#قصص_الأنبياء
#الحلقة_الثانية
#قصة_آدم_الجزء_الثاني
#عصيان_إبليس_وخلق_حواء

وقفنا عند الملائكة إللي سجدت لآدم ماعدا كائن واحد لم يسجد وعصى أمر ربنا،
الكائن ده هو إبليس😬
قلنا عن إبليس إنه كان من الجن،
◇والجن ربنا خلقهم من لهيب أسود شديد الحرارة
إللي هو مَارِج من نار◇

¤ملحوظة مهمة¤
☆الجن ده عالم زي عالم البشر كده فيهم المؤمن والكافر....وكلمة شيطان تتقال على من كَفَر من الجن،
لكن مؤمنوا الجن لا يُقال عليهم شياطين،
فالشياطين جزء من الجن☆

ربنا رفع إبليس للسماء مع الملائكة مع إن الملائكة أفضل منه وأكرم،
حتى إن الملائكة كانت تقول:
ما خلق الله خلقا إلا وكنا أكرم منه وأعلم منه.
وطبعا الهدف إللي ربنا خلق البشر والجن عشانه هو إنهم يعبدوه سبحانه 👌
"وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ"

◇طيب السؤال إللي بيطرح نفسه هنا،
ربنا أمر الملائكة إنها تسجد لآدم عليه السلام، إيه إللي دخل إبليس في الموضوع🤔

احنا قلنا إن الملائكة هم أعظم وأكرم المخلوقات صح؟
طيب لما الأمر ييجي لشخص عظيم وينفذّه ...الطبيعي طبعا إن الأقل منه منزلة ينفذه بكل تلقائية،
فكان يجب على إبليس إللي أقل مكانة من الملائكة إه يسمع كلام ربنا💁‍♂️

طيب خلونا نقول إن إبليس فِهم غلط واختلط عليه الأمر🙄
الطبيعي في الموقف ده إنه يقول إيه؟
يقول يارب إنت أمرت الملائكة وأنا من الجن فمكنتش عارف إني أنا كمان لازم أسجد😅
هو بقى مقلش كده😑
ده قال بكل بجاحة وكِبر :
" قَالَ لَمْ أَكُن لِّأَسْجُدَ لِبَشَرٍ خَلَقْتَهُ مِن صَلْصَالٍ مِّنْ حَمَإٍ مَّسْنُونٍ"
عارفين يعني إيه؟!
كأنه بيقول: أنا مسجدش لكائن متعفن 🙄

متستغربوش...متستغربوش😅
مش احنا قلنا المرة إللي فاتت إن الحمأ المسنون معناها الطين المتعفن الأسود،
وإبليس شاف مراحل خلق آدم،
فهو شايف نفسه إنه مخلوق من نار والنار دي حاجة عظيمة وأحسن من الطين المتعفن ده،
ده غير القدرات إللي عنده زي إنه ممكن يتمثل في صور متعددة زي صورة البشر أو الحيوان،

وآدم من وجهة نظره مخلوق من طين متعفن وكمان أجوف ،
فإزاي بقى النار العظيمة تسجد لطين متعفن😏
فكل كلامه فيه انتقاص من آدم عليه السلام،
مع إن الطين أنفع وخير من النار،
فالطين فيه: الرزانة، والحلم، والأناة، والنمو.
والنار فيها: الطيش، والخِفة، والسرعة، والإحراق.

فهو من الأول كده وقلبه فيه حسد من آدم بسبب إن ربنا خلقه بيده وأعطاله اهتمام وفوق كل ده أمره هو و الملائكة بالسجود له ،
يعني هو كان متعمد أصلا إنه ميطعش أمر ربنا بالسجود لآدم،
يعني معندهوش أي شبهة أهه ولا عذر😑
وخصوصا إن ربنا أصلا وجه الأمر مبااااشرة لإبليس بالسجود،
"قال مَا مَنَعَكَ أَلَّا تَسْجُدَ إِذْ أَمَرْتُكَ"
فإبليس عصى أمر ربنا عامد متعمد،

وهنا يا جماعة يبان بقى صِدق العبودية لله👌
مش ربنا كرّم إبليس بسبب علمه وعبادته؟
فالصادق في العبادة لله هينفذ أوامر ربنا حتى لو كانت مخالفة لهواه وهيقدم أومر ربنا على رغباته💁‍♂️

¤=وقفة هنا بقى مع نفسنا، نبص في حياتنا كده،
هل بنعبد ربنا كما يُريد ونطيع أوامره ولا بنعبد ربنا في الحاجات إللي على مزاجنا وحسب ظروفنا بس؟!=¤

فربنا لما أمر إبليس بحاجة عكس هواه؛
هل ضحّى إبليس وداس على هواه عشان ربنا وتقبل أوامره
ولا رفض أوامر ربنا وقعد يجادل ويبرر معصيته الواضحة😑

☆أكيد كلنا قابلنا في الحياة نماذج من البشر كده،
تقولها الصح تقعد تبرر وتدور على أي حجة وتجادل بالباطل،
سواء في أمور الدين أو الدنيا،
عشان كده لازم لما نسمع الصح من ربنا ننفذ،
حتى لو مقدرناش ننفذ على طول يبقى منردش الحق لأي سبب،
لما نتقبل الصح طاعة لله، ربنا هيسهله علينا بعد كده👌

المهم،
بسب بقى معصية إبليس دي ربنا طرده من رحمته وتوعّده بدخول النار،
هنا إبليس طلب من ربنا إنه يمد له في عمره لحاااد يوم القيامة،
طيب الطلب العجيب ده ليه؟
هل هو ناوي إنه يقضي الحياة دي تائب لله وطائع لعل ربنا يتجاوز عنه ويغفرله 😔
لأ 😑
ده طلب من ربنا كده عشان يُهلك بني آدم!!
قال لربنا مش انت يارب أضلتني، طيب أنا بقى هضل ذرية آدم،
" قَالَ فَبِمَا أَغْوَيْتَنِي لَأَقْعُدَنَّ لَهُمْ صِرَاطَكَ الْمُسْتَقِيمَ"
وهزيّن لهم المعصية وأحبّبهم فيها ومش هسيبهم لحد ما أضلهم كلهم،
"إلا عبادك منهم المُخلَصين"
فربنا حققله أمنيته وإداله العمر الطويل ،
" قَالَ فَإِنَّكَ مِنَ الْمُنظَرِينَ"
وقاله اعمل إللي انت عايزه، أي حد هيتبعك هيدخل معاك جهنم،
" لَّمَن تَبِعَكَ مِنْهُمْ لَأَمْلَأَنَّ جَهَنَّمَ مِنكُمْ أَجْمَعِينَ"
وأي حد هيتوب ويستغفر ويرجع هقبله وهيكون جزاؤه الجنة،
وده كان بداية العداء بين إبليس وذريته وآدم وذريته،
احنا هنسيب إبليس دلوقتي ونرجع لآدم عليه السلام ونشوف حصل معاه إيه👌

بعد ما ربنا خلق آدم مسح الله على ظهر آدم ،فنزلت أرواح ذرية آدم كووولهم من بداية الخلق حتى قيام الساعة بين يديه سبحانه،
زي ما رسول الله ﷺ قال في الحديث:
"أَخَذَ اللهُ الْمِيثَاقَ م

#قصص_الأنبياء
#الحلقة_الثانية_عشرة
#إبراهيم_عليه_السلام_الجزء_الثاني
#إبراهيم_وإلقائه_في_النار

وقفنا المرة إللي فاتت عند إبراهيم عليه السلام لما كسّر الأصنام كلها ماعدا أكبر واحد فيهم،
وعلق الفأس عليه، وبعدين قومه لما رجعوا من العيد بتاعهم وراحوا يشوفوا الآلهة لقوهم متكسرين ، وسألوا مين إللي عمل فيهم كده،
"قَالُوا مَنْ فَعَلَ هَذَا بِآلِهَتِنَا إِنَّهُ لَمِنَ الظَّالِمِينَ"

فبعض الناس قالوا احنا سمعنا شاب اسمه إبراهيم بينتقص الآلهة بتاعتنا ويذكرها بالسوء، فقالوا هاتوه قصاد الناس كلهم عشان يشهدوا عليه،
"قَالُوا سَمِعْنَا فَتًى يَذْكُرُهُمْ يُقَالُ لَهُ إِبْرَاهِيمُ ۩ قَالُوا فَأْتُوا بِهِ عَلَى أَعْيُنِ النَّاسِ لَعَلَّهُمْ يَشْهَدُونَ"
وفعلا جابوا إبراهيم عليه السلام وسألوه قصاد الناس كلهم :
إنت إللي كسرت آلهتنا يا إبراهيم😡
"قَالُوا أأنْتَ فَعَلْتَ هَذَا بِآلِهَتِنَا يَاإِبْرَاهِيمُ"

☆إنتم متخيلين ناس كفار بيتأكدوا من المعلومة قبل ما ياخدوا أي قرار😅
ده احنا كمسلمين لما أي حد يقولنا حاجة ولّا خبر بينتشر على الفيسبوك ولّا كلام الناس تنقله عن شخص معين بنصدقه على طول 🤓
كم من علاقات اتقطعت بسبب كلمة اتقالت وصدقناها من غير ما نتأكد، مع إن ربنا حذرنا وقال لنا:
"يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ "
لما واحد ييجي يقولك ده فلان بيقول عليك كذا😮
ما تستعجلش وتتعصب وتقعد تشتم فيه تدعي عليه من غير لما تتأكد!!👌
تقول لي بس أنا واثق في صاحبي إللي بلغني الكلام ده😤
هقولك كلامي ده مش تخوين لصاحبك، بس ممكن صاحبك يكون فهم غلط أو طلّع الكلام من سياقه ونقله بفهمه الغلط بدون قصد خصوصا إن السّياق من المُقَيِّدات🙄
يعني قيد محطوط على الكلام المُطلَق، ما ينفعش نفكّه منه وإلا المعنى هيتغير
بمعنى هل ينفع أقول "ويل للمصلين" واسكت؟
لأ طبعا... لاااازم أكمل سياق الآية إللي هو:
"الذين هم عن صلاتهم ساهون"
فربنا قَيِّد لنا سياق الآية المُطلَقة "ويل للمصلين"
ب "الذين هم عن صلاتهم ساهون"
يعني مش كل المصلين دي فئة محددة👌

◇مثال في حياتنا اليومية للتوضيح أكتر 😅
ممكن واحد صاحبك يقول عنك:
《والله ده على نياته خالص》
وهو يقصد من جواه إنك غلبان وطيب وملكش في الخبث والمكر وسوء النية،
فيقوم إللي سمع الكلمة أول مرة يفهمها بمعنى تاني، وينقلك المعنى إللي هو فهمه ده ويييجي يقولك ده فلان بيقول عليك إنك أهبل وعبيط والناس بتضحك عليك بسهولة 🙄
وكمان يقول لك كده من غير ما يحكي لك الموقف –السياق يعني- إللي حصل،
فانت لو عرفت الكلام اتقال في أنهي موقف كنت هتفهم المعنى إللي صاحبك يقصده👌
فمتصدقش حد بينقلك أي كلام غير لما تجيب الطرف التاني وتسأله إنت قلت كذا؟ وكان قصدك إيه؟
هتلاقيه بيقولك محصلش😤
أو أيوة قلت وكان قصدي كذا مش كذا.

فعلى الرغم من إن قوم إبراهيم كانوا كفار لكن راحوا يتأكدوا من المعلومة وكمان هيعطوا فرصة لإبراهيم عليه السلام إنه يدافع عن نفسه👌
فقال لهم إبراهيم : بل فعله كبيرهم هذا 👈فاسألوهم إن كانوا لو ينطقون😏
"قَالَ بَلْ فَعَلَهُ كَبِيرُهُمْ هَذَا فَاسْأَلُوهُمْ إِنْ كَانُوا يَنْطِقُونَ"

آآاااه 😅
همّ دلوقتي اتزنقوا خلاص :
يا إما يعترفوا بالحق، وهو إن الجماد ده إللي همّ صنعوه ومش بيتحرك فميقدرش يعمل كده،
يا إما يقولوا معاك حق يا إبراهيم فعلا انت بريء والإله ده هو إللي كسر الأصنام التانية😤
هنا قوم إبراهيم عليه السلام راجعوا نفسهم كده شوية وقالوا لبعض احنا إللي غلط واحنا إللي ظَلَمَة😧
" فَرَجَعُوا إِلَى أَنْفُسِهِمْ فَقَالُوا إِنَّكُمْ أَنْتُمُ الظَّالِمُونَ"

لكن لحظة الصدق مع النفس إللي بتبقى أول بوابات الوصول للحق، ما استمريتش كتير للأسف ورجعوا عن كلامهم ده واستكبروا عن اتباع الحق وقالوا لإبراهيم:
ما انت عارف إنهم مش بيتكلموا😠!!
"ثُم نُكِسُوا عَلَى رُؤوسِهِمْ لَقَدْ عَلِمْتَ مَا هَؤُلَاءِ يَنْطِقُونَ"
فإبراهيم عليه السلام زنقهم أكتر وقال لهم:
يبقى ليه بتعبدوا ما لا ينفعكم ولا يضركم ولا حتى كانت قادرة تدافع عن نفسها ضد التحطيم !!😡
"قَالَ أَفَتَعْبُدُونَ مِنْ دُونِ اللَّهِ مَا لَا يَنْفَعُكُمْ شَيْئًا وَلَا يَضُرُّكُمْ ..أُفٍّ لَكُمْ وَلِمَا تَعْبُدُونَ مِنْ دُونِ اللَّهِ أَفَلَا تَعْقِلُونَ"

هنا قوم إبراهيم عليه السلام لما لقوا نفسهم ماعندهمش أي كلام يردوا بيه راحوا مستخدمين مبدأ القوة والبطش😑
قالوا إحنا هنحرقه وننصر آلهتنا 😤
"قَالُوا حَرِّقُوهُ وَانْصُرُوا آلِهَتَكُمْ إِنْ كُنْتُمْ فَاعِلِينَ"

☆وده مبدأ الشخص إللي مش بيبقى عارف يرد😏
لما تكون بتكلم حد وانت إللي معاك الحق،
وعمال تقول الدلائل بتاعتك والتاني مش عارف يرد،
تلاقيه فجأة راح مزعق...ممكن يشتم...يتهمك بحاجة مش فيك، عشان يتهرب من الحوار بأي طريقة ويقلب عليك الترابيزة زي ما بيقو

#قصص_الأنبياء
#الحلقة_الثانية_والعشرون
#قصة_يوسف(٤)
#الخروج_من_السجن

وقفنا المرة إللي فاتت عند يوسف عليه السلام لما طلب من الساقي إللي فسّر له الرؤيا إنه يحكي قصته عند الملك،
لكن الساقي نسي موضوع يوسف عليه السلام بتقدير من ربنا، وقعد يوسف في السجن حوالي من ثلاثة إلى سبع سنين، المدة بالضبط مكنتش معروفة🤷‍♂️
"وَقَالَ لِلَّذِي ظَنَّ أَنَّهُ نَاجٍ مِنْهُمَا اذْكُرْنِي عِنْدَ رَبِّكَ فَأَنْسَاهُ الشَّيْطَانُ ذِكْرَ رَبِّهِ فَلَبِثَ فِي السِّجْنِ بِضْعَ سِنِينَ"

