#ቴክኖ_ቅምሻ

አውቶኖመስ ቨሂክልስ (ነጂ አልባ ተሽከርካሪዎች)

በየኔወርቅ መኮንን

በ2023 በሰፊው ገበያ ላይ ከዋሉ ቴክኖሎጂዎች መካከል አንዱ አውቶኖመስ ቨሂክልስ (ነጂ አልባ ተሽከርካሪዎች) በመባል የሚታወቁ ሲሆን ያለ ሰው (ሹፌር) መሄድ የሚችሉ ተሽከርካሪዎች ናቸው፡፡ ብዙ ኩባንያዎች እና ድርጅቶች እነዚህን ተሽከርካሪዎች ወደ ገበያ ለማምጣት እየሰሩ ነው።

ተሽከርካሪዎቹ ራዳርን፣ ጂፒኤስን፣ ካሜራዎችን እና ሊዳርን ጨምሮ የርቀት ዳሳሽ ቴክኖሎጂን በመጠቀም አካባቢያቸውን በ3D ካርታ መከታተል ይችላሉ።

እንዲሁም ክትትሉ የመንገድ መሠረተ ልማትን፣ ሌሎች ተሽከርካሪዎችን፣ እግረኞችን፣ የትራፊክ መብራቶችን እና የመንገድ ምልክቶችን ያጠቃልላል።

እነዚህ ተሽከርካሪዎች የመንገድ ደህንነት መጨመር፣ የአሽከርካሪዎች የስራ ጫና መቀነስ፣ የነዳጅ ፍጆታ መቀነስ፣ የትራፊክ መጨናነቅ መቀነስ እና መሰል ጥቅሞች አላቸው ተብሏል፡፡

ይሁን እንጂ በሰፊው ጥቅም ላይ ከመዋላቸው በፊት ሊታዩ የሚገባቸው ተግዳሮቶች መካከል ቴክኖሎጂ፣ ቁጥጥር፣ የማኅበረሰብ ጉዳዮች እና መሰል ችግሮችን መፍታት እንደሚያስፈልግ ይገለጻል፡፡

እነዚህ ተግዳሮቶች ቢኖሩም ራሳቸውን ችለው የሚንቀሳቀሱ ተሽከርካሪዎች በሚቀጥሉት አሥርት ዓመታት የትራንስፖርት ዘርፉን የመለወጥ አቅም እንዳላቸው ባለሞያዎች ተናግረዋል።

በጊዜ ሂደት በማስተዋወቅ ተሽከርካሪዎቹ በመንገዶች ላይ በስፋት ከመገኘታቸው በፊት በተወሰኑ አካባቢዎች ብቻ እንዲንቀሳቀሱ ማድረግ ያስፈልጋልም ይላሉ፡፡

ሰው ሰራሽ የነርቭ ሕዋሶች---

#ቴክኖ_ቅምሻ

በየኔወርቅ መኮንን

ሳይንቲስቶች የሰው ነርቮች ላይ በሲሊኮን ቺፕስ በማያያዝ በነርቭ ስርዓታችን ውስጥ ያሉትን የነርቭ ሴሎች በመምሰል እና የኤሌክትሪክ ባህሪያቸውን ለመቅዳት መንገድ አግኝተዋል።
ከነርቭ ሲስተም ለሚመጡ የኤሌክትሪክ ምልክቶች ምላሽ የሚሰጡ አርቲፊሻል ነርቮች እንደ እውነተኛ ነርቭ ሴሎች ዲዛይን ማድረግ ለብዙ አሥርተ ዓመታት በሕክምና ውስጥ ትልቅ ግብ ሆኖ ቆይቷል።

ሰው ሰራሽ የነርቭ ሴሎች ጤናማ ተግባራቸውን በመድገም እና የሰውነት ሥራን ወደነበረበት ለመመለስ ባዮሎጂያዊ ግብረመልሶችን በበቂ ሁኔታ ምላሽ በመስጠት የታመሙ ባዮ-ሰርኩይቶችን መጠገን ይችላሉ።https://www.facebook.com/wmccwaltamediaandcommunicationcorporate/posts/758852242947774?ref=embed_post

አዕምሮ አንባቢ ሮቦት

#ቴክኖ_ቅምሻ

በየኔወርቅ መኮንን

በዓለማችን ላይ እያደጉ ከመጡ ቴክኖሎጂዎች መካከል አንዱ የሮቦቲክስ ዘርፍ ነው፡፡ በዚህም ሮቦቶች የተለያዩ አገልግሎቶችን ሲሰጡና የሰዎችን ድካም ሲያቀሉ መመልከት አዲስ ነገር አይደለም፡፡

