የሱዳኑ ወታደራዊ መሪ ሥልጣን ለመልቀቅ ፈቃደኛ መሆናቸውን ገለጹ

ሰኔ 28/2014 (ዋልታ) የሱዳን ጦር ኃይል አገሪቱ ወደ ሲቪል አስተዳደር እንድትመለስ ለማድረግ ቦታውን እንደሚለቅ ወታደራዊው መሪ ጄኔራል አብዱል ፋታህ አል-ቡርሃን ተናገሩ።

የአገሪቱ ጦር ኃይል ሱዳን ወደ ዴሞክራሲ ለምታደርገው ሽግግር እንቅፋት እንደማይሆንና ምርጫ እንዲደረግ ወስኖ እየሠራ እንደሆነ ገልጸዋል።

ጄኔራል አል-ቡርሃን ጨምረውም በአገሪቱ ያለውን ፖለቲካዊ ቀውስ ለማብቃት ከሲቪል ቡድኖች ጋር በሚደረገው ድርድር ላይ ጦር ሠራዊቱ የሚያደርገውን ተሳትፎ እንደሚያቋርጥ አሳውቀዋል።

ነገር ግን አገሪቱ ውስጥ ምርጫ ስለሚደረግበት እንዲሁም ጦር ኃይሉ ሥልጣን ስለሚያስረክብበት ሂደት የጊዜ ሰሌዳ ምንም አለማለታቸውን ቢቢሲ ዘግቧል፡፡

በሱዳን ውስጥ ዴሞክራሲያዊ ሥርዓት እንዲመሰረት የሚጠይቁት ተቃዋሚ ሰልፈኞች ሠራዊቱ ከፖለቲካው እንዲወጣ በመጠየቅ ለወራት የዘለቀ ተቃውሞ ሲያደርጉ መቆየታቸው ይታወሳል።

አዲሱን የነዳጅ ድጎማ ተግባራዊ ለማድረግ መንግሥት እየሰራ መሆኑ ተገለጸ

ሰኔ 28/2014 (ዋልታ) አዲሱ የታለመለት የነዳጅ ድጎማ ተግባራዊ ለማድረግ መንግሥት እየሰራ መሆኑን የንግድና ቀጣናዊ ትስስር ሚኒስቴር ገለጸ፡፡

የታለመለት የነዳጅ ድጎማ ተግባራዊነት በሚመለከት የንግድና ቀጣናዊ ትስስር ሚኒስቴር፣ የትራንስፖርትና ሎጅስቲክስ ሚኒስቴር እና የነዳጅና ኢነርጂ ባለስልጣን በዛሬው ዕለት በጋራ መግለጫ ሰጥተዋል።

የንግድና ቀጣናዊ ትስስር ሚኒስትር ገ/መስቀል ጫላ የነዳጅ ድጎማ ለመተግበር በተዘረጋው ሥርዓት መሰረት በየሦስት ወሩ መንግሥት ለነዳጅ የሚያደርገውን ድጎማ 25 በመቶ እያነሳ እንደሚሄድ ገልጸዋል።

ድጎማ የሚደረግላቸው የሕዝብ ትራንስፖርት ሰጪ ተሽከርካሪዎች ድጎማ ደግሞ በቀጣይ አምስት ዓመታት ውስጥ እንደሚነሳ ገልጸዋል።

በዚህም መንግሥት በየስድስት ወሩ ተፈፃሚ በሚያደርገው ሥርዓት መሰረት 10 በመቶ ድጎማን እያነሳ የሚሄድ ሲሆን በቀጣይ 5 ዓመታት ውስጥ በድጎማ የሚደገፋ የሕዝብ ትራንስፖርት ሰጪ ተሽከርካሪዎች ከድጎማ የሚወጡ ይሆናል ተብሏል።

በሰለሞን በየነ

ለፈጣን መረጃዎች፦
ፌስቡክ https://bit.ly/3Ma7QTW

ከባንክ እንደተደወለ በማስመሰል የማጭበርበር ሙከራዎች እየተደረገ በመሆኑ ኅብረተሰቡ እንዲጠነቀቅ ማሳሰቢያ ተሰጠ

ሰኔ 28/2014 (ዋልታ) አጭበርባሪዎች ከባንክ እንደደወሉ በማስመሰል ገንዘብ ለማጭበርበር ሙከራዎችን እያደረጉ በመሆኑ ኅብረተሰቡ አስፈላጊውን ጥንቃቄ እንዲያደርግ የፋይናንስ ደኅንነት አገልግሎት ጥሪ አቀረበ።

አገልግሎቱ አጭበርባሪዎች የግለሰቦች ስልክ ላይ በመደወል እና ከባንክ እንደደወሉ በማስመሰል ሽልማት ደርሷችኋል፣ የሞባይል ባንኪንግ አገልግሎታችሁን አስተካክሉ እና ሌሎች መሰል መልእክቶችን በማስተላለፍ ገንዘብ ለማጭበርበር ሙከራዎችን እያደረጉ እንደሆነ ጥቆማዎች ደርሰውኛል ብሏል።