في يوم من الأيام الملك رأى رؤيا، رأى إن فيه سبع بقرات ضعاف هزلانين بياكلوا سبع بقرات سِمان وطخان كده وحلوين😅
فقام من النوم مفزوع😳
ليه🤨
لأن الطبيعي إن القوي السمين هو إللي ياكل الضعيف مش العكس🙃
فنام تاني ورأى سبع سنبلات يابسة بيتلفّوا على سبع سنبلات خضراء وبيخلوهم يابسين زيهم، فقال باااس كده الموضوع فيه حاجة😨
"وَقَالَ الْمَلِكُ إِنِّي أَرَى سَبْعَ بَقَرَاتٍ سِمَانٍ يَأْكُلُهُنَّ سَبْعٌ عِجَافٌ وَسَبْعَ سُنْبُلَاتٍ خُضْرٍ وَأُخَرَ يَابِسَاتٍ"
جمع السحرة والكهان والوزراء وحكى لهم الرؤيا...وسألهم إيه رأيكم ؟ أنا عاوز حد يفسرلي الرؤيا دي😥
فقالوا له كلهم : رؤيا إيه بس🙄
دي أضغاث أحلام ...أوهام ....واحنا مش اختصاصنا تفسير الأحلام🤷‍♂️
احنا بنفسر الرؤى بس، لو دي رؤيا كنا فسرناها على طول😊
"قَالُوا أَضْغَاثُ أَحْلَامٍ وَمَا نَحْنُ بِتَأْوِيلِ الْأَحْلَامِ بِعَالِمِينَ"

☆يعني مش بس جهلة؛ لأ ده بيفتوا بغير علم😑
وكمان إيه، بيجزموا بكده بكل ثقة😏
يعني حتى مش شايفين احتمال إنهم ممكن يكونوا غلط🙄 لأ ده كمان ادّعوا الفضل لنفسهم:
لو كانت رؤيا كنا عرفناها😤
أمّال يعني تضيع هيبِتهم كده قدام الملك والحاشية ويبان إنهم مش عارفين😏
فالأسهل والأحسن لشكلهم إيه؟ إنهم ينكروا الموضوع كله وخلاص، وبكل ثقة كده😐
ده حتى مقالوش طب خلينا نبحث المسألة وندور، لأ ده قالوها خبط لزق كده ...دي أضغاث أحلام 😤

☆ولو أخدتم بالكم هتلاقوا النوعية دي في حياتنا
تيجي تقول له معلومة انت سمعتها من دكتور مثلا ولّا حد على علم بيها،
تلاقيه يقولك لا لا لا.. الكلام ده مش مظبوط ده كلام فارغ، الصح كذا وكذا😤
وخدوا بقى من ده كتير في الدين تلاقوا أحلى جهل وأحلى فتي🤓
تقول لواحد على حكم حاجة ولّا معلومة، يقوم يضرب بعرض الحائط العلم والأدلة ويتكلم برأيه ويقول لك لأ مش صح🙄
أصل بالعقل كده إزاي دي تيجي يعني 🤔
ده الصح كذا ..طيب يابني ابحث ودور واتأكد، ولا الهوا😶
طيب يافلان والحديث الصحيح الفلاني؟ طب الآية الصريحة الفلانية 😅
يقولك: لالا تفسيرها مش كده احنا أصلا لازم نعيد قراءة النصوص دي كلها ونحط لها تفسير عصري يناسب الناس، انتم بتفسروا الدين على مزاجكم وديننا بريء من الخرافات بتاعتكم دي😑
طيب يا سيدي كلام العلماء والأئمة الفلانية وتفسيرهم كذا كذا ده مش كلامي !
يقولك : لا العلماء دول متشددين وما وصلهمش الأحاديث إللي وصلت للي جم بعدهم😒
عمال يقاوح معاك ويفتي بالباطل في دين الله، وهو أصلا مابيعرفش يفرق بين الفاعل من المفعول أو يقرأ حتى القرآن صح 🤦‍♂️
مش فاهم إن العلماء دول بيرجعوا للصحابة والتابعين وتابعي التابعين إللي رسول الله ﷺ قال عنهم إنهم أفضل القرون على الإطلاق وبيشوفوهم فسروا الآيات والأحاديث وطبقوها إزاي في حياة النبي ﷺ وبعد وفاته وعلى الأساس ده بينقلوا عنهم،
يعني مش بيخترعوا دين جديد ولا حاجة🙄
لكن هنقول إيه😞

المهم،
مين بقى إللي كان موجود في اللحظة دي وسمع الحواااار 🤭
ساقي الملك إللي طلع من السجن ونسِي خااالص موضوع يوسف 💁‍♂️
وفي وسط القصر والملأ قاعدين والسحرة والكهنة والملك قاعد محتار،
إذ فجأةً يطلع صوت حد بيقول: أنا هقول لكم تأويل الرؤيا دي إيه🙋‍♂️
"وَقَالَ الَّذِي نَجَا مِنْهُمَا وَادَّكَرَ بَعْدَ أُمَّةٍ أَنَا أُنَبِّئُكُمْ بِتَأْوِيلِهِ "
طبعا الكل بص مين إللي بيتكلم ده! لقوه ساقي الملك🤨
وكإن نظراتهم ليه ساعتها بتقول : يعني إنت إللي هتجيب التايهة يا فالح😏
راح على طول قال لهم: ابعتوني بس للسجن.. فيه واحد هناك هو إللي هيفسر كل حاجة 👌
"فَأَرْسِلُونِ"
في اللحظة دي بس افتكر يوسف عليه السلام، وقال بكل ثقة إنه هيجيب لهم خُلاصة الموضوع، وده بسبب ثقته الشديدة في يوسف عليه السلام😊
وعلى رأي المثل: اسأل مجرب..
هو جرب بنفسه صدق تأويل يوسف للرؤى.. ده غير إنه قعد معاه فترة في السجن وعاشره بنفسه وشاف صلاحه وحسن خلقه وتقواه،
وفعلا بعتوا الساقي للسجن ودخل على يوسف عليه السلام
وأول ما بدأ كلامه مدحه وأثنى عليه، لإنه مش ناسي فعلا أد إيه يوسف كان إنسان صالح ومحترم ومن المحسنين.

فحكى له الرؤيا، وقال له إيه تفسيرها لعلي أرجع وأقول للناس عشان يعرفوا يتصرفوا إزاي وكمان عشان يعرفوا عنك وعن مكانتك وقدرك وفضلك فيكون ده سبب مُحتمل في إنك تخرج من السجن.
"يُوسُفُ أَيُّهَا الصِّدِّيقُ أَفْتِنَا فِي سَبْعِ بَقَرَاتٍ سِمَانٍ

#قصص_الأنبياء
#الحلقة_الثانية_والثلاثون
#قصة_موسى_الجزء_السابع
#بين_موسى_وبني_إسرائيل(٢)
#قارون

وقفنا المرة إللي فاتت عند السبعين رجل إللي قالوا لموسى عليه السلام مش هنؤمن غير لما نشوف ربنا بعنينا،
فربنا عاقبهم بإنه أرسل عليهم صاعقة يعني نار شديدة من السماء أو رجْفة على خلاف في التفاسير،
لكن إللي يهمنا إنها أمر من شدته صُعِقُوا وماتوا!
وبعدها ربنا أحياهم مرة تانية!
"فَأَخَذَتْكُمُ الصَّاعِقَةُ وَأَنتُمْ تَنظُرُون ۩ ثُمَّ بَعَثْنَاكُم مِّن بَعْدِ مَوْتِكُمْ لَعَلَّكُمْ تَشْكُرُونَ "
لإنهم لما ماتوا موسى عليه السلام خاف.. هيرجع يقول إيه لبني إسرائيل😕
يقول لهم خرجت بسبعين واحد منهم وكلهم ماتوا ورجعت من غيرهم؟!
مش هيصدقوه طبعا لإنهم بعقول وقلوب زي ما انتم شوفتوا كده😬
وهتحصل فتنة جامدة ساعتها.. فموسى عليه السلام دعا ربنا إنه يُحييهم تاني:
"قَالَ رَبِّ لَوْ شِئْتَ أَهْلَكْتَهُم مِّن قَبْلُ وَإِيَّايَ ۖ أَتُهْلِكُنَا بِمَا فَعَلَ السُّفَهَاءُ مِنَّا"
يعني كإن موسى عليه السلام بيقول:
يا رب انت لم تهلكنا قبل كده في يوم المجزرة إللي حصلت، مع إن الهلاك ساعتها كان قريب مننا جدا،
لكن انت برحمتك عصمتنا منه، أفتهلكنا الآن بما فعل السفهاء منا😔
حاشاك يارب إنك تعمل فينا كده، فيارب زي ما عصمتنا من الهلاك يوم المقتلة، اعصمنا اليوم ولا تُهلكنا بما فعل السفهاء منا🤲
فربنا استجاب لموسى وأحياهم مرة تانية واحد ورا التاني ، وبقوا شايفين بعض إزاي ربنا بيُحيي الموتى،
ودي آية ومعجزة جديدة تُضاف للآيات المُبهرة إللي شافوها وبتدل على إن محدش فعلا يستحق العبادة غير ربنا الخالق عز وجل👌
ورجعوا كلهم مع موسى عليه السلام لبني إسرائيل،
بدأ موسى عليه السلام في تعليم بني إسرائيل التوراة من الألواح، فأول حاجة قال لهم إنهم لازم يقبلوا كل اللي في التوراة وينفذوا إللي فيها،
"وَكَتَبْنَا لَهُۥ فِى ٱلْأَلْوَاحِ مِن كُلِّ شَىْءٍۢ مَّوْعِظَةً وَتَفْصِيلًا لِّكُلِّ شَىْءٍۢ فَخُذْهَا بِقُوَّةٍۢ وَأْمُرْ قَوْمَكَ يَأْخُذُواْ بِأَحْسَنِهَا"

فقالوا: احنا هنشوف إللي فيها الأول، فلو لقينا الأوامر والنواهي سهلة نعملها هنعملها🙄
فموسى عليه السلام قال لهم: لأ طبعا، لازم تقبلوها كلها، ده دين😳

☆وده والله زي حال ناس كتير اليومين دول😞
نيجي نقول لهم الدين بيقول كذا وبيقول كذا..
يقوموا ياخدوا منه إللي يوافق مزاجهم وسهل إنهم يعملوه، ولو الموضوع صعب ومحتاج مجاهدة تلاقيهم يسيبوه، وياريتهم يسكتوا ويدعوا ربنا مثلا إنه في يوم من الأيام ربنا يهديهم ويعملوا الصح ويبعدوا عن الغلط🙄
لأ، ده تلاقيهم راضيين ومكتفيِين باللي خلاص نقّوه من الدين🤦‍♂️
وعشان يبقوا في السليم بيدوروا على كلام لشيوخ الله أعلم بيهم عشان ياخدوا فتوى منه باللي همّ عايزينه..
على منهج الشيخ فانوس إللي بيريّح النفوس🤓
والمثل بيقول حطها في رقبة عالم واطلع سالم😀
وللأسف مش قادرين يفهموا إن لو مسألة فيها خلاف بين العلماء،
ده مش معناه إننا نختار براحتنا و هَوَانا بين أقوال العلماء،
لأ طبعا الإنسان لازم ياخد بالأحوط،
والمطلوب من المسلم لما يلاقي في خلاف إنه يتتبع مراد الله ويدور معاه حيث دار،
يعني يشوف كده هو إيه إللي ربنا يحبه ويريده ويرضاه ويقوم منفذه👌
فصاحب القلب السليم بيخرج من الخلاف وياخد بالأحوط لدينه ويبعد عن الشبهة،
والدليل على كلامنا هو قول رسول الله ﷺ:
إِنَّ الْحَلَالَ بَيِّنٌ، والْحَرَامَ بَيِّنٌ، وبَيْنَهُمَا مُشْتَبِهَاتٌ لَا يَعْلَمُهُنَّ كَثِيرٌ مِنَ النَّاسِ،
فَمَنِ اتَّقَى الشُّبُهَاتِ فَقَدِ اسْتَبْرَأَ لِدِينِهِ، وعِرْضِهِ، ومَنْ وقَعَ فِي الشُّبُهَاتِ وقَعَ فِي الْحَرَامِ،
كَالرَّاعِي يَرْعَى حَوْلَ الْحِمَى، يُوشِكُ أَنْ يَقَعَ فِيهِ، أَلَا وإِنَّ لِكُلِّ مَلِكٍ حِمًى،
أَلَا وإِنَّ حِمَى اللَّهِ مَحَارِمُهُ، أَلَا وإِنَّ فِي الْجَسَدِ مُضْغَةً إِذَا صَلَحَتْ صَلَحَ الْجَسَدُ كُلُّهُ، وإِذَا فَسَدَتْ فَسَدَ الْجَسَدُ كُلُّهُ، أَلَا وهِيَ الْقَلْبُ"
ده غير إن لما حد يكون عايز فتوى شرعية لااازم يدور على العالم الثقة الأمين إللي بيتقي الله في الفتوى ومش بيتساهل فيها😑
هو احنا مش لما بنكون عايزين نكشف على المخ مثلا مش بندوّر على أحسن الأطباء المتخصصين في المخ عشان نعالج أجسادنا إللي هتفنى في يوم من الأيام؟!
طيب ماهو الدين أَوْلى وأهم إننا ندور على أفضل العلماء وأتقاهم لله عشان ناخد عنهم ديننا لأن هو ده إللي هنتسأل عنه في القبر 👌

بني إسرائيل لما قعدوا يراجعوا موسى عليه السلام ده آه هناخده، وده لأ مش هناخده..واحنا مش هنقدر و...و...
ربنا أمر الملائكة إنهم يرفعوا عليهم الجبل كأنه غمامة على رؤوسهم ...متخيلين الجبل العملاق🏔 اترفع لفوق وهمّ تحته😮
"وَإِذ نَتَقْنَا الْجَبَلَ فَوْقَهُمْ كَأَنَّهُ ظُلَّةٌ وَظَنُّواْ أَنَّهُ وَاقِعٌ بِهِمْ خُذُواْ مَا آتَيْنَاكُم بِقُوَّةٍ وَاذْكُرُواْ مَا فِيهِ لَعَ

#قصص_الأنبياء
#الحلقة_الثانية_والأربعون
#قصة_سليمان_الجزء_الرابع
#إسلام_ملكة_سبأ

كنا واقفين المرة إللي فاتت عند سليمان عليه السلام لما قال لرُسل ملكة سبأ إنه هيأتيهم بجنود مش هيقدروا عليها وهيخرجوهم من أرضهم مذلولين،
لما الرسل مشيوا بقى من عند سليمان عليه السلام ووصلوا لملكة سبأ -ويُقال إن اسمها بَلقِيس- حكوا لها إللي شافوه عند سليمان عليه السلام،
فقالت أنا كنت متأكدة إنه مش هيكون زي ملوك الدنيا، واحنا مش هنقدر على قتاله فعلا ..
فقررت إنها تروح مع وفد من كبراء قومها عشان تسمع من سليمان عليه السلام عن الدين إللي هو بيدعو إليه ده،

سليمان عِرف إن الملكة هتيجي مع وفد لسليمان، سواء بقى عرف عن طريق الوحي أو عن طريق الهدهد أو هو نفسه استنتج كده، المهم إنه عرف وخلاص،
فعرض مهمة على أفراد الملأ بتاعه قال لهم:
مين فيكم يقدر يجيبلي العرش بتاعها قبل ما ييجوا عندنا هنا برغبتهم طائعين مستسلمين؟
"قَالَ يَا أَيُّهَا الْمَلَأُ أَيُّكُمْ يَأْتِينِي بِعَرْشِهَا قَبْلَ أَن يَأْتُونِي مُسْلِمِينَ"

غرض سليمان من طلبه ده إنه يورّيها جزء من قدرة ربنا وفضله عليه ونعمه العظيمة إللي وهبها له عز وجل 👌
فعفريت من الجن من جنود سليمان من جيش الجن قال بافتخار واقتدار وهمة عالية:
أنا هجيبهولك قبل ما تقوم من مقامك، يعني قبل ما تقوم من مجلسك ده وتتركه، أو قبل ما مجلسك يكون انفض باللي فيه وكل واحد يروح لحاله،
المعنى بالظبط على خلاف بين المفسرين لكن المقصود يقول هجيبهولك بسرعة جدا،
وأنا قوي هقدر أشيله، وأمين مش هضيع منه حاجة👌
"قَالَ عِفْريتٌ مِّنَ الْجِنِّ أَنَا آتِيكَ بِهِ قَبْلَ أَن تَقُومَ مِن مَّقَامِكَ وَإِنِّي عَلَيْهِ لَقَوِيٌّ أَمِينٌ"

☆ملحوظة:
العفريت هو المارد من الجن شديد القوة والدهاء والمكر والخُبث،
والعفريت من الجن ده أعلى في الخبث والدهاء والمكر من مَردة الجن، والمَردة أشد من الشياطين،
فباختصار:
الجن عموما كلهم كفار ما عدا فصيلة الجن المؤمن:
"وَأَنَّا مِنَّا الْمُسْلِمُونَ وَمِنَّا الْقَاسِطُونَ فَمَنْ أَسْلَمَ فَأُولَئِكَ تَحَرَّوْا رَشَدًا ۩ وَأَمَّا الْقَاسِطُونَ فَكَانُوا لِجَهَنَّمَ حَطَبًا "

لكن واحد تاني رد وقال :
أنا أجيبهولك في غمضة عين 👌
ربنا قال عنه:
"قَالَ الَّذِي عِندَهُ عِلْمٌ مِّنَ الْكِتَابِ أَنَا آتِيكَ بِهِ قَبْلَ أَن يَرْتَدَّ إِلَيْكَ طَرْفُكَ"
إللي عنده علم من الكتاب هو:
إما جبريل عليه السلام، أو هو صاحب صالح لسليمان عليه السلام عنده اسم الله الأعظم الذي إذا دُعِيَ به أجاب.