በፈረንጆቹ 2023 ከተሰሩ ቴክኖሎጂዎች መካከል አንዱ አዕምሮ አንባቢ ሮቦት ቴክኖሎጂ ሲሆን በእጅጉ ተሻሽሎም መጥቷል፡፡

አዕምሮ አንባቢ ሮቦቶች ለአንድ ድርጊት ከተለያዩ የሰውነት እንቅስቃሴዎች ጋር የሚዛመዱ የተለያዩ የአንጎል ምልክቶችን ለመለየት የኤሌክትሮ ኢንሴፋሎ ግራም (EEG) ምልክቶችን ይጠቀማሉ።

ኤሌክትሮ ኢንሴፋሎ ግራም በአንጎል ሞገዶች ወይም በአንጎል የኤሌክትሪክ እንቅስቃሴ ውስጥ ያሉ ያልተለመዱ ነገሮችን የሚያውቅበት መንገድ ነው፡፡

ይህ አንጎልን የማንበብ ሮቦቲክ ቴክኖሎጂ ሰውን ያማከለ እና ለቤት ስራ፣ ለንግድ ስራዎች እና ለሌሎች የደህንነት አላማዎች የሚውል በመሆኑ ጠቃሚ የሮቦቲክስ ዘርፍ ነው።

ሮቦቱ ሊታሰብ በማይችል መልኩ የራስ ቅል ሲግናልን በመቆጣጠር የአንጎልን የኤሌክትሪክ እንቅስቃሴ ያነባል።

ድሮኖች እና ሮቦቲክስ በግብርናው ዘርፍ

#ቴክኖ_ቅምሻ
በየኔወርቅ መኮንን

የግብርና ሥራ አድካሚ መሆኑ አያጠራጥርም። በተለይም በየጊዜው እየጨመረ ባለው የዓለም የምግብ ፍላጎት አሳሳቢ ሆኗል፡፡ ለዚህም ይረዳ ዘንድ ወደ ቴክኖሎጂ ማማተር ግዴታ ከሆነ ሰነባብቷል፡፡

የግብርና ቴክኖሎጂዎችን መጠቀም ዘርፉን የበለጠ ትርፋማ፣ ቀልጣፋ፣ ደህንነቱ የተጠበቀ እና ለአካባቢው ተስማሚ እንዲሆን አድርጎታል፡፡

ድሮኖች እና ሮቦቲክስ መጠቀም አርሶ አደሮች ከፍተኛ ምርት እንዲያገኙ ከማድረግ በላይ ሀብታቸውን መቆጠብ እና የሰው ጉልበትንም መቀነስ አስችለዋል፡፡

ለእርሻ ሥራ ብዙውን ጊዜ ሰው፣ እንስሳት እና በእርሻ ላይ ጉዳት ሊያደርስ የሚችል ከፍተኛ መጠን ያለው ኬሚካሎች እንጠቀማለን። ከዚህ አንጻር የግብርና ሮቦቲክሶችን መጠቀም በእርሻ ላይ የሚደርሰውን አሉታዊ ተፅእኖ ይቀንሳል፡፡

“አይገን” የተሰኘው የግብርና ቴክኖሎጂ ኩባንያ አረምን እና ተባዮችን የሚያስወግዱ ሮቦቶች ሰርቷል፤ ሮቦቶች ማንኛውንም ፀረ ተባይ ኬሚካሎችን ሳይጠቀሙ አረሞችን እና ተባዮችን በጥሩ ሁኔታ ማስወገድ ይችላሉ።

እነዚህ ቴክኖሎጂዎች የተክሎችን እድገት ለመከታተል፣ የእፅዋትን በሽታ ለመለየት እና የመስክ ሙቀትን ለመቆጣጠር የተነደፉ ናቸው።

ድሮኖች ማዳበሪያዎችን ወይም ኬሚካሎችን ለአስፈላጊ የሰብል ሕክምናዎች በቀላሉ መርጨት ይችላሉ፡፡

በቺሊ በሰው ሰራሽ አስተውሎት (AI) የሚንቀሳቀሱ ድሮኖች እንደ ኮክ፣ ፒር፣ ፕለም እና ሌሎች የመሳሰሉ ፍራፍሬዎችን ለመሰብሰብም ያገለግላሉ።

የናሳው X-59 ጄት
#ቴክኖ_ቅምሻ
በየኔወርቅ መኮንን

በዓለም ላይ የመጀመሪያው የአውሮፕላን በረራ በ1903 የተደረገ ሲሆን አብራሪዎችም ዊልበር ራይት እና ኦርቪል ራይት ነበሩ፡፡

የሰው ልጅ ፍላጎት እየጨመረ መምጣቱ ቴክኖሎጂው ከቀን ወደ ቀን እያደገ እንዲመጣ አድርጎታል፡፡ ለዚህ አንዱ ማሳያ የናሳው X-59 ሱፐርሶኒክ ቴክኖሎጂ (Quesst) ጄት ነው፡፡

የናሳው X-59 ሱፐርሶኒክ ቴክኖሎጂ (Quesst) ጄት በዚህ ዓመት መጨረሻ በአርምስትሮንግ የበረራ ጥናትና ምርምር ማዕከል ለመጀመሪያ ጊዜ የሙከራ በረራውን ወደ ሰማይ ሊያደርግ ነው።

