#قصص_الأنبياء(٢)
#السيرة_النبوية
#الحلقة_مائة_وخمسة_وعشرون
#علامات_الساعة_الكبرى_الجزء_السادس
#المسيح_الدجال_الجزء_الرابع
#النجاة_من_فتنة_الدجال

وقفنا المرة إللي فاتت عند تساؤل مهم، وهو إزاي الإنسان يقدر يحفظ نفسه من فتنة الدجال،
شوفوا،
من عدل ربنا ورحمته إنه مقدّرش علينا البلاء وسابنا من غير ما يقول لنا عن الطريقة إللي ننجي بيها نفسنا من البلاء أو الفتنة بصفة عامة أو من فتنة الدجال بصفة خاصة،
أقول لكم زي إيه 🤔
عارفين لما واحد يدخل مسابقة عشان يكسب جائزة كبيرة، أو يلعب لعبة مثلا مش بيكون فيها أدوات مساعدة؟
وكل ما المستوى يكون أصعب كل ما عوامل المساعدة تزيد وتبقى أقوى😁
ولله المثل الأعلى في السماوات والأرض أهه ربنا لما خلقنا في الدنيا وجعل لنا فيها الابتلاءات عشان يختبرنا أعطانا أدوات مساعدة نقدر نستعين بيها على تخطي الابتلاءات والفتن،
فاللي هيستعمل أدوات المساعدة دي هو إللي هينجو، أما بقى إللي هيعمل فيها بطل ويعتمد على نفسه بس، أكيد هيخسر👌
ففتنة الدجال من اختبارات وابتلاءات الدنيا، بل هي أصعب وأخطر الابتلاءات في الدنيا، زي كده لما الواحد يوصل للسؤال الأخير في المسابقة أو يوصل للمستوى الأخير في اللعبة بيكون أصعب سؤال وأصعب مرحلة إللي وراها الفوز على طول😅
وفتنة الدجال هي أخطر ابتلاءات الدنيا لأن إللي الإيمان بالدجَّال يقود إلى الكفر الصريح، والكفر الصريح يقود إلى الخلود الأبدي في جهنم ربنا يعافينا😓
عشان كده لازم نستعد كويس جدا قبل ما نواجه الفتنة العظيمة دي،
طيب، إيه بقى العوامل المساعدة إللي ربنا أعطاها لنا عشان نحمي نفسنا من الدجال😊

◇أولا: الاستعاذة من فتنة الدجال،
يعني من قبل حتى ظهور الدجال احنا بندعو ربنا وبنلجأ إليه إنه يحفظنا من فتنة الدجال، وبندعي ربنا في كل صلاة بعد التشهد الأخير وقبل التسليم من الصلاة زي ما رسول الله ﷺ علمنا قال:
" اللَّهُمَّ إِنِّي أَعُوذُ بِكَ مِنْ عَذَابِ جَهَنَّمَ ، وَأَعُوذُ بِكَ مِنْ عَذَابِ الْقَبْرِ، 《وَأَعُوذُ بِكَ مِنْ فِتْنَةِ الْمَسِيحِ الدَّجَّالِ》، وَأَعُوذُ بِكَ مِنْ فِتْنَةِ الْمَحْيَا وَالْمَمَاتِ."

◇ثانيا : الابتعاد عن الدجال
يعني إللي يسمع إن الدجال خرج يبعد عنه فورا وميقربش منه، لأن احنا بطبيعتنا البشرية عندنا فضول وبنحب نتفرج، حتى لو على كوارث والله وخصوصا احنا كنساء😅
فلما الناس تسمع بالدجال وإن معاه نهر من ماء ونهر من نار ومع كنوز الأرض ماشية وراه، فطبيعي إن الواحد هيبقى عايز يتفرج🤷‍♂️
فلأن ربنا يعلم طبيعتنا دي قال لنا عن طريق رسول الله ﷺ إن إللي يسمع بالدجال يبعد عنه، لأن ممكن لو شافه يُفتن بيه وهو مفكر نفسه مؤمن ومفيش حاجة هتأثر فيه،
قال رسول الله ﷺ:
" من سَمع بالدجال فليَنأَ عنه -فليبتعد عنه- فوالله إن الرجل ليأتيه وهو يحسب أنه مؤمن، فيتبعه مما يبعث فيه من الشبهات"

☆ومن هنا نقدر ناخد فائدة مهمة جدا👌
وهي إننا منعرضش نفسنا للابتلاءات والفتن ونبعد عنها تماما،
أقول لكم مثال من الواقع، لما واحدة تدخل مجموعة أو جروب عالفيس بوك مثلا وكل إللي فيها صور للنساء بيستعرضوا فيه لبسهم إللي على الموضة والشياكة والألوان و...و... وهي بتقول إنها بتتفرج بس، فضول يعني،
إيه بقى إللي يضمن لها إنها متجيش يوم من الأيام وتعمل زيهم😕
ماهو ده باب فتنة أهه وشبهة للقلوب😬
فاللي يسمع عن فتنة يبعد عنها مش يروح يتفرج، باب الفرجة ده ياما ضيّع ناس مكنوش يتخيلوا في يوم من الأيام إنهم هيضيعوا😞
وزي برده الشاب إللي يروح مع أصحابه يتفرج عليهم وهم بيشربوا، بيشربوا بقى أي حاجة محرمة، المهم إن الفضول وإنه عايز يتفرج دفعه إنه يبقى زيهم، وخدوا أمثلة من دي كتير،
فمحدش يستهون بموضوع الفضول والفرجة لأن ده باب خطير جدا في فتنة الإنسان من غير ما ياخد باله👌

☆سؤال بقى،
إزاي هنبعد عنه وهو هيروح كل بلد في موجودة الأرض🤨
في أماكن يقدر الناس يهربوا فيها بعيد عن الدجال،
والأماكن دي هي:
أولا: الجبال،
قال رسول الله ﷺ :
" لَيَفرَّنَّ الناس من الدّجال في الجبال"
يعني الناس هتهرب من الدجال ويتجهوا للجبال يعيشوا فيها طلباً للسلامة،
ثانيا مكة والمدينة:
الدجال هيدخل كل البلاد ما عدا مكة والمدينة زي ما رسول الله ﷺ قال:
"ليس من بلد إلا سيَطَؤُه الدجال، إلا مكة والمدينة"
ثالثا : المسجد الحرام والمسجد النبوي والمسجد الأقصى ومسجد الطور، ومسجد الطور ده زي ما قال العلماء هو على جبل الطور، المكان إللي كلم فيه موسى عليه السلام ربه الموجود في سيناء،
فالأربع مساجد دول الدجال مش هيقدر يقرب منهم ولا يدخلهم،
قال رسول الله ﷺ:
" لا يقرب أربعة مساجد مسجد الحرام ومسجد المدينة ومسجد الطور ومسجد الأقصى"

♤وهنا هيطلع لنا سؤال😁
رسول الله ﷺ شاف في رؤيا له إن عيسى عليه السلام كان بيطوف حول الكعبة وشاف وراه المسيح الدجال بيطوف هو كمان، ورؤيا الأنبياء حق ووحي، إزاي ده بقى والمسيح الدجال لا يدخل مكة ولا يقرب المسجد الحرام🤨

الجواب على قولي