☆طب بما إنه مش جن وعنده قوة خارقة، هيجيب العرش في لمح البصر إزاي🤔
بالدعاء.. هيدعو الله باسمه الأعظم وهو موقن بالإجابة ويعلم إن الاسم ده إذا دُعِي الله به أجاب،
عشان كده ربنا وصفه بإنه عنده علم؛ لإن علم أسماء الله وصفاته من أعظم علوم التوحيد👌
فمجرد ما هيدعو هيلاقيه قصاده، وفعلا ده إللي حصل👌

في لمح البصر أو أسرع كمان بمجرد ما دعا باسم الله الأعظم سليمان عليه السلام لقى العرش قدامه!
فلما سليمان شاف عرش بلقيس قصاده أول حاجة عملها
كانت شكر النعمة👌
وكأنه بيقول:
مش هسمح للنعمة تلهيني عن ذكر الله وشكره،
مش هسمح للنعمة تفتني عن ديني،
أنا عارف إن النعم دي اختبار يا إما أشكر يا إما أجحد النعمة وأكفر، ولازم كل مرة أنجح في الاختبار ده،
وإللي بيشكر بيشكر لنفسه لإن ربنا كده كده غني عن العاملين،
وعبودية الشكر دي لمصلحتنا احنا لإن ربنا هيزيد الشاكر من فضله، واللي مش بيشكر النعمة مش هيضر ربنا بشيء..مش بيضر إلا نفسه👌
"فَلَمَّا رَآهُ مُسْتَقِرًّا عِندَهُ قَالَ هَذَا مِن فَضْلِ رَبِّي لِيَبْلُوَنِي أَأَشْكُرُ أَمْ أَكْفُرُ وَمَن شَكَرَ فَإِنَّمَا يَشْكُرُ لِنَفْسِهِ وَمَن كَفَرَ فَإِنَّ رَبِّي غَنِيٌّ كَرِيمٌ"

بعد كده وجّه سليمان أوامر للخدم بتوعه وقال لهم:
غيّروا في شكل العرش بتاعها شوية بحيث لما تيجي نخليها تشوفه ونشوف رد فعلها 👌
"قَالَ نَكِّرُوا لَهَا عَرْشَهَا نَنظُرْ أَتَهْتَدِي أَمْ تَكُونُ مِنَ الَّذِينَ لَا يَهْتَدُونَ"
والتغيير إللي حصل هنا يا جماعة كان تغيير في الشكل يعني يضيف جواهر مثلا بطريقة معينة، لكن مش تغيير في أصل العرش؛ لأنه مش بتاعه عشان يتصرف فيه👌

☆طيب ليه سليمان أمر جنوده اصلا إنهم يغيروا التغيير ده🤔
إحنا عارفين إن سليمان عليه السلام ذكي وسريع البديهة،
من يوم ما كان بيحكم مع سيدنا داود في الخصومات،
فهو حب يعرف هل عندها وعي وبصيرة وهتقدر تتعرف علي عرشها رغم التغييرات إللي عملوها فيه دي،
ولّا هتكون من النوع إللي بيدخل عليه الخدع والتزييف وبيتلخبط ومش بيعرف يميز الحق من الباطل👌

فلما جاءت ملكة سبأ لسليمان استقبلها وورّاها العرش وسألها:
ده العرش بتاعك👈
فقالت: كأنه هو😳
هي مقدرتش تقول 《لأ》 لأنه يشبه العرش بتاعها جدا، وفي نفس الوقت مش قادرة تقول《أيوة》 لأن العرش بتاعها في سبأ، والمسافة بين فلسطين وبين سبأ كبيرة...فإزاي العرش بتاعه

#قصص_الأنبياء
#الحلقة_الثانية_والخمسون
#مريم_زكريا_الجزء_الثاني
#زكريا_يحيى

اتكلمنا المرة إللي فاتت عن زكريا عليه السلام لما كان بيدخل على مريم الطفلة الصغيرة عشان يعطيها الأكل بتاعها ،
فكان بيلاقي عندها فاكهة الصيف في الشتاء ،
وفاكهة الشتاء في الصيف، فلما سألها قالت له إن ده رزق من عند ربنا👌
فوقع في قلب زكريا عليه السلام إن ربنا حقق للطفلة الصغيرة دي كرامة وأعطاها الفاكهة من غير ما تطلب،
أمّال لو أنا بقى دعيت وطلبت بقى ..أكيد ربنا هيستحيب،
حتى ربنا مقالش في القرآن فدعا زكريا لأ..ده قال:
"هُنَالِكَ دَعَا زَكَرِيَّا رَبَّهُ "
فكأن زكريا عليه السلام جت له فرصة فاغتنمها👌
يعني يارب إنت إديتها حاجة عجيبة من عجائب الأرزاق من غير ماهي تسألك،
لكن أنا يارب هسألك فيا ترى عطائك هيكون إزاي لمن يسألك😮
ودعا زكريا وقال:
"رَبِّ هَبْ لِي مِن لَّدُنكَ ذُرِّيَّةً طَيِّبَةً إِنَّكَ سَمِيعُ الدُّعَاء"
يعني يارب هب لي ذرية طيبة على الرغم من كبر سني وشعري إللي شاب وعقم زوجتي.. يا سميع الدعاء يا مَن ترزق من تشاء بغير حساب🤲

☆طيب هو ليه زكريا عليه السلام قال لربنا : "هب لي" ومقلش "أعطني"🤔

لأن الهبة لا يُحاسَب عليها الشخص إللي هيوهبها لي لو لم يهبها لي👌
بمعنى إن أنا لو اديتك هِبة فده فضل من عندي، ولو منعتك الهبة دي فانت ملكش أي حق إنك تزعل أو تضايق،
بعكس لو جيت طلبت مني شيء، وأنا منعته عنك ممكن ساعتها تزعل..
ننزّل الموقف على زكريا عليه السلام:
هو طلب من ربنا الهبة، بمعنى إنه لو إداله الطفل هيبقى كرم وفضل من ربنا عليه عز وجل ،
ولو منعه الطفل، فخلاص مش مشكلة مش هيزعل إن ربنا منع عنه شيء لإنه أصلا بيطلبها وهو شايف إن ملوش حق فيها ولا يملك حاليا أسباب الهبة إللي بيطلبها دي، وكله هيبقى أولا وأخيرا بفضل ربنا..
وده يعملنا جانب من أدب الأنبياء في الدعاء عليهم السلام👌

تعالوا كده نحلل دعاء زكريا عليه السلام ونشوف إزاي دعا ربناو نتعلم منه 😊
◇أول حاجة، زكريا عليه السلام كلم ربنا بينه وبين نفسه، مناجاة في الخفاء من غير ما حد يسمعه..
"إذْ نَادَى رَبَّهُ نِدَاء خَفِيًّا"
قال:
يارب متسبنيش من غير ولد ولا وارث يرث النبوة من بعدي وأنت خير الوارثين🤲
"وَزَكَرِيَّا إِذْ نَادَىٰ رَبَّهُ رَبِّ لَا تَذَرْنِي فَرْدًا وَأَنتَ خَيْرُ الْوَارِثِينَ"

☆واحد عايش بقاله مائة سنة تقريبا بيطلع يشوف الناس ، فلان معاه أبناؤه بيلعب معاهم، وده أبناؤه بياخدوا بالهم منه وده..وده..
مائة سنة.. ماسمعش كلمة بابا.. مش هيحس بإحساس زكريا عليه السلام غير إللي اتحرم من نعمة الذرية...
يارب يرزق كل مشتاق ذرية صالحة 🤲

☆عارفين بقى زكريا عليه السلام حالته من ناحية التشخيص الطبي إيه🙃؟
رجل وزوجته داخلين على مائة سنة.. هي عاقر وهو شيخ كبير عجوز.. يعني من الناحية الطبية استحاااالة إنهم يخلفوا أطفال😶
فكان زكريا عليه السلام بيدعو في الخفاء بالليل بينه وبين ربنا... متخيلين لو الناس سمعوه وهو بيدعي بإن ربنا يرزقه طفل، وهو ظروفه زي إللي قلناها كده.. الناس هيكون رد فعلهم إيه😶

◇تاني حاجة بدأ زكريا عليه السلام الدعاء بأنه أظهر الفقر والضعف والذل لله👌
قال : يارب أنا عظمي بقى ضعيف يعني لو انت شايفني واقف لكن انا عظمي ضعيف😔
وشعر رأسي شاب كله، وأنا عمري ما دعيتك قبل كده ورديت دعائي،
"قَالَ رَبِّ إِنِّي وَهَنَ الْعَظْمُ مِنِّي وَاشْتَعَلَ الرَّأْسُ شَيْبًا وَلَمْ أَكُن بِدُعَائِكَ رَبِّ شَقِيًّا"

☆خدوا بالكم إن في أدعية ربنا بيستجيبها لنا من غير ما ندعي بيها👌
يعني انت النهاردة دعيت ربنا إنه يحفظ لك بصرك؟
دعيت ربنا إنه يحفظ لك سمعك، جسمك، عيالك، والدتك، والدك، بيتك إللي إنت ساكن فيه، موبايلك إللي معاك دلوقتي، إلى آخر كل النعم إللي احنا غارقانين فيها ليل نهار؟
طيب ولما مش بتدعي إن ربنا يحفظهم؟ مين إللي بيحفظهم من غير دعاءك؟ الحفيظ عز وجل..
نِعم كتير أوي ربنا حافظها لنا من غير ما ندعي بس احنا مش واخدين بالنا 😞

◇تالت حاجة بقى قال لربنا في الدعاء السبب هو ليه عايز الولد، فقال :
"وَإِنِّي خِفْتُ الْمَوَالِيَ مِن وَرَائِي وَكَانَتِ امْرَأَتِي عَاقِرًا فَهَبْ لِي مِن لَّدُنكَ وَلِيًّا.. يرِثُنِي وَيَرِثُ مِنْ آلِ يَعْقُوبَ وَاجْعَلْهُ رَبِّ رَضِيًّا"
يعني يارب أنا خايف إني أسيب أحبار اليهود يُفسدوا على بني إسرائيل دينهم ومفيش نبي غيري دلوقتي، وكمان زوجتي عاقر لا تلد😔
فيارب اوهبني من رحمتك ذرية 🤲
لكن مش أي ذرية أنا مش عايز ولد كده وخلاص، لأ أنا عايزه يكون ذرية طيبة يرثني ويرث من آل يعقوب النبوة..

فاستجاب الله دعاء زكريا عليه السلام👌
ومش بس كده😁
ده ربنا أرسل له الملائكة عشان تبشره وتقوله:
"يا زَكَرِيَّا إِنَّا نُبَشِّرُكَ بِغُلامٍ اسْمُهُ يَحْيَى لَمْ نَجْعَل لَّهُ مِن قَبْلُ سَمِيًّا"
يعني يا زكريا، احنا ملائكة الله جايبين لك البشارة من ربنا إنه استجاب دعاءك وهيرزقك بولد اسمه يحيى من أحسن ا

#قصص_الأنبياء(٢)
#السيرة_النبوية
#الحلقة_الثانية
#قبل_مولد_رسول_الله(٢)
#أصحاب_الأخدود(٢)

وقفنا المرة إللي فاتت عند الغلام لما جنود الملك أخذوه وطلعوا به على قمة جبل وبدأوا يساوموه..يعني يقولوا يابني اعقل وهتبقى إنت الساحر وهتبقى كلمتك مسموعة، ده غير النعيم إللي هتكون فيه،
ولو مسمعتش الكلام هنرميك من فوق الجبل..شوف الفرق بقى..يعني تبقى عايش مُنعم ولا نموتك😈

الغلام إللي لسه مبلغش حتى ..يعني عمره أقل من خمسة عشرة سنة عمل إيه؟
بكل هدوووء وثقة ويقين دعا ربنا وقال :
اللهم اكفنيهم بما شئت🤲

☆أصله يا جماعة الموضوع منتهي بالنسبة له..هو عارف إنه على حق ..هو مش دعا ربنا قبل كده إنه يخليه يشوف آية لو الراهب على حق يقتل الدابة 😁

وكانت النتيجة إن الجبل اتهز ووقعوا كلهم وماتوا ماعدا الغلام💁‍♀️
لكن الغلام عمل حاجة غريبة أوي🤨
المفروض والطبيعي إنه يهرب بجلده ويبعد عن الملك وينقذ نفسه🤷‍♀️
لكن الغلام رجع للملك تاني😳

فلما دخل على الملك سأله فين الجنود إللي كانوا معاك😧
قال له الغلام : ربنا كفاني شرهم👌

الملك بقى مش يتعظ ولا حتى يفكر في إللي حصل ولا يسأل الغلام عن دينه😀

لأ ..ده أمر جنود تانيين إنهم يأخذوا الغلام ويركبوا سفينة ويهددوه بالقتل ...يا إما يرجع عن دينه أو يقتلوه😑
فلما ركبوا السفينة والجنود هددوا الغلام،
الغلام برده دعا: اللهم اكفنيهم بما شئت🤲

فاتقلبت السفينة وماتوا كلهم ماعدا الغلام هو الوحيد إللي نجى😮
مش يهرب بقى... ده رجع تاني للملك😶
فالملك لما شافه سأله فين الجنود إللي كانوا معاك😳
فالغلام قال له : ربنا نجاني منهم👌
وقبل ما الملك يأمر جنود تانيين إنهم يقتلوا الغلام،
قال له الغلام:
شوف إنت مش هتقدر تقتلني إلا لو عملت إللي هقول لك عليه👌
فالملك قال له : أعمل إيه😕

☆الواحد مش عارف يتعجب من مين أكثر ..من الغلام إللي رجع عشان الملك يقتله،
ولا من الملك إللي معندهوش ذرة عقل ومش بيفكر إلا في قتل الغلام ومش قادر يشوف قدرة ربنا ومعجزاته😑

الغلام قال له:
اجمع الناس في مكان واحد واصلبني في جذع شجرة وبعدين خذ سهم من الأسهم إللي معايا وضَعْه في القوس وقل بصوت عالي يسمعه الناس بسم الله رب الغلام وارمني بالسهم ،
لو عملت كده هتقدر تقتلني👌
فالملك جمع الناس وعمل زي ما الغلام قال له بالضبط..وقال بسم الله رب الغلام ورمى السهم فنزل السهم في صُدْغِه فقتله،
وطبعا الناس كانت عارفة إللي بيحصل مع الغلام وإزاي إن الملك مكنش قادر يقتله وإن الجنود هم إللي بيموتوا كل مرة وإنه مقدرش يقتله إلا لما قال:
بسم الله رب الغلام،
فبعد ما قُتل الغلام الناس كلها في نفس واحد قالت : آمنا بالله رب الغلام😮
وهو ده السبب إللي منع الغلام إنه يهرب ..عنده رسالة عايز يوصلها للملك وللناس..الراهب ..المعلم الأول قُتل،
ومفيش غيره ينشر الدين فلو كان هرب مين إللي كان هينقذ الناس دي من ضلال الكفر والشرك👌
يُقال إن الناس إللي آمنت في اللحظة دي عشرين ألف إنسان،
يعني الملك ده لو كان ساب الغلام يدعو طول عمره مكنش هيؤمن العدد ده كله😅
بس سبحان الله كل ما أراد إنسان إنه يحارب دين ربنا ..حربه دي بتكون سبب في انتشار الدين أكثر 👌
وموت شخص واحد أهه كان سبب في إحياء قلوب الآلاف 😊