ጄቱ በአሁኑ ጊዜ በፓልምዴል ካሊፎርኒያ በሚገኘው የሎክሄድ ማርቲን ስኩንክ ሥራ ተቋም ውስጥ በሀንጋሪ እየተገጣጠመ ይገኛል።

ጄቱ ቀይ፣ ነጭ እና ሰማያዊ ቀለም ያሉት ሲሆን የቀለማት ንድፍ የጄቱን ገጽታ ብቻ ሳይሆን ከእርጥበት እና ከዝገት መከላከልን ይጨምራል፡፡ ዲዛይኑ ለመሬት እና ለበረራ ስራዎች ወሳኝ የሆኑ የደህንነት ምልክቶችንም አካቷል፡፡

በሎክሂድ ማርቲን የተገነባው X-59 ጄት የድምፅ ማገጃው ጫጫታን ለመስበር ታስቦ የተሰራለት መሆኑም ተጠቁሟል፡፡ ዋናው አላማም የድምፅ ማገጃውን በሚሰብርበት ጊዜ ጮክ ያለ ድምፅ በሚሰማበት ሰዓት በመሬት ላይ ያሉ ሰዎችን በድምፅ እንዳይረብሽ ለመከላከል ነው።

ክንፉ እና ጅራቱ በልዩ ሁኔታ የተሠሩ ሲሆን ጄቱ በሚበርበት ጊዜ የአየርን ፍሰት ለመቆጣጠር የተነደፈ መሆኑም ተጠቁሟል፡፡

የህዋ ኤጄንሲው ህዝቡ ለጄቱ የሚሰጠውን ምላሽ ለመለካት የመጀመርያ የሙከራ በረራውን በ2024 ህዝብ በሰፈረባቸው አካባቢዎች ያደርጋል ተብሏል፡፡ መረጃውን ያገኘነው ከናሳ ድረገጽ ላይ ነው።

ኢ-አፍንጫ - (ኤሌክትሮኒክ አፍንጫዎች)
#ቴክኖ_ቅምሻ

በየኔወርቅ መኮንን

የሰው ሰራሽ አስተውሎት (አርተፊሻል ኢንተለጀንስ) ቴክኖሎጂ ውጤቶች እየመጠቁ እና እየተበራከቱ መሆናቸው ይታወቃል፡፡

የሰው ልጆችን ሥራ አጥ ሊያደርጉ ይችላሉ የሚሉ ስጋቶችን እስከሚፈጥሩ ድረስ ያልገቡበት ዘርፍ ጥቂት ነው።

በቅርቡ ደግሞ ኤሌክትሮኒክ አፍንጫዎች (e-nose sensors) ማበልጸጋቸው ተሰምቷል፡፡

በሃርቫርድ ጆን ኤ ፖልሰን የምህንድስና እና አፕላይድ ሳይንስ ትምህርት ቤት (SEAS) የሚመራ የምርምር ቡድን በፍጥነት እና በትክክል ማሽተት የሚችል ኢ-አፍንጫን አስተዋውቋል።

ኢ-አፍንጫ በአርተፊሻል ኢንተለጀንስ (AI) የነቃ ተንቀሳቃሽ፣ ዳሳሽ አደገኛ ቆሻሻን ለመቆጣጠር፣ የአየር ጥራት ለመከታተል፣ የተበላሹ ምግቦችን ለመለየት እና በሽታዎችን ለመመርመር አገልግሎት ላይ ይውሏል ተብሏል።

የሰው ልጅ አፍንጫ ያማረ፣ ስሜታዊ እና ራስን መጠገን የሚችል ሲሆን የኢ-አፍንጫ ዳሳሾች ግን አይደክሙም ወይም በጉንፋን አይያዙም በተጨማሪም ኢ-አፍንጫ መርዛማ እና ሌሎችን ነገሮችን በመለየት በሰዎች ላይ ሊደርሱ የሚችሉ አደገኛ ነገሮችን ለማስወገድ እንደሚውሉ ተጠቁሟል፡፡

የኤሌክትሮኒካዊ አፍንጫ ስርዓት በተለምዶ ባለብዙ የመረጃ ማቀናበሪያ አሃድ እንደ አርቴፊሻል ነርቭ ኔትወርክ፣ ዲጂታል ስርዓት የሚለይ ስልተ ቀመሮችን እና የማጣቀሻ ላይብራሪ ዳታቤዝ ያሉ ሶፍትዌሮችን ያካትታል ተብሏል።

ምንጭ - ሀርቫርድ የኒቨርስቲ

ለተራራቁ ሰዎች የመነካካት ስሜት እንዲሰማቸው የሚያደርግ “ኢ-ቆዳ” ቴክኖሎጂ

#ቴክኖ_ቅምሻ

የሰው ልጅ ቆዳ ለስላሳ እና የሚለጠጥ ሲሆን በሚሊዮን የሚቆጠሩ ሙቀትና ንክኪ የሚሰማቸው የነርቭ ጫፎች አሉት፤ ይህም ውጫዊውን ዓለም ለመለየት እና ምላሽ ለመስጠት ያስችለዋል፡፡