ግለሰቦች እንደዚህ ዓይነት መልእክቶች በሚደርሳቸው ወቅት አቅራቢያቸው በሚገኝ የባንክ ቅርንጫፍ በመሄድ ከማረጋገጣቸው በፊት ምንም ዓይነት እርምጃ ከመውሰድ በመጠንቀቅ ራሳቸውን ከአጭበርባሪዎች እንዲጠብቁ አሳስቧል፡፡

ለፈጣን መረጃዎች፦
ፌስቡክ https://bit.ly/3Ma7QTW

በኢትዮጵያ የአሜሪካ ኤምባሲ አገልግሎቶች የሀገራቱን ሕዝቦች ወዳጅነት ማዕከል ማድረግ እንዳለባቸው ተጠቆመ

ሰኔ 28/2014 (ዋልታ) በኢትዮጵያ የአሜሪካ ኤምባሲ የሚሰጡ የቆንስላ አገልግሎቶች የሁለቱን ሀገራት ሕዝቦች ወዳጅነት ማዕከል ማድረግ እንዳለባቸው የውጭ ጉዳይ ሚኒስትር ዴኤታ አምባሳደር ብርቱካን አያኖ ገለጹ፡፡

ሚኒስትር ዴኤታዋ በኢትዮጵያ የአሜሪካ ኤምባሲ ጉዳይ ፈጻሚ አምባሳደር ትሬሲ አን ጃኮብሰን ጋር ተወያይተዋል፡፡

በውይይታቸውም የውጭ ጉዳይ ሚኒስቴር እና የአሜሪካ ኤምባሲ ለዜጎች የሚሰጡትን አገልግሎት ቀልጣፋ ለማድረግ ስለሚችሉበት ሁኔታ ዝርዝር ነጥቦች ተነሥተዋል።

ሚኒስትር ዴኤታ አምባሳደር ብርቱካን በሚኒስቴሩ የሚሰጡ የተለያዩ የአገልግሎት ዓይነቶች ጊዜ እና ሁኔታን ከግምት በማስገባት ለዲፕሎማቲክ ማኅበረሰብ እና ለሰብዓዊ ዕርዳታ አቅራቢ ድርጅቶች እየቀረቡ መሆኑን አስረድተዋል።

በኢምግሬሽን እና ዜግነት አገልግሎት ለደንበኞች የሚቀርቡ የቪዛ አሰጣጥ ሂደቶችን ቀልጣፋ እና ዘመናዊ ለማድረግ እየተሠራ መሆኑን ገልጸው በሽግግር ሂደት እያጋጠሙ ያሉ ጉድለቶችም በቅርቡ ይወገዳሉ ብለዋል።

በተመሳሳይ በኢትዮጵያ የአሜሪካ ኤምባሲ የሚሰጡ የቆንስላ አገልግሎቶች የሁለቱን ሕዝቦች ወዳጅነት ማዕከል ማድረግ እንዳለባቸው ጠይቀዋል።

ሌሎች የሁለትዮሽ እና ወቅታዊ ጉዳዮችን በሚመለከትም ሐሳብ በመለዋወጥ በቀጣይም ተባብሮ መሥራት ለመንግሥታቱ እና ለሁለቱ አገራት ሕዝቦች ያለው ፋይዳ ትልቅ መሆኑን መናገራቸውን ከውጭ ጉዳይ ሚኒስቴር ቃል አቀባይ ጽሕፈት ቤት ያገኘነው መረጃ አመላክቷል።

ለፈጣን መረጃዎች፦
ፌስቡክ https://bit.ly/3Ma7QTW

ዋልታ ምሽት በቀጥታ ሰኔ 28/2014
https://fb.watch/e46sS-YmXG/

ሚኒስቴሩ የነዳጅ ምርቶች የችርቻሮ ዋጋ ላይ ጭማሪ አደረገ

ሰኔ 28/2014 (ዋልታ) ከነገ ሰኔ 29 ቀን 2014 ዓ.ም እስከ ሐምሌ 30 ቀን 2014 ዓ.ም የነዳጅ ምርቶች የመሸጫ ዋጋ ጭማሪ መደረጉን የንግድና ቀጣናዊ ትስስር ሚኒስቴር አስታወቀ፡፡

የሚኒስትሮች ምክር ቤት ታኅሣሥ 20 ቀን 2014 ዓ.ም ባደረገው 3ኛ መደበኛ ስብሰባ ባስተላለፈው የነዳጅ ውጤቶች የዋጋ ግንባታና የትርፍ ህዳግ አሰራር እና የመሸጫ ዋጋ ማስተካከያና የታለመ ድጎማ አፈጻጸም ውሳኔ ለማስጀመር የቅድመ ዝግጅት ሥራ ሲከናወን መቆየቱ ይታወቃል፡፡

በዚህም መሰረት፡-
ቤንዚን - 47 ነጥብ 83 በሊትር
ነጭ ናፍጣ - 49 ነጥብ 02 በሊትር
ኬሮሲን - 49 ነጥብ 02 በሊትር

ቀላል ጥቁር ናፍጣ - 53 ነጥብ 10 በሊትር
ከባድ ጥቁር ናፍጣ - 52 ነጥብ 37 በሊትር
የአውሮፕላን ነዳጅ - 98 ነጥብ 83 በሊትር መሆኑን የሚኒስቴሩ መረጃ አስታውቋል፡፡

ለፈጣን መረጃዎች፦
ፌስቡክ https://bit.ly/3Ma7QTW