☆نقف هنا وقفة مهمة جدا 👌
طبعا احنا شايفين في واقعنا الأطفال إللي بتُقتل وتُذبح وبتموت من البرد والناس إللي بتُعتقل وبتُعذب وممكن تموت تحت التعذيب،
الناس دي لها رسالة زي الغلام بالضبط...هم لما يُعذبوا أو يموتوا جزاؤهم الجنة إن شاء الله ونحسبهم شهداء،
وربنا بيخفف عنهم ألم التعذيب وألم القتل،
إحنا ممكن نتخيل إنهم بيتألموا ألم شديد جدا ..زي الراهب إللي نُشر بالمنشار نصفين..متخيلين منشار بينشر جمجمة على الحي كده لحد ما يتقسم نصين 😶
الموضوع تخيله بس مرعب..فما بالنا باللي حصل معاه كده فعلا😐
لكن دي من وجهة نظرنا إحنا البشرية ،
أما في حسابات ربنا فالموضوع مختلف تماما، رسول الله صلى الله عليه وسلم قال إن الشهيد مش بيحس بأي وجع إلا زي ماحنا بنحس بوجع القرصة،
فالعذاب والقتل بالنسبة لهم أجر وبالنسبة لنا إحياء لقلوبنا،
لما تشوفي طفل بيموت من البرد ولا إنسان معتقل ولا...ولا...،
قلبك القاسي بيلين وترفعي إيدك بالدعاء للناس دي،
وبيخليكي تشكري نعمة ربنا إللي إنتي فيها وغيرها وغيرها من الحكم التي لا يعلمها إلا الله،
وفي نفس الوقت هو فتنة للناس إللي في قلوبها مرض ونفوسها خبيثة،
عشان ربنا يطلع إللي جواهم عشان يُقيم عليهم الحُجة لما يقولوا هو فين ربنا ..وفين رحمة ربنا..وإزاي ربنا يقبل بالظلم ..وإزاي...وإزاي...
وفي واحد من أكبر الملحدين دلوقتي وكان حافظ للقرآن في يوم من الأيام قال الكلام ده فعلا👌
ربنا مش بيقول لنا القصص من باب التسلية...القصص للعبرة.. لكن العبرة لمن يعتبر👌
ربنا حكيم رحيم ولا يرضى بالظلم لكن إحنا إللي مش شايفين حكمة ربنا وبدل ما نتهم عقولنا بالعجز عن فهم حكمة ربنا،
بنَتّهم ربنا بالظلم وعد

#قصص_الأنبياء(٢)
#السيرة_النبوية
#الحلقة_الثانية_عشرة
#إسلام_زيد_بن_حارثة
#إسلام_أبو_بكر_الصديق

كنا واقفين المرة إللي فاتت عند إسلام علي بن أبي طالب وعرفنا إزاي أسلم مع إن كان عمره عشر سنين وكان هو أول من أسلم من الصبيان😉
كان في شخص ثاني عايش مع رسول الله صلى الله عليه وسلم في بيته هو مولاه زيد بن حارثة أو كان في الوقت ده اسمه زيد بن محمد،
المَوْلى يعني شخص كان عبد وسيده حرره،
خلونا نرجع بالزمن كده قبل بعثة رسول الله بسنين طويلة،
لما كان زيد بن حارثة غلام صغير ،
كانت أمه واخداه وخرجت معاه عشان يزوروا قومها،
وهم في الطريق أغار عليهم ناس من قبيلة ثانية يعني هجم عليهم ناس وأخذوا زيد من أمه عشان يبيعوه في سوق العبيد ويقبضوا ثمنه😳
واحنا قلنا قبل كده إن العرب كانوا عايشين على الإغارة على بعض،
أخذوا زيد وراحوا سوق العبيد وباعوه وقبضوا ثمنه😑
طبعا متسألوش عن قلب أم انفطر قلبها على ابنها إللي اتخطف قصاد عينها،
ولا تسألوا عن مشاعر الأب لما عرف إن ابنه اتخطف وعارف إنه هيتباع، وهيبقى عبد بعد ما كان حر،
والعبيد بيتعاملوا أسوأ معاملة وبينضربوا وبيشتغلوا ،
فمجرد التخيل إن ابنه يحصل معاه كده أكيد كان حاجة صعبة على نفسه،
وهو مسكتش ومستسلمش حاول يدور عليه في كل مكان بس مكنش لاقيه😞
في الوقت ده كان زيد بن حارثة اتباع في سوق عكاظ،
وسوق عكاظ ده كان سوق مشهور في الجاهلية بيبيعوا فيه كل حاجة ومنهم العبيد،
فاشترى زيد بن حارثة واحد من أهل مكة اسمه
《حكيم بن حزام》
وكان حكيم بن حزام ابن أخ خديجة زوجة محمد رسول الله صلى الله عليه وسلم، فاستوهبت زيد من حكيم ابن حزام،
يعني طلبت منه إنه يوهبها زيد،
ويقال إن حكيم بن حزام اشتراه من الشام وجاء به لمكة وطلبته منه خديجة فأعطاه لها كهدية على اعتبار إنها عمته😉
فخديجة لما أخذت زيد راحت لزوجها محمد بن عبد الله وأعطته زيد بن حارثة، فكان زيد بيخدم سيده الجديد محمد بن عبد الله، فأحبه حب شديد جدا،
وشاف منه الصدق والكرم والمعاملة الطيبة وكل ده كان قبل البعثة بسنين،
في يوم من الأيام كان في رجل جاء للحج فشاف زيد بن حارثة فعرفه فهو كان من قبيلته،
رجع الرجل من الحج وعلى طول راح لحارثة أبو زيد إللي كان بيدور عليه،
وقال له إنه شاف ابنه زيد في مكة عند رجل اسمه محمد من قبيلة قريش،
فأبوه فرح طبعا أخيرا لقى ابنه فراح واخد أخوه وسافروا مكة وتحملوا مشقة السفر عشان يوصلوا لابنه،
ولما وصلوا لمكة قعدوا يدوروا فين محمد بن عبد الله ؟
لما وصلوا له حكوا له قصتهم وإزاي إن ابنهم كان حر والناس سرقته منهم وباعوه،
فقالوا له : احنا عايزين ابننا ..احنا هنشتريه منك عادي، بس متزودش علينا في السعر لدرجة إننا منعرفش نشتريه😥

فقال لهم : طيب أنا عندي اقتراح تاني..احنا نجيبه ونخيّره ، لو عايز يروح معاكم هسيبه يروح معاكم ،
لكن لو اختارني فأنا مش هسيب حد اختارني👌
فقالوا : والله أنصفت وزدت في الإنصاف😮

فنادى على زيد وسأله : إنت تعرف مين الناس دي يا زيد؟
فقال زيد: أيوة ده أبي وده عمي 😕
فقال له :
طيب هم عايزين يأخذوك معاهم ترجع لأهلك وتبقى حر وتعيش حياتك..إيه رأيك؟
فقال : والله لا أختار على محمد أحد😤
فأبوه اتصدم😳
إزاي تقبل بحياة العبودية والذل على إنك ترجع مع أبوك لأمك وأهلك😳
فقال لهم: والله أنا شفت منه حاجة ..مش موجودة في غيره ..يعني أنا لو وسط أهلي مش هيعاملوني زي ما هو بيعاملني😤
حاول أبوه وعمه يقنعوه يرجع معاهم مفيش فايدة 😅
والكلام ده كان قبل البعثة بسنين، فلما شاف محمد بن عبد الله الموقف ده قام وسط الناس وكلها وقال:
أنا أشهدكم جميعا إني قد أعتقت زيد بن حارثة وتبنيته ..يعني أنا حررته من العبودية واتبنيته فهو ابني يرثني وأرثه👌
فلما شاف حارثة إن ابنه بقى ابن لرجل من قبيلة قريش واطمن إنه عايش حياة كريمة ومبسوط رضي وتركه في مكة ورجع لقومه😊

زيد بن حارثة أو هنقول زيد بن محمد زي ما اتعرف بين الناس ، وكل الناس كانت بتناديه زيد بن محمد عاش مع محمد بن عبد الله لحد ما جاء له الوحي،
وبقى محمد رسول الله صلى الله عليه وسلم، فدعاه رسول الله للإسلام،
وقال له إنه رسول من عند الله ، ربنا أرسله عشان يأمر الناس بعبادته هو وحده،
فزيد بن حارثة كان بيحب رسول الله وكان بيثق فيه لدرجة إنه مرضيش يرجع لأهله، ورسول الله كان بيحبه برده،
فكان متوافر فيه نفس الشروط إللي كانت في خديجة وعلي إللي أسلموا 😉
فأسلم زيد بن محمد وآمن برسول الله صلى الله عليه وسلم،
وكان عمره في الوقت ده حوالي أربعة وثلاثين عام👌

خذوا بالكم إن الموضوع مش سهل...ده واحد هيغير دينه كله، هيسيب دين أبائه وأجداده..هيواجه مجتمع بحاله،
مش عارف الناس إزاي هتتقبل فكرة الإسلام👌
لكن هو بسبب حبه لرسول الله صلى الله عليه وسلم ،
وكمان تفكيره بعقله إن الرجل ده صادق وعمره ما شافه بيكذب ،
فمفيش واحد هيسيب الكذب على الناس ويكذب على الله💁‍♂️
وشايف إنه طول عمره بيساعد الناس بدون مقابل ، فهل هييجي بعد م

#قصص_الأنبياء(٢)
#السيرة_النبوية
#الحلقة_الثانية_والعشرون
#بين_هجرة_الحبشة_الأولى_والثانية

وقفنا المرة إللي فاتت عند إسلام عمر بن الخطاب وشوفنا إنه من بعد ما أسلم على طول راح نشر إسلامه في مكة كلها😅
وكان سبب إن المسلمين المستضعفين يصلوا عند الكعبة،
ويُقال في رواية فيها ضعف:
إنه لما أسلم قال لرسول الله :
يارسول الله مش احنا على الحق وهم على الباطل؟
فرسول الله قال له : نعم!
فقال عمر :طيب ليه نستخبى منهم خلينا نظهر إسلامنا👌
وخرج المسلمين صفين في مقدمة الصف الأول حمزة بن عبد المطلب،
ومقدمة الصف الثاني عمر بن الخطاب ويتقدمهم رسول الله صلى الله عليه وسلم،
فلما كفار مكة شافوهم اتغاظوا واتنكدوا جدا 👌
《من كتاب: ما شاع ولم يثبت في السيرة النبوية》

المهم إن الكفار أكيد اتنكدوا بإسلام حمزة وعمر وده إللي يهمنا😅
واستمر أذى المشركين للمسلمين لكن أخف من الأول ،
وكان رسول الله بيدعوهم ويقرأ عليهم القرآن،
في مرة لما كان رسول الله بيدعو سادات مكة،
جاء له رجل من الصحابة اسمه عبد الله بن أم مكتوم وهو ابن خال خديجة زوجة رسول الله،
وكان رجل أعمى،وكان عايز يسأل رسول الله عن آيات من القرآن سمعها،
فكان طول ماهو ماشي بيسأل أين محمد ...أين رسول الله؟...فالناس تقول له كمل في طريقك،
وهو عمال يمشي بسرعة كأنه بيجري مع إنه أعمى😮
وأصلا الأعمى لما بيمشي لوحده بيضرب بالعصاية بتاعته ضربة على اليمين وضربة على اليسار ،
وضربة أمامه عشان يعرف يمشي خطوة😕
فتخيلوا شدة حماسه عشان يسمع القرآن من رسول الله 😊
فلما قرب منه وسأل الناس أين رسول الله قالوا له:
هو هناك أمامك،
فلما وصل عنده سمع صوت رسول الله بيتكلم مع واحد من سادات مكة هو الوليد بن المغيرة وقيل أُبي بن خلف،
فقال لرسول الله صلى الله عليه وسلم:
يارسول الله علمني مما علمك الله...عايزه يعلمه القرآن ،
وكان رسول الله زي ماتقولوا مركز مع الوليد في الدعوة 😅
فعبد الله بن أم مكتوم أعمى،
فمش شايف الموقف عشان يقدر يحكم،
هل المناسب إني أمشي ولا المناسب إني أسأل لحد ما رسول الله يجاوبني🤔
فعبد الله بن أم مكتوم فضل يلح على رسول الله إنه يقرأ له
وكان جاي بسرعة متحمس شاغله إنه يتعلم القرآن من رسول الله،
فهو تخيل إن رسول الله تبسم له وهيبدأ يقرأ عليه القرآن ويجاوب على كل أسئلته😊
لكن رسول الله اتضايق من كثرة إلحاحه وإنه شغله عن دعوة الوليد إللي كان حاسس إنه بدأ يلين،
ورسول الله كان حريص على إسلام سادات مكة،
لأن الناس هتتبعهم وكمان هيبطلوا تعذيب المسلمين،
فكل ده كان بيدور في رأس رسول الله وبعدين فجأة لقى حد بيقاطعه وبيلح عليه😅
فعبس رسول الله في وجه الأعمى يعني كشّر وأعرض عنه وكمل كلامه مع الوليد،

☆زي مثلا لما تكوني بتتكلمي مع أحد ومندمجين في الكلام في موضوع مهم وخلاص قربتي تقنعي إللي قصادك،
فييجي حد ويقاطعك ويبدأ يسألك عن حاجة ويلح عليكي فهيكون رد فعلك إيه😅

الموقف ده محدش شافه من الصحابة لكن ربنا رآه 👌
هل الموقف ده يعدي؟
أنزل الله في الموقف ده قرآن يُتلى إلى يوم القيامة😊
نزل جبريل على رسول الله صلى الله عليه وسلم وقال له:
"عَبَسَ وَتَوَلَّى * أَنْ جَاءَهُ الْأَعْمَى * وَمَا يُدْرِيكَ لَعَلَّهُ يَزَّكَّى* أَوْ يَذَّكَّرُ فَتَنْفَعَهُ الذِّكْرَى*
أَمَّا مَنِ اسْتَغْنَى فَأَنْتَ لَهُ تَصَدَّى* وَمَا عَلَيْكَ أَلَّا يَزَّكَّى * وَأَمَّا مَنْ جَاءَكَ يَسْعَى * وَهُوَ يَخْشَى فَأَنْتَ عَنْهُ تَلَهَّى* كَلَّا إِنَّهَا تَذْكِرَةٌ "
فربنا بيرشد رسول الله إنه يساوي بين الناس في الدعوة لأن هو عليه البلاغ فقط أما الهداية فهي بيد الله👌

فكان لما عبد الله بن أم مكتوم يأتي لرسول الله بعد الحادثة دي كان يكرمه ويتبسم في وجهه ويحسن إليه😊

أما بالنسبة لقول رسول الله:
"مرحباً بالذي عاتبني ربي من أجله"
فالحديث ده ضعيف 👌

☆ممكن هنا حد يسأل سؤال 🤔
يعني كده إن رسول الله أخطأ وهو معصوم🙊

فاكرين لما اتكلمنا في قصص الأنبياء عن عصمة الأنبياء😉
هقولها تاني عشان أفكركم بها وعشان إللي مكنش يعرف يعرف 😁
وعشان هتحصل معانا مواقف ثانية في السيرة فلازم تكونوا فاكرين معنى عصمة الأنبياء😉