በዓለማችን ላይ ቴክኖሎጂዎች እየተራቀቁና የሰዎችን ችግር እያቀለሉ መጥተዋል፡፡ ለዚህም አንዱ ማሳያ የሆነው ኢ-ቆዳ የረዥም ርቀት ጓደኞቻችንንና ቤተሰቦቻችንን እንድናቅፍ ይረዳል ተብሏል፡፡

የረዥም ርቀት ጓደኞቻችንንና ቤተሰቦቻችንን እንድናቅፍ ይረዳል የተባለው ይህ ኢ-ቆዳ ባለ ብዙ ሽፋን፣ ለስላሳ እና ከተቀናጀ ነርቭ መሰል ኤሌክትሮኒክስ ጋር ልክ እንደ እውነተኛ ቆዳ ግፊትን፣ ሙቀትን፣ ጫናን እና ሌሎችንም ተግባራት ያከናውናል ተብሏል፡፡

ዘመናዊ ቴክኖሎጂ በዓለም ውስጥ በየትኛውም ቦታ ማለት ይቻላል በቃላት እና በዕይታ እንድንግባባ ቢፈቅድልንም በአሁኑ ጊዜ በረዥም ርቀት የመነካካት ስሜትን የምንጋራበት አስተማማኝ ዘዴ ግን የለም።

በካሊፎርንያ ስታንፎርድ ዩኒቨርሲቲ የኬሚካል ኢንጅነር ዢህና ቦአ የተሰራው ገመድ አልባ ለስላሳ ኢ-ቆዳ በኢንተርኔት መተቃቀፍን እውን ሊያደርግ ነው ብለዋል።

ኢ-ቆዳው በተለዋዋጭ ማንቀሳቀሻዎች ተሞልቷል። ይህም የግለሰቡን እንቅስቃሴ በመገንዘቡ ወደ ኤሌክትሪክ ምልክቶች ይለውጧቸዋል እነዚህ ምልክቶች በብሉቱዝ ወደ ሌላ ኢ-ቆዳ ሲስተም ይላካል እዚያም አንቀሳቃሾቹ የመጀመሪያ እንቅስቃሴዎችን ወደ ሚመስሉ ሜካኒካዊ ንዝረቶች ይቀይሯቸዋል።
👇👇
https://www.facebook.com/wmccwaltamediaandcommunicationcorporate/posts/pfbid0xpvrGTYDXRKp9msHt65TbZYHs4QjLJxhqYZZ9ixrR69WvptwDEEPn7XA6haHBKYjl

ራሱን የሚጠግን ሕያው ኮንክሪት
#ቴክኖ_ቅምሻ

የኢንዱስትሪውን ዘርፍ የሚያሳድጉና የሚያግዙ አዳዲስ ቴክኖሎጂዎች እየመጡ ነው፡፡ በዓለማችን ላይ ታዋቂው የሮማዊያን ፓንታዮን ግንባታ ከ2000 ዓመት በፊት ከተገነባበት ጊዜ ጀምሮ እስካሁን ኮንክሪትን ለግንባታ ሂደት እየተጠቀምነው እንገኛለን፡፡

ኮንክሪቱ ምንም ያህል በጥንቃቄ ቢሰራም በአንዳንድ ሁኔታዎች ሊሰነጣጠቅ ብሎም እነዚህ ስንጥቆች ወደ ፍርስራሽ ሊቀየሩ ይችላሉ፤ ይህን ችግር ለመቅረፍ ሳይንቲስቶች ሕያው ኮንክሪትን መፍጠር ችለዋል፡፡

ሳይንቲስቶቹ ይህን ቴክኖሎጂ ለመፍጠር አሸዋ፣ ጄል እና ባሲለስ ሱቲሊስ ባክቴሪያን በመጠቀም ሕያው ኮንክሪት መፍጠር ችለናል ብለዋል።

የግንባታ ቁሳቁስም መዋቅራዊ ሸክም የመሸከም ተግባር አለው ያሉት ሳይንቲስቶቹ ኮንክሪቱ ለአካባቢ ጥበቃ ተስማሚ እንደሆነም ተናግረዋል፡፡

የተፈጥሮ አደጋዎች እና ከባድ የአየር ሁኔታዎች ለምሳሌ እንደ የመሬት መንቀጥቀጥ ወይም ከፍተኛ ንፋስ ያሉ አደጋዎች በሚከሰቱበት ሰዓት መቋቋም ይችላል በተጨማሪም ውሃ አይገባውም ምክንያቱም ስንጥቅ ልክ እንደተከሰተ ራሳቸውን ስለሚጠግኑ ተመራጭ ያደርጋቸዋልም ነው የተባለው።

