан.

Кўзларидан оққан ёшида

Мен отамнинг аксин кўраман.



Онам қариб қолган. Қўрқаман,

Баъзан азоб бўғзимни қисар.

Кўзим юмсам уни кўраман,

Шундан ёшга тўлади кўзлар.



Хат ёзмайман. Баъзан сим қоқиб

Ҳол-аҳволин сўрайман… Аммо

Ярим тунлар уйғониб гоҳо

Ўй сураман шифтга жим боқиб.



Далаларда қўнаркан шудринг,

Тонгни қарши оламан титраб,

“Она, – дейман, – мани кечиргин”,

“Она”, – дейман лабим пирпираб.

Хуршид Даврон

@nazmiy

Юлдузлар суврати ўчмасдан ҳали,
Қуёш кун саҳнига қўймасдан қадам.
Саҳар шабнамга юз чаяр маҳали,
Оҳиста ойнамни чертади Дадам.

"Ўғлим, бисёр уҳлаб қўймадингизми,
Ғафлат оғушида қолманг бу қадар.
Онангиз соғиниб кўзларингизни,
Ўксинар, сиз эса бунда бехабар!

Яшамоқ имтиҳон, гоҳ қилар ўйин,
Инсон ҳаётига синов берар зеб.
Боринг, акангиздан ҳол сўраб қўйинг,
Тинкаси қуриди тирикчилик деб!

Сингиллар қўйиндан учган қуш каби,
Бир кафт меҳр тутинг, қанотин силаб.
Буғдойзорни кечиб боринг уларчун,
Жонин тўшарга шай бир дийдор тилаб".

Дада,-дейман- дада, соғиндим ёмон,
Кафтингизни беринг, бошимда турсин!
Мени гумроҳ қилган, рангимни сомон-
Девона кўнгиллик, шоирлик қурсин!

Шафақ қозонидан сут тошар аста-
Қуёш кун саҳнига қўяди қадам.
Уйғондим, енгимга кўзёшим арта,
Аҳир, деразамни чертганди, Дадам...

✍ Асрорбек СОЛИЖОНОВ

👉 @nazmiy