أولا :الأنبياء معصومين من الخطأ في تبليغ الوحي سواء خطأ متعمد أو خطأ غير متعمد ومعصومين من الكفر قبل الوحي وبعده.
ثانيا: الأنبياء معصومين من الوقوع في الكبائر
ثالثا : الأنبياء معصومين من الصغائر التي تدل على الخسة زي سرقة لقمة مثلا.
لكن ممكن يقعوا في الصغائر التي لا تدل على الخسة مع عدم إقرارهم عليها.
زي آدم عليه السلام لما وقع في معصية الأكل من الشجرة ناسيا، ومستمرش عليها ده تاب واستغفر على طول وربنا قبل توبته.
"وَعَصَىٰ آدَمُ رَبَّهُ فَغَوَىٰ *ثُمَّ اجْتَبَاهُ رَبُّهُ فَتَابَ عَلَيْهِ وَهَدَىٰ"

فالخطأ إللي وقع فيه رسول الله هو خطأ بشري عادي لا يتعارض مع حسن خلقه صلى الله عليه وسلم😉
فرسول بشر بيفرح ويحزن ويغضب وده بيظهر على ملامح الوجه،

#قصص_الأنبياء(٢)
#السيرة_النبوية
#الحلقة_الثانية_والثلاثون
#رحلة_الإسراء_والمعراج
#المعراج_الجزء_الأول

وقفنا المرة إللي فاتت عند جبريل عليه السلام لما أعطى رسول الله ﷺ كأسين واحد فيه لبن والثاني فيه خمر،
فشرب رسول الله ﷺ من الكأس إللي كان فيه لبن فقال له جبريل عليه السلام: هُديت وهُديت أمتك،
والمتوقع إن رسول الله ﷺ يرجع بقى لمكة لكن كان في رحلة ثانية مستنياهﷺ 😮
رحلة مختلفة عن أي رحلة ، رحلة المعراج..يعني الصعود للسماء،
هنبدأ بإزاي رسول الله ﷺ طلع للسماء رسول الله بيحكي وبيقول إنه طلع على حاجة زي السلم كده،
ولكن السلم ده مختلف، فهو مكون من ثلاث درجات، يعني يطلع الدرجة الأولى وبعدين الثانية وبعدين الثالثة وبعد الثالثة يوصل للسماء،
فكل سماء هيوصل لها هتكون بالطريقة دي، درجة اثنين ثلاثة وبعدين السماء وهكذا،
فصعد رسول الله ص مع جبريل على السلم الثلاث دراجات وبقى على باب من أبواب السماء الدنيا،
والسماء الدنيا إللي هي السماء الحقيقية مش الجزء الظاهر إللي احنا شايفينه ده 😅
حتى رسول الله ﷺ بيقول إنه لو أراد إنه يلمس السماء للمسها،
يعني يقدر يحط إيده عليها ويحسس عليها ويحس بها زي ما بنحط إيدنا كده على الحائط مثلا 😉
وطبعا مش هنسأل هو رسول الله ﷺ كان بيتنفس إزاي وهو في الفضاء الخارجي ومفيش أكسجين😀
احنا بنتكلم عن رسول الله ﷺ وبنتكلم عن ربنا يعني احنا برة السنن الكونية أصلا وبرة كل القوانين💁‍♀️
فلما وصل جبريل عليه السلام لباب من أبواب السماء الدنيا وخبط على الباب فخازن الباب ...الحارس يعني سأل : مين؟، فقال : جبريل!
فسأله خازن هل معك أحد فقال له جبريل عليه السلام :معي محمد!
فسأله الخازن :هو أُرسل إليه؟ يعني ربنا أمر إنه ييجي ، فجبريل عليه السلام قال : نعم !
،فقال الخازن فلنِعم المجيء جاء وفرح به أهل السماء ،
يعني كأن الخازن بيقول بلغتنا كده ده الدنيا نورت😍

☆هنشوف أد إيه في تشابه بين نظام الحياة في السماء والأرض،
فزي ما فيه عندنا في الأرض شركات مثلا وعليها حراس بيحرسوها وبيشوفوا إللي داخل وإللي طالع،
برده في السماء هنلاقي كل سماء عليها حراس من الملائكة وظيفتهم حراسة أبواب السماء 😉

لما دخل رسول الله ﷺ السماء الدنيا شاف رجل قاعد في السماء حوله سواد عظيم ،لما ينظر ناحية يمينه يضحك ولما ينظر ناحية شماله يبكي،
فرسول الله ﷺ سأل جبريل من هذا؟!
فقال له جبريل عليه السلام : هذا أبوك آدم سلم عليه!
فسلم رسول الله ﷺ على أدم، فقال آدم عليه السلام لرسول الله أهلا بابني ، أهلا بالابن الصالح والنبي الصالح فلنعم الابن أنت ،ودعا لرسول الله ﷺ بخير،
وبعدين مشي رسول الله مع جبريل عشان يكمل الرحلة😁

☆إذا كان رسول الله ﷺ مشفش والده، لكنه شاف أبوه الأكبر آدم عليه السلام😊.

◇نقف كده مع بعض ثواني نجاوب على كم سؤال 😁
¤أولا:
إزاي رسول الله ﷺ يسأل جبريل عن آدم عليه السلام من هذا وهو كان لسه مصلي معاه في المسجد الأقصى من شوية🤔

مبدئيا هو في خلاف بين العلماء، هل رسول الله صلّى بالأنبياء قبل المعراج ولا صلى بهم بعد المعراج ، في علماء قالوا إنه صلى قبل المعراج وعلماء قالوا إنه صلى بهم بعد المعراج وكل فريق له أدلته💁‍♀️
فأنا شرحت لكم المرة إللي فاتت إن رسول الله ﷺ صلى بالأنبياء قبل المعراج، وعلى الأساس ده تكون الإجابة كالتالي :
رسول الله ﷺ لما دخل المسجد دخل صلى على طول من غير ما يركز في وجوه الانبياء، ده غير الرهبة إللي حصلت له لما شاف الاجتماع الرهيب للأنبياء ده فأكيد مش هياخد باله من كل المائة وأربعة وعشرين ألف نبي 😶
تخيلوا لما ندخل مكان زحمة بنبقى شايفين وجوه ناس كثيرة لكن مش مركزين في الأشخاص نفسهم شكلهم وملامحهم إيه🤷‍♀️
فدلوقتي رسول الله شايف دلوقتي آدم عليه السلام وجها لوجه ، فطبيعي إنه يسأل عن الشخص إللي قصاده دلوقتي ده هو مين بالتحديد، وخصوصا لما شاف السواد إللي حواليه وشاف بكاؤه وضحكه.
لكن لو القول الثاني بإن رسول الله ﷺ صلى بالأنبياء بعد المعراج يبقى مفيش إشكالية لأنه أول مرة كان يقابلهم كانت في السماء😉

¤السؤال الثاني إيه هو السواد إللي كان حول آدم عليه السلام ده🤔
السواد ده هو نسمات أو أرواح أبنائه إللي لسه لم يولدوا من أهل الجنة ومن أهل النار ،
فلما كان ينظر على نسمات أهل الجنة ناحية اليمين كان يضحك فرحا بهم،
ولما كان ينظرعلى نسمات أهل النار ناحية الشمال كان يبكي حزنا عليهم لأنهم فشلوا في الإختبار😞
وموقف البكاء ده يعتبر موقف عارض ، يعني مش إن آدم عليه السلام قاعد بس ينظر ناحية اليمين ويضحك وناحية الشمال ويبكي إلى قيام الساعة،
لأن احنا قلنا إن الأنبياء لهم حياة خاصة بعد الموت وإن أرواحهم موجودة في الجنة أصلا فهو خرج من الجنة عشان يقابل رسول الله ﷺ زي باقي الأنبياء إللي رسول الله ﷺ هيقابلهم في باقي السماوات،
ووجود آدم عليه السلام في السماء الدنيا بالّذت مش في أي سماء ثانية لأن هو بيعرض عليه نسمات أهل ال

#قصص_الأنبياء(٢)
#السيرة_النبوية
#الحلقة_الثانية_والأربعون
#انتشار_الإسلام_في_يثرب

كنا واقفين المرة إللي فاتت عند مصعب بن عمير لما سافر ليثرب مع وفد الإثنا عشر من الأوس والخزرج عشان يدعوا الناس إللي في يثرب ويعلم المسلمين الدين،
هنسيب رسول الله ﷺ في مكة يكمل تعليم المسلمين ويكمل مشواره في الدعوة هناك وهنروح مع مصعب رضي الله عنه ليثرب،
وصل مصعب ليثرب ونزل في ضيافة الصحابي أسعد زرارة إللي كان من الستة إللي أسلموا أول مرة😉
وكان جاء مع الوفد إللي بايع بيعة العقبة الأولى😁

دلوقتي مصعب عايز يبدأ في الدعوة، لكن هيبدأ إزاي محتاجين خطة🤔
فاستغل مصعب ميزة أسعد بن زرارة وهي إنه يعرف أهل يثرب كلهم ومشهور بينهم وكان حكيم جدا، مع إنه عمره مكنش لسه وصل للثلاثين،
ومش بس يعرفهم، ده له علاقات كويسة بناس كثير منهم،
يبقى الخطة دلوقتي إن أسعد بن زرارة يأخذ مصعب بن عمير معاه ويروح يزور الناس ويعمل جولة في يثرب ويقول للناس اسمعوا من مصعب،
يقوم مصعب يدعي الناس للإسلام ويقرأ عليهم القرآن،
وبكده كل واحد قدر يخدم الدين بالميزة بتاعته،
لو كان أسعد معندهوش لباقة مصعب ولا قدرته على توصيل المعلومة لكنه عنده مميزات تانية قدر يستغلها في نشر الدين😉
☆الإسلام بيستغل كل الطاقات، مفيش حد ملوش لازمة في الإسلام، كل واحد عنده ميزة يستغلها وكل واحد يكمل التاني،
وهنشوف إن شاء الله التنوع الرهيب إللي كان في الصحابة،
هنشوف إللي كان متميز في تعلم اللغات وهنشوف إللي كان متميز في قراءة القرآن، وإللي كان متميز في العبادة وإللي كان متميز في التخطيط للحروب،
كل دي طاقات مطلوبة لخدمة الإسلام👌
عارفين بقى احنا مشكلتنا إيه😓
إن احنا عايزين نعمل الحاجة إللي عاجبانا حتى لو كانت صعبة ومش بتاعتنا وواقفين قصادها وهي متقفلة😑
احنا بنبقى عايزين نعملها عشان الموضوع على مزاجنا،
لكن هي مش بتاعتنا،
احنا متميزين في حاجات تانية لو ركزنا فيها هنبدع بس احنا نكتشف ميزتنا في إيه، قدراتنا إيه،
هل أنا قدراتي إني أكون داعية زي مصعب بن عمير، ولا قدراتي إني أجيب الناس للداعية زي أسعد بن زرارة،
نصيحة من شخص مجرب، ركزوا على مميزاتكم وقدراتكم وإللي تقدروا عليه هتشوفوا العجب من نفسكم😊
وهي دي نفس فكرة فأتبع سببا😁

بدأ مصعب رضي الله عنه يدعو الناس عن طريق أسعد بن زُرارة الخَزْرجي،
ذهب أسعد لحديقة للأوس وجمع فيها لمصعب أكبر عدد يقدر يجمعه عشان يدعوهم ويقرأ عليهم القرآن،
كان موجود في الحديقة دي سيدين من سادات الأوس قاعدين مع بعض وحواليهم بعض أصحابهم،
《أُسَيْد بن حُضَيْر》 ،《سعد بن معاذ》
سعد بن معاذ كان ابن خالة أسعد بن زرارة فلما لقاه جاي ومعاه مصعب الرجل الغريب ده غضب جدا وكان لسه هيقوم يتخانق معاه لكن مسك نفسه عشان صلة القرابة إللي بينهم وقال لأُسيد بن حُضير صاحبه :
اذهب للأثنين دول إللي جايين يقعدوا في مجالسنا وهددهم وابعدهم عن مجالسنا وقول لهم ميقربوش من الأماكن بتاعتنا،
ولولا إن أسعد بن خالتي أنا كنت روحت بنفسي وخلصت الموضوع😤

فراح أسيد بن حضير ناحية أسعد ومصعب فلما شافه أسعد جاي من بعيد قال لمصعب:
شوف الرجل إللي جاي من بعيد ده ، هذا سيد قومه فاصدق الله فيه👌
فقال مصعب : لو قعد هكلمه وأدعوه👌

☆أسعد بيقول لمصعب خليك صادق مع ربنا وإنت بتدعيه، خلي نيتك لله،
وده يعلمنا إن الصدق مع الله في دعوة الناس بيفتح لنا قلوب الناس👌
العجيب بقى إن أسعد إللي لسه مسلم مبقالوش سنة بيقول لمصعب بن عمير اصدق الله فيه...خلي نيتك لله متخيلين 😳
مصعب القارئ العالم بالقرآن المبتلى في الله إللي عاش اثنا عشر سنة صادق مع الله أسعد بيقول له اصدق مع الله🙊
والأعجب منه رد مصعب: قال له لو قعد هكلمه😳
لو حد في واقعنا كان قال لأسعد إنت يابني بتقولي أنا أصدق مع الله😏
إنت مش عارف أنا ابتليت أد إيه في الله🙄
وقعد يجيب له تاريخه الطويل في الصبر والصدق، وتضيع قضية دعوة الرجل إللي جاي ده😑
بكل بساطة أسعد قال له أصدق مع الله فمصعب أخذ الكلمة وتذكر وصدق مع الله وخلصت الحكاية من غير كلام كثير ملوش لازمة🤷‍♀️
وده التطبيق العملي لقول الله:
"وَذَكِّرْ فَإِنَّ الذِّكْرَىٰ تَنفَعُ الْمُؤْمِنِينَ "
أسعد بن زرارة رضي الله عنه ذكّر مصعب فكان مصعب من المؤمنين فنفعه تذكير أسعد👌

وصل أُسيد بن حُضَيْر عندهم وهو متحفز للخناقة معاهم وقال لهما :
إنتم إيه إللي جابكم هنا، امشوا من هنا لو خايفين على نفسكم 😠

الكلام شديد ومستفز لكن مصعب الهادئ الحليم قال له بكل هدوء:
إيه رأيك تقعد تسمع، لو عجبك الكلام اقبله معجبكش هنمشي ومش هنقول لك حاجة تكرهها😊

فقال أُسَيد بن حضير : صح معاك حق 😕
وراح قاعد يسمع وهو ساند على الحربة بتاعته، بدأ مصعب يتكلم عن الإسلام وإنه بيدعو للتوحيد ومكارم الأخلاق،
وقرأ عليه آيات من القرآن،
فبدأ وجه أسيد يتغير ...الوجه الغضبان بدأ يتغير ويظهر عليه علامات الإعجاب بكلام الله وظهرت علامات الهدوء والسكينة على وجه أسيد😮
و

#قصص_الأنبياء(٢)
#السيرة_النبوية
#الحلقة_الثانية_والخمسون
#سلمان_الفارسي(٢)
#رسول_الله_واليهود

كنا واقفين عند سلمان الفارسي لما كان بيحكي لرسول الله ﷺ قصة بحثه عن الحق،
كان وصل للرجل في عَمّورية وقعد معاه فترة لحد ما جاءه الموت، فسلمان بيحكي لرسول الله ﷺ يقول:
قلت للرجل : يا فلان، توصيني أروح لمين بعدك، وإنت شايف حالك دلوقتي😥
فقال لي: والله يابني مفيش حد على إللي كنت عليه أنا وأصحابي أنصحك تروح له، لكن الزمن إللي إنت فيه ده زمان هيخرج فيه نبي وهو هيبعث بدين إبراهيم،
هيخرج بأرض العرب،
وهيهاجر لأرض بين حرّتين بينهما نخل ، له علامات لا تخفى على أحد: يأكل الهدية ولا يأكل الصدقة، بين كتفيه خاتم النبوة، فلو عرفت تروح البلاد دي روح👌
☆الحَرّة يعني : أرض حجارتها سوداء