ኮንክሪቱ በስራ ላይ በሚውሉበት ጊዜ ጉዳት የደረሰበትን ጥቃቅን ስንጥቆችን በኬሚካላዊ እና ሜካኒካል ባህሪያቸውን ሳያበላሹ ራሳቸውን ወደነበሩበት በመመለስ ህይወቱን እንደሚያራዝመው መግለፃቸውን የቢቢሲ መረጃ አመላክቷል፡፡

የኮሎራዶ ቡልደር ዩኒቨርሲቲ ቡድን እንዳሉት ሥራቸው ወደፊት በሚሰሩ ህንጻዎች ሂደት ስራ የሚያቀል እና በህንጻ፣ በወለል ላይ ስንጥቆች በሚፈጠሩበት ጊዜ አደገኛ መርዞችን ከአየር ላይ ወይም ከብርሃን በመሳብ ወደ ነበሩበት ለመመለስ የሚያስችል አቅም አላቸው፡፡

በየኔወርቅ መኮንን

የጥጥ ባትሪዎች

#ቴክኖ_ቅምሻ

ጥጥ አብዛኛውን ጊዜ የምንጠቀመው ለአልባሳት መስሪያ ነው፤ አሁን ላይ ግን ባትሪዎችን ለመስራት አገልግሎት ላይ እየዋለ ይገኛል፡፡

ለባትሪ መስሪያ የሚያስፈልጉ ሊቲየም እና ሌሎች ማዕድናትን ማውጣት እያደረሰ ያለው ዘርፈ ብዙ ጉዳት እየጨመረ ነው።

የጥጥ ተክል በባትሪ ቴክኖሎጂ መስክ አስደናቂ ሆኖ ብቅ ብሏል። አንዳንድ ተመራማሪዎች እንደሚሉት ከሆነ ጥጥ በካቶድ እና በአኖድ መካከል ያለውን የአዮን ፍሰት የሚያመቻች ኤሌክትሮላይት በመተካት አሁን ካሉት የበለጠ የተረጋጋ እና ጠንካራ ባትሪዎችን መፍጠር ያስችላል።

ፒጄፒ አይን የተሰኘው የጃፓን ኩባንያ ከተቃጠለ ጥጥ የተገኘ ካርቦን በመጠቀም ባትሪ ሠርቷል። ይህ አካሄድ ዘላቂነት ያለው ብቻ ሳይሆን የባትሪዎችን ቅልጥፍና እና የአካባቢ ተፅእኖንም ይለውጣል ተብሏል።

ሂደቱ የሚጀምረው ጥጥን በከፍተኛ ሙቀት በማቃጠል ወደ ካርቦን በመቀየር የባትሪውን አኖድ ይጠቀማል፤ ይህ ዘዴ ከባህላዊ ግራፋይት አኖዶች ጉልህ የሆነ የመነሻ መንገድ መሆኑ የበለጠ ዘላቂ የባትሪ ምርት ሂደትን ያመለክታል ተብሏል።

ከግራፋይት ወደ ጥጥ-ተኮር ባትሪዎች የሚደረገው ሽግግር የቴክኖሎጂ ፈተናዎችን ብቻ ሳይሆን ኢኮኖሚያዊ ጉዳዮችንም ያካትታል፡፡ ነገር ግን በዘላቂነቱ ዙሪያ ያለው ዓለም አቀፋዊ ንቃተ ህሊና ሲያድግ እና ለአካባቢ ተስማሚ ምርቶች ፍላጐት መጨመረ ተፈላጊነቱን ይጨምረዋል፡፡

ጥጥ ከጨርቃጨርቅ ፋብሪካ ወደ የባትሪ ቴክኖሎጂ አቅም ሃይል መጓዙ የሰው ልጅ ብልሃት ብቻ ሳይሆን ለወደፊትም በሃይል ማከማቻ እና ፍጆታ ዘላቂነት ያለው ተስፋ ማሳያ መሆኑን ተመራማሪዎች ይገልጻሉ፡፡

በየኔወርቅ መኮንን

አረም አራሚው ሮቦት

#ቴክኖ_ቅምሻ

በግብርና ኢንዱስትሪ ውስጥ የሮቦቶች ሚና ሰብሎችን ከመቆጣጠር፣ በአፈር ውስጥ የአሲድነት መጠን ከመለካት እስከ ቀላል ፍራፍሬ እና አትክልቶችን የመልቀም፣ የማሸግ እና ዘሮችን የመትከል የመሳሰሉ ውስብስብ ተግባራትን ከማከናወን ጀምሮ ሰፊ መተግበሪዎች አሏቸው።