فلما مات ودفناه قعدت في عمورية فترة، وبعدين عدّى عليّ تجار من كَلْبٍ فقلت لهم : أعطيكم بقراتي دي وغُنيمتي وتحملوني معاكم لأرض العرب🤔
فقالوا : ماشي اتفقنا، فأعطيتهم وأخذوني معاهم، فلما وصلنا وادي القرى ظلموني وباعوني عبدا لرجل من اليهود😔
فلما كنت عنده وشفت النخل ، تمنيت إن هي دي تكون الأرض إللي صاحبي قال لي عليها،
فو أنا عنده جاء له ابن عمه من قريظة فاشتراني منه وأخذني معاه للمدينة، فوالله أول ما شفتها عرفت إنها الأرض إللي صاحبي قال لي عليها وفضلت موجود فيها،
وانشغلت بشغل الرّق ومسمعتش عن بعثة رسول ولا أي حاجة خالص، لحد ما كنت في يوم شغال على نخلة من بتوع سيدي وسيدي جالس لقينا ابن عم له جاي علينا من بعيد ولما وصل عندنا لقيناه بيقول :
قاتل الله بني قِيلة《الأوس والخزرج، وقِيلة هو اسم أمهم》 ، مجتمعين على رجل بِقُبَاء جاي من مكة بيقولوا إنه نبي😏
فأول ما سمعت كلامة جسمي تلج وساب من بعضه لدرجة إني كنت هقع من فوق النخلة على سيدي 😳
فنزلت من على النخلة وقلت لابن عمه ده:
بتقول إيه بتقول إيه😲
فغضب سيدي وراح ضاربني وقال لي: وإنت مالك أصلا بالموضوع ، روح شوف شغلك😠
فقلت له: مفيش حاجة أنا كنت بس عايز أتثبت من كلامه😓
وكان عندي تمر جمعته، فلما جاء المساء جئتكم وقلت لكم إنكم محتاجين فدي صدقة مني، فأكل أصحابك ولم تأكل، فقلت دي أول علامة،
وبعدين جمعت تمر تاني وقدمته لكم هدية فأكلتَ وقلت لأصحابك يأكلوا معاك، فقلت دي تاني علامة،
ومكنش فاضل غير العلامة الثالثة إللي هي خاتم النبوة فلما شفتها على ظهرك عرفت إن إنت المقصود من وصف صاحبي، فكان رسول الله ﷺ مبسوط إنه أصحابه سمعوا قصة سلمان رضي الله عنه،
وأسلم سلمان ولكنه لسه عبد فكان مشغول في شغل الرّق،

☆قصة سلمان من أعجب القصص إللي ممكن نسمعها مختصر القصة بتاعته : إن إللي عايز يتبع الحق بصدق وبيدور عليه ربنا هيوصله للحق في النهاية👌
"وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا"

¤اختلف العلماء في عُمْر سلمان الفارسي، بسبب رحلته الطويلة دي ،في ناس قالوا إنه كان من المُعَمّرين فكان عمره مائتين وخمسين سنة، وناس قالوا ثلاثمائة،
لكن القول الراجح إنه مات لما كان قرب على الثمانين سنة في خلافة عثمان بن عفان رضي الله عنه،
يعني لما قابل رسول الله ﷺ كان تقريبا عمره معدي الأربعين🤔

وبما إننا اتكلمنا عن اليهود خلونا نشوف خطة رسول الله ﷺ في التعامل مع اليهود كانت إيه👌

عارفين لما بنبقى داخلين مشروع أو بنقدم على وظيفة أو مسافرين مكان،
الطبيعي إننا بنسأل عن طبيعة الحاجات إللي احنا هنتعامل معاها لأول مرة دي، نعرف طبيعة الناس إللي هنتعامل معاهم، مميزاتهم وعيوبهم،
إزاي نتقي شرهم ، إزاي نتعايش معاهم ومنعرّضش نفسنا إنهم يخدعونا،
أهه ربنا كان بيعمل كده مع رسول الله ﷺ والمسلمين من خلال القرآن👌

قبل ما المسلمين يعرفوا أصلا إنهم هيهاجروا للمدينة ويتعاملوا مع اليهود كان ربنا بيحكي لهم قصص عن بني إسرائيل وعن موسى عليه السلام ومواقفه مع فرعون وكمان مواقفه مع بني إسرائيل،
عشان ربنا يوسع آفاق المسلمين، انتم هتكون لكم دولة في يوم من الأيام، فمحتاجين تعرفوا أصناف الناس الموجودة معاكم على الأرض ومنهم اليهود،
فربنا أراد إنه يوصل للمسلمين فكرة عامة عن بني إسرائيل، إللي هم أجداد اليهود إللي عايشين في يثرب،
ولما يدخلوا المدينة يبقى عندهم انطباع إن اليهود دول أهل كتاب زينا، وده هنلاقيه في آية :
"ولَا تُجَادِلُوا أَهْلَ الْكِتَابِ إِلَّا بِالَّتِي هِيَ أَحْسَنُ"
وكمان هم أتباع رسول زينا، موسى عليه السلام وبيعبدوا إله واحد وهو الله، وهم اتأذوا وصبروا على ظلم فرعون:
"وَتَمَّتْ كَلِمَتُ رَبِّكَ الْحُسْنَىٰ عَلَىٰ بَنِي إِسْرَائِيلَ بِمَا صَبَرُوا"
وربنا قال عنهم إنه اختارهم على العالمين،
"وَلَقَدِ اخْتَرْنَاهُمْ عَلَى عِلْمٍ عَلَى الْعَالَمِينَ"
فكل ده بيعطي للمسلمين انطباع إيجابي عن اليهود إللي هيتعاملوا معاهم لما يتقابلوا، وخصوصا إن المنطق والعقل بيقول إن اليهود هيتبعوا رسول الله ﷺ🤷‍♀️

لكن في نفس الوقت ربنا علم الصحابة في القرآن إن بني إسرائيل دول بر

#قصص_الأنبياء(٢)
#السيرة_النبوية
#الحلقة_الثانية_والستون
#إني_وجدت_ما_وعد_ربي_حقا
#رد_فعل_الناس_على_نصر_المسلمين

اتكلمنا المرة إللي فاتت عن أسرى وقتلى غزوة بدر، وبدأت أخبار انتصار المسلمين على مشركي مكة تنتشر في جزيرة العرب، وكان رسول الله ﷺ من عادته إنه إذا انتصر على جيش يقعد في مكان المعركة ثلاثة أيام،
عشان يريحوا وعشان يظهر قوته ويخافه الأعداء ويدفن شهداء المسلمين،
وكانوا أربعة عشر رجلا من المسلمين، والصحيح إن الشهيد يُدفن في مكانه إللي قتل فيه ولا يُغسل، وحتى الصلاة عليهم غير واجبة لأن مفيش أحاديث تثبت أو تنفي صلاة رسول الله ﷺ على الشهداء في غزوة من الغزوات.
وصل خبر انتصار المسلمين إلى أهل مكة عن طريق واحد من قبيلة خزاعة،
أول ما دخل مكة الناس سألته : إيه الأخبار😕
فقال لهم: قُتل عتبة بن ربيعة وقُتل شيبة بن ربيعة وأبو الحكم بن هشام، وأمية بن خلف،
وقعد يعد لهم سادات مكة إللي قتلوا، فسمعه صفوان بن أمية بن خلف فقال لهم:
الرجل ده شكله اتجنن، اسألوه كده عني شوفوا هيقول إيه😏
فلما سألوه عن صفوان قال لهم : ماله صفوان ماهو قاعد عند الحِجر🤨
وأنا والله شفت أبوه وأخوه لما قتلا👌
وبدأت الناس إللي فروا من معركة بدر يعودوا لمكة ويحكوا إللي حصل معاهم في المعركة،
وصل الخبر لأبو لهب عم رسول الله ﷺ وكان في مكان عند زمزم وكان أبو رافع مولى رسول الله ﷺ في نفس المكان إللي عند زمزم ،
فبيحكي أبو رافع إللي حصل مع أبو لهب ويقول:
كنت غلام للعباس، يعني بيساعده في أموره زي العبد كده،
فأسلمت وأسلمت أم الفضل وأسلم العباس وكان يكتم إسلامه،
فلما وصل لنا خبر انتصار المسلمين حسينا بعزة وفخر وفرح،
أما أبو لهب فكان مقهور من إللي حصل،
فكنت قاعد بنْحت الأقداح في حجرة زمزم وكانت أم الفضل قاعدة معايا واحنا قاعدين فرحانين لنصر المسلمين،
ولقينا أبو لهب جاي علينا بيجر رجله من القهرة وماشي وهو مغموم،
لحد ما جه وقعد على حَجر وكان ظهره لظهري، يعني أبو لهب قعد في ظهر أبو رافع،
وهو قاعد سمعنا الناس بتقول : أبو سفيان بن الحارث بن عبد المطلب جاء من الحرب،
☆أبو سفيان بن الحارث ده غير أبو سفيان بن حرب صاحب القافلة ركزوا😅

فنادى عليه أبو لهب وقال له: تعال يابن أخي إنت عندك الخبر الأكيد قل لي إيه إللي حصل 😓
والناس حولهم يسمعون ،فقال له أبو سفيان بن الحارث:
والله احنا مجرد ما قابلنا المسلمين إلا وكأننا سلمنا نفسنا لهم يقتلوننا ويأسروننا زي ما هم عايزين😥
وأنا لا ألومهم على الهزيمة دي، احنا قابلنا رجال بيض على خيول بَلق يعني خيول بيضاء وفيها سواد، بين السماء والأرض والله ما في أحد يقدر عليهم👌
فقال أبو رافع: والله دي الملائكة 😲

☆مقدرش يمسك نفسه من الحماس 😅

فابو لهب راح رافع إيده وضرب وجه أبو رافع ضربة شديدة فبدأ أبو رافع يعاركه بيدافع عن نفسه،
لكن أبو رافع كان رجل ضعيف الجسد فراح أبو لهب شايل أبو رافع ورماه في الأرض زي بتوع المصارعة كده وقعد عليه يضرب فيه🙊
فقامت أم الفضل وجابت عمود وضربت أبو لهب على رأسه فتحت له رأسه فتحة جامدة، وقالت له :
إنت مستضعفه عشان سيده مش موجود😡
☆أبو لهب يبقى أخو زوج أم الفضل واخدين بالكم😅

فقام أبو لهب ومشي وهو ذليل، وربنا ابتلاه بداء اسمه العَدَسة، قرحة تتشاءم منها العرب وهي مُعدية، فمعداش سبع ليال إلا ومات أبو لهب،
وقعد ثلاثة أيام بعد موته أبناؤه خايفين يقربوا منه، فلما خافوا الناس تُعايرهم إنهم تركوا أبوهم من غير دفن،
حفروا حفرة ودفعوه في الحفرة بعود خشب ورموا عليه الحجارة من بعيد لحد ما غطوه وتركوه ومشيوا👌

المشهد بيقف هنا عند ناس كثير، خلاص الميت اندفن وانتهى الأمر، لكن أبو لهب دي كانت بدايته، بداية العذاب الأبدي:
"تَبَّتْ يَدَا أَبِي لَهَبٍ وَتَبَّ * مَا أَغْنَى عَنْهُ مَالُهُ وَمَا كَسَبَ* سَيَصْلَى نَارًا ذَاتَ لَهَبٍ "
يا ترى أبو لهب كان إحساسه عامل إزاي لما شاف ملك الموت وهو جاي يقبض روحه ومعاه ملائكة سود الوجوه معاهم كفن من النار عشان يكفنوا فيه روحه وهم قاعدين قصاده وملك الموت عند رأسه وبيقول :
أيتها النفس الخبيثة، اخرجي إلى سخط من الله وغضب،
وروحه تفرقت في جسده خايفة تخرج،
فانتزعها ملك الموت زي ما بننتزع عود مليان شوك من الصوف المبلول،
ولا لما اتحط في القبر وسمع أصوات أقدام عياله وهم سايبينه وماشيين وواجه بعدها منكر ونكير، الملكان المسؤلان عن امتحان الناس في القبر،
وإللي وصفهم لوحده يخلينا نطلع نجري لو شفناهم واحنا في الدنيا، مش في قبر مظلم ومفيش منه مفر،
يا ترى إيه كمية الرعب إللي أبو لهب حس بيها لما شاف ملكان أسودان أزرقان، يحفران الأرض بأنيابهما ،
أعينهما كالبرق الخاطف وأصواتهما كالرعد القاصف، وبيسألوه: من ربك؟ وما دينك؟ ومن نبيك؟
وهو بيقول :
هاه هاه لا أدري ، فينادي مُنادٍ من السماء أفرشوا له من النار وألبسوه من النار وافتحوا له بابا إلى النار 👌
فجاءه من حرها وسمومها وضاق عليه قبره لحد ما أضلاعه دخلت في بعض، وج

#قصص_الأنبياء(٢)
#السيرة_النبوية
#الحلقة_الثانية_والسبعون
#اختيار_أرض_المعركة
#أخبار_بعض_من_خرج_في_غزوة_أحد

اتكلمنا المرة إللي فاتت عن تجهيز رسول الله ﷺ لجيش المسلمين وقلنا إنه قعد يستعرض الجيش عشان يشوف لو فيه خلل، أو في حد لا يصلُح للقتال،
فوهو بيشوف الجيش إللي كان عدده ألف رجل شاف أطفال في الجيش جايين عايزين يجاهدوا مع رسول الله ﷺ😮
زي أسامة بن زيد بن حارثة إللي كان عمره حوالي من تسعة إلى عشرة أعوام،
وأسامة يعتبر حفيد رسول الله ﷺ لأن أبوه زيد كان تبناه رسول الله ﷺ وبقى اسمه زيد بن محمد لحد ما اتحرم التبني، وكان رسول الله ﷺ بيحبه هو وأبوه،
وكان أسامة يُسمى الحِبّ بن الحِبّ،
وكان من الأطفال في الجيش عبد الله بن عمر بن الخطاب، وأبو سعيد الخدري،
وكان رسول الله ﷺ بيرد عن الجهاد أي حد تحت سن خمسة عشرة عاما،
لأن من صفات الجيش المنتصر توْسِيد الأمر إلى أهله،
يعني إني أعطي المسؤولية للي يقدر يتحملها من غير واسطة أو محسوبية أو عشان أنا بحب فلان أو لأ👌
ومن علامات يوم القيامة أن يُوَسّد الأمر لغير أهله، يعني واحد مبيفهمش في الاقتصاد نلاقيه متعيّن في أعلى مناصب الاقتصاد،
واحد مش عارف يبقى مسؤول عن فرخة نلاقيه بقى مسؤول عن ملايين البشر وهكذا😑
جاء رجل لرسول الله ﷺ يسأله متى الساعة،
قال له رسول الله ﷺ:
إذا ضيعت الأمانة فانتظر الساعة، قال: كيف إضاعتها؟ قال: إذا وُسّد الأمر إلى غير أهله."

فرسول الله ﷺ كان بيعطي المسؤولية للي يقدر عليها فعلا وهو عارف إن دول أطفال مش أد المسؤولية،
لكن دايما في شواذ للقاعدة 😁
واحد من صغار الصحابة اسمه رافع بن خديج كانت قدرته في الرماية ممتازة على الرغم من إن عمره كان ثلاثة عشر عاما إلى أربعة عشرة عام، فوافق رسول الله ﷺ إنه يخرج معاه في الغزوة،
واحد تاني من صغار الصحابة اسمه سَمُرَة بن جُنْدَب كان عمره أقل من خمسة عشرة عام هو كمان قال لرسول الله ﷺ :
اشمعنى رافع، أنا أقوى من رافع خليني أصارعه يا رسول الله وهتشوف إني أقدر أغلبه 😤
فقال لهما رسول الله ﷺ خلاص تصارعا، عشان يختبر قدراتهم القتالية،
فلما تصارعا غلب سَمُرة رافعا، فوافق رسول الله ﷺ إن سمرة يخرج معاه للجهاد زي رافع،
وجاء رسول الله ﷺ واحد من الصحابة اسمه عمرو بن الجَمُوح، كان من سادات الأنصار عايز يخرج يجاهد معاه، لكن الصحابي ده عنده عرج في رجله،
يعني بيمشي يعرج، فأبناءه قالوا له ربنا عذرك مش فرض عليك الجهاد🤷‍♂️
وكان حاول يخرج مع رسول الله ﷺ في غزوة بدر لكن أباؤه منعوه لنفس السبب،
لكنه المرة دي صمم إنه يخرج وذهب لرسول الله ﷺ يشتكي أبناءه وإنه عايز يخرج،
فرسول الله ﷺ قال له :
إنت عندك عذر، الجهاد مش فرض عليك، فقال له عمرو بن الجموح :
أنا عايز أطأ الجنة بعرجتي هذه، يعني عايز أدخل الجنة بعرجتي دي،
فوافق رسول الله ﷺ وأذن له إنه يخرج معاه للجهاد.

☆عارفين عمرو بن الجموح ده كان آخر واحد أسلم من الأنصار ومع ذلك شوفوا إصراره على الخروج للجهاد مع إنه معذور😮
"ليْسَ عَلَى الْأَعْمَىٰ حَرَجٌ وَلَا عَلَى الْأَعْرَجِ حَرَجٌ وَلَا عَلَى الْمَرِيضِ حَرَجٌ"
وقصة إسلامه عجيبة، لما مصعب بن عمير جاء للمدينة وبدأ يدعو الناس للإسلام، وكان أبناء عمرو بن الجموح ممن سابقوا للإسلام وكانوا ممن حضر بيعة العقبة الثانية،
وأسلمت زوجته وأخوها عبد الله بن حرام إللي كان صديق مقرب منه ومش بس زوج أخته، ومع ذلك عمرو بن الجموح لم يُسلم👌
وكان عنده صنم اسمه مناف بيعبده، فكان معاذ ابنه وصاحبه اسمه معاذ بن جبل بيدعوا الناس للإسلام،
فاستعملوا الحيلة مع عمرو بن الجموح عشان يبينوا له بالعقل إن الصنم إللي بيبعده ده لا يضر ولا ينفع،
فكان معاذ بن عمرو وصاحبه معاذ بن جبل كل يوم بالليل يأخذوا الصنم مناف بتاعه ده ويرموه في حفرة من الحفر إللي الناس بترمي فيها الفضلات،
يقوم عمرو بن الجموح الصبح مش لاقي الصنم بتاعه😕
يقعد يدوّر عليه لحد ما يلاقيه مرمي في الحفرة فيغضب ويزعق ويقول :
مين إللي تعدى على الإله بتاعنا😡
فيأخذه ويغسله وينظفه ويُعطره، ولما ييجي الليل يكرر المعاذان نفس الفعلة، لحد ما زهق عمرو بن الجموح، فجاء بسيف وعلقه في رقبة الصنم وقال له:
شوف، لو حد جاءك عشان يؤذيك دافع عن نفسك بالسيف👌
صحي تاني يوم الصبح ملقاش الصنم، لقاه في الحفرة ومش بس كده ده لقاه مربوط في كلب ميت😷
فوهو قاعد غضبان ومتضايق رآه بعض أشراف المدينة من المسلمين فقعدوا يفهموه مين هو الإله العظيم الذي ليس كمثله شيء،
وإزاي يكون إله ومش قادر يدافع عن نفسه، فكلموه عن الإسلام وعن رسول الله ﷺ، فقام عمرو بن الجموح وتطهر وتطيب وذهب لرسول الله ﷺ ليبايعه على الإسلام،
وكان لما أسلم على مشارف الستين من عمره،
ولما طلب إنه يخرج للجهاد مع رسول الله ﷺ في غزوة أحد كان في الستين من عمره،
مقلش خلاص بقى أنا ربنا عذرني وممكن آخذ بالرخصة وأقعد،
أو أنا رجل كبير في السن ومش هقدر أجاهد أصلا، الناس دي مكنتش بتفكر كده، الناس دي كانوا عار

#قصص_الأنبياء(٢)
#السيرة_النبوية
#الحلقة_الثانية_والثمانون
#قصة_المقداد_ولبن_رسول_الله
#رسول_الله_مع_سودة_وعائشة

هنتكلم النهاردة عن بعض مواقف رسول الله ﷺ مع أصحابه وبعض زوجاته،
واحد من الصحابة اسمه المقداد بن الأسود، أو خلينا نقول اسمه إللي هو مشهور به المقداد بن عمرو،
فاكرينه😊
إللي قال لرسول الله ﷺ في غزوة بدر لما كان بيستشير الصحابة يقاتلوا ولا يرجعوا للمدينة فقال المقداد بن عمرو:
يا رسول الله! اعمل إللي إنت شايفه صح، فوالله مش هنقول لك كما قال بنو إسرائيل لموسى اذهب أنت وربك فقاتلا فإنا هاهنا قاعدون،
ولكن هنقول لك : اذهب أنت وربك فقاتلا إنا معكما مقاتلون وكان رسول الله ﷺ فرح بكلامه جدا👌
حصل موقف بين رسول الله ﷺ والمقداد بن عمرو هيحكيه لنا المقداد، يقول:
أنا واثنين من أصحابي كنا جعانين جدا لدرجة إن تركيزنا راح، لا شايفين ولا سامعين حاجة،
فعرضنا أنفسنا على أصحاب النبي ﷺ عشان يضيفونا ويأكلونا فمحدش منهم قَبِلَنا😓

☆قلنا قبل كده إن الصحابة كانوا فقراء جدا، كان ممكن الواحد يقعد بالأيام مياكلش وكانوا بيربطوا الحجر على بطونهم من شدة الجوع،
فكل إللي عرضوا نفسهم عليهم كانوا فقراء زيهم ومعندهمش إللي يكفي الثلاثة دول.

فالثلاثة راحوا لرسول الله ﷺ، فأخذهم رسول الله ﷺ وذهب لأهله ،فلقى عندهم ثلاثة أَعْنُز، ماعز يعني،
فقال لهم احلبوا الماعز الثلاثة واقسموا اللبن بيننا احنا الأربعة،
فكانوا بيحلبوا اللبن ويشربوا ويتركوا نصيب رسول الله ﷺ متغطي في جنب لحد ما ييجي ويشربه،
استمر الوضع كده كام يوم، وكان رسول الله ﷺ بيذهب للأنصار ولما يخلّص مشواره يرجع بالليل ويقعد يصلي في المسجد وبعدها ييجي يشرب اللبن بتاعه،
في يوم من الأيام بعد ما شربوا نام الاثنان ولم ينم المقداد كان لسه جعان ومفيش غير نصيب رسول الله ﷺ بس هو إللي فاضل، فيقول:
وأنا نايم على الأرض كده جاءني الشيطان يوسوس لي وقال لي:
محمد بيروح للأنصار، فأكيد يعني مش هيسيبوه من غير أكل وهيضيفوه، فأكيد مش هيبقى محتاج لشوية اللبن دول،
قوم اشرب قوم😈
فلما أغراه الشيطان وأقنعه إن رسول الله ﷺ مش محتاج شوية لبن قام المقداد بن عمرو وشرب نصيب رسول الله ﷺ من اللبن،
وأول ما دخل اللبن جوفه وعرف إن خلاص مفيش مجال إنه يرجع اللبن ده تاني، الشيطان مسابوش وقعد يندّمه😶
قال له: إنت عملت إيه😱
شربت اللبن بتاع محمد😳
دلوقتي ييجي عشان يشرب اللبن بتاعه وميلاقيهوش، فيدعو عليك وتضيع عليك دنياك وآخرتك😤
فطار النوم من عين المقداد وقعد قلقان وغطى نفسه بشَمْلة،
غطاء زي لحاف صغير كده، كان لما يغطي رأسه رجل تبان،
لو غطى رجله رأسه تبان،
وهو على الحالة دي جاء رسول الله ﷺ 🙊
وكان من عادته لما ييجي إنه يسلم سلام ميصحيش النائم وإللي صاحي يسمع سلامه،
فسلم رسول الله ﷺ كعادته وصلى في المسجد، وراح يكشف عن الطبق إللي فيه اللبن بتاعه عشان يشربه، فلما كشفه ملقاش فيه حاجة، فرفع إيده يدعي،
وكل ده والمقداد باصص على رسول الله ﷺ من تحت الشملة بتاعته ورسول الله ﷺ ميعرفش حاجة😅
فلما شافه المقداد بيرفع إيده للسماء عشان يدعي قال في نفسه:
بس كده أنا خلاص هلكت...روحت في داهية😶
فقعد يسمع رسول الله ﷺ هيدعي بإيه،
فسمعه يقول : اللهم أطعم من أطعمني واسقِ من سقاني🤲
فقام المقداد وأخذ سكينة وذهب إلى الأَعْنز عشان يذبح منهم واحدة ويُطعم رسول الله ﷺ ويبقى الدعاء إللي رسول الله ﷺ دعاه من نصيبه،
فلقى المقداد الضرع بتاع الأعنز كلهم مليان لبن، فأتى بطبق كبير عميق لا يتصور آل محمد ﷺ إنهم يحلبوا فيه ولا حتى يملوه زي ماهو بيحكي،
فحلب الأعنز وملأ الطبق باللبن لدرجة إن رغوة اللبن عِليت عن الطبق😮
فأخذ اللبن وراح لرسول الله ﷺ، فرآه رسول الله ﷺ وأكيد استغرب إن المقداد لسه صاحي 🤨
فقال له المقداد وهو بيعطيه اللبن:
اشرب يارسول الله 😊
فرسول الله ﷺ سأله: هل شربتم؟
فقال له المقداد: اشرب 😊
طبعا مجاوبهوش😅
هو مش عايز رسول الله ﷺ يعرف حاجة لحد ما يخلص عشان يأخذ بركة دعاء رسول الله ﷺ 😁

يقول المقداد: لما شرب رسول الله ﷺ اللبن وعرفت إنه خلاص ارتوى وبكده يبقى الدعوة إللي رسول الله ﷺ دعاها بقت من نصيبي قعدت أضحك لدرجة إني وقعت على الأرض من كثرة الضحك😄
طبعا كل ده رسول الله ﷺ ميعرفش إللي حصل مع المقداد وصراعه من نفسه وإزاي إنه كان حزين جدا عشان خايف من دعوة رسول الله ﷺ عليه، وفجأة اتحولت الدعوة وبقت في مصلحته،
فرسول الله ﷺ قال له:
إحدى سَوْءاتك يا مقداد👌
يعني إنت عملت عَملة يا مقداد😁
فحكى له المقداد كل إللي حصل معاه، فقال له رسول الله ﷺ:
دي رحمة من الله، مش كنت تقول عشان نصحي الاتنين النايمين دول عشان يشربوا معانا!

☆شوفتم إزاي الشيطان ممكن يوقع الإنسان في الخطأ، ومش بس كده، ده بعد الخطأ يندمه وممكن يوصله لمرحلة اليأس من رحمة الله،
يقول إنت عملت المعصية الفلانية خلاص كده، ربنا مش هيقبلك تاني، ويزين له باقي المعاصي عشان يوقعه أكثر وأكثر وبالتالي يضيعه،
كل واح

#قصص_الأنبياء(٢)
#السيرة_النبوية
#الحلقة_الثانية_والتسعون
#أحداث_السنة_الخامسة_من_الهجرة
#وجاء_الأحزاب

وقفنا المرة إللي فاتت عند انتهاء الصحابة من حفر الخندق، وهم خلصوا من هنا ولقوا جيش المشركين بكل أحزابه جايين،
المشركين لأنهم جمعوا نفسهم من مختلف الطوائف والقبائل بقى اسمهم أحزاب، فاتسمت المعركة دي بغزوة الأحزاب أو غزوة الخندق، والأحداث دي كانت في شوال من السنة الخامسة من الهجرة على أرجح وأصح أقوال العلماء،
وصل جيش المشركين وشافوا الخندق محفور، وكانت صدمة بالنسبة لهم واتغاظوا جدا، يعني هم مجمعين الأعداد دي كلها وجايين وعندهم آمال إنهم يقضوا على المسلمين،وفي الآخر ميعرفوش يدخلوا المدينة😑
ودي أول مرة يشوفوا خندق في حياتهم، هم متعودين على الهجوم والدفاع والمواجهة،
حتى إنهم قالوا :
هذه حيلة لا تعرفها العرب🤨
ووقف الجيشان وبينهما الخندق، المشركين مش عارفين يعبروا، مفيش غير طريقين يدخلوا منهم المدينة، الطريق إللي أمامهم دلوقتي وطريق تاني من ناحية بني قريظة،
لكن بني قريظة على عهد مع رسول الله ﷺ،
فقعدوا يدُورُوا حول الخندق عشان يلاقوا ثغرة يعدوا منها مش عارفين،
رسول الله ﷺ كان نظّم نقط حراسة على طول الخندق عشان لو حد من المشركين حاول إنه يَعبر الخندق ويهجم على المسلمين يلاقي إللي يرجعه،
فكان المسلمون بيرموا المشركين بالسهام عشان محدش منهم يقدر يَعبر الخندق ولا حتى يقدر يردمه ويعدي،
وبكده كووول العشرة آلاف دول ولا لهم لازمة🤷‍♀️
وجعل رسول الله ﷺ مجموعات للقتال، عشان لو حد فلت من السهام وعرف يعدي الخندق يلاقي إللي يُقاتله ويهزمه،
فكان رسول الله ﷺ عامل حسابه لكل احتمال،
كان في واحد من فرسان العرب المشهورين اسمه عمرو بن وُدْ، كان معروف بقوته، لدرجة إنه يقال عنه إنه لو بَارَز أربعين رجل لوحده لنثرهم عن يمينه وشماله،
الفارس ده قعد رايح جاي على الخندق من أوله لآخره، بيدور على أي حتة تكون ضيقة شوية يقدر يعدي منها،
وفعلا لقى مكان يعتبر ضيق نسبيا فرجع للوراء لعكرمة بن أبي جهل، وضِرار بن الخطاب أخو عمر بن الخطاب وأخبرهم بالمكان،
فراحوا بالفرس بتاعهم قفزوا مرة واحدة هم الثلاثة من فوق الحتة دي ووصلوا الجهة التانية ناحية المسلمين🙊
رسول الله ﷺ جهز لهم مجموعة صغيرة من الصحابة يقاتلوهم بقيادة علي بن أبي طالب رضي الله عنه،
فلما تواجهوا تصدّى علي بن أبي طالب لعمرو بن وُد وقاتله قتال شديد وضربه علي رضي الله عنه بالسيف وقتله،
وكان علي رضي الله عنه من أقوى الفرسان، ومدخلش مبارزة مع حد إلا وهزمه👌
عكرمة بن أبي جهل وضرار بن الخطاب شافوا الفارس عمرو بن ود اتقتل راحوا راجعين على طول😅
تكررت محاولات المشركين لعبور الخندق مرات كثيرة، ومنهم محاولة خالد بن الوليد ومعه مجموعة من المشركين إنهم يعبروا، لكن أُسيد بن حُضير ومعاه مئتين من المسلمين قدروا إنهم يمنعوهم،
المشركين مش عايزين يستسلموا، وهم عشرة آلاف فكانوا ساعات يضغطوا جامد في الهجوم على الخندق والصحابة يدفعوهم، لدرجة مرة قعدوا يهجموا من قبل العصر لحد بعد المغرب،
والمسلمين انشغلوا بيهم حتى ضاعت عليهم صلاة العصر، مش لاقيين حتى خمس دقائق يصلوا فيهم تخيلوا كمية الهجوم كانت عاملة إزاي😶
وده حدث نادر جدا في السيرة، إن المسلمين يضيع عليهم فرض من الفروض لحد ما يخرج وقته، والمسلمين اتضايقوا جدا إزاي يضيع عليهم صلاة،
مع إن إللي شغلهم كان الجهاد، مش ماتش كورة، ولا فرجة على فيلم ولا مسلسل ولا...ولا...
حتى رسول الله ﷺ نفسه قال:
"ملأ الله قبورهم وبيوتهم نارا كما شغلونا عن الصلاة الوسطى حتى غابت الشمس"
الهجوم ده مقعدش يوم ولا اتنين ولاأسبوع ولا أسبوعين،
استمر حصار المشركين للمدينة والهجوم على الخندق شهر كامل، والمسلمين صامدين ثابتين،
المشركين كانوا بيرموا المسلمين بالسهام من ناحيتهم فقُتل في غزوة الخندق سبعة من الصحابة،
وأُصيب سعد بن معاذ رضي الله عنه بسهم في ذراعه،
أما المشركين فقُتل منهم أربعة،
أبو سفيان قائد الجيش شاف إن الوضع كده مش نافع، وزي ما المسلمين تعبانين والحصار صعب عليهم كذلك المشركين عندهم نفس المشكلة،
وزي ما ربنا قال:
" إِنْ تَكُونُوا تَأْلَمُونَ فَإِنَّهُمْ يَأْلَمُونَ كَمَا تَأْلَمُونَ "
الحل الوحيد دلوقتي قصاد أبو سفيان وأسهل طريقة لهزيمة المسلمين إن بني قريظة يتعاونوا معاهم وينقضوا العهد مع رسول الله ﷺ،
والخطة تكون إن بني قريظة تهجم على المسلمين من خلفهم وهم يهجموا على المسلمين من ناحية الخندق ويردموا منه جزء ويعدوا كلهم وبكده المسلمين هيبقوا بين فكّي كماشة،
مش هيقدروا يدافعوا عن نفسهم وعن الخندق في نفس الوقت،
فلو نجحت فعلا الخطة دي، هيقدروا يقضوا على المسلمين نهائيا😶
رسول الله ﷺ كان عامل حسابه لاحتمال زي ده، فعشان يكون في الاحتياط ويبقى مطمئن، جمع النساء والأطفال وكبار السن في حصن داخل المدينة،
عشان محدش يهجم عليهم من أي جهة ويعرضهم للخطر،
المشكلة بقى مين إللي هيقنع بني قريظة إنهم يتعاونوا