ከነዚህ ተግባራት ውጭም ሮቦቶች አረምን ማረም ጀምረዋል። በዚህም የሰውን ልጅ ልፋትና ድካም በማቅለል ላይ መሆናቸው ተሰምቷል፡፡

እነዚህ ሮቦቶች ከእርሻ ላይ አረሞችን ያስወግዳሉ። አረሞችን ለመለየት እና ከአፈር ውስጥ ለማስወገድ ትክክለኛ መሳሪያዎችን ለመጠቀም የምስል ማወቂያ ቴክኖሎጂን ይጠቀማሉ። በተለይ ለአረም ማረም የተነደፉ ብዙ ዓላማ ያላቸው ሮቦቶች አሉ። እነዚህ ሮቦቶች ከአረሙ በላይ እየሳቡ አረሞችን ይፈልጋሉ። አረሙን ሲያገኙ በመጎተት እንደሚያስወግዳቸውም የፎርብስ መጽሔት መረጃ ያመላክታል፡፡

ተንቀሳቃሽ እና አርቲካልቲድ ሮቦቶች በማጣመር ራሳቸውን ችለው በየሜዳው ማሰስ እና የሰው ጉልበት ሳያስፈልጋቸው አረሙን መለየት እና ማስወገድም ይችላሉ። በተጨማሪ ገበሬዎች እነዚህን ሮቦቶች እንደ የአፈር ትንተናና ተከላ ላሉ ተግባራት ሊጠቀሙባቸው ይችላሉ።

ይህ ቴክኖሎጂ እየገፋ ሲሄድ መረጃውም በግብርናው ኢንዱስትሪ ውስጥ የሞባይል ሮቦቶች የበለጠ በአዳዲስ መተግበሪያዎች መምጣት ይጀምራሉ። ለምሳሌ አረም መቼ እና የት እንደሚከሰት ለመረዳት ትልቅ የመረጃ ትንታኔን መጠቀም እና በዚህ መሰረት እርምጃ ለመውሰድ ይህ ጥምረት በመጨረሻ ከምርታማነት መጨመር በተጨማሪ ቀልጣፋ እና ዘላቂ የግብርና ልምዶችን ያመጣል።

በየኔወርቅ መኮንን

ሶራ - ጽሑፍን ወደ ተንቀሳቃሽ ምስል የሚቀይር ሰው ሰራሽ አስተውሎት

#ቴክኖ_ቅምሻ

ኦፕን ኤ.አይ (OpenAI Sora) “ሶራ” የተሰኘ ጽሑፍን ወደ ተንቀሳቃሽ ምስል የሚቀይር የሰው ሰራሽ አስተውሎት (አርቲፊሻል ኢንተለጀንስ) መተግበሪያ ይፋ አድርጓል፡፡

መተግበሪያው ከተገልጋዮች በጽሑፍ የሚቀርብለት ጥያቄ ላይ በመመስረት ተንቀሳቃሽ ምስሎችን በላቀ ጥራትና ፍጥነት ለመስራት ያስችላል፡፡

በጽሑፍ ከሚቀርብለት ጥያቄ በተጨማሪ የትዕዛዙን አውድ በመረዳትና በመተርጎም ተንቀሳቃሽ ምስልን ይፈጥራል፡፡

ከማይንቀሳቀሱ ምስሎች ላይም ተንቀሳቃሽ ምስልን መፍጠር የሚችለው ይህ መተግበሪያ የነባር ተንቀሳቃሽ ምስሎችን ወደ ፊት እና ወደ ኃላ ርዝማኔ መጨመር ቢያስፈልግ ለመጨመር የሚያስችል አማራጮችን ይዟል።

ከፍተኛ ቋንቋን የመረዳት ክህሎት እንዲኖረው ተደርጎ የተሰራው መተግበሪያ የሚፈጥራቸው ተንቀሳቃሽ ምስሎች ከእውነተኛው ዓለም ጋር እጅግ ተቀራራቢ ስለመሆናቸው ተገልጿል፡፡

በሙከራ ደረጃ ላይ የሚገኘው “ሶራ” ሙሉ በሙሉ ወደ ስራ ሲገባ በተለይም በመዝናኛው ዘርፍ ትልቅ እመርታ ያመጣል ተብሎ እንደሚጠበቅ የኦፕን ኤ.አይ ድረ-ገጽ መረጃ ያመላክታል፡፡

በየኔወርቅ መኮንን

አሌፍ-በራሪው የኤሌክትሪክ መኪና

#ቴክኖ_ቅምሻ

በዓለም የመጀመሪያው በኤሌክትሪክ የሚሰራ በራሪ የህዝብ ትራንስፖርት መኪና የተሳካ የሙከራ በረራ አድርጓል።

በአንድ ጊዜ ሙሉ ቻርጅ እስከ 250 ኪሎ ሜትር እንደሚጓዝና በሰዓት 200 ኪሎ ሜትር ድረስ መብረር እንደሚችል ነው የተጠቆመው። አሌፍ የተሰኘው አዲሱ በራሪ የኤሌክትሪክ መኪና በአንድ ጊዜም 5 ሰዎችን ማሳፈር ይችላል ተብሏል።

ይህ የህዝብ ትራንስፖርት መኪና በዓየር ላይ ለመብረር እና በመንገድ ላይ ለመጓዝ የሚያስችል የተሳካ ሙከራ ማድረጉም ታውቋል፡፡

የመጀመሪያው የተባለለት በራሪው ተሽከርካሪ የኤሌክትሪክ መኪና በአውራ ጎዳናዎችም ላይ እንደ መደበኛ መኪና መነዳት የሚችል ተሽከርካሪም ነው፡፡

ተሽከርካሪው በመንገድ ላይም ሆነ በአየር ላይ የመስራት፣ እንደ መደበኛ መኪና የመምሰል እና በተለመደው የመኪና ማቆሚያ ቦታ ላይ ለማቆም መቻሉ የተለየ ያደርገዋል።

ሰዎችን ሰዓታቸውን በመቆጠብ፣ በአካባቢ ላይ ብክለት ሳያስከትል እና ፈጣን መጓጓዣ ሆኖ የሚያገለግል በመሆኑ የመጭው ዘመን ተመራጭ ያደርገዋልም ተብሏል፡፡

ኩባንያው እ.ኤ.አ. በ2025 መጨረሻ ተሽከርካሪውን ሙሉ በሙሉ በማጠናቀቅ ወደ ምርት እንደሚገባና 300 ሺህ ዶላር ዋጋ እንደተቆረጠለት ከሲኤንኤን የተገኘው መረጃ አመላክቷል፡፡

በየኔወርቅ መኮንን

ደርምኔት

#ቴክኖ_ቅምሻ

ደርምኔት የቆዳ መቆጣትን ለሚያስከትሉ ሁኔታዎች አጠቃላይ መጠሪያ ቃል ነው። ደርምኔት በኢትዮጵያ አርቲፊሻል ኢንተለጀንስ ኢንስቲትዩት የበለፀገ የሰው ሰራሽ አስተውሎት ቴክኖሎጂ ውጤት ሲሆን ሲስተሙ የሕፃናት ቆዳ በሽታ ልየታን ይሰራል፡፡

ከነዚህም ውስጥ በሕክምናው አጠራር አቶፒክ ደርማታይተስ፣ ፖፑላር አርትካሪያ እና ስኬቢስ የተሰኙ የሕፃናት ቆዳ በሽታዎችን በመለየት ምርመራ እና ሕክምና መስጠት የሚያስችል ስርዓት ነው፡፡

ደርምኔት በሕፃናት ቆዳ ስፔሻሊስት ሐኪሞች እና በአርቲፊሻል ኢንተለጀንስ ተመራማሪዎች ጥምረት የበለፀገ ስርዓት ነው፡፡ ታካሚዎች የቦታ፣ የጊዜ እና የሁኔታ መለዋወጥ ሳይገድባቸው በበየነ መረብ ትስስር አገልግሎቱን ያገኛሉ፡፡

አበልጽጎ ወደ ስራ ለማስገባት የሁለት ዓመት ጊዜን የፈጀው ይህ ስርዓት ሀገራችን ያሏትን ጥቂት የቆዳ ስፔሻሊስት ሐኪሞች እውቀትና ክህሎት ለማሽን በማስተማር ሕክምናውን ማዘመን መቻሉን የኢትዮጵያ አርቴፊሻል ኢንተለጀንስ ኢንስቲትዩት መረጃ ያሳያል፡፡

235 ሰዎችን የሚይዘው አሳንሰር (ሊፍት)
#ቴክኖ_ቅምሻ

በፊንላንድ ሊፍት ኩባንያ ኮን በ2022 በህንድ ሙምባይ በሚገኘው ጂዮ ወርልድ ሴንተር ህንፃ ውስጥ በዓለማችን የመጀመሪያ የሆነውን 235 ሰዎችን የሚይዘው አሳንሰር (ሊፍት) ገጥሞታል።

ይህ ትልቁ የመንገደኞች ሊፍት የስቲዲዮ አፓርታማ ያክላል የተባለ ሲሆን 16 ቶን የሚመዝንና በ9 የብረት ኬብሎች የተደገፈ ነው፡፡ አሳንሰሩ ሰዎችን ከማጓጓዝ በተጨማሪ ለሰርግና ለአርት ኤግዚብሽን ማሳያ እንዲሆን ተደርጎ የተሰራ ሲሆን 25.78 ስኩየር ሜትር ስፋት ያለውና ለተመልካች ውብ የሆነ እይታና የአትክልት ቦታ ያካተተ ነው።

አሳንሰሩ 18 ትላልቅ ፑሊዎች፣ 9 የብረት ኬብሎች እና በብረት ዓምዶች ላይ የተስተካከሉ ሀዲዶችን ባቀፈ አዲስ የፑሊ ጨረር ሲስተም ላይ የተሰራ ነው ተብሏል።

የዓለማችን ትልቁ የመንገደኞች አሳንሰር (ሊፍት) ልዩ ባለ አራት ፓነል የመስታወት በር፣ የመስታወት ግድግዳዎች ፓኖራሚክ እይታዎችን እና ክሪስታል-የተጣበበ ጣሪያን ያሳያል። በአምስት ፎቆች መካከል ብቻ የሚጓዝ ቢሆንም በሴኮንድ 1 ሜትር ፍጥነት በመጓዝ ሪከርድ ሰባሪው ሊፍትም ሆኗል።

ሊፍቱ ውስጥ ተጓዦች ሲደክማቸው አረፍ የሚሉበት 2 ምቹ ሶፋዎችም አሉት፡፡

የኮን ማኔጂንግ ዳይሬክተር ኢሚት ጎሳይን የዓለማችንን ትልቁን የህዝብ ማመላለሻ አሳንሰር (ሊፍት) ለደንበኞቻችን ችግር ፈች የሆነ ፕሮጀክት በመስራታችን ኩራት ይሰማናል ብለዋል፡፡
👇
https://shorturl.at/rT679

ፖይትሪ ካሜራ (Poetry Camera)
#ቴክኖ_ቅምሻ

ፎቶግራፍን ወደ ግጥም የመቀየር አቅም ያለው በሰው ሰራሽ አስተውሎት የታገዘ ካሜራ

ኬሊን ካሮሊን እና ሪያን ማተር በተባሉ ወጣቶች የተሰራዉ ካሜራ ለጥበብ አፍቃሪያን አዲስ አማራጭ ይዞ ብቅ ብሏል፡፡

ፖይትሪ ካሜራ (Poetry Camera) የሚል ስያሜ የተሰጠው ይህ ፈጠራ ምስሎችን በማንሳት ወደ ግጥም ስንኞች ለመቀየር የሚያስችል ሲሆን ከተለመደው ካሜራ ጋር በቅርጽ የሚመሳሰል ግን ተግባሩ የተለያየ ነዉ፡፡

ካሜራው ፎቶዎች በተለምዶ ከሚያሳዩት የምስል ትዕይንት ባሻገር በምስሉ ውስጥ ያሉትን ትዕይንቶች ለመተንተን የሚውሉ የግጥም መግለጫዎችን ለመስራት ያገለግላል፡፡

የሰው ሰራሽ አስተውሎት (AI) ቴክኖሎጂ ግኝት የሆነዉ ይህ ካሜራ የኦፕን ኤ.አይ (AI) ፈጠራ የሆነውን ቻትጂፒቲ ፕላስን የሚያንቀሳቅሰውን GPT-4ን ተመሳሳይ የሰው ሰራሽ አስተውሎት (AI) ሞዴል ይጠቀማል፡፡

ይህም የቀረጻቸውን ትዕይንቶች የግጥም ትርጓሜዎችን እንዲሰራ እንደሚያደርገው ዘ ታይም ኦፍ ኢንዲያ ዘግቧል፡፡

ቴክኖሎጂው የፎቶዎቹን ቀለሞች፣ ባሕርያት እና ይዘቶችን ይመረምራል፡፡ በመቀጠልም ከፎቶው የሰበሰባቸውን ዳታዎች ተጠቅሞ የግጥም ስንኞችን ይሰጣል፡፡

በየኔወርቅ መኮንን

ጤናን የሚከታተል ዲጂታል ስካነር
#ቴክኖ_ቅምሻ

ኪው ባዮ (Q Bio) የተሰኘ የአሜሪካ ኩባንያ በአንድ ሰዓት ውስጥ በመቶዎች የሚቆጠሩ ባዮማርከርን የሚለካ ስካነር ሰርቷል፡፡

ዲጂታል ስካነሩ ከሆርሞን መጠን ጀምሮ በጉበት ውስጥ የሚከማች ስብ፣ እብጠት እና ማንኛውንም የካንሰር አይነት ማየት የሚያስችል ነው ተብሏል፡፡

ስካነሩ ሰዎች የህመም ስሜት ሲሰማቸው እና የጉዳት ምልክቶች ሲታይባቸው መላ ሰውነታቸውን እንዲቃኙ ማድረግ ያስቻለ ሲሆን ይህም የዶክተሮችን ሸክም እንደሚያቃልል የኪው ባዮ አዘጋጆች ይናገራሉ፡፡

መረጃውን በጊዜ ሂደት መከታተል እና በእያንዳንዱ አዲስ ቅኝት ሊዘምን የሚችል የታካሚ አካል ዲጂታል መንትያ በመባል የሚታወቀውን 3 ዲ (3D) ዲጂታል አምሳያን ለመስራት መታሰቡንም የሄልዝ ቴክ መጋዚን መረጃ ያመላክታል፡፡

የኪው ባዮ (Q Bio) ዋና ሥራ አስፈፃሚ ጄፍ ካዲትስ ዲጂታል ስካነሩ ብዙ መጠን ያለው መረጃ መሰብሰብ እንደሚችል ገልጸው ዶክተሮች የትኞቹ ታካሚዎች በአስቸኳይ መታየት እንዳለባቸው እንዲለዩና ቅድሚያ እንዲሰጡ ለማወቅ ያስችላቸዋል ብለዋል፡፡

በየኔወርቅ መኮንን