#قصص_الأنبياء
#الحلقة_الثانية
#قصة_آدم_الجزء_الثاني
#عصيان_إبليس_وخلق_حواء

وقفنا عند الملائكة إللي سجدت لآدم ماعدا كائن واحد لم يسجد وعصى أمر ربنا،
الكائن ده هو إبليس😬
قلنا عن إبليس إنه كان من الجن،
◇والجن ربنا خلقهم من لهيب أسود شديد الحرارة
إللي هو مَارِج من نار◇

¤ملحوظة مهمة¤
☆الجن ده عالم زي عالم البشر كده فيهم المؤمن والكافر....وكلمة شيطان تتقال على من كَفَر من الجن،
لكن مؤمنوا الجن لا يُقال عليهم شياطين،
فالشياطين جزء من الجن☆

ربنا رفع إبليس للسماء مع الملائكة مع إن الملائكة أفضل منه وأكرم،
حتى إن الملائكة كانت تقول:
ما خلق الله خلقا إلا وكنا أكرم منه وأعلم منه.
وطبعا الهدف إللي ربنا خلق البشر والجن عشانه هو إنهم يعبدوه سبحانه 👌
"وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ"

◇طيب السؤال إللي بيطرح نفسه هنا،
ربنا أمر الملائكة إنها تسجد لآدم عليه السلام، إيه إللي دخل إبليس في الموضوع🤔

احنا قلنا إن الملائكة هم أعظم وأكرم المخلوقات صح؟
طيب لما الأمر ييجي لشخص عظيم وينفذّه ...الطبيعي طبعا إن الأقل منه منزلة ينفذه بكل تلقائية،
فكان يجب على إبليس إللي أقل مكانة من الملائكة إنه يسمع كلام ربنا💁‍♂️

طيب خلونا نقول إن إبليس فِهم غلط واختلط عليه الأمر🙄
الطبيعي في الموقف ده إنه يقول إيه؟
يقول يارب إنت أمرت الملائكة وأنا من الجن فمكنتش عارف إني أنا كمان لازم أسجد😅
هو بقى مقلش كده😑
ده قال بكل بجاحة وكِبر :
" قَالَ لَمْ أَكُن لِّأَسْجُدَ لِبَشَرٍ خَلَقْتَهُ مِن صَلْصَالٍ مِّنْ حَمَإٍ مَّسْنُونٍ"
عارفين يعني إيه؟!
كأنه بيقول: أنا مسجدش لكائن متعفن 🙄

متستغربوش...متستغربوش😅
مش احنا قلنا المرة إللي فاتت إن الحمأ المسنون معناها الطين المتعفن الأسود،
وإبليس شاف مراحل خلق آدم،
فهو شايف نفسه إنه مخلوق من نار والنار دي حاجة عظيمة وأحسن من الطين المتعفن ده،
ده غير القدرات إللي عنده زي إنه ممكن يتمثل في صور متعددة زي صورة البشر أو الحيوان،

وآدم من وجهة نظره مخلوق من طين متعفن وكمان أجوف ،
فإزاي بقى النار العظيمة تسجد لطين متعفن😏
فكل كلامه فيه انتقاص من آدم عليه السلام،
مع إن الطين أنفع وخير من النار،
فالطين فيه: الرزانة، والحلم، والأناة، والنمو.
والنار فيها: الطيش، والخِفة، والسرعة، والإحراق.

فهو من الأول كده وقلبه فيه حسد من آدم بسبب إن ربنا خلقه بيده وأعطاله اهتمام وفوق كل ده أمره هو و الملائكة بالسجود له ،
يعني هو كان متعمد أصلا إنه ميطعش أمر ربنا بالسجود لآدم،
يعني معندهوش أي شبهة أهه ولا عذر😑
وخصوصا إن ربنا أصلا وجه الأمر مبااااشرة لإبليس بالسجود،
"قال مَا مَنَعَكَ أَلَّا تَسْجُدَ إِذْ أَمَرْتُكَ"
فإبليس عصى أمر ربنا عامد متعمد،

وهنا يا جماعة يبان بقى صِدق العبودية لله👌
مش ربنا كرّم إبليس بسبب علمه وعبادته؟
فالصادق في العبادة لله هينفذ أوامر ربنا حتى لو كانت مخالفة لهواه وهيقدم أومر ربنا على رغباته💁‍♂️

¤=وقفة هنا بقى مع نفسنا، نبص في حياتنا كده،
هل بنعبد ربنا كما يُريد ونطيع أوامره ولا بنعبد ربنا في الحاجات إللي على مزاجنا وحسب ظروفنا بس؟!=¤

فربنا لما أمر إبليس بحاجة عكس هواه؛
هل ضحّى إبليس وداس على هواه عشان ربنا وتقبل أوامره
ولا رفض أوامر ربنا وقعد يجادل ويبرر معصيته الواضحة😑

☆أكيد كلنا قابلنا في الحياة نماذج من البشر كده،
تقولها الصح تقعد تبرر وتدور على أي حجة وتجادل بالباطل،
سواء في أمور الدين أو الدنيا،
عشان كده لازم لما نسمع الصح من ربنا ننفذ،
حتى لو مقدرناش ننفذ على طول يبقى منردش الحق لأي سبب،
لما نتقبل الصح طاعة لله، ربنا هيسهله علينا بعد كده👌

المهم،
بسب بقى معصية إبليس دي ربنا طرده من رحمته وتوعّده بدخول النار،
هنا إبليس طلب من ربنا إنه يمد له في عمره لحاااد يوم القيامة،
طيب الطلب العجيب ده ليه؟
هل هو ناوي إنه يقضي الحياة دي تائب لله وطائع لعل ربنا يتجاوز عنه ويغفرله 😔
لأ 😑
ده طلب من ربنا كده عشان يُهلك بني آدم!!
قال لربنا مش انت يارب أضلتني، طيب أنا بقى هضل ذرية آدم،
" قَالَ فَبِمَا أَغْوَيْتَنِي لَأَقْعُدَنَّ لَهُمْ صِرَاطَكَ الْمُسْتَقِيمَ"
وهزيّن لهم المعصية وأحبّبهم فيها ومش هسيبهم لحد ما أضلهم كلهم،
"إلا عبادك منهم المُخلَصين"
فربنا حققله أمنيته وإداله العمر الطويل ،
" قَالَ فَإِنَّكَ مِنَ الْمُنظَرِينَ"
وقاله اعمل إللي انت عايزه، أي حد هيتبعك هيدخل معاك جهنم،
" لَّمَن تَبِعَكَ مِنْهُمْ لَأَمْلَأَنَّ جَهَنَّمَ مِنكُمْ أَجْمَعِينَ"
وأي حد هيتوب ويستغفر ويرجع هقبله وهيكون جزاؤه الجنة،
وده كان بداية العداء بين إبليس وذريته وآدم وذريته،
احنا هنسيب إبليس دلوقتي ونرجع لآدم عليه السلام ونشوف حصل معاه إيه👌

بعد ما ربنا خلق آدم مسح الله على ظهر آدم ،فنزلت أرواح ذرية آدم كووولهم من بداية الخلق حتى قيام الساعة بين يديه سبحانه،
زي ما رسول الله ﷺ قال في الحديث:
"أَخَذَ اللهُ الْمِيثَاقَ م

#قصص_الأنبياء
#الحلقة_الثانية_عشرة
#إبراهيم_عليه_السلام_الجزء_الثاني
#إبراهيم_وإلقائه_في_النار

وقفنا المرة إللي فاتت عند إبراهيم عليه السلام لما كسّر الأصنام كلها ماعدا أكبر واحد فيهم،
وعلق الفأس عليه، وبعدين قومه لما رجعوا من العيد بتاعهم وراحوا يشوفوا الآلهة لقوهم متكسرين ، وسألوا مين إللي عمل فيهم كده،
"قَالُوا مَنْ فَعَلَ هَذَا بِآلِهَتِنَا إِنَّهُ لَمِنَ الظَّالِمِينَ"

فبعض الناس قالوا احنا سمعنا شاب اسمه إبراهيم بينتقص الآلهة بتاعتنا ويذكرها بالسوء، فقالوا هاتوه قصاد الناس كلهم عشان يشهدوا عليه،
"قَالُوا سَمِعْنَا فَتًى يَذْكُرُهُمْ يُقَالُ لَهُ إِبْرَاهِيمُ ۩ قَالُوا فَأْتُوا بِهِ عَلَى أَعْيُنِ النَّاسِ لَعَلَّهُمْ يَشْهَدُونَ"
وفعلا جابوا إبراهيم عليه السلام وسألوه قصاد الناس كلهم :
إنت إللي كسرت آلهتنا يا إبراهيم😡
"قَالُوا أأنْتَ فَعَلْتَ هَذَا بِآلِهَتِنَا يَاإِبْرَاهِيمُ"

☆إنتم متخيلين ناس كفار بيتأكدوا من المعلومة قبل ما ياخدوا أي قرار😅
ده احنا كمسلمين لما أي حد يقولنا حاجة ولّا خبر بينتشر على الفيسبوك ولّا كلام الناس تنقله عن شخص معين بنصدقه على طول 🤓
كم من علاقات اتقطعت بسبب كلمة اتقالت وصدقناها من غير ما نتأكد، مع إن ربنا حذرنا وقال لنا:
"يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ "
لما واحد ييجي يقولك ده فلان بيقول عليك كذا😮
ما تستعجلش وتتعصب وتقعد تشتم فيه تدعي عليه من غير لما تتأكد!!👌
تقول لي بس أنا واثق في صاحبي إللي بلغني الكلام ده😤
هقولك كلامي ده مش تخوين لصاحبك، بس ممكن صاحبك يكون فهم غلط أو طلّع الكلام من سياقه ونقله بفهمه الغلط بدون قصد خصوصا إن السّياق من المُقَيِّدات🙄
يعني قيد محطوط على الكلام المُطلَق، ما ينفعش نفكّه منه وإلا المعنى هيتغير
بمعنى هل ينفع أقول "ويل للمصلين" واسكت؟
لأ طبعا... لاااازم أكمل سياق الآية إللي هو:
"الذين هم عن صلاتهم ساهون"
فربنا قَيِّد لنا سياق الآية المُطلَقة "ويل للمصلين"
ب "الذين هم عن صلاتهم ساهون"
يعني مش كل المصلين دي فئة محددة👌

◇مثال في حياتنا اليومية للتوضيح أكتر 😅
ممكن واحد صاحبك يقول عنك:
《والله ده على نياته خالص》
وهو يقصد من جواه إنك غلبان وطيب وملكش في الخبث والمكر وسوء النية،
فيقوم إللي سمع الكلمة أول مرة يفهمها بمعنى تاني، وينقلك المعنى إللي هو فهمه ده ويييجي يقولك ده فلان بيقول عليك إنك أهبل وعبيط والناس بتضحك عليك بسهولة 🙄
وكمان يقول لك كده من غير ما يحكي لك الموقف –السياق يعني- إللي حصل،
فانت لو عرفت الكلام اتقال في أنهي موقف كنت هتفهم المعنى إللي صاحبك يقصده👌
فمتصدقش حد بينقلك أي كلام غير لما تجيب الطرف التاني وتسأله إنت قلت كذا؟ وكان قصدك إيه؟
هتلاقيه بيقولك محصلش😤
أو أيوة قلت وكان قصدي كذا مش كذا.

فعلى الرغم من إن قوم إبراهيم كانوا كفار لكن راحوا يتأكدوا من المعلومة وكمان هيعطوا فرصة لإبراهيم عليه السلام إنه يدافع عن نفسه👌
فقال لهم إبراهيم : بل فعله كبيرهم هذا 👈فاسألوهم إن كانوا لو ينطقون😏
"قَالَ بَلْ فَعَلَهُ كَبِيرُهُمْ هَذَا فَاسْأَلُوهُمْ إِنْ كَانُوا يَنْطِقُونَ"

آآاااه 😅
همّ دلوقتي اتزنقوا خلاص :
يا إما يعترفوا بالحق، وهو إن الجماد ده إللي همّ صنعوه ومش بيتحرك فميقدرش يعمل كده،
يا إما يقولوا معاك حق يا إبراهيم فعلا انت بريء والإله ده هو إللي كسر الأصنام التانية😤
هنا قوم إبراهيم عليه السلام راجعوا نفسهم كده شوية وقالوا لبعض احنا إللي غلط واحنا إللي ظَلَمَة😧
" فَرَجَعُوا إِلَى أَنْفُسِهِمْ فَقَالُوا إِنَّكُمْ أَنْتُمُ الظَّالِمُونَ"

لكن لحظة الصدق مع النفس إللي بتبقى أول بوابات الوصول للحق، ما استمريتش كتير للأسف ورجعوا عن كلامهم ده واستكبروا عن اتباع الحق وقالوا لإبراهيم:
ما انت عارف إنهم مش بيتكلموا😠!!
"ثُم نُكِسُوا عَلَى رُؤوسِهِمْ لَقَدْ عَلِمْتَ مَا هَؤُلَاءِ يَنْطِقُونَ"
فإبراهيم عليه السلام زنقهم أكتر وقال لهم:
يبقى ليه بتعبدوا ما لا ينفعكم ولا يضركم ولا حتى كانت قادرة تدافع عن نفسها ضد التحطيم !!😡
"قَالَ أَفَتَعْبُدُونَ مِنْ دُونِ اللَّهِ مَا لَا يَنْفَعُكُمْ شَيْئًا وَلَا يَضُرُّكُمْ ..أُفٍّ لَكُمْ وَلِمَا تَعْبُدُونَ مِنْ دُونِ اللَّهِ أَفَلَا تَعْقِلُونَ"

هنا قوم إبراهيم عليه السلام لما لقوا نفسهم ماعندهمش أي كلام يردوا بيه راحوا مستخدمين مبدأ القوة والبطش😑
قالوا إحنا هنحرقه وننصر آلهتنا 😤
"قَالُوا حَرِّقُوهُ وَانْصُرُوا آلِهَتَكُمْ إِنْ كُنْتُمْ فَاعِلِينَ"

☆وده مبدأ الشخص إللي مش بيبقى عارف يرد😏
لما تكون بتكلم حد وانت إللي معاك الحق،
وعمال تقول الدلائل بتاعتك والتاني مش عارف يرد،
تلاقيه فجأة راح مزعق...ممكن يشتم...يتهمك بحاجة مش فيك، عشان يتهرب من الحوار بأي طريقة ويقلب عليك الترابيزة زي ما